Yoꞌoꞌ kaꞌán David xiinꞌ Ndiosí te̱ ku̱vi̱ta i̱ni̱ a̱ xaꞌa̱ꞌ ra̱ kii̱ꞌ kuni ku̱vi̱ va̱ ra̱
Ya̱a̱ ña̱ ni̱ xi̱ta̱ David xaꞌa̱ꞌ Seminit, na ka̱ta̱ e̱ꞌ e̱ xiinꞌ ñuu̱ꞌ ña̱ yoo tu̱tyi̱ nuu̱ꞌ.
6
Yahvé,
tee̱ꞌ ndee xiꞌé u̱nꞌ xini u̱nꞌ yuꞌu̱ xaꞌa̱ꞌ ku̱a̱tyi̱ i̱ ndii,
sa̱a̱ u̱nꞌ ña̱ va̱ꞌa̱ te̱ kü̱tunꞌ u̱nꞌ yuꞌu̱,
ni̱ nde̱e̱ sä̱ndoꞌoꞌ tu̱ u̱nꞌ yuꞌu̱ xaꞌa̱ꞌ a̱ ña̱ nasaáꞌ va̱ u̱nꞌ xini u̱nꞌ yuꞌu̱.
2 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱,
sa̱kanꞌ ña̱ kuni ku̱vi̱ i̱.
Sa̱ndaꞌa u̱nꞌ yuꞌu̱,
Tákuiꞌe Yahvé,
sa̱kanꞌ ña̱ kisiꞌ vi̱ꞌ a̱ ka̱niiꞌ ñu̱ꞌuꞌ ndeꞌi̱ i̱ ña̱ köo̱ꞌ ka̱ ndi̱e̱e̱ꞌ i̱.
3 Ndiꞌni̱ yaꞌa̱ tu̱ nimá i̱,
te̱ yoꞌó,
Tákuiꞌe Yahvé,
¿a̱ma̱ vi̱ꞌ ki̱xi̱n u̱nꞌ te̱ tyi̱ndi̱e̱eꞌ u̱nꞌ yuꞌu̱?
4 Ni̱a̱ꞌa̱ kiꞌi̱ꞌ,
Tákuiꞌe Yahvé,
te̱ sa̱ndoó ndiká u̱nꞌ nimá i̱,
sa̱kakú kiꞌi̱ꞌ yuꞌu̱ xaꞌa̱ꞌ a̱ ña̱ ndani̱ u̱nꞌ yuꞌu̱.
5 Sa̱kanꞌ ña̱ nde̱e̱ i̱i̱n ne̱ xa̱ ni̱ xiꞌi̱ ndii,
kü̱vi̱ ka̱ na̱ka̱ꞌanꞌ ni̱a̱ xaꞌa̱ꞌ u̱nꞌ,
ni̱ nde̱e̱ köo̱ꞌ tu̱ ku̱vi̱ sa̱kaꞌnuꞌ yoꞌó ti̱xi̱n yavi̱ ndi̱i̱.
6 Xa̱ ni̱ xa̱vi xa̱va̱ꞌa̱ i̱ xakuꞌ i̱,
sa̱a̱ ñu̱u xakuꞌ uꞌvi̱ va̱ i̱,
te̱ tyiiꞌ ndooꞌ toto̱ kiꞌiꞌ xíniꞌ i̱ xaaꞌ ti̱kui nuu̱ꞌ i̱ ña̱ xakuꞌ i̱.
7 Xa̱ ni̱ xa̱vi va̱ ndu̱tyiꞌ nuu̱ꞌ i̱ ña̱ ndoꞌoꞌ i̱.
Te̱ ndasi taꞌanꞌ xiinꞌ i̱ xaaꞌ sa̱kanꞌ,
te̱ tüviꞌ va̱ꞌa̱ ka̱ nuu̱ꞌ i̱.
8 Kuaꞌan ndi̱a̱ꞌa̱ sa̱kuuꞌ ndoꞌó,
ne̱ xaaꞌ ña̱ ni̱a̱ꞌa nuu̱ꞌ i̱,
sa̱kanꞌ ña̱ xa̱ ni̱ xi̱ni̱ so̱ꞌo̱ Yahvé tatyi̱ꞌ i̱ ña̱ xakuꞌ i̱ nuu̱ꞌ a̱.
9 Xa̱ ni̱ xi̱ni̱ so̱ꞌo̱ Yahvé ña̱ kaꞌán ndaꞌvi i̱ nuu̱ꞌ a̱,
te̱ xa̱ ni̱ na̱ti̱i̱n a̱ ña̱ kaꞌán i̱ xiinꞌ a̱.
10 Sa̱kuuꞌ te̱ ndasiꞌ taꞌanꞌ xiinꞌ i̱ ndii,
ku̱ka̱ꞌa̱n xa̱va̱ꞌa̱ nuu̱ꞌ ra̱,
te̱ nde̱e̱ xïní ka̱ ra̱ nde̱e̱ ña̱ sa̱a̱ ra̱,
te̱ ku̱nu̱ sa̱kuuꞌ ra̱ kutyani xa̱va̱ꞌa̱ nuu̱ꞌ ra̱.