So̱ꞌo̱ ni̱ xa̱a̱ a̱ kii̱ꞌ ni̱ ka̱na̱ Ester rey Asuero xiinꞌ Amán te̱ ku̱xi̱ ra̱ vi̱ꞌe̱ aꞌ
5
Kii̱ꞌ ni̱ xkaꞌndi̱a̱ uni̱ kivi̱ꞌ ndii,
ni̱ na̱kuiꞌnu̱ Ester soo̱ꞌ ti̱koo̱ꞌ ña̱ niꞌnuꞌ aꞌ ña̱ nduuꞌ aꞌ reina,
te̱ ni̱ ndiꞌvi̱ aꞌ ti̱xi̱n vi̱ꞌe̱ miiꞌ nduꞌu̱ꞌ rey,
ya̱ti̱n miiꞌ iinꞌ tei̱ kaꞌnuꞌ ra̱ miiꞌ nduꞌu̱ꞌ ra̱ xaꞌndia tyuunꞌ ra̱.
2 Te̱ kii̱ꞌ ni̱ xi̱ni̱ rey iinꞌ reina Ester nuu̱ꞌ ki̱ꞌe̱ ti̱xi̱n vi̱ꞌe̱ ra̱ ndii,
ni̱ na̱ku̱a̱tiaꞌ nimá ra̱ ni̱ xi̱ni̱ ña̱ꞌaꞌ ra̱.
Te̱ ni̱ ka̱ta̱ni̱ ra̱ ta̱tunꞌ tunꞌ oro,
tunꞌ niꞌiꞌ ra̱ nuu̱ꞌ aꞌ.
Sa̱kanꞌ te̱ ni̱ ku̱ya̱ti̱n Ester,
te̱ ni̱ tondi̱a̱ nda̱ꞌaꞌ aꞌ nuu̱ꞌ nu̱ꞌ.
3 Te̱ ni̱ nda̱tuꞌu̱nꞌ ña̱ꞌaꞌ rey ndii:
―¿Yo̱o̱ nduuꞌ a̱ ndoꞌoꞌ u̱nꞌ,
reina Ester?
¿Yo̱o̱ nduuꞌ a̱ kuni kaka̱n u̱nꞌ nuu̱ꞌ i̱?
Tee̱ꞌ ndee taꞌvi̱ꞌ sa̱va̱ miiꞌ xaꞌndia tyuunꞌ i̱ kaka̱n u̱nꞌ nuu̱ꞌ i̱ ndii,
ta̱xi̱ i̱ e̱ nda̱ꞌaꞌ u̱nꞌ ―ni̱ katyi̱ ra̱.
Te̱ ni̱ kaꞌa̱n Ester xiinꞌ ra̱ ndii:
4 ―Rey,
naaꞌ kuatiaꞌ nimá u̱nꞌ xini u̱nꞌ yuꞌu̱ ndii,
sa̱a̱ u̱nꞌ ña̱ va̱ꞌa̱ te̱ kuꞌu̱n u̱nꞌ miiꞌ nduꞌu̱ꞌ i̱ vi̱ti̱n xiinꞌ Amán te̱ ku̱xi̱ ndo̱ꞌ ña̱ xaxi̱ꞌ ña̱ ni̱ xa̱va̱ꞌa̱ i̱ xaꞌa̱n u̱nꞌ xaꞌa̱ꞌ a̱ ña̱ kiꞌinꞌ kaꞌnuꞌ i̱ yoꞌó,
rey ―ni̱ katyi̱ aꞌ.
5 Sa̱kanꞌ te̱ ni̱ kaꞌa̱n rey xiinꞌ te̱ xikaꞌ nuuꞌ nuu̱ꞌ ra̱ ndii:
―Kuaꞌan kiꞌi̱ꞌ ndo̱ꞌ te̱ na̱ndu̱kuꞌ ndo̱ꞌ Amán,
te̱ na xinu̱ ña̱ kaꞌán nimá reina Ester ―ni̱ katyi̱ ra̱.
Sa̱kanꞌ na kuiiꞌ ni̱ xaꞌa̱n rey xiinꞌ Amán,
te̱ ni̱ xi̱xi̱ ra̱ ña̱ xaxi̱ꞌ ña̱ ni̱ xa̱va̱ꞌa̱ reina Ester xaꞌa̱ꞌ ra̱.
6 Te̱ kii̱ꞌ ndieeꞌ ra̱ xiꞌiꞌ ra̱ vino,
te̱ ni̱ kaꞌa̱n rey Asuero xiinꞌ reina Ester ndii:
―Kaꞌa̱n xiinꞌ i̱ vi̱ti̱n nde̱e̱ ña̱ kuní u̱nꞌ.
¿Yo̱o̱ nduuꞌ ña̱ kaꞌán nimá u̱nꞌ xaꞌa̱ꞌ?
Tee̱ꞌ ndee taꞌvi̱ꞌ sa̱va̱ miiꞌ xaꞌndia tyuunꞌ i̱ kaka̱n u̱nꞌ nuu̱ꞌ i̱ ndii,
ta̱xi̱ i̱ e̱ nda̱ꞌaꞌ u̱nꞌ ―ni̱ katyi̱ ra̱.
7 Sa̱kanꞌ te̱ ni̱ kaꞌa̱n reina Ester xiinꞌ ra̱ ndii:
―Ña̱ xikán i̱ nuu̱ꞌ u̱nꞌ xiinꞌ ña̱ kaꞌán nimá i̱ xaꞌa̱ꞌ ndii,
ña̱ yo̱ꞌo̱ꞌ nduuꞌ a̱:
8 Naaꞌ kuatiaꞌ nimá u̱nꞌ xini u̱nꞌ yuꞌu̱,
te̱ na̱ku̱i̱i̱n yu̱ꞌuꞌ u̱nꞌ sa̱a̱ u̱nꞌ ña̱ kaka̱n i̱ nuu̱ꞌ u̱nꞌ ndii,
sa̱a̱ u̱nꞌ ña̱ va̱ꞌa̱ te̱ ki̱xi̱n tu̱ku̱u̱ u̱nꞌ xiinꞌ Amán vi̱ꞌe̱ i̱ tiaa̱n,
te̱ ku̱xi̱ ndo̱ꞌ ña̱ xaxi̱ꞌ ña̱ sa̱va̱ꞌa̱ tu̱ku̱u̱ i̱ xaꞌa̱ꞌ a̱ ña̱ kiꞌinꞌ kaꞌnuꞌ i̱ yoꞌó.
Sa̱kanꞌ te̱ kaꞌa̱n i̱ xiinꞌ u̱nꞌ yo̱o̱ nduuꞌ ña̱ kuni kaka̱n i̱ nuu̱ꞌ u̱nꞌ,
rey ―ni̱ katyi̱ aꞌ.
So̱ꞌo̱ ni̱ xa̱a̱ a̱ kii̱ꞌ sakooꞌ tu̱ꞌva̱ Amán ndu̱yu̱ miiꞌ ka̱ta̱xkoꞌ ra̱ Mardoqueo
9 Sa̱kanꞌ te̱ va̱ꞌa̱ va̱ kuni Amán ni̱ ke̱ta̱ ra̱ kuaꞌa̱n ra̱ kii̱ꞌ ndi̱ꞌi̱ ni̱ xi̱xi̱ ra̱.
Ndisu̱ kii̱ꞌ ni̱ xi̱ni̱ ra̱ nduꞌu̱ꞌ Mardoqueo yiꞌeꞌ vi̱ꞌe̱ rey ndii,
ni̱ na̱saa̱ꞌ xa̱va̱ꞌa̱ ra̱ ni̱ xi̱ni̱ ña̱ꞌaꞌ ra̱ xaꞌa̱ꞌ a̱ ka̱ nï̱ ndo̱ndi̱tyi̱ te̱ ja̱a̱nꞌ te̱ ki̱ꞌi̱n kaꞌnuꞌ ña̱ꞌaꞌ ra̱,
ni̱ nde̱e̱ nï̱ xa̱a̱ ra̱ kuenta kuuꞌ vi̱ꞌ Amán ja̱a̱nꞌ kii̱ꞌ xkaꞌndíá ra̱ i̱kanꞌ kuaꞌa̱n ra̱.
10 Ndisu̱ köo̱ꞌ a̱ ni̱ xa̱a̱ Amán,
te̱ ni̱ ke̱ta̱ ra̱ kuaꞌa̱n ra̱ vi̱ꞌe̱ ra̱.
Te̱ kii̱ꞌ ni̱ na̱xa̱a̱ ra̱ vi̱ꞌe̱ ra̱,
te̱ ni̱ ka̱na̱ ra̱ te̱ xiní taꞌanꞌ xiinꞌ ra̱,
xiinꞌ ñaꞌ siꞌi ra̱ Zeres,
11 te̱ ni̱ kaꞌa̱n ra̱ xiinꞌ sa̱kuuꞌ ni̱a̱ ña̱ te̱ kaꞌnuꞌ va̱ nduuꞌ ra̱,
te̱ kuaꞌa̱ꞌ tu̱ ña̱ vikaꞌ kumiꞌ ra̱,
te̱ kuaꞌa̱ꞌ va̱ tu̱ siꞌe̱ ra̱ yoo,
xiinꞌ xaꞌa̱ꞌ ña̱ ni̱ ka̱ni̱ꞌi̱ ña̱ꞌaꞌ rey nuu̱ꞌ sa̱kuuꞌ te̱ xaꞌndia tyuunꞌ xiinꞌ ra̱,
ña̱ ni̱ ta̱xi̱ rey i̱i̱n tyu̱u̱n kaꞌnuꞌ ka̱ nda̱ꞌaꞌ ra̱ te̱ sa̱kanꞌ tyu̱u̱n ña̱ xaaꞌ sa̱kuuꞌ te̱ ja̱a̱nꞌ.
12 Te̱ ni̱ kaꞌa̱n ka̱ Amán ndii:
―Te̱ siinꞌ tu̱ku̱u̱ ndii,
i̱i̱n nda̱a̱ꞌ yuꞌu̱ ku̱i̱ti̱ꞌ ni̱ ka̱na̱ reina Ester kuꞌu̱n ku̱xi̱ xiinꞌ rey Asuero ña̱ xaxi̱ꞌ ña̱ ni̱ xa̱va̱ꞌa̱ aꞌ xaꞌa̱ꞌ ra̱.
Te̱ xa̱ ni̱ kaꞌa̱n aꞌ xiinꞌ i̱ ña̱ kuꞌu̱n tu̱ i̱ tiaa̱n te̱ ku̱xi̱ i̱ xiinꞌ rey ña̱ xaxi̱ꞌ ña̱ sa̱va̱ꞌa̱ tu̱ku̱u̱ aꞌ xaꞌa̱ꞌ ra̱.
13 Ndisu̱ sa̱kuuꞌ ña̱ kaa̱ꞌ ndii,
ña̱ kuäsa̱ꞌ kuní nduuꞌ a̱ nuu̱ꞌ yuꞌu̱ naaꞌ kusaaꞌ nduꞌu̱ꞌ te̱ nduꞌu̱ꞌ te̱ judío,
te̱ naniꞌ Mardoqueo ja̱a̱nꞌ,
yiꞌeꞌ rey ―ni̱ katyi̱ ra̱.
14 Sa̱kanꞌ te̱ ni̱ kaꞌa̱n ñaꞌ siꞌi ra̱,
te̱ ni̱ kaꞌa̱n tu̱ sa̱kuuꞌ te̱ xiní taꞌanꞌ xiinꞌ ra̱ xiinꞌ ra̱ ndii:
―Kaꞌa̱n tyuunꞌ u̱nꞌ na ka̱sa̱ꞌa̱ te̱ yivi̱ꞌ i̱i̱n ndu̱yu̱,
te̱ ku̱miꞌ nu̱ꞌ oko̱ uꞌu̱n metro ña̱ sukun nu̱ꞌ,
te̱ ni̱a̱ꞌa̱ tiaa̱n kaꞌa̱n u̱nꞌ xiinꞌ rey te̱ ka̱ta̱xkoꞌ ndo̱ꞌ Mardoqueo nuu̱ꞌ tunꞌ ja̱a̱nꞌ.
Sa̱kanꞌ te̱ va̱ꞌa̱ kuni u̱nꞌ kii̱ꞌ kuꞌu̱n ku̱xi̱ u̱nꞌ xiinꞌ rey ―ni̱ katyi̱ ni̱a̱ xiinꞌ ra̱.
Te̱ ni̱ xta̱ni̱ Amán ña̱ ni̱ kaꞌa̱n ne̱ ja̱a̱nꞌ,
sa̱kanꞌ na ni̱ kaꞌa̱n tyuunꞌ ra̱,
te̱ ni̱ xa̱ꞌa̱ te̱ yivi̱ꞌ ndu̱yu̱ ja̱a̱nꞌ nuu̱ꞌ ki̱ꞌe̱ ra̱.