Yoꞌoꞌ kaꞌán a̱ xaꞌa̱ꞌ sutu̱, xiinꞌ te̱ vi̱ꞌe̱ Leví, te̱ ni̱ na̱ndi̱koꞌ ñu̱u̱ Jerusalén
12
Yoꞌoꞌ ku̱a̱xi̱ kivi̱ꞌ sa̱kuuꞌ sutu̱ xiinꞌ te̱ vi̱ꞌe̱ Leví,
te̱ ni̱ na̱ndi̱koꞌ xiinꞌ Josué,
xiinꞌ Zorobabel,
siꞌe̱ Salatiel:
Seraías xiinꞌ Jeremías xiinꞌ Esdras
2 xiinꞌ Amarías xiinꞌ Maluc xiinꞌ Hatús
3 xiinꞌ Secanías xiinꞌ Rehum xiinꞌ Meremot
4 xiinꞌ Iddo xiinꞌ Gineto xiinꞌ Abías
5 xiinꞌ Mijamín xiinꞌ Maadías xiinꞌ Bilga
6 xiinꞌ Semaías xiinꞌ Joiarib xiinꞌ Jedaías
7 xiinꞌ Salú xiinꞌ Amoc xiinꞌ Hilcías xiinꞌ i̱nga̱ Jedaías.
Ña̱ yo̱ꞌo̱ꞌ nduuꞌ kivi̱ꞌ sa̱kuuꞌ te̱ kuuꞌ nu̱uꞌ nuu̱ꞌ sutu̱ xiinꞌ nuu̱ꞌ ne̱ taꞌanꞌ ra̱ kivi̱ꞌ ña̱ ni̱ xa̱ꞌndi̱a̱ tyuunꞌ Josué.
8 Te̱ ña̱ yo̱ꞌo̱ꞌ nduuꞌ kivi̱ꞌ te̱ vi̱ꞌe̱ Leví:
Jesúa xiinꞌ Binúi xiinꞌ Cadmiel xiinꞌ Serebías xiinꞌ Judá xiinꞌ Matanías,
te̱ ja̱a̱nꞌ xiinꞌ i̱nga̱ te̱ ndiakaꞌ taꞌanꞌ xiinꞌ ra̱ nduuꞌ te̱ kuuꞌ nu̱uꞌ nuu̱ꞌ sa̱kuuꞌ te̱ xitaꞌ nuu̱ꞌ Ndiosí.
9 Te̱ taꞌanꞌ ra̱ Bacbuquías xiinꞌ te̱ naniꞌ Uni nduuꞌ te̱ ni̱ tyi̱ndi̱e̱eꞌ taꞌanꞌ xiinꞌ ra̱ kii̱ꞌ xaaꞌ ra̱ tyu̱u̱n nuu̱ꞌ Ndiosí.
10 Jesúa ni̱ nduu̱ yu̱vaꞌ Joiacim,
te̱ Joiacim ni̱ nduu̱ yu̱vaꞌ Eliasib,
te̱ Eliasib ni̱ nduu̱ yu̱vaꞌ Joiada,
11 te̱ Joiada ni̱ nduu̱ yu̱vaꞌ Jonatán,
te̱ Jonatán ni̱ nduu̱ yu̱vaꞌ Jadúa.
12 Kivi̱ꞌ ña̱ ni̱ nduu̱ Joiacim sutu̱ kuuꞌ nu̱uꞌ ndii,
ña̱ yo̱ꞌo̱ꞌ nduuꞌ kivi̱ꞌ i̱nga̱ ka̱ sutu̱,
te̱ ni̱ xa̱ꞌndi̱a̱ tyuunꞌ nuu̱ꞌ i̱ꞌi̱n ti̱ꞌvi̱:
Te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Seraías ndii,
Meraías ni̱ nduu̱ ra̱,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Jeremías ndii,
Hananías ni̱ nduu̱ ra̱.
13 Te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Esdras ndii,
Mesulam ni̱ nduu̱ ra̱,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Amarías ndii,
Johanán ni̱ nduu̱ ra̱,
14 Te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Melicú ndii,
Jonatán ni̱ nduu̱ ra̱,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Sebanías ndii,
José ni̱ nduu̱ ra̱.
15 Te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Harim ndii,
Adna ni̱ nduu̱ ra̱,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Meraiot ndii,
Helcai ni̱ nduu̱ ra̱.
16 Te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Iddo ndii,
Zacarías ni̱ nduu̱ ra̱,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Ginetón ndii,
Mesulam ni̱ nduu̱ ra̱.
17 Te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Abías ndii,
Zicri ni̱ nduu̱ ra̱,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Miniamín xiinꞌ ne̱ vi̱ꞌe̱ Moadías ndii,
Piltai ni̱ nduu̱ ra̱.
18 Te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Bilga ndii,
Samúa ni̱ nduu̱ ra̱,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Semaías ndii,
Jonatán ni̱ nduu̱ ra̱.
19 Te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Joiarib ndii,
Matenai ni̱ nduu̱ ra̱,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Jedaías ndii,
Uzi ni̱ nduu̱ ra̱.
20 Te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Salai ndii,
Calai ni̱ nduu̱ ra̱,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Amoc ndii,
Eber ni̱ nduu̱ ra̱.
21 Te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Hilcías ndii,
Hasabías ni̱ nduu̱ ra̱,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Jedaías ndii,
Natanael ni̱ nduu̱ ra̱.
22 Kii̱ꞌ ni̱ nduu̱ Eliasib,
xiinꞌ Joiada,
xiinꞌ Johanán,
xiinꞌ Jadúa te̱ kuuꞌ nu̱uꞌ nuu̱ꞌ sutu̱ ndii,
ni̱ na̱ko̱so̱ꞌ kivi̱ꞌ i̱ꞌi̱n te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ Leví,
xiinꞌ i̱ꞌi̱n kivi̱ꞌ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ sutu̱,
te̱ ni̱ xaꞌa̱n ndi̱koꞌ a̱ nde̱e̱ kivi̱ꞌ ña̱ ni̱ xa̱ꞌndi̱a̱ tyuunꞌ rey Darío,
te̱ nduuꞌ te̱ ni̱ ki̱e̱e̱ nuu̱ꞌ ñu̱ꞌuꞌ Persia.
23 Te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ Leví ndii,
ni̱ na̱ko̱so̱ꞌ kivi̱ꞌ ra̱ nuu̱ꞌ tu̱tu̱ miiꞌ ndieé sa̱kuuꞌ ne̱ yivi̱ꞌ tu̱tu̱ nde̱e̱ kii̱ꞌ ni̱ xa̱ꞌndi̱a̱ tyuunꞌ Johanán,
siꞌe̱ Eliasib.
24 Ña̱ yo̱ꞌo̱ꞌ nduuꞌ kivi̱ꞌ i̱ꞌi̱n te̱ kuuꞌ nu̱uꞌ nuu̱ꞌ ne̱ vi̱ꞌe̱ Leví:
Hasabías,
xiinꞌ Serebías,
xiinꞌ Jesúa,
siꞌe̱ Cadmiel.
Te̱ kii̱ꞌ kuní a̱ ka̱ka̱ nu̱u̱ ra̱ nuu̱ꞌ Ndiosí ndii,
te̱ i̱i̱n kuuꞌ xiinꞌ ra̱ ni̱ tyi̱ndi̱e̱eꞌ ña̱ꞌaꞌ xitaꞌ ra̱ ya̱a̱ nuu̱ꞌ Ndiosí,
te̱ taxiꞌ tu̱ ra̱ ña̱ tyi̱nda̱ni Ndiosí,
sa̱a̱ niiꞌ ni̱ kaꞌa̱n tyuunꞌ David,
te̱ ni̱ xika̱ nuuꞌ nu̱u̱ Ndiosí.
25 Te̱ kuuꞌ nu̱uꞌ nuu̱ꞌ te̱ xíinꞌ,
te̱ xitoꞌ yaka̱ ña̱ iinꞌ ya̱ti̱n yiꞌeꞌ ndii,
ña̱ yo̱ꞌo̱ꞌ nduuꞌ kivi̱ꞌ ra̱:
Matanías,
xiinꞌ Bacbuquías,
xiinꞌ Obadías,
xiinꞌ Mesulam,
xiinꞌ Talmón,
xiinꞌ Acub nduuꞌ ra̱.
26 Te̱ sa̱kuuꞌ te̱ ja̱a̱nꞌ ni̱ xika̱ i̱i̱n yivi̱ꞌ kii̱ꞌ ni̱ tiaku̱ Joacim,
siꞌe̱ Jesúa,
te̱ nduuꞌ si̱a̱niꞌ Josadac,
xiinꞌ kii̱ꞌ ni̱ nduu̱ Nehemías,
te̱ xaꞌndia tyuunꞌ ñu̱u̱ Jerusalén,
xiinꞌ kii̱ꞌ ni̱ xa̱a̱ Esdras,
te̱ keꞌi tu̱tu̱,
te̱ nduuꞌ tu̱ ra̱ sutu̱.
Yoꞌoꞌ kaꞌán a̱ xaꞌa̱ꞌ kii̱ꞌ ni̱ sa̱na̱kuaꞌa ne̱ yivi̱ꞌ nama̱ ña̱ ndasi i̱ꞌnu̱ ñu̱u̱ Jerusalén nda̱ꞌaꞌ Ndiosí
27 Kii̱ꞌ ni̱ xinu̱ nama̱ ñu̱u̱ Jerusalén ndii,
ni̱ sa̱na̱kuaꞌa ne̱ yivi̱ꞌ a̱ nda̱ꞌaꞌ Ndiosí,
sa̱kanꞌ na ni̱ na̱ndu̱kuꞌ ni̱a̱ sa̱kuuꞌ te̱ vi̱ꞌe̱ Leví miiꞌ ka̱ ndieeꞌ ra̱,
te̱ ni̱ xa̱ka̱ ña̱ꞌaꞌ ni̱a̱ kuaꞌa̱n ra̱ ñu̱u̱ Jerusalén te̱ ka̱ta̱ ra̱ ya̱a̱ nuu̱ꞌ Ndiosí xiinꞌ ñuu̱ꞌ arpa,
xiinꞌ ñuu̱ꞌ címbalo,
xiinꞌ ñuu̱ꞌ cítara xaꞌa̱ꞌ a̱ ña̱ xakaꞌnuꞌ ni̱a̱ Ndiosí ña̱ va̱ꞌa̱ kuni ni̱a̱ ña̱ ni̱ xinu̱ nama̱ ña̱ ndasi i̱ꞌnu̱ ñu̱u̱ ja̱a̱nꞌ.
28 Ni̱ ka̱na̱ ni̱a̱ mi̱iꞌ ndi̱ꞌi̱ te̱ tyu̱u̱n va̱ xitaꞌ nuu̱ꞌ Ndiosí,
te̱ ndieeꞌ sa̱kuuꞌ ñu̱u̱ ña̱ ñuꞌuꞌ ya̱ti̱n ñu̱u̱ Jerusalén,
xiinꞌ nde̱e̱ te̱ ndieeꞌ nuu̱ꞌ ñu̱ꞌuꞌ Netofa,
29 xiinꞌ te̱ ndieeꞌ ñu̱u̱ Gilgal,
xiinꞌ te̱ ndieeꞌ nuu̱ꞌ ñu̱ꞌuꞌ Geba,
xiinꞌ te̱ ndieeꞌ ñu̱u̱ Azmavet,
sa̱kanꞌ ña̱ sa̱kuuꞌ te̱ xitaꞌ ja̱a̱nꞌ ndii,
ni̱ xa̱ꞌa̱ ra̱ ñu̱u̱ kualiꞌ ndieeꞌ ra̱ sa̱a̱ kuaꞌa̱n xi̱i̱nꞌ ñu̱u̱ Jerusalén.
30 Sa̱kanꞌ te̱ ni̱ nda̱sa̱ndo̱o̱ xiinꞌ miiꞌ sutu̱,
xiinꞌ te̱ vi̱ꞌe̱ Leví,
ndi̱ꞌi̱ ja̱a̱nꞌ te̱ ni̱ nda̱sa̱ndo̱o̱ tu̱ ra̱ sa̱kuuꞌ ne̱ yivi̱ꞌ,
xiinꞌ yiꞌeꞌ ñu̱u̱,
xiinꞌ nama̱ ña̱ ndasi i̱ꞌnu̱ a̱.
31 Sa̱kanꞌ te̱ ni̱ kaꞌa̱n i̱ xiinꞌ sa̱kuuꞌ te̱ xaꞌndia tyuunꞌ nuu̱ꞌ ne̱ vi̱ꞌe̱ Judá ña̱ ka̱a̱ ra̱ nuu̱ꞌ nama̱,
te̱ ni̱ nda̱sa̱i̱i̱n tu̱ i̱ uvi̱ ti̱ꞌvi̱ naꞌnuꞌ te̱ xitaꞌ,
te̱ ki̱e̱ndu̱u̱ kuꞌu̱n nuu̱ꞌ nama̱ ja̱a̱nꞌ,
i̱i̱n ti̱ꞌvi̱ ra̱ so̱ꞌo̱ kuꞌu̱n nuu̱ꞌ nama̱ nda̱ꞌaꞌ ku̱a̱ꞌa̱ a̱ miiꞌ yoo yiꞌeꞌ ña̱ kuaꞌa̱n Miiꞌ Xitíá Mi̱ꞌiꞌ.
32 Te̱ xata̱ꞌ te̱ xitaꞌ ja̱a̱nꞌ ndikún Osaías,
xiinꞌ taꞌvi̱ꞌ sa̱va̱ te̱ kuuꞌ nu̱uꞌ nuu̱ꞌ ne̱ vi̱ꞌe̱ Judá,
33 xiinꞌ Azarías,
xiinꞌ Esdras xiinꞌ Mesulam,
34 xiinꞌ Judá,
xiinꞌ Benjamín xiinꞌ Semaías xiinꞌ Jeremías.
35 Te̱ xata̱ꞌ te̱ ja̱a̱nꞌ ndikún sa̱kuuꞌ sutu̱ te̱ niꞌiꞌ nda̱tyuunꞌ tunꞌ niꞌiꞌ i̱tyiꞌ,
i̱i̱n ra̱ naniꞌ Zacarías,
te̱ nduuꞌ siꞌe̱ Jonatán,
te̱ Jonatán nduuꞌ siꞌe̱ Semaías,
te̱ Semaías nduuꞌ siꞌe̱ Matanías,
te̱ Matanías nduuꞌ siꞌe̱ Micaías,
te̱ Micaías nduuꞌ siꞌe̱ Zacur,
te̱ Zacur nduuꞌ siꞌe̱ Asaf.
36 Te̱ kuaꞌa̱n tu̱ ña̱ni̱ Zacarías ja̱a̱nꞌ,
te̱ naniꞌ Semaías,
xiinꞌ Azarael,
xiinꞌ Milalai xiinꞌ Gilalai,
xiinꞌ Maai xiinꞌ Natanael xiinꞌ Judá xiinꞌ Hanani xandaaꞌ ra̱ ñuu̱ꞌ sa̱a̱ niiꞌ ni̱ sa̱niaꞌá ña̱ꞌaꞌ David,
te̱ ni̱ xika̱ nuuꞌ nuu̱ꞌ Ndiosí.
Te̱ niꞌiꞌ i̱tyiꞌ Esdras,
te̱ keꞌi tu̱tu̱,
nuu̱ꞌ sa̱kuuꞌ te̱ ja̱a̱nꞌ ki̱e̱ndu̱u̱ ra̱ kuaꞌa̱n ra̱ .
37 Te̱ kii̱ꞌ ni̱ xa̱a̱ ra̱ miiꞌ yoo yiꞌeꞌ ña̱ naniꞌ Ti̱ko̱ꞌyoꞌ ndii,
ni̱ ka̱a̱ nda̱ku ra̱ kuato̱ ña̱ kuaꞌa̱n miiꞌ naá ñu̱u̱ David kuaꞌa̱n ka̱a̱ ra̱ nuu̱ꞌ nama̱.
Te̱ ni̱ xkaꞌndi̱a̱ ra̱ ya̱ti̱n vi̱ꞌe̱ miiꞌ ni̱ nduꞌu̱ꞌ David,
te̱ ni̱ na̱xa̱a̱ ra̱ nde̱e̱ miiꞌ yoo yiꞌeꞌ ña̱ naniꞌ Miiꞌ Kieeꞌ Ti̱kui,
xi̱i̱nꞌ ñu̱u̱ xtoꞌniꞌ miiꞌ ketaꞌ ñu̱ꞌu̱.
38 Te̱ i̱nga̱ ti̱ꞌvi̱ te̱ xitaꞌ ya̱a̱ nuu̱ꞌ Ndiosí ni̱ ki̱ꞌi̱n kuaꞌa̱n tu̱ku̱ taꞌviꞌ nuu̱ꞌ nama̱ ja̱a̱nꞌ,
te̱ kuaꞌa̱n tu̱ yuꞌu̱ xiinꞌ te̱ ja̱a̱nꞌ,
te̱ kuaꞌa̱n tu̱ sa̱va̱ ne̱ yivi̱ꞌ xiinꞌ i̱,
ni̱ xa̱ꞌaꞌ ndu̱ nde̱e̱ miiꞌ iinꞌ vi̱ꞌe̱ sukun ña̱ naniꞌ Kuaꞌa̱ꞌ Nuꞌu̱,
te̱ ni̱ xaꞌa̱n ndi̱koꞌ ndu̱ nde̱e̱ miiꞌ ni̱ ku̱ndiká nuu̱ꞌ nama̱.
39 Ni̱ xkaꞌndi̱a̱ ndu̱ nde̱e̱ ya̱ti̱n yiꞌeꞌ ña̱ naniꞌ Efraín,
te̱ ni̱ xkaꞌndi̱a̱ tu̱ ndu̱ yiꞌeꞌ ña̱ naniꞌ Ya̱taꞌ,
xiinꞌ yiꞌeꞌ ña̱ naniꞌ Ti̱a̱kaꞌ,
xiinꞌ miiꞌ iinꞌ vi̱ꞌe̱ sukun ña̱ naniꞌ Hananeel,
xiinꞌ miiꞌ iinꞌ vi̱ꞌe̱ sukun ña̱ naniꞌ Hamea,
te̱ ni̱ xaꞌa̱n ndi̱koꞌ ndu̱ nde̱e̱ yiꞌeꞌ ña̱ naniꞌ miiꞌ kieeꞌ Mbe̱e̱,
te̱ ni̱ xi̱kuii̱n ndu̱ nde̱e̱ yiꞌeꞌ ña̱ naniꞌ Vi̱ꞌe̱ Ka̱a̱.
40 Uvi̱ sa̱aꞌ ti̱ꞌvi̱ te̱ xitaꞌ ya̱a̱ ja̱a̱nꞌ ni̱ xi̱kuita̱ ta̱taꞌviꞌ yiꞌeꞌ yu̱kunꞌ Ndiosí,
sa̱kanꞌ tu̱ ni̱ xa̱a̱ yuꞌu̱ xiinꞌ taꞌvi̱ꞌ sa̱va̱ te̱ xaꞌndia tyuunꞌ te̱ kuaꞌa̱n xiinꞌ i̱ ja̱a̱nꞌ,
41 xiinꞌ sutu̱,
te̱ nduuꞌ:
Eliacim,
xiinꞌ Maaseías xiinꞌ Miniamín xiinꞌ Micaías xiinꞌ Elioenai xiinꞌ Zacarías xiinꞌ Hananías ndisoꞌ ra̱ nda̱tyuunꞌ tunꞌ niꞌiꞌ i̱tyiꞌ,
42 te̱ xiinꞌ te̱ xitaꞌ ya̱a̱ ja̱a̱nꞌ ku̱a̱xi̱ Maasías xiinꞌ Semaías xiinꞌ Eleazar xiinꞌ Uzi xiinꞌ Johanán xiinꞌ Malquías xiinꞌ Elam xiinꞌ Ezer.
Te̱ ni̱ xa̱ꞌaꞌ ra̱ xitaꞌ tiꞌeꞌ va̱ ra̱,
te̱ Izrahías ni̱ nduu̱ te̱ niꞌiꞌ i̱tyiꞌ nuu̱ꞌ ra̱.
43 Te̱ kivi̱ꞌ ja̱a̱nꞌ ni̱ na̱soko̱ꞌ sutu̱ kuaꞌa̱ꞌ xa̱va̱ꞌa̱ ki̱tiꞌ nuu̱ꞌ Ndiosí,
te̱ va̱ꞌa̱ xa̱va̱ꞌa̱ ni̱ ku̱ni̱ sa̱kuuꞌ ne̱ yivi̱ꞌ,
sa̱kanꞌ ña̱ ni̱ sa̱ku̱a̱tiaꞌ va̱ Ndiosí nimá ni̱a̱.
Ña̱ꞌaꞌ xiinꞌ ne̱ kualiꞌ ndii,
va̱ꞌa̱ yaꞌa̱ tu̱ ni̱ ku̱ni̱ ne̱ ja̱a̱nꞌ,
te̱ nde̱e̱ xikaꞌ vi̱ꞌ tiakú kuaaꞌ ne̱ ndieeꞌ ñu̱u̱ Jerusalén xaꞌa̱ꞌ a̱ ña̱ sii̱ꞌ va̱ kuni ni̱a̱.
Yoꞌoꞌ kaꞌán a̱ xaꞌa̱ꞌ ña̱ꞌa̱ ña̱ kayá ka̱xi̱ꞌ sutu̱, xiinꞌ te̱ Leví, xiinꞌ te̱ xitoꞌ yiꞌeꞌ, xiinꞌ te̱ xitaꞌ ya̱a̱
44 Te̱ kivi̱ꞌ ja̱a̱nꞌ ni̱ ta̱va̱ꞌ ra̱ te̱ yivi̱ꞌ,
te̱ ko̱to̱ yaka̱ miiꞌ nakayá ña̱ ndiaa yaꞌviꞌ,
xiinꞌ ña̱ nasoko̱ꞌ ne̱ yivi̱ꞌ,
xiinꞌ ña̱ saviꞌ ña̱ nakuixaꞌ nu̱uꞌ ñu̱ꞌuꞌ miiꞌ xikaꞌ ni̱a̱,
xiinꞌ ña̱ uxi̱ xata̱ꞌ i̱ꞌi̱n siento ña̱ ni̱ na̱ku̱i̱xa̱ miiꞌ xikaꞌ i̱ꞌi̱n ni̱a̱.
Te̱ ni̱ na̱ti̱i̱n ra̱ nda̱ꞌaꞌ ne̱ ndieeꞌ ñu̱u̱ ña̱ ñuꞌuꞌ xaꞌa̱ꞌ kuꞌu̱ sa̱kuuꞌ ña̱ ku̱a̱xi̱ ndi̱a̱ka̱ ni̱a̱ nda̱ꞌaꞌ sutu̱ xiinꞌ nda̱ꞌaꞌ te̱ vi̱ꞌe̱ Leví sa̱a̱ niiꞌ kaꞌán tu̱ꞌu̱n nde̱iꞌ Ndiosí.
Te̱ ne̱ Judá ndii,
va̱ꞌa̱ xa̱va̱ꞌa̱ kuni ni̱a̱ xini ni̱a̱ sutu̱,
te̱ sa̱kanꞌ tu̱ va̱ꞌa̱ kuni ni̱a̱ xini ni̱a̱ te̱ vi̱ꞌe̱ Leví,
te̱ xikaꞌ nuuꞌ ti̱xi̱n yu̱kunꞌ.
45 Sa̱kanꞌ ña̱ ni̱ xika̱ nu̱u̱ va̱ꞌa̱ sa̱kuuꞌ ra̱ nuu̱ꞌ Ndiosí,
te̱ ni̱ xi̱kuiꞌni̱ tu̱ ra̱ xaꞌa̱ꞌ ku̱a̱tyi̱ ni̱a̱ nuu̱ꞌ a̱,
te̱ sa̱kanꞌ tu̱ te̱ xitaꞌ ya̱a̱,
xiinꞌ te̱ xitoꞌ yiꞌeꞌ ñu̱u̱ sa̱a̱ niiꞌ kaꞌán tyuunꞌ rey David,
te̱ sa̱kanꞌ tu̱ ni̱ kaꞌa̱n tyuunꞌ Salomón,
siꞌe̱ ra̱.
46 Ku̱a̱tyi̱ ndii,
nde̱e̱ xta̱ꞌanꞌ kii̱ꞌ ni̱ xika̱ rey David i̱i̱n yivi̱ꞌ,
xiinꞌ Asaf ndii,
ni̱ yoo̱ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ xakaꞌnuꞌ ra̱ Ndiosí xiinꞌ nuu̱ꞌ te̱ xitaꞌ ya̱a̱ ña̱ taxiꞌ ra̱ ña̱ tyi̱nda̱ni a̱.
47 Te̱ sa̱kuuꞌ ne̱ vi̱ꞌe̱ Israel kii̱ꞌ ni̱ tiaku̱ Zorobabel xiinꞌ kii̱ꞌ ni̱ tiaku̱ Nehemías ndii,
ni̱ ta̱xi̱ ni̱a̱ ña̱ xaxi̱ꞌ nda̱ꞌaꞌ te̱ xitaꞌ ya̱a̱ xiinꞌ nda̱ꞌaꞌ te̱ xitoꞌ yiꞌeꞌ nama̱ ñu̱u̱,
te̱ xa̱ i̱ꞌi̱n xa̱ i̱ꞌi̱n kivi̱ꞌ ni̱ ta̱xi̱ ni̱a̱ i̱ꞌi̱n a̱,
te̱ ni̱ ta̱xi̱ tu̱ ni̱a̱ a̱ nda̱ꞌaꞌ te̱ vi̱ꞌe̱ Leví ña̱ xaxi̱ꞌ ña̱ kande̱iꞌ kuꞌu̱n nda̱ꞌaꞌ te̱ ja̱a̱nꞌ,
te̱ sa̱kanꞌ tu̱ ni̱ ta̱xi̱ te̱ ja̱a̱nꞌ nda̱ꞌaꞌ si̱a̱niꞌ xikaꞌ Aarón ña̱ kande̱iꞌ na̱ꞌi̱ te̱ ja̱a̱nꞌ.