So̱ꞌo̱ ni̱ xa̱a̱ a̱ kii̱ꞌ ni̱ ta̱xi̱ Ester kuento aꞌ nuu̱ꞌ Mardoqueo ña̱ vi̱kuiꞌni̱ aꞌ xaꞌa̱ꞌ ne̱ ñu̱u̱ aꞌ
4
Kii̱ꞌ ni̱ xi̱ni̱ Mardoqueo kuento xaꞌa̱ꞌ ña̱ ja̱a̱nꞌ ndii,
ni̱ sa̱kuatyiꞌ ra̱ toto̱ niꞌnuꞌ ra̱ xaꞌa̱ꞌ a̱ ña̱ sutyiꞌ va̱ i̱ni̱ ra̱.
Te̱ ni̱ na̱kuiꞌnu̱ ra̱ toto̱ ndiaaꞌ nde̱iꞌ,
te̱ ni̱ sa̱kaaꞌ tu̱ ra̱ yaa̱ꞌ nuꞌu̱ xíniꞌ ra̱.
Te̱ ni̱ ke̱ta̱ ra̱ kuaꞌa̱n ra̱ ka̱niiꞌ ñu̱u̱ ja̱a̱nꞌ ndeꞌí tiꞌeꞌ ra̱.
2 Te̱ ni̱ xa̱a̱ ra̱ nde̱e̱ yiꞌeꞌ vi̱ꞌe̱ miiꞌ nduꞌu̱ꞌ rey xaꞌndia tyuunꞌ ra̱,
ndisu̱ nï̱ ndiꞌvi̱ ra̱ ti̱xi̱n vi̱ꞌe̱ ja̱a̱nꞌ,
sa̱kanꞌ ña̱ vä̱ꞌa̱ yoo a̱ ña̱ xkaꞌndi̱a̱ ne̱ yivi̱ꞌ nde̱e̱ ti̱xi̱n vi̱ꞌe̱ ja̱a̱nꞌ niꞌnuꞌ ni̱a̱ toto̱ nde̱iꞌ ja̱a̱nꞌ.
3 Te̱ i̱ꞌi̱n ñu̱u̱ kaꞌnuꞌ miiꞌ ndieeꞌ ne̱ judío,
te̱ xaá tu̱ꞌu̱n nde̱iꞌ ña̱ ni̱ kaꞌa̱n tuní rey ja̱a̱nꞌ ndii,
ni̱ ku̱su̱tyiꞌ xa̱va̱ꞌa̱ i̱ni̱ ni̱a̱,
te̱ ni̱ yoo̱ ndi̱ti̱a̱ tu̱ ni̱a̱,
te̱ ni̱ xa̱ku̱ va̱ ni̱a̱,
nde̱e̱ ni̱ ta̱na̱ ndi̱i ni̱a̱,
te̱ kiꞌinꞌ ni̱a̱ ni̱ na̱kuiꞌnu̱ toto̱ nde̱iꞌ.
Te̱ sa̱va̱ tu̱ku̱ ni̱a̱ ndii,
nde̱e̱ nuu̱ꞌ yaa̱ꞌ nuꞌu̱ ni̱ kixi̱n ni̱a̱.
4 Te̱ ni̱ ki̱xi̱n ña̱ꞌaꞌ sa̱va̱,
ne̱ xikaꞌ nuuꞌ nuu̱ꞌ Ester,
xiinꞌ te̱ xíinꞌ aꞌ,
te̱ ñaꞌma,
te̱ ni̱ kaꞌa̱n ni̱a̱ xiinꞌ aꞌ ña̱ ndoꞌoꞌ Mardoqueo.
Te̱ ni̱ ku̱su̱tyiꞌ xa̱va̱ꞌa̱ i̱ni̱ aꞌ.
Te̱ ni̱ ti̱ꞌviꞌ aꞌ toto̱ ku̱i̱ꞌnu̱ ra̱,
te̱ ta̱va̱ꞌ ra̱ toto̱ nde̱iꞌ ña̱ niꞌnuꞌ ra̱ nduꞌu̱ꞌ ra̱ yiꞌeꞌ ja̱a̱nꞌ,
ndisu̱ nï̱ xi̱i̱n ra̱ na̱ti̱i̱n ra̱ a̱.
5 Sa̱kanꞌ te̱ ni̱ ka̱na̱ aꞌ Hatac,
i̱i̱n te̱ ñaꞌma,
te̱ xaꞌndia tyuunꞌ nuu̱ꞌ te̱ xíinꞌ rey,
te̱ ni̱ ta̱xi̱ ra̱ xikaꞌ nuuꞌ nuu̱ꞌ aꞌ.
Te̱ ni̱ ti̱ꞌviꞌ aꞌ ra̱ miiꞌ nduꞌu̱ꞌ Mardoqueo te̱ nda̱tuꞌu̱nꞌ ña̱ꞌaꞌ ra̱ yo̱o̱ nduuꞌ a̱ ndoꞌoꞌ ra̱,
te̱ ndiotyun tu̱ na xaaꞌ ra̱ ña̱ ja̱a̱nꞌ.
6 Sa̱kanꞌ na ni̱ ke̱ta̱ Hatac kuaꞌa̱n ra̱ miiꞌ nduꞌu̱ꞌ Mardoqueo ma̱ꞌiꞌ ya̱ꞌvi̱ xtoꞌniꞌ miiꞌ iinꞌ vi̱ꞌe̱ rey.
7 Te̱ ni̱ kaꞌa̱n Mardoqueo xiinꞌ ra̱ sa̱kuuꞌ ña̱ ni̱ xkaꞌndi̱a̱ i̱kanꞌ,
te̱ ni̱ kaꞌa̱n tu̱ ra̱ sa̱a̱ kuuꞌ xu̱ꞌunꞌ ni̱ kaꞌa̱n Amán sa̱mani̱ꞌ ra̱ rey,
te̱ kiee̱ a̱ miiꞌ naá xu̱ꞌunꞌ rey ja̱a̱nꞌ,
te̱ ta̱xi̱ rey ka̱ꞌni̱ꞌ ra̱ sa̱kuuꞌ ne̱ judío.
8 Ni̱ ta̱xi̱ tu̱ Mardoqueo nda̱ꞌaꞌ Hatac i̱i̱n tu̱tu̱ miiꞌ yoso̱ꞌ ña̱ ni̱ kaꞌa̱n tyuunꞌ rey ñu̱u̱ Susa,
ña̱ ka̱ꞌni̱ꞌ ra̱ sa̱kuuꞌ ne̱ judío,
te̱ ta̱xi̱ te̱ ja̱a̱nꞌ a̱ nda̱ꞌaꞌ Ester,
te̱ ku̱nda̱ni̱ tu̱ ñaꞌ ja̱a̱nꞌ sa̱kuuꞌ ña̱ xkaꞌndíá ñu̱u̱ ja̱a̱nꞌ.
Te̱ ni̱ kaꞌa̱n tu̱ ra̱ xiinꞌ Hatac ja̱a̱nꞌ ña̱ kaꞌa̱n ndi̱e̱eꞌ ra̱ xiinꞌ Ester te̱ kuꞌu̱n kaꞌa̱n ndaꞌvi aꞌ xiinꞌ rey vi̱kuiꞌni̱ aꞌ nuu̱ꞌ ra̱ xaꞌa̱ꞌ ne̱ ñu̱u̱ aꞌ.
9 Te̱ ni̱ na̱ndi̱koꞌ Hatac,
te̱ ni̱ kaꞌa̱n ra̱ xiinꞌ Ester sa̱kuuꞌ ña̱ ni̱ kaꞌa̱n Mardoqueo xiinꞌ ra̱.
10 Sa̱kanꞌ te̱ ni̱ ti̱ꞌviꞌ tu̱ku̱u̱ Ester Hatac kaꞌán aꞌ xiinꞌ ra̱,
ña̱ kaꞌa̱n ra̱ xiinꞌ Mardoqueo ndii:
11 ―Sa̱kuuꞌ ne̱ xikaꞌ nuuꞌ nuu̱ꞌ rey,
xiinꞌ sa̱kuuꞌ ne̱ ndieeꞌ nuu̱ꞌ ñu̱ꞌuꞌ miiꞌ xaꞌndia tyuunꞌ ra̱ ndii,
xiní ni̱a̱ ña̱ yoo i̱i̱n nda̱a̱ꞌ tu̱ꞌu̱n nde̱iꞌ ña̱ kaꞌán ña̱ kuní a̱ ku̱vi̱ tiaa̱ uun ña̱ꞌaꞌ naaꞌ ndiꞌvi̱ ni̱a̱ ti̱xi̱n vi̱ꞌe̱ miiꞌ nduꞌu̱ꞌ rey,
te̱ ku̱ni̱ ña̱ꞌaꞌ ni̱a̱ naaꞌ nï̱ ka̱na̱ ña̱ꞌaꞌ ra̱.
Ne̱ ku̱vi̱ kaku̱ naaꞌ ndiꞌvi̱ ni̱a̱ i̱kanꞌ ndii,
ne̱ ka̱ta̱ni̱ rey ta̱tunꞌ ra̱ nuu̱ꞌ ku̱i̱ti̱ꞌ nduuꞌ ne̱ ja̱a̱nꞌ.
Ndisu̱ yuꞌu̱ ndii,
xa̱ ni̱ ndi̱ꞌi̱ i̱i̱n yoo̱ꞌ ña̱ tiäꞌa̱an ka̱na̱ rey yuꞌu̱ te̱ kuꞌu̱n i̱ nuu̱ꞌ ra̱ ―ni̱ katyi̱ aꞌ.
12 Te̱ kii̱ꞌ ni̱ kaꞌa̱n Hatac ja̱a̱nꞌ xiinꞌ Mardoqueo kuento ña̱ ni̱ ti̱ꞌviꞌ ña̱ꞌaꞌ Ester kaꞌa̱n ra̱ xiinꞌ ra̱ ndii,
13 ni̱ ti̱ꞌviꞌ ni̱ tu̱ku̱u̱ Mardoqueo i̱nga̱ kuento xiinꞌ Hatac nda̱ꞌaꞌ Ester,
kaꞌán ra̱ ndii:
―Kä̱ni̱ni̱ u̱nꞌ na i̱i̱n nda̱a̱ꞌ yoꞌó ku̱i̱ti̱ꞌ ku̱ndu̱u̱ ñaꞌ judía ñaꞌ kaku̱ kii̱ꞌ ka̱ꞌni̱ꞌ ra̱ sa̱kuuꞌ ne̱ judío xaꞌa̱ꞌ a̱ ña̱ nduꞌu̱ꞌ u̱nꞌ vi̱ꞌe̱ rey ku̱i̱ti̱ꞌ.
14 Sa̱kanꞌ ña̱ naaꞌ ko̱o̱ taxi̱nꞌ xa̱tyiꞌ yu̱ꞌuꞌ u̱nꞌ vi̱ti̱n ndii,
kueinꞌ ke̱ta̱ tu̱ku̱u̱ miiꞌ ki̱xi̱n ne̱ sa̱kakú nduꞌu̱,
ne̱ judío.
Ndisu̱ yoꞌó xiinꞌ sa̱kuuꞌ ne̱ i̱i̱n kuuꞌ xiinꞌ yu̱vaꞌ siꞌiꞌ u̱nꞌ ndii,
ka̱ꞌni̱ꞌ ña̱ꞌaꞌ ra̱.
Tee̱ꞌ kueinꞌ ni̱ na̱ndu̱u̱ yoꞌó reina vi̱ti̱n te̱ sa̱kakú u̱nꞌ ne̱ ñu̱u̱ e̱ꞌ nuu̱ꞌ tu̱ndoꞌo̱ꞌ kaa̱ꞌ ―ni̱ katyi̱ ra̱.
15 Sa̱kanꞌ te̱ ni̱ ti̱ꞌviꞌ ni̱ tu̱ku̱u̱ Ester kuento yoꞌoꞌ nuu̱ꞌ Mardoqueo kaꞌán aꞌ ndii:
16 ―Kuaꞌan te̱ na̱ka̱ya̱ u̱nꞌ sa̱kuuꞌ ne̱ judío,
ne̱ ndieeꞌ ñu̱u̱ Susa,
te̱ ko̱o̱ ndi̱ti̱a̱ ndo̱ꞌ xaꞌa̱ꞌ i̱,
na kü̱xi̱ ndo̱ꞌ te̱ ni̱ nde̱e̱ kö̱ꞌo̱ tu̱ ndo̱ꞌ ti̱kui niiꞌ uni̱ kivi̱ꞌ,
xiinꞌ niiꞌ uni̱ ñu̱u.
Yuꞌu̱ xiinꞌ sa̱kuuꞌ ña̱ꞌaꞌ,
ña̱ xikaꞌ nuuꞌ nuu̱ꞌ i̱ ndii,
sa̱kanꞌ tu̱ sa̱a̱ nduꞌu̱.
Ndi̱ꞌi̱ ja̱a̱nꞌ te̱ kuꞌu̱n i̱ nuu̱ꞌ rey tee̱ꞌ ndee täxiꞌ tu̱ꞌu̱n nde̱iꞌ ña̱ sa̱a̱ i̱ sa̱kanꞌ.
Te̱ naaꞌ ka̱ꞌni̱ꞌ ra̱ yuꞌu̱ ndii,
na ka̱ꞌni̱ꞌ ra̱ yuꞌu̱ ―ni̱ katyi̱ aꞌ.
17 Sa̱kanꞌ te̱ ni̱ ke̱ta̱ Mardoqueo kuaꞌa̱n ra̱,
te̱ ni̱ sa̱xinú ra̱ sa̱kuuꞌ ña̱ ni̱ kaꞌa̱n tyuunꞌ Ester xiinꞌ ra̱.