So̱ꞌo̱ ni̱ xa̱a̱ a̱ kii̱ꞌ ni̱ na̱ka̱xi̱n rey Asuero Ester te̱ ku̱ndu̱u̱ aꞌ reina
2
Kii̱ꞌ ni̱ xkaꞌndi̱a̱ ndiaꞌviꞌ yoo̱ꞌ ndii,
ni̱ nu̱u̱ ña̱ xiꞌé rey Asuero,
te̱ ni̱ na̱ka̱ꞌanꞌ ra̱ ña̱ ni̱ xa̱a̱ reina Vasti xiinꞌ ra̱,
te̱ ni̱ na̱ka̱ꞌanꞌ tu̱ ra̱ xaꞌa̱ꞌ nde̱iꞌ ña̱ ni̱ tyi̱tuní ra̱ te̱ kü̱ndu̱u̱ ka̱ ñaꞌ ja̱a̱nꞌ reina.
2 Sa̱kanꞌ te̱ ni̱ kaꞌa̱n te̱ xikaꞌ nuuꞌ nuu̱ꞌ rey ja̱a̱nꞌ xiinꞌ ra̱ ndii:
―Va̱ꞌa̱ ka̱ ndu̱kuꞌ e̱ꞌ kiꞌinꞌ ña̱ꞌaꞌ sa̱va̱,
ne̱ nda̱tu̱nꞌ,
ne̱ tiäꞌa̱an ku̱ni̱ te̱ yivi̱ꞌ,
te̱ ku̱ndi̱e̱e̱ ni̱a̱ xiinꞌ u̱nꞌ,
rey.
3 Te̱ i̱ꞌi̱n ñu̱u̱ ka̱niiꞌ nuu̱ꞌ ñu̱ꞌuꞌ miiꞌ xaꞌndia tyuunꞌ u̱nꞌ ndii,
ta̱ndi̱e̱e̱ u̱nꞌ te̱ ka̱ꞌndi̱a̱ tyuunꞌ,
te̱ ki̱xi̱n ndi̱a̱ka̱ sa̱kuuꞌ ña̱ꞌaꞌ sa̱va̱ ja̱a̱nꞌ ñu̱u̱ Susa yoꞌoꞌ miiꞌ iinꞌ vi̱ꞌe̱ kaꞌnuꞌ miiꞌ ñuꞌuꞌ ña̱ꞌaꞌ sa̱va̱.
Te̱ sa̱na̱kuaꞌa ña̱ꞌaꞌ ra̱ nda̱ꞌaꞌ te̱ naniꞌ Hegai,
te̱ ñaꞌma,
te̱ i̱ni̱ u̱nꞌ xini u̱nꞌ,
te̱ ko̱to̱ ña̱ꞌaꞌ ra̱.
Te̱ Hegai ja̱a̱nꞌ sa̱tatanꞌ ña̱ꞌaꞌ te̱ ndu̱nda̱tu̱nꞌ ka̱ ni̱a̱.
4 Te̱ ña̱ꞌaꞌ sa̱va̱,
ñaꞌ xtani̱ yaꞌa̱ ka̱ mi̱iꞌ rey,
ku̱ndu̱u̱ ñaꞌ na̱ꞌi̱ tyuunꞌ nuu̱ꞌ Vasti te̱ ku̱ndu̱u̱ aꞌ reina ―ni̱ katyi̱ ra̱.
Te̱ ni̱ xta̱ni̱ va̱ rey ja̱a̱nꞌ ña̱ ni̱ kaꞌa̱n te̱ ja̱a̱nꞌ xiinꞌ ra̱,
sa̱kanꞌ na kuiiꞌ ni̱ xa̱a̱ ra̱ ña̱ ja̱a̱nꞌ.
5 Te̱ ni̱ nduꞌu̱ꞌ i̱i̱n te̱ judío,
te̱ vi̱ꞌe̱ Benjamín,
te̱ ni̱ na̱niꞌ Mardoqueo,
ñu̱u̱ Susa ja̱a̱nꞌ miiꞌ iinꞌ vi̱ꞌe̱ kaꞌnuꞌ miiꞌ xaꞌndia tyuunꞌ rey Asuero ja̱a̱nꞌ.
Te̱ Mardoqueo ja̱a̱nꞌ ndii,
siꞌe̱ Jaír ni̱ nduu̱ ra̱,
te̱ xii̱ꞌ ra̱ ni̱ nduu̱ Simeí,
te̱ xii̱ꞌ xi̱kuaꞌ ra̱ ni̱ nduu̱ Cis.
6 Te̱ Mardoqueo ja̱a̱nꞌ ndii,
nde̱e̱ ñu̱u̱ Jerusalén nduꞌu̱ꞌ ra̱,
te̱ ni̱ xaꞌa̱n ti̱i̱n uꞌvi̱ ña̱ꞌaꞌ Nabucodonosor,
te̱ ni̱ nduu̱ rey nuu̱ꞌ ñu̱ꞌuꞌ Babilonia,
te̱ kuaꞌa̱n ra̱ xiinꞌ ra̱ ñu̱u̱ ja̱a̱nꞌ.
Te̱ kivi̱ꞌ ja̱a̱nꞌ ni̱ xi̱kuꞌu̱n tu̱ Jeconía,
te̱ ni̱ nduu̱ rey nuu̱ꞌ ñu̱ꞌuꞌ Judá.
7 Te̱ Mardoqueo ja̱a̱nꞌ ndii,
ni̱ yoo̱ i̱i̱n ñaꞌ taꞌanꞌ ra̱ siꞌe̱ xi̱to̱ ra̱,
ñaꞌ ni̱ na̱niꞌ Hadasa,
te̱ ni̱ na̱niꞌ tu̱ aꞌ Ester.
Ñaꞌ ja̱a̱nꞌ ndii,
nda̱tu̱nꞌ xa̱va̱ꞌa̱ aꞌ,
te̱ va̱ꞌa̱ tu̱ kaaꞌ aꞌ.
Te̱ kii̱ꞌ ni̱ ndo̱ñuꞌuꞌ yu̱vaꞌ siꞌiꞌ aꞌ ndii,
ni̱ na̱ꞌi̱ ña̱ꞌaꞌ Mardoqueo,
te̱ ni̱ sa̱kuaꞌnuꞌ ña̱ꞌaꞌ ra̱ nde̱e̱ naa ñaꞌ siꞌe̱ mi̱iꞌ ra̱,
sa̱kanꞌ ña̱ ni̱ ndoo̱ ndaꞌvi aꞌ.
8 Numi̱ꞌ va̱ kii̱ꞌ ni̱ kiku̱ tu̱ꞌu̱n nde̱iꞌ ña̱ ni̱ kaꞌa̱n tyuunꞌ rey ja̱a̱nꞌ ka̱niiꞌ nuu̱ꞌ ñu̱ꞌuꞌ ja̱a̱nꞌ ndii,
kuaꞌa̱ꞌ va̱ ña̱ꞌaꞌ sa̱va̱ ni̱ xi̱kuꞌu̱n kuaꞌa̱n ñu̱u̱ Susa miiꞌ iinꞌ vi̱ꞌe̱ kaꞌnuꞌ ña̱ xaꞌndia tyuunꞌ rey.
Te̱ ni̱ sa̱na̱kuaꞌa ra̱ sa̱kuuꞌ ni̱a̱ nda̱ꞌaꞌ te̱ naniꞌ Hegai,
te̱ ndisoꞌ tyuunꞌ xaꞌa̱ꞌ ña̱ꞌaꞌ,
te̱ i̱kanꞌ kaꞌni̱ tu̱ Ester kuaꞌa̱n aꞌ.
9 Te̱ xaꞌa̱ꞌ a̱ ña̱ va̱ꞌa̱ va̱ ni̱ ku̱ni̱ Hegai ni̱ xi̱ni̱ ra̱ Ester ja̱a̱nꞌ ndii,
mani̱ꞌ ni̱ ku̱u̱ ra̱ xiinꞌ aꞌ,
sa̱kanꞌ na xa̱kaꞌán e̱ꞌ,
te̱ ni̱ xa̱ꞌaꞌ taxiꞌ ra̱ xa̱ꞌa̱n xavixínꞌ ka̱va̱ i̱i̱nꞌ aꞌ,
te̱ ni̱ ta̱xi̱ tu̱ ra̱ ña̱ xaxi̱ꞌ va̱ꞌa̱ ka̱ kuxi̱ꞌ aꞌ,
te̱ ndu̱nda̱tu̱nꞌ yaꞌa̱ ka̱ aꞌ.
Te̱ ni̱ ta̱xi̱ tu̱ ra̱ uxa̱ taꞌanꞌ ne̱ sa̱va̱,
ne̱ va̱ꞌa̱ ka̱ xatyuunꞌ ti̱xi̱n vi̱ꞌe̱ rey ja̱a̱nꞌ,
ka̱ka̱ nu̱u̱ nuu̱ꞌ aꞌ,
te̱ ni̱ xaꞌa̱n ndi̱a̱ka̱ ña̱ꞌaꞌ ra̱ xiinꞌ sa̱kuuꞌ ña̱ꞌaꞌ sa̱va̱ ja̱a̱nꞌ i̱i̱n vi̱ꞌe̱ va̱ꞌa̱ ka̱ miiꞌ ku̱nduꞌu̱ꞌ aꞌ,
miiꞌ yoo vi̱ꞌe̱ ndieeꞌ ña̱ꞌaꞌ.
10 Te̱ Ester ndii,
nï̱ kaꞌa̱n aꞌ miiꞌ ni̱ ki̱e̱e̱ aꞌ,
ni̱ nde̱e̱ ndee nuu̱ꞌ ne̱ yivi̱ꞌ ni̱ nduu̱ yu̱vaꞌ siꞌiꞌ aꞌ,
sa̱kanꞌ ña̱ Mardoqueo ni̱ kaꞌa̱n xiinꞌ aꞌ ña̱ käꞌa̱n aꞌ xaꞌa̱ꞌ ña̱ ja̱a̱nꞌ nuu̱ꞌ nde̱e̱ i̱i̱n ne̱ yivi̱ꞌ.
11 Sa̱kanꞌ tu̱ Mardoqueo ndii,
tiaa̱n tiaa̱n xkaꞌndíá ra̱ nuu̱ꞌ ki̱ꞌe̱ vi̱ꞌe̱ miiꞌ ndieeꞌ ña̱ꞌaꞌ ja̱a̱nꞌ te̱ ku̱ni̱ ra̱ sa̱a̱ kuaꞌa̱n Ester,
te̱ ku̱nda̱ni̱ tu̱ ra̱ sa̱a̱ kuuꞌ ne̱ yivi̱ꞌ xiinꞌ aꞌ.
12 Te̱ i̱ꞌi̱n ña̱ꞌaꞌ sa̱va̱ ja̱a̱nꞌ,
kii̱ꞌ kuní ka̱ kuꞌu̱n ni̱a̱ nuu̱ꞌ rey Asuero ndii,
kuní a̱ ku̱tatanꞌ ni̱a̱ niiꞌ i̱i̱n kuiya̱.
Iñu̱ taꞌanꞌ yoo̱ꞌ xikavá xa̱ꞌa̱n xavixínꞌ ña̱ naniꞌ mirra ka̱niiꞌ i̱i̱nꞌ ni̱a̱,
te̱ i̱nga̱ ka̱ iñu̱ taꞌan yoo̱ꞌ ndii,
ti̱kui xavixínꞌ xiinꞌ i̱nga̱ ka̱ nuu̱ꞌ xa̱ꞌa̱n ña̱ xikavá i̱i̱nꞌ ña̱ꞌaꞌ xakin ni̱a̱ i̱i̱nꞌ ni̱a̱.
13 Te̱ kii̱ꞌ xinu̱ kivi̱ꞌ ña̱ kutatanꞌ ni̱a̱ ja̱a̱nꞌ ndii,
kuaꞌa̱n ni̱a̱ nuu̱ꞌ rey ja̱a̱nꞌ,
te̱ ku̱vi̱ kaka̱n ni̱a̱ ndee ka̱ toto̱ ku̱i̱ꞌnu̱ ni̱a̱,
xiinꞌ ndee ka̱ ka̱a̱ nda̱tu̱nꞌ ña̱ ku̱ꞌu̱n nda̱ꞌaꞌ ni̱a̱,
uun suku̱nꞌ ni̱a̱,
ki̱e̱e̱ ni̱a̱ nde̱e̱ vi̱ꞌe̱ ña̱ꞌaꞌ,
te̱ nda̱tu̱nꞌ ko̱o̱ ni̱a̱ kuꞌu̱n ni̱a̱ nuu̱ꞌ rey ja̱a̱nꞌ.
14 Ña̱ꞌaꞌ ja̱a̱nꞌ ndii,
xa̱kuaa̱ꞌ kuaꞌa̱n ni̱a̱ nuu̱ꞌ rey,
te̱ ni̱a̱ꞌa̱ tu̱ku̱ kivi̱ꞌ na̱ndi̱koꞌ ni̱a̱ vi̱ꞌe̱ miiꞌ ndieeꞌ mi̱iꞌ ndiꞌiꞌ ña̱ꞌaꞌ te̱ ko̱to̱ ña̱ꞌaꞌ Saasgaz,
te̱ xitoꞌ sa̱kuuꞌ ña̱ꞌaꞌ,
ne̱ nduuꞌ musa rey ja̱a̱nꞌ.
Te̱ ja̱a̱nꞌ ndii,
te̱ ñaꞌma,
te̱ xikaꞌ nuuꞌ nuu̱ꞌ rey,
nduuꞌ ra̱.
Te̱ ña̱ꞌaꞌ ja̱a̱nꞌ ndii,
köo̱ꞌ kivi̱ꞌ kuꞌu̱n ka̱ ni̱a̱ nuu̱ꞌ rey ja̱a̱nꞌ naaꞌ kä̱na̱ ña̱ꞌaꞌ mi̱iꞌ ra̱,
ndisu̱ naaꞌ ni̱ xta̱ni̱ va̱ ra̱ nde̱e̱ ka̱ ne̱ ja̱a̱nꞌ ndii,
ka̱na̱ ña̱ꞌaꞌ mi̱iꞌ ra̱ xiinꞌ kivi̱ꞌ ni̱a̱,
sa̱kanꞌ vi̱ꞌ te̱ ku̱vi̱ kuꞌu̱n tu̱ku̱u̱ ni̱a̱ nuu̱ꞌ ra̱.
15 Te̱ Ester ndii,
ñaꞌ siꞌe̱ Abihail,
xi̱to̱ Mardoqueo,
ni̱ nduu̱ aꞌ,
te̱ Mardoqueo ja̱a̱nꞌ nduuꞌ te̱ ni̱ na̱ꞌi̱ ña̱ꞌaꞌ,
te̱ ni̱ sa̱kuaꞌnuꞌ ndaꞌvi ña̱ꞌaꞌ ra̱ nde̱e̱ naaꞌ ñaꞌ siꞌe̱ mi̱iꞌ ra̱.
Te̱ kii̱ꞌ ni̱ xa̱a̱ kivi̱ꞌ ña̱ kuꞌu̱n aꞌ nuu̱ꞌ rey ndii,
nï̱ xika̱n aꞌ nde̱e̱ i̱i̱n ña̱ꞌa̱ ko̱ni̱ꞌi̱ aꞌ kuꞌu̱n aꞌ.
Süu̱ꞌ ja̱a̱nꞌ ndii,
ña̱ ni̱ kaꞌa̱n Hegai,
te̱ ñaꞌma,
te̱ ndisoꞌ tyuunꞌ xaꞌa̱ꞌ ña̱ꞌaꞌ ja̱a̱nꞌ ku̱i̱ti̱ꞌ ni̱ niꞌi̱n aꞌ kii̱ꞌ ni̱ xaꞌa̱n aꞌ nuu̱ꞌ rey.
Te̱ kii̱ꞌ sa̱kanꞌ ndii,
sa̱kuuꞌ ne̱ yivi̱ꞌ,
ne̱ ni̱ xi̱ni̱ Ester ja̱a̱nꞌ ndii,
va̱ꞌa̱ kuni ni̱a̱ xini ña̱ꞌaꞌ ni̱a̱.
16 Te̱ ni̱ xaꞌa̱n ndi̱a̱ka̱ ra̱ Ester nuu̱ꞌ rey Asuero vi̱ꞌe̱ ra̱ miiꞌ nduꞌu̱ꞌ ra̱ xaꞌndia tyuunꞌ ra̱ yoo̱ꞌ tiꞌ uxi̱,
tiꞌ naniꞌ Tébet,
kii̱ꞌ xa̱ kuaꞌa̱n uxa̱ kuiya̱ ña̱ xaꞌndia tyuunꞌ ra̱.
17 Te̱ ni̱ xta̱ni̱ ka̱ rey Asuero Ester te̱ sa̱kanꞌ sa̱kuuꞌ i̱nga̱ ne̱ sa̱va̱,
ne̱ ni̱ xaꞌa̱n nuu̱ꞌ ra̱,
te̱ mani̱ꞌ ka̱ ni̱ ku̱u̱ ra̱ xiinꞌ ñaꞌ ja̱a̱nꞌ.
Sa̱kanꞌ na kuiiꞌ ni̱ tyi̱nduꞌu̱ꞌ ra̱ corona kaꞌnuꞌ xíniꞌ aꞌ,
te̱ ni̱ nda̱sa̱nduuꞌ ña̱ꞌaꞌ ra̱ reina,
te̱ ni̱ na̱ꞌi̱ aꞌ nuu̱ꞌ Vasti.
18 Ndi̱ꞌi̱ ja̱a̱nꞌ te̱ ni̱ xa̱ꞌa̱ ra̱ i̱i̱n vi̱koꞌ miiꞌ ni̱ yoo̱ kuaꞌa̱ꞌ ña̱ xaxi̱ꞌ ni̱ xa̱a̱ ra̱ xaꞌa̱ꞌ a̱ ña̱ kiꞌinꞌ kaꞌnuꞌ ra̱ Ester ja̱a̱nꞌ,
te̱ ni̱ ka̱na̱ ra̱ sa̱kuuꞌ te̱ ndiaa tyuunꞌ vie̱ xiinꞌ sa̱kuuꞌ te̱ xikaꞌ nuuꞌ nuu̱ꞌ ra̱ vi̱koꞌ ja̱a̱nꞌ,
te̱ ni̱ sa̱nuuꞌ ra̱ xu̱ꞌunꞌ xaniꞌ ña̱ ke̱ndiaa̱ꞌ yaꞌviꞌ ra̱ nda̱ꞌaꞌ ne̱ ñu̱u̱ ra̱.
Te̱ ni̱ ta̱xi̱ tu̱ ra̱ kuaꞌa̱ꞌ tu̱mani̱ꞌ nda̱ꞌaꞌ sa̱kuuꞌ ne̱ yivi̱ꞌ sa̱a̱ kuní a̱ sa̱a̱ i̱i̱n rey,
te̱ va̱ꞌa̱ nimá.
So̱ꞌo̱ ni̱ xa̱a̱ a̱ kii̱ꞌ ni̱ xi̱ni̱ Mardoqueo kuento ña̱ kuni ka̱ꞌni̱ꞌ te̱ yivi̱ꞌ rey Asuero
19 Te̱ kii̱ꞌ ni̱ ndu̱i̱i̱n sa̱kuuꞌ ña̱ꞌaꞌ sa̱va̱ ja̱a̱nꞌ i̱nga̱ vi̱ꞌe̱ ña̱ꞌaꞌ ndii,
xa̱ te̱ xitoꞌ yiꞌeꞌ vi̱ꞌe̱ rey ja̱a̱nꞌ ni̱ na̱ndu̱u̱ Mardoqueo nduꞌu̱ꞌ ra̱ yiꞌeꞌ rey.
20 Te̱ sa̱a̱ niiꞌ ni̱ kaꞌa̱n tyuunꞌ Mardoqueo xiinꞌ Ester ña̱ käꞌa̱n aꞌ miiꞌ ni̱ ki̱e̱e̱ aꞌ,
ni̱ nde̱e̱ ndee nuu̱ꞌ ne̱ yivi̱ꞌ nduuꞌ yu̱vaꞌ siꞌiꞌ aꞌ ndii,
ni̱ sa̱xinú naa saxinú aꞌ ña̱ ni̱ kaꞌa̱n ra̱ xiinꞌ aꞌ nde̱e̱ naa xaaꞌ aꞌ kii̱ꞌ ni̱ nduꞌu̱ꞌ aꞌ nuu̱ꞌ ra̱ kii̱ꞌ ni̱ sa̱kuaꞌnuꞌ ndaꞌvi ña̱ꞌaꞌ ra̱.
21 Untaꞌ kii̱ꞌ nduꞌu̱ꞌ Mardoqueo xitoꞌ ra̱ yiꞌeꞌ rey ndii,
ni̱ xi̱ni̱ so̱ꞌo̱ ra̱ ndatuꞌunꞌ tuní uvi̱ taꞌanꞌ te̱ xikaꞌ nuuꞌ nuu̱ꞌ rey ña̱ ka̱ꞌni̱ꞌ ra̱ rey ja̱a̱nꞌ.
I̱i̱n ra̱ naniꞌ Bigtán,
te̱ i̱nga̱ ra̱ naniꞌ Teres.
Te̱ uvi̱ sa̱aꞌ te̱ ja̱a̱nꞌ nduuꞌ te̱ ñaꞌma,
te̱ kuuꞌ nu̱uꞌ nuu̱ꞌ te̱ xíinꞌ te̱ xitoꞌ yiꞌeꞌ rey ja̱a̱nꞌ.
Te̱ ja̱a̱nꞌ ndii,
xiꞌé xa̱va̱ꞌa̱ ra̱ xini ra̱ rey,
sa̱kanꞌ na kuiiꞌ ndatuꞌunꞌ tuní ra̱ sa̱a̱ sa̱a̱ ra̱ te̱ ka̱ꞌni̱ꞌ ra̱ rey Asuero ja̱a̱nꞌ.
22 Te̱ kii̱ꞌ ni̱ xi̱ni̱ so̱ꞌo̱ Mardoqueo ña̱ ja̱a̱nꞌ ndii,
ni̱ kaꞌa̱n ra̱ xiinꞌ reina Ester xaꞌa̱ꞌ a̱,
te̱ ñaꞌ ja̱a̱nꞌ ni̱ xaꞌa̱n kaꞌa̱n xiinꞌ rey ña̱ ni̱ kaꞌa̱n Mardoqueo xiinꞌ aꞌ ja̱a̱nꞌ.
23 Te̱ kii̱ꞌ ni̱ nda̱tuꞌu̱nꞌ ndiꞌi̱ rey kiꞌinꞌ ne̱ yivi̱ꞌ xaꞌa̱ꞌ ña̱ ni̱ kaꞌa̱n Mardoqueo ja̱a̱nꞌ,
te̱ ni̱ ku̱nda̱ni̱ ra̱ ña̱ ña̱ ndi̱xa̱ xna̱ꞌa̱ nduuꞌ a̱ ndii,
ni̱ xa̱ꞌni̱ꞌ ra̱ uvi̱ sa̱aꞌ te̱ ñaꞌma ja̱a̱nꞌ,
ni̱ ka̱ta̱xkoꞌ ña̱ꞌaꞌ ra̱ nuu̱ꞌ ndu̱yu̱.
Te̱ ni̱ na̱ko̱so̱ꞌ sa̱kuuꞌ ña̱ ni̱ yoo̱ ja̱a̱nꞌ nuu̱ꞌ tu̱tu̱ miiꞌ nakoso̱ꞌ sa̱kuuꞌ ña̱ xkaꞌndíá miiꞌ nduꞌu̱ꞌ rey,
te̱ nakoó va̱ꞌa̱ a̱ vi̱ꞌe̱ ra̱.