Yoꞌoꞌ ku̱a̱xi̱ ña̱ ni̱ kaꞌa̱n David xiinꞌ Ndiosí xa̱kuaa̱ꞌ ña̱ i̱ni̱ ra̱ xini ña̱ꞌaꞌ ra̱
Ya̱a̱ ña̱ ni̱ xi̱ta̱ David, ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
4
Ndiosí mi̱iꞌ i̱,
ña̱ nakaꞌán nda̱ku xaꞌa̱ꞌ i̱,
sa̱a̱ u̱nꞌ ña̱ va̱ꞌa̱ te̱ na̱ku̱i̱i̱n u̱nꞌ kii̱ꞌ kaꞌán i̱ xiinꞌ u̱nꞌ.
Te̱ kii̱ꞌ ndoꞌoꞌ nimá i̱ ndii,
sa̱kiꞌví u̱nꞌ nimá i̱,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ i̱,
te̱ ku̱ni̱ so̱ꞌo̱ u̱nꞌ ña̱ kaꞌán ndaꞌvi i̱ xaꞌa̱ꞌ i̱ nuu̱ꞌ u̱nꞌ.
2 Ndoꞌó,
te̱ yivi̱ꞌ i̱i̱n yivi̱ꞌ,
te̱ kaꞌnuꞌ,
¿a̱ma̱ vi̱ꞌ kuꞌu̱n ndi̱koꞌ ndo̱ꞌ ña̱ kani̱a̱ꞌa ndo̱ꞌ xaꞌa̱ꞌ ña̱ kiꞌinꞌ kaꞌnuꞌ ne̱ yivi̱ꞌ yuꞌu̱?
Te̱ ¿a̱ma̱ vi̱ꞌ kuꞌu̱n ndi̱koꞌ ndo̱ꞌ ña̱ xtani̱ ka̱ ndo̱ꞌ ña̱ sikiꞌ xiinꞌ ña̱ xini xaꞌanꞌ?
Selah
3 Sa̱kanꞌ na kuiiꞌ kuní i̱ ña̱ ku̱nda̱ni̱ ndo̱ꞌ ña̱ Yahvé ndii,
ne̱ xatyuunꞌ nda̱ku nakaxin a̱ xikaꞌ nuuꞌ nuu̱ꞌ a̱,
xaꞌa̱ꞌ a̱ ja̱a̱nꞌ na ku̱ni̱ so̱ꞌo̱ a̱ kii̱ꞌ kaꞌa̱n ndaꞌvi yuꞌu̱ nuu̱ꞌ a̱.
4 Kii̱ꞌ na̱saa̱ꞌ ndo̱ꞌ ndii,
tä̱xi̱ ndo̱ꞌ vi̱ko̱ꞌniꞌiꞌ a̱ ndoꞌó te̱ sa̱a̱ ndo̱ꞌ ku̱a̱tyi̱ nuu̱ꞌ Ndiosí,
süu̱ꞌ ja̱a̱nꞌ ndii,
na̱ka̱ni̱ni̱ ndo̱ꞌ xiinꞌ nimá ndo̱ꞌ kii̱ꞌ na̱ka̱nduꞌu̱ꞌ ndo̱ꞌ kusu̱n ndo̱ꞌ xaꞌa̱ꞌ sa̱kuuꞌ ña̱ ni̱ xa̱a̱ ndo̱ꞌ,
te̱ käꞌa̱n ndo̱ꞌ nde̱e̱ i̱i̱n ña̱ꞌa̱.
Selah
5 Te̱ na̱soko̱ꞌ ndo̱ꞌ nuu̱ꞌ Yahvé ña̱ꞌa̱ ña̱ xikán a̱ nuu̱ꞌ ndo̱ꞌ xiinꞌ i̱i̱n ka̱niiꞌ nimá ndo̱ꞌ,
te̱ i̱ni̱ ndo̱ꞌ ku̱ni̱ ña̱ꞌaꞌ ndo̱ꞌ.
6 Kuaꞌa̱ꞌ yaꞌa̱ ne̱ yivi̱ꞌ ndatuꞌúnꞌ taꞌanꞌ kaꞌán ni̱a̱ ndii:
“¿Yo̱o̱ tu̱ sa̱tyuunꞌ va̱ꞌa̱ xaꞌa̱ꞌ e̱ꞌ?”
katyi ni̱a̱.
Sa̱a̱ u̱nꞌ ña̱ va̱ꞌa̱,
Tákuiꞌe Yahvé,
te̱ ko̱to̱ u̱nꞌ miiꞌ ndieeꞌ ndu̱,
te̱ va̱ꞌa̱ ku̱ni̱ u̱nꞌ ku̱ni̱ u̱nꞌ ndu̱.
7 Yoꞌó ni̱ ta̱xi̱ kuaꞌa̱ꞌ ka̱ ña̱ va̱ꞌa̱ kuni nimá i̱,
te̱ sa̱kanꞌ tu̱ ña̱ va̱ꞌa̱ kuni ne̱ ni̱ na̱ka̱ya̱ kuaꞌa̱ꞌ va̱ ña̱ savi̱ꞌ naa kuuꞌ ndi̱kinꞌ trigo xiinꞌ vino xa̱aꞌ.
8 Xaꞌa̱ꞌ a̱ ja̱a̱nꞌ na kuiiꞌ na̱ka̱nduꞌu̱ꞌ mani̱ꞌ i̱,
te̱ i̱i̱n kusu̱n ku̱i̱ti̱ꞌ i̱,
sa̱kanꞌ ña̱ yoꞌó,
Yahvé,
xaaꞌ sa̱kanꞌ,
te̱ i̱ni̱ i̱ xikaꞌ i̱ i̱i̱n yivi̱ꞌ.