Yoꞌoꞌ xikán David nuu̱ꞌ Ndiosí te̱ ko̱to̱ ña̱ꞌaꞌ a̱
Ña̱ yo̱ꞌo̱ꞌ nduuꞌ ya̱a̱ ña̱ ni̱ xi̱ta̱ David xaꞌa̱ꞌ Nehilot, ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
5
Tákuiꞌe,
Yahvé,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán i̱ xiinꞌ u̱nꞌ,
te̱ sa̱a̱ u̱nꞌ kuenta xaꞌa̱ꞌ ña̱ tanaꞌ i̱ nuu̱ꞌ u̱nꞌ.
2 Tákuiꞌe,
yoꞌó ña̱ nduuꞌ rey mi̱iꞌ i̱ xiinꞌ ña̱ nduuꞌ Ndiosí,
ña̱ kiꞌinꞌ kaꞌnuꞌ i̱,
sa̱a̱ u̱nꞌ ña̱ va̱ꞌa̱ te̱ tyu̱nxaꞌaꞌ u̱nꞌ ña̱ tiakú kaꞌán ndaꞌvi i̱ nuu̱ꞌ u̱nꞌ,
sa̱kanꞌ ña̱ xiinꞌ yoꞌó kaꞌán ndaꞌvi i̱.
3 Tákuiꞌe,
Yahvé,
sa̱a̱ ni̱a̱ꞌa̱ ku̱ni̱ so̱ꞌo̱ u̱nꞌ tatyi̱ꞌ i̱ ña̱ kaꞌán i̱ xiinꞌ u̱nꞌ,
te̱ sa̱a̱ ni̱a̱ꞌa̱ kii̱ꞌ ki̱xi̱n i̱ nuu̱ꞌ u̱nꞌ te̱ kaꞌa̱n i̱ xiinꞌ u̱nꞌ ndii,
ku̱ndi̱a̱tu̱ i̱ nde̱e̱ sa̱xinú u̱nꞌ ña̱ xikán i̱ nuu̱ꞌ u̱nꞌ.
4 Sa̱kanꞌ ña̱ yoꞌó ndii,
süu̱ꞌ Ndiosí ña̱ xtani̱ ña̱ ni̱a̱ꞌa nduuꞌ u̱nꞌ,
te̱ nde̱e̱ i̱i̱n ne̱ xaaꞌ ña̱ ni̱a̱ꞌa kü̱vi̱ ku̱nduꞌu̱ꞌ nuu̱ꞌ u̱nꞌ.
5 Xaꞌa̱ꞌ a̱ ja̱a̱nꞌ na nde̱e̱ i̱i̱n te̱ küuꞌ kaxiꞌ kü̱vi̱ ku̱ya̱ti̱n nuu̱ꞌ u̱nꞌ,
ku̱a̱tyi̱ ndii,
ndasiꞌ u̱nꞌ sa̱kuuꞌ ne̱ xaaꞌ ña̱ ki̱ni̱.
6 Tákuiꞌe Yahvé,
yoꞌó ndii,
sa̱ndo̱ñuꞌuꞌ u̱nꞌ sa̱kuuꞌ ne̱ kaꞌán tu̱n vixi̱,
sa̱kanꞌ ña̱ ndasiꞌ u̱nꞌ te̱ xaꞌni̱ꞌ ne̱ yivi̱ꞌ xiinꞌ ne̱ kaꞌán tu̱n vixi̱.
7 Ndisu̱ yuꞌu̱,
xaꞌa̱ꞌ a̱ ña̱ kuvita va̱ nimá u̱nꞌ xaꞌa̱ꞌ i̱ ndii,
ku̱vi̱ ndiꞌvi̱ i̱ ti̱xi̱n yu̱kunꞌ su̱ꞌu̱n kaꞌnuꞌ u̱nꞌ,
te̱ sa̱kaꞌnuꞌ i̱ yoꞌó xiinꞌ kuaꞌa̱ꞌ va̱ ña̱ kiꞌinꞌ kaꞌnuꞌ.
8 Yahvé,
sa̱a̱ u̱nꞌ ña̱ va̱ꞌa̱ tyi̱ndi̱e̱eꞌ u̱nꞌ yuꞌu̱,
te̱ sa̱tyuunꞌ nda̱ku i̱,
te̱ tä̱xi̱ u̱nꞌ na ka̱nandoo te̱ ndasiꞌ taꞌanꞌ xiinꞌ yuꞌu̱,
te̱ sa̱a̱ i̱ ña̱ ni̱a̱ꞌa.
Tyi̱ndi̱e̱eꞌ u̱nꞌ yuꞌu̱ te̱ ka̱ka̱ nda̱ku i̱ i̱tyiꞌ u̱nꞌ.
9 Sa̱kanꞌ ña̱ te̱ ja̱a̱nꞌ ndii,
köo̱ꞌ kivi̱ꞌ ndatuꞌunꞌ nda̱ku ra̱,
te̱ ña̱ ndi̱e̱eꞌ ka̱ kaꞌán nimá te̱ ja̱a̱nꞌ xaꞌa̱ꞌ ndii,
ña̱ sa̱ndo̱ñuꞌuꞌ ra̱ i̱nga̱ ne̱ yivi̱ꞌ ku̱i̱ti̱ꞌ nduuꞌ a̱.
Te̱ kuaꞌa̱ꞌ xa̱va̱ꞌa̱ ña̱ ni̱a̱ꞌa kieeꞌ yu̱ꞌuꞌ ra̱,
te̱ nduuꞌ a̱ nde̱e̱ naa yavi̱ ndi̱i̱.
Te̱ yaa̱ꞌ ra̱ ndii,
xa̱ mi̱iꞌ ndiꞌiꞌ tu̱ꞌu̱n vixi̱ ku̱i̱ti̱ꞌ kaꞌán a̱.
10 Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ ka̱ni̱ ña̱ꞌaꞌ u̱nꞌ,
te̱ na koyo̱ mi̱iꞌ ra̱ nuu̱ꞌ ña̱ tyituní sikiꞌ ra̱,
sa̱a̱ u̱nꞌ ña̱ va̱ꞌa̱ te̱ ta̱xiꞌ ña̱ꞌaꞌ u̱nꞌ nuu̱ꞌ u̱nꞌ xaꞌa̱ꞌ a̱ ña̱ kuaꞌa̱ꞌ va̱ ku̱a̱tyi̱ ndisoꞌ ra̱,
Sa̱kanꞌ ña̱ ni̱ xa̱teiꞌ ra̱ nuu̱ꞌ u̱nꞌ.
11 Ndisu̱ na va̱ꞌa̱ ku̱ni̱ sa̱kuuꞌ ne̱ i̱ni̱ xini yoꞌó,
te̱ na ka̱ta̱ tiꞌeꞌ sii̱ꞌ ni̱a̱ nuu̱ꞌ u̱nꞌ sa̱a̱ kivi̱ꞌ,
sa̱kanꞌ ña̱ yoꞌó nakaꞌán xaꞌa̱ꞌ ni̱a̱.
Te̱ na ku̱ndi̱e̱e̱ sii̱ꞌ sa̱kuuꞌ ne̱ ndani̱ yoꞌó.
12 Te̱ yoꞌó,
Tákuiꞌe Yahvé ndii,
sa̱ñuꞌuꞌ u̱nꞌ ne̱ xatyuunꞌ nda̱ku,
te̱ xitoꞌ ña̱ꞌaꞌ u̱nꞌ nduuꞌ u̱nꞌ nde̱e̱ na ka̱a̱ tiꞌeꞌ ña̱ tiasi ña̱ꞌaꞌ nuu̱ꞌ ña̱ i̱yo̱.