Yoꞌoꞌ kaꞌán ndaꞌvi David xiinꞌ Ndiosí te̱ tyi̱ndi̱e̱eꞌ ña̱ꞌaꞌ a̱ nuu̱ꞌ ña̱ ndoꞌoꞌ ra̱
Ya̱a̱ ña̱ ni̱ xi̱ta̱ David, ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
13
Tákuiꞌe Yahvé,
¿a̱ma̱ vi̱ꞌ kuꞌu̱n ndi̱koꞌ u̱nꞌ ña̱ nandoso̱ꞌ u̱nꞌ xaꞌa̱ꞌ i̱?
¿Ñáá nde̱e̱ ndiꞌiꞌ ni̱ kivi̱ꞌ näkaꞌanꞌ ka̱ u̱nꞌ xaꞌa̱ꞌ i̱?
¿A̱ma̱ vi̱ꞌ kuꞌu̱n ndi̱koꞌ u̱nꞌ ña̱ xäaꞌ u̱nꞌ kuenta kuuꞌ i̱?
2 ¿A̱ma̱ vi̱ꞌ kuꞌu̱n ndi̱koꞌ i̱ ña̱ ndiꞌni̱ nimá i̱,
te̱ xikaꞌ i̱,
te̱ sutyiꞌ tu̱ i̱ni̱ i̱ tiaa̱n tiaa̱n te̱ xikaꞌ i̱?
¿A̱ma̱ vi̱ꞌ kuꞌu̱n ndi̱koꞌ te̱ ndasiꞌ taꞌanꞌ xiinꞌ i̱ ña̱ xikoniꞌiꞌ ra̱ yuꞌu̱?
3 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ tyu̱nxaꞌaꞌ u̱nꞌ kuuꞌ i̱,
te̱ na̱ku̱i̱i̱n u̱nꞌ ña̱ kaꞌán i̱ xiinꞌ u̱nꞌ.
Sa̱a̱ u̱nꞌ ña̱ va̱ꞌa̱ te̱ nu̱niaꞌ u̱nꞌ ndu̱tyiꞌ nuu̱ꞌ i̱,
te̱ tä̱xi̱ u̱nꞌ ña̱ ka̱nandoo ña̱ xiꞌí yuꞌu̱ te̱ ku̱vi̱ xa̱tyiꞌ i̱.
4 Sa̱kanꞌ te̱ käꞌa̱n te̱ ndasiꞌ taꞌanꞌ xiinꞌ i̱ ndii:
“Ni̱ ka̱nandoo ña̱ꞌaꞌ i̱”,
katyi̱ ra̱.
Te̱ na̱ku̱a̱tiaꞌ ra̱ naaꞌ ku̱ni̱ ra̱ xaa̱ i̱ ñu̱ꞌuꞌ.
5 Ndisu̱ yuꞌu̱ ndii,
i̱ni̱ i̱ xini i̱ ña̱ kuvita i̱ni̱ u̱nꞌ xaꞌa̱ꞌ i̱,
te̱ na̱ku̱a̱tiaꞌ nimá i̱ xaꞌa̱ꞌ ña̱ sakakú u̱nꞌ yuꞌu̱.
6 Ka̱ta̱ i̱ ya̱a̱ nuu̱ꞌ Yahvé xaꞌa̱ꞌ a̱ ña̱ ni̱ xa̱a̱ a̱ ña̱ va̱ꞌa̱ xaꞌa̱ꞌ i̱.