So̱ꞌo̱ ni̱ xa̱a̱ a̱ kii̱ꞌ ni̱ tyi̱tuní Amán ka̱ꞌni̱ꞌ ra̱ sa̱kuuꞌ ne̱ judío
3
Kii̱ꞌ ni̱ yaꞌa̱ ndiaꞌviꞌ kivi̱ꞌ,
te̱ ni̱ sa̱kuisoꞌ tyuunꞌ vie̱ ka̱ rey Asuero Amán,
siꞌe̱ Hamedata,
te̱ i̱tyiꞌ Agag,
sa̱kanꞌ na ni̱ sa̱na̱nduuꞌ ña̱ꞌaꞌ ra̱ te̱ xaꞌndia tyuunꞌ kuuꞌ nu̱uꞌ nuu̱ꞌ sa̱kuuꞌ te̱ xaꞌndia tyuunꞌ xiinꞌ ra̱.
2 Sa̱kanꞌ na kuiiꞌ sa̱kuuꞌ te̱ xatyuunꞌ nuu̱ꞌ rey ndii,
xikuitá xitiꞌ ra̱ nuu̱ꞌ Amán,
ña̱ kiꞌinꞌ kaꞌnuꞌ ña̱ꞌaꞌ ra̱ kii̱ꞌ xkaꞌndíá te̱ ja̱a̱nꞌ kuaꞌa̱n ra̱.
Sa̱kanꞌ ña̱ xa̱ sa̱kanꞌ ni̱ kaꞌa̱n tyuunꞌ mi̱iꞌ rey Asuero.
Ndisu̱ Mardoqueo ndii,
nï̱ xi̱i̱n ra̱ ku̱i̱i̱n xitiꞌ ra̱ nuu̱ꞌ te̱ ja̱a̱nꞌ,
te̱ nï̱ ki̱ꞌi̱n kaꞌnuꞌ tu̱ ña̱ꞌaꞌ ra̱.
3 Xaꞌa̱ꞌ a̱ ja̱a̱nꞌ na ni̱ nda̱tuꞌu̱nꞌ i̱nga̱ te̱ xikaꞌ nuuꞌ nuu̱ꞌ rey,
te̱ xitoꞌ yiꞌeꞌ ra̱,
Mardoqueo ndii:
―¿Ndiotyun na xaꞌnú yoꞌó ña̱ ni̱ kaꞌa̱n tyuunꞌ rey nuu̱ꞌ e̱ꞌ?
―ni̱ katyi̱ ra̱.
4 Te̱ sa̱kuuꞌ kivi̱ꞌ kaꞌán ra̱ ña̱ ja̱a̱nꞌ xiinꞌ Mardoqueo,
ndisu̱ xäaꞌ te̱ ja̱a̱nꞌ kuenta kuuꞌ ra̱.
Xaꞌa̱ꞌ a̱ ja̱a̱nꞌ na ni̱ xaꞌa̱n kaꞌa̱n vixi̱ ra̱ nuu̱ꞌ Amán te̱ ku̱ni̱ ra̱ naaꞌ sa̱a̱ te̱ sa̱a̱ Mardoqueo ña̱ ja̱a̱nꞌ,
sa̱kanꞌ ña̱ xa̱ ni̱ kaꞌa̱n Mardoqueo xiinꞌ te̱ yivi̱ꞌ ja̱a̱nꞌ ña̱ te̱ judío nduuꞌ ra̱.
5 Te̱ kii̱ꞌ ni̱ xi̱ni̱ Amán ña̱ xïkuiín xitiꞌ Mardoqueo nuu̱ꞌ ra̱,
te̱ ni̱ nde̱e̱ kïꞌinꞌ kaꞌnuꞌ tu̱ ña̱ꞌaꞌ ra̱ ndii,
ni̱ na̱saa̱ꞌ xa̱va̱ꞌa̱ ra̱.
6 Te̱ ni̱ kuni̱ ra̱ ka̱ꞌni̱ꞌ ña̱ꞌaꞌ ra̱,
ndisu̱ xaꞌa̱ꞌ a̱ ña̱ ni̱ xi̱ni̱ ra̱ kuento ña̱ te̱ judío nduuꞌ Mardoqueo ja̱a̱nꞌ ndii,
nï̱ kuni̱ ra̱ ka̱ꞌni̱ꞌ ra̱ te̱ ja̱a̱nꞌ ku̱i̱ti̱ꞌ.
Süu̱ꞌ ja̱a̱nꞌ ndii,
ni̱ xa̱ꞌaꞌ na̱ndu̱kuꞌ ra̱ sa̱a̱ sa̱a̱ ra̱ te̱ ka̱ꞌni̱ꞌ ra̱ sa̱kuuꞌ ne̱ judío,
ne̱ ndieeꞌ ka̱niiꞌ nuu̱ꞌ ñu̱ꞌuꞌ miiꞌ xaꞌndia tyuunꞌ rey Asuero ja̱a̱nꞌ.
7 Yoo̱ꞌ nu̱uꞌ,
tiꞌ naniꞌ Nisán,
kii̱ꞌ xa̱ ni̱ xkaꞌndi̱a̱ uxi̱ uvi̱ kuiya̱ ña̱ xaꞌndia tyuunꞌ rey Asuero ndii,
ni̱ kaꞌa̱n tyuunꞌ Amán,
te̱ ni̱ ka̱ti̱n te̱ yivi̱ꞌ nuu̱ꞌ ra̱.
Te̱ ña̱ ni̱ ka̱ti̱n ra̱ ja̱a̱nꞌ ndii,
pur naniꞌ a̱,
te̱ ku̱nda̱ni̱ ra̱ ndee kivi̱ꞌ xiinꞌ ndee yoo̱ꞌ va̱ꞌa̱ ka̱ ka̱ꞌni̱ꞌ ra̱ sa̱kuuꞌ ne̱ judío.
Te̱ ni̱ na̱ma̱ a̱ kivi̱ꞌ ña̱ uxi̱ uni̱ kuaꞌa̱n yoo̱ꞌ uxi̱ uvi̱,
tiꞌ naniꞌ Adar.
8 Sa̱kanꞌ te̱ ni̱ kaꞌa̱n Amán xiinꞌ rey Asuero ndii:
―Ka̱niiꞌ nuu̱ꞌ ñu̱ꞌuꞌ miiꞌ xaꞌndia tyuunꞌ yoꞌó,
rey ndii,
kaꞌni̱ i̱i̱n ti̱ꞌvi̱ ne̱ yivi̱ꞌ,
ne̱ yoo tu̱ꞌu̱n nde̱iꞌ mi̱iꞌ ña̱ näkuitá xiinꞌ tu̱ꞌu̱n nde̱iꞌ ña̱ xaaꞌ i̱nga̱ ne̱ yivi̱ꞌ,
te̱ säxinú tu̱ ni̱a̱ nde̱iꞌ ña̱ kaꞌán tyuunꞌ yoꞌó,
rey.
Te̱ köo̱ꞌ xa̱tyiꞌ a̱ ka̱nandoo u̱nꞌ tee̱ꞌ ndee ndieeꞌ ni̱a̱ nuu̱ꞌ ñu̱ꞌuꞌ miiꞌ xaꞌndia tyuunꞌ u̱nꞌ.
9 Sa̱kanꞌ na kuiiꞌ naaꞌ va̱ꞌa̱ yoo a̱ tuu yoꞌó,
rey ndii,
kaꞌa̱n tyuunꞌ u̱nꞌ i̱i̱n nde̱iꞌ ña̱ kaꞌa̱n ña̱ kuní a̱ ku̱vi̱ sa̱kuuꞌ ne̱ ja̱a̱nꞌ.
Te̱ ta̱xi̱ yuꞌu̱ uxi̱ mií i̱ti̱n xu̱ꞌunꞌ yuu̱ꞌ plata nda̱ꞌaꞌ te̱ xitoꞌ xu̱ꞌunꞌ u̱nꞌ,
te̱ ta̱a̱nꞌ ra̱ a̱ miiꞌ ñuꞌuꞌ xu̱ꞌunꞌ yoꞌó,
rey ―ni̱ katyi̱ Amán.
10 Sa̱kanꞌ te̱ ni̱ xta̱ꞌniꞌ rey ka̱xun nda̱ꞌaꞌ nuu̱ꞌ nda̱ꞌaꞌ ra̱,
ña̱ nduuꞌ sello ra̱,
te̱ ni̱ ta̱xi̱ ra̱ a̱ nda̱ꞌaꞌ Amán,
siꞌe̱ Hamedata,
te̱ nduuꞌ te̱ i̱tyiꞌ Agag.
Te̱ Amán ja̱a̱nꞌ ndii,
te̱ ndasiꞌ taꞌanꞌ xiinꞌ ne̱ judío nduuꞌ ra̱.
11 Te̱ ni̱ kaꞌa̱n rey xiinꞌ Amán ndii:
―Xu̱ꞌunꞌ plata ña̱ kaꞌán u̱nꞌ ta̱xi̱ u̱nꞌ nda̱ꞌaꞌ i̱ ja̱a̱nꞌ ndii,
ku̱vi̱ ndoo̱ mi̱iꞌ u̱nꞌ xiinꞌ a̱.
Te̱ sa̱kanꞌ tu̱ ne̱ yivi̱ꞌ ja̱a̱nꞌ ndii,
ku̱vi̱ sa̱a̱ u̱nꞌ xiinꞌ ni̱a̱ ndee ka̱ ña̱ kaꞌán nimá u̱nꞌ ―ni̱ katyi̱ ra̱.
12 Sa̱kanꞌ na kuiiꞌ ni̱ ka̱na̱ ra̱ sa̱kuuꞌ te̱ keꞌi tu̱tu̱,
te̱ xatyuunꞌ nuu̱ꞌ rey,
kivi̱ꞌ ña̱ uxi̱ uni̱ xikaꞌ yoo̱ꞌ nu̱uꞌ.
Te̱ ni̱ ke̱ꞌi̱ te̱ ja̱a̱nꞌ sa̱kuuꞌ ña̱ ni̱ kaꞌa̱n tyuunꞌ Amán xiinꞌ ra̱,
te̱ kuaꞌa̱n a̱ nda̱ꞌaꞌ sa̱kuuꞌ te̱ ndisoꞌ tyuunꞌ vie̱ nuu̱ꞌ ñu̱ꞌuꞌ ja̱a̱nꞌ,
xiinꞌ nda̱ꞌaꞌ te̱ xaꞌndia tyuunꞌ nuu̱ꞌ i̱ꞌi̱n ñu̱u̱,
xiinꞌ nda̱ꞌaꞌ te̱ kuuꞌ nu̱uꞌ nuu̱ꞌ ne̱ ndieeꞌ nuu̱ꞌ ñu̱ꞌuꞌ nda̱ꞌaꞌ ñu̱u̱ ja̱a̱nꞌ.
Te̱ i̱ꞌi̱n ñu̱u̱ xiinꞌ nda̱ꞌaꞌ a̱ ni̱ ti̱ꞌviꞌ ra̱ tu̱tu̱ ña̱ ni̱ keꞌi̱ xiinꞌ tu̱ꞌu̱n ña̱ ndatuꞌunꞌ mi̱iꞌ ne̱ ndieeꞌ i̱kanꞌ,
xiinꞌ sa̱a̱ keꞌi ni̱a̱ tu̱ꞌu̱n ni̱a̱ ja̱a̱nꞌ.
Sa̱kanꞌ ña̱ sa̱kanꞌ ni̱ kaꞌa̱n tyuunꞌ rey Asuero,
te̱ ni̱ tyi̱nduꞌu̱ꞌ tu̱ ra̱ sello ra̱ xata̱ꞌ tu̱tu̱ ja̱a̱nꞌ,
ña̱ nduuꞌ ka̱xun nda̱ꞌaꞌ rey ja̱a̱nꞌ.
13 Sa̱kanꞌ te̱ ni̱ ti̱ꞌviꞌ ra̱ tu̱tu̱ ja̱a̱nꞌ ka̱niiꞌ nuu̱ꞌ ñu̱ꞌuꞌ miiꞌ xaꞌndia tyuunꞌ rey ja̱a̱nꞌ xiinꞌ nda̱ꞌaꞌ te̱ xaxa̱ꞌ tu̱tu̱,
miiꞌ kaꞌán tyuunꞌ ra̱ ña̱ ka̱ꞌni̱ꞌ ra̱,
te̱ sa̱kuatyiꞌ xiꞌe̱ ndo̱o̱ ra̱,
te̱ sa̱ndiꞌiꞌ xa̱tyiꞌ ra̱ sa̱kuuꞌ ne̱ judío,
ne̱ sa̱va̱,
xiinꞌ ne̱ xi̱xa̱,
ne̱ kualiꞌ,
xiinꞌ ña̱ꞌaꞌ.
Te̱ i̱i̱n nda̱a̱ꞌ ku̱i̱ti̱ꞌ kivi̱ꞌ sa̱a̱ ra̱ sa̱kuuꞌ ña̱ ja̱a̱nꞌ,
kivi̱ꞌ ña̱ uxi̱ uni̱ xikaꞌ yoo̱ꞌ uxi̱ uvi̱,
tiꞌ naniꞌ Adar.
Te̱ na̱ka̱ya̱ tu̱ ra̱ sa̱kuuꞌ ña̱ kumiꞌ ni̱a̱.
14 Te̱ ni̱ ke̱ꞌi̱ ra̱ kiꞌinꞌ tu̱tu̱ miiꞌ yoso̱ꞌ nde̱iꞌ ja̱a̱nꞌ te̱ kuaꞌa̱n a̱ sa̱kuuꞌ ñu̱u̱ xiinꞌ nda̱ꞌaꞌ a̱,
te̱ ko̱o̱ tu̱ꞌva̱ ne̱ ndieeꞌ i̱kanꞌ kii̱ꞌ xaa̱ kivi̱ꞌ ja̱a̱nꞌ.
15 Sa̱kanꞌ te̱ ni̱ kiku̱ te̱ xaxa̱ꞌ tu̱tu̱,
te̱ ka̱ma̱ ka̱ kuaꞌa̱n sa̱na̱kuaꞌa ra̱ a̱ sa̱a̱ ni̱ kaꞌa̱n tyuunꞌ rey xiinꞌ ra̱.
Te̱ tu̱tu̱ miiꞌ yoso̱ꞌ nde̱iꞌ ja̱a̱nꞌ ndii,
ni̱ kiku̱ tu̱ a̱ ñu̱u̱ Susa,
ña̱ nduuꞌ ñu̱u̱ kaꞌnuꞌ miiꞌ nduꞌu̱ꞌ rey ja̱a̱nꞌ xaꞌndia tyuunꞌ ra̱.
Te̱ kii̱ꞌ yoo sa̱kuuꞌ ña̱ ja̱a̱nꞌ ndii,
ni̱ xi̱ku̱nduꞌu̱ꞌ rey Asuero xiinꞌ Amán xiꞌiꞌ ra̱ vino,
ndisu̱ sa̱kuuꞌ ne̱ ndieeꞌ ñu̱u̱ Susa ja̱a̱nꞌ ndii,
ni̱ ndi̱ꞌni̱ xa̱va̱ꞌa̱ nimá ni̱a̱.