Yoꞌoꞌ kaꞌán ndaꞌvi David nuu̱ꞌ Ndiosí te̱ sa̱kakú ña̱ꞌaꞌ a̱
Ya̱a̱ ña̱ ni̱ xi̱ta̱ David nuu̱ꞌ Ndiosí xaꞌa̱ꞌ a̱ ña̱ ni̱ kaꞌa̱n Cus, siꞌe̱ Benjamín.
7
Yahvé,
Ndiosí mi̱iꞌ i̱,
yoꞌó i̱ni̱ i̱ xini i̱,
sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱ nda̱ꞌaꞌ sa̱kuuꞌ te̱ ndasiꞌ taꞌanꞌ xiinꞌ i̱,
ko̱to̱ u̱nꞌ yuꞌu̱ te̱ tä̱xi̱ u̱nꞌ ka̱ꞌni̱ꞌ ra̱ yuꞌu̱.
2 Sa̱kanꞌ ña̱ nduuꞌ ra̱ nde̱e̱ naa lion,
te̱ kuni na̱ti̱i̱n ra̱ yuꞌu̱,
te̱ sa̱kuatyiꞌ xiꞌe̱ ndo̱o̱ ra̱ yuꞌu̱,
te̱ köo̱ꞌ nde̱e̱ i̱i̱n ne̱ sa̱kakú yuꞌu̱ nda̱ꞌaꞌ ra̱.
3 Yahvé,
Ndiosí ña̱ xakaꞌnuꞌ i̱,
naaꞌ ni̱ xa̱a̱ i̱ i̱i̱n ña̱ ni̱a̱ꞌa,
uun naaꞌ ni̱ xi̱ni̱ xaꞌanꞌ i̱ i̱i̱n ne̱ yivi̱ꞌ,
4 uun naaꞌ ni̱ xa̱a̱ i̱ ña̱ vä̱ꞌa̱ xiinꞌ te̱ yoo ña̱ mani̱ꞌ xiinꞌ i̱,
uun naaꞌ ni̱ sa̱ndoó ndiká i̱ te̱ ndasiꞌ yuꞌu̱,
5 naaꞌ ni̱ xa̱a̱ i̱ sa̱kuuꞌ ña̱ vä̱ꞌa̱ ja̱a̱nꞌ ndii,
na ku̱ndiku̱n te̱ ndasiꞌ taꞌanꞌ xiinꞌ i̱ ja̱a̱nꞌ yuꞌu̱,
na na̱ti̱i̱n ra̱ yuꞌu̱,
te̱ ka̱ñu̱u̱ nde̱i̱ ra̱ yuꞌu̱ ñu̱ꞌuꞌ,
te̱ na sa̱kaꞌanꞌ ra̱ yuꞌu̱ nuu̱ꞌ kuaꞌa̱ꞌ ne̱ yivi̱ꞌ.
Selah
6 Tákuiꞌe Yahvé,
ni̱a̱ꞌa̱ kiꞌi̱ꞌ te̱ sa̱kakú u̱nꞌ yuꞌu̱,
te̱ niaꞌa̱ u̱nꞌ ña̱ xiꞌé u̱nꞌ,
ku̱ntaꞌanꞌ kiꞌi̱ꞌ xiinꞌ te̱ xiꞌé xini yuꞌu̱,
ni̱a̱ꞌa̱ kiꞌi̱ꞌ te̱ kaꞌnu̱ nda̱ku u̱nꞌ ku̱a̱tyi̱ xaꞌa̱ꞌ i̱.
7 Na̱ka̱ya̱ kiꞌi̱ꞌ sa̱kuuꞌ ne̱ yivi̱ꞌ i̱i̱n yivi̱ꞌ nuu̱ꞌ u̱nꞌ,
te̱ ka̱ꞌndi̱a̱ tyuunꞌ u̱nꞌ nuu̱ꞌ ni̱a̱ nde̱e̱ ndi̱e̱nu̱ miiꞌ nduꞌu̱ꞌ u̱nꞌ nuu̱ꞌ tei̱ kaꞌnuꞌ.
8 Yahvé,
yoꞌó sanaꞌmá ne̱ yivi̱ꞌ i̱i̱n yivi̱ꞌ,
sa̱naꞌmá u̱nꞌ yuꞌu̱ xiinꞌ ña̱ xatyuunꞌ nda̱ku sa̱a̱ niiꞌ xatyuunꞌ nda̱ku i̱
xiinꞌ sa̱a̱ niiꞌ i̱i̱n nda̱a̱ꞌ nimá i̱ te̱ xikaꞌ i̱.
9 Sa̱a̱ u̱nꞌ ña̱ va̱ꞌa̱ te̱ sa̱ndiꞌiꞌ u̱nꞌ ña̱ ni̱a̱ꞌa ña̱ xaaꞌ ne̱ ni̱a̱ꞌa,
ndisu̱ na̱ka̱ta̱ kutu̱ꞌ u̱nꞌ ne̱ xatyuunꞌ nda̱ku,
sa̱kanꞌ ña̱ yoꞌó ndii,
Ndiosí ña̱ xatyuunꞌ nda̱ku nduuꞌ u̱nꞌ,
te̱ xiní u̱nꞌ sa̱kuuꞌ ña̱ ñuꞌuꞌ nimá ne̱ yivi̱ꞌ xiinꞌ ña̱ xanini ni̱a̱.
10 Ndiosí nduuꞌ nde̱e̱ naa ka̱a̱ tiꞌeꞌ ña̱ tiasi yuꞌu̱ nuu̱ꞌ ña̱ i̱yo̱,
te̱ ña̱ ja̱a̱nꞌ nduuꞌ tu̱ ña̱ sakakú ne̱ i̱i̱n nda̱a̱ꞌ nimá.
11 Ndiosí nduuꞌ kuesí ña̱ xaꞌnú nda̱ku ku̱a̱tyi̱ ne̱ yivi̱ꞌ,
te̱ sa̱kuuꞌ kivi̱ꞌ xiꞌé a̱ xini a̱ ne̱ xaaꞌ ña̱ ni̱a̱ꞌa.
12 Naaꞌ nä̱ma̱ ne̱ yivi̱ꞌ nimá ni̱a̱ ndii,
xa̱ ni̱ nda̱ki̱n Ndiosí ityi̱ a̱,
te̱ xa̱ ni̱ sa̱kooꞌ tu̱ꞌva̱ a̱ tunꞌ to̱so̱,
te̱ xa̱ ni̱ tyi̱ta̱ꞌnu̱ a̱ yo̱ꞌoꞌ nuu̱ꞌ nu̱ꞌ.
13 Te̱ sa̱kanꞌ tu̱ xa̱ ni̱ sa̱kooꞌ tu̱ꞌva̱ a̱ kuxi̱,
tunꞌ xaꞌni̱ꞌ a̱ xiinꞌ,
xiinꞌ kuxi̱,
tunꞌ ndatin nuu̱ꞌ te̱ ki̱niꞌ a̱ xiinꞌ nu̱ꞌ.
14 Ne̱ xaaꞌ ña̱ ni̱a̱ꞌa ndii,
nde̱e̱ naa ni̱ na̱kuꞌu̱n siꞌe̱ ni̱a̱ xiinꞌ ña̱ ni̱a̱ꞌa ja̱a̱nꞌ,
te̱ nde̱e̱ naa ñuꞌuꞌ siꞌe̱ ni̱a̱ xaaꞌ ña̱ ki̱ni̱,
te̱ sa̱kakuꞌ ni̱a̱ tu̱n vixi̱.
15 Xatiaꞌ ni̱a̱ i̱i̱n poso̱ kunu va̱,
ndisu̱ mi̱iꞌ ni̱a̱ koyó ti̱xi̱n poso̱ ja̱a̱nꞌ.
16 Te̱ sa̱kuuꞌ ña̱ ni̱a̱ꞌa ña̱ xaaꞌ ni̱a̱ ndii,
siki̱ꞌ mi̱iꞌ ni̱a̱ koyo̱ a̱,
te̱ ña̱ ndisoꞌ ikaꞌ ni̱a̱ ndii,
nuu̱ꞌ mi̱iꞌ ni̱a̱ na̱ko̱to̱ꞌni̱ a̱.
17 Ta̱xi̱ i̱ ña̱ tyi̱nda̱ni Yahvé xaꞌa̱ꞌ a̱ ña̱ xatyuunꞌ nda̱ku a̱,
te̱ ka̱ta̱ i̱ ya̱a̱ nuu̱ꞌ Tákuiꞌe,
ña̱ nduꞌu̱ꞌ ndi̱e̱nu̱.