Yoꞌoꞌ kaꞌán a̱ xaꞌa̱ꞌ ne̱ Israel, ne̱ ni̱ na̱ku̱ndiee̱ ñu̱u̱ Jerusalén
11
Te̱ xaꞌndia tyuunꞌ nuu̱ꞌ ne̱ vi̱ꞌe̱ Israel ndii,
ñu̱u̱ Jerusalén ni̱ ndoo̱ ra̱ ndieeꞌ ra̱.
Ndisu̱ sa̱kuuꞌ i̱nga̱ ne̱ yivi̱ꞌ ja̱a̱nꞌ ndii,
ni̱ ka̱ti̱n ni̱a̱ sa̱kanꞌ te̱ i̱i̱n nda̱a̱ꞌ i̱i̱n nda̱a̱ꞌ ku̱i̱ti̱ꞌ ne̱ uxi̱ ti̱ꞌvi̱ ja̱a̱nꞌ ndoo̱ ku̱nduꞌu̱ꞌ ñu̱u̱ Jerusalén,
ña̱ su̱ꞌu̱n,
te̱ i̱nga̱ ti̱ꞌvi̱ ne̱ íin taꞌan ndii,
ñu̱u̱ mi̱iꞌ ne̱ ja̱a̱nꞌ miiꞌ xa̱ ni̱ ndiee̱ ni̱a̱ nuꞌu̱ ni̱a̱ ku̱ndi̱e̱e̱ ni̱a̱.
2 Te̱ ni̱ sa̱ñuꞌuꞌ ne̱ yivi̱ꞌ sa̱kuuꞌ te̱ yivi̱ꞌ,
te̱ ni̱ xika̱n mi̱iꞌ ña̱ ndo̱o̱ ra̱ ku̱ndi̱e̱e̱ ra̱ ñu̱u̱ Jerusalén.
3 Ña̱ yo̱ꞌo̱ꞌ nduuꞌ kivi̱ꞌ te̱ kuuꞌ nu̱uꞌ nuu̱ꞌ ne̱ yivi̱ꞌ,
te̱ ni̱ ndiee̱ nda̱ꞌaꞌ ñu̱u̱,
te̱ ni̱ xika̱n ndoo̱ ku̱ndi̱e̱e̱ ñu̱u̱ Jerusalén,
te̱ sa̱va̱ ra̱ ni̱ ndoo̱ ndieeꞌ nuu̱ꞌ ñu̱ꞌuꞌ te̱ vi̱ꞌe̱ Judá.
Te̱ sa̱va̱ ne̱ vi̱ꞌe̱ Israel,
xiinꞌ sutu̱,
xiinꞌ te̱ tyindieeꞌ taꞌanꞌ xiinꞌ sutu̱,
xiinꞌ te̱ xatyuunꞌ ti̱xi̱n yu̱kunꞌ kaꞌnuꞌ,
xiinꞌ si̱a̱niꞌ xikaꞌ te̱ ni̱ xika̱ nu̱u̱ nuu̱ꞌ Salomón ndii,
i̱ꞌi̱n ra̱ ni̱ ndoo̱ ndieeꞌ nuu̱ꞌ ñu̱ꞌuꞌ mi̱iꞌ ra̱,
xiinꞌ ñu̱u̱ mi̱iꞌ ra̱.
4 Ñu̱u̱ Jerusalén ja̱a̱nꞌ ni̱ ndoo̱ sa̱va̱ te̱ si̱a̱niꞌ xikaꞌ te̱ vi̱ꞌe̱ Judá xiinꞌ sa̱va̱ te̱ vi̱ꞌe̱ Benjamín.
Te̱ ña̱ yo̱ꞌo̱ꞌ nduuꞌ kivi̱ꞌ si̱a̱niꞌ xikaꞌ te̱ vi̱ꞌe̱ Judá,
te̱ ni̱ ndoo̱ ndieeꞌ i̱kanꞌ:
Ataías,
te̱ nduuꞌ siꞌe̱ Uzías,
te̱ siꞌe̱ Zacarías nduuꞌ Uzías,
te̱ siꞌe̱ Amarías nduuꞌ Zacarías,
te̱ siꞌe̱ Sefatías nduuꞌ Amarías,
te̱ siꞌe̱ Mahalaleel nduuꞌ Sefatías.
Te̱ sa̱kuuꞌ te̱ kaa̱ꞌ nduuꞌ si̱a̱niꞌ xikaꞌ Fares.
5 Te̱ sa̱kanꞌ tu̱ Maasías,
siꞌe̱ Baruc,
te̱ siꞌe̱ Colhoze nduuꞌ Baruc,
te̱ siꞌe̱ Hazaías nduuꞌ Colhoze,
te̱ siꞌe̱ Adaías nduuꞌ Hazaías,
te̱ siꞌe̱ Joiarib nduuꞌ Adaías,
te̱ siꞌe̱ Zacarías nduuꞌ Joiarib,
te̱ siꞌe̱ Siloni nduuꞌ Zacarías.
6 Te̱ ña̱ sa̱kuuꞌ si̱a̱niꞌ xikaꞌ Fares,
te̱ ni̱ ndoo̱ ndieeꞌ ñu̱u̱ Jerusalén ndii,
ku̱miꞌ siento uni̱ xi̱ko̱ uni̱a̱ ni̱ ku̱u̱ mi̱iꞌ ndi̱ꞌi̱ te̱ xiní ku̱ntaꞌanꞌ.
7 Ña̱ yo̱ꞌo̱ꞌ nduuꞌ kivi̱ꞌ te̱ si̱a̱niꞌ xikaꞌ Benjamín,
te̱ ni̱ ndoo̱ ndieeꞌ ñu̱u̱ Jerusalén:
Salú,
siꞌe̱ Mesulam,
te̱ siꞌe̱ Joed nduuꞌ Mesulam,
te̱ siꞌe̱ Pedaías nduuꞌ Joed,
te̱ siꞌe̱ Colaías nduuꞌ Pedaías,
te̱ siꞌe̱ Maasías nduuꞌ Colaías,
te̱ siꞌe̱ Itiel nduuꞌ Maasías,
te̱ siꞌe̱ Jesaías nduuꞌ Itiel.
8 Te̱ xiinꞌ te̱ ja̱a̱nꞌ tu̱ kaꞌni̱ ña̱ni̱ ra̱,
te̱ naniꞌ Gabai,
xiinꞌ Salai.
Te̱ íin siento oko̱ uni̱a̱ kuuꞌ ra̱ ña̱ sa̱kuuꞌ ra̱.
9 Te̱ kuuꞌ nu̱uꞌ nu̱uꞌ sa̱kuuꞌ te̱ ja̱a̱nꞌ ndii,
Joel,
siꞌe̱ Zicri,
nduuꞌ ra̱,
te̱ te̱ uvi̱ ndii,
Judá,
siꞌe̱ Senúa,
nduuꞌ te̱ kuuꞌ nu̱uꞌ nuu̱ꞌ sa̱kuuꞌ ne̱ ndieeꞌ ñu̱u̱ Jerusalén.
10 Te̱ kuenta sutu̱,
te̱ ni̱ ndoo̱ ndieeꞌ ñu̱u̱ Jerusalén ndii,
ña̱ yo̱ꞌo̱ꞌ nduuꞌ kivi̱ꞌ ra̱:
Jedaías,
siꞌe̱ Joiarib,
xiinꞌ Jaquín,
11 xiinꞌ Seraías,
siꞌe̱ Hilcías,
te̱ siꞌe̱ Mesulam nduuꞌ Hilcías,
te̱ siꞌe̱ Sadoc nduuꞌ Mesulam,
te̱ siꞌe̱ Meraiot nduuꞌ Sadoc,
te̱ siꞌe̱ Ahitob nduuꞌ Meraiot,
te̱ ja̱a̱nꞌ ni̱ nduu̱ tu̱ te̱ kuuꞌ nu̱uꞌ ti̱xi̱n yu̱kunꞌ Ndiosí.
12 Te̱ xiinꞌ te̱ ja̱a̱nꞌ tu̱ kaꞌni̱ uni̱a̱ siento oko̱ uvi̱ te̱ i̱i̱n kuuꞌ xiinꞌ ra̱,
te̱ xatyuunꞌ ti̱xi̱n yu̱kunꞌ ja̱a̱nꞌ.
Te̱ i̱kanꞌ tu̱ kaꞌni̱ Adaías,
siꞌe̱ Jeroham,
te̱ siꞌe̱ Pelaías ni̱ nduu̱ Jeroham,
te̱ siꞌe̱ Amsi ni̱ nduu̱ Pelaías,
te̱ siꞌe̱ Zacarías ni̱ nduu̱ Amsi,
te̱ siꞌe̱ Pasur ni̱ nduu̱ Zacarías,
te̱ siꞌe̱ Malquías ni̱ nduu̱ Pasur.
13 Xiinꞌ kiꞌinꞌ te̱ i̱i̱n kuuꞌ xiinꞌ ra̱,
te̱ xaꞌndia tyuunꞌ nuu̱ꞌ ne̱ i̱i̱n kuuꞌ xiinꞌ i̱ꞌi̱n ra̱,
te̱ ja̱a̱nꞌ ndii,
uvi̱ siento uvi̱ xi̱ko̱ uvi̱ kuuꞌ ra̱,
te̱ i̱kanꞌ kaꞌni̱ tu̱ Amasai,
siꞌe̱ Azareel,
te̱ siꞌe̱ Azai nduuꞌ Azareel,
te̱ siꞌe̱ Mesilemot nduuꞌ Azai,
te̱ siꞌe̱ Imer nduuꞌ Mesilemot.
14 Te̱ kaꞌni̱ tu̱ kiꞌinꞌ te̱ i̱i̱n kuuꞌ xiinꞌ ra̱,
te̱ ndi̱e̱eꞌ xa̱va̱ꞌa̱ ku̱ntaꞌanꞌ miiꞌ yoo ñuꞌu̱,
te̱ ja̱a̱nꞌ ndii,
siento oko̱ uni̱a̱ kuuꞌ ra̱,
te̱ te̱ xaꞌndia tyuunꞌ nuu̱ꞌ te̱ ja̱a̱nꞌ ndii,
Zabdiel,
siꞌe̱ Gedolim,
nduuꞌ ra̱.
15 Te̱ kuenta te̱ vi̱ꞌe̱ Leví,
te̱ ni̱ ndoo̱ ndieeꞌ ñu̱u̱ Jerusalén ndii,
ña̱ yo̱ꞌo̱ꞌ nduuꞌ kivi̱ꞌ ra̱:
Semaías,
siꞌe̱ Hasub,
te̱ siꞌe̱ Azricam nduuꞌ Hasub,
te̱ siꞌe̱ Hasabías nduuꞌ Azricam,
te̱ siꞌe̱ Buni nduuꞌ Hasabías.
16 Te̱ Sabetai xiinꞌ Jozabad ni̱ nduu̱ te̱ xaꞌndia tyuunꞌ nuu̱ꞌ ne̱ vi̱ꞌe̱ Leví,
te̱ ni̱ ndiso̱ tyuunꞌ tu̱ ra̱ kii̱ꞌ ni̱ xa̱tyuunꞌ te̱ yivi̱ꞌ xaꞌa ra̱ nama̱ ña̱ ndasi i̱ꞌnu̱ yu̱kunꞌ kaꞌnuꞌ,
17 xiinꞌ Matanías,
siꞌe̱ Micaía,
te̱ siꞌe̱ Zabdi nduuꞌ Micaía,
te̱ siꞌe̱ Asaf nduuꞌ Zabdi.
Te̱ kuuꞌ nu̱uꞌ nuu̱ꞌ te̱ xitaꞌ ti̱xi̱n yu̱kunꞌ,
te̱ su̱vi̱ ra̱ xaꞌaꞌ xiinꞌ ya̱a̱ kii̱ꞌ xitaꞌ ne̱ yivi̱ꞌ xiinꞌ kii̱ꞌ kaꞌán ni̱a̱ xiinꞌ Ndiosí taxiꞌ ni̱a̱ ña̱ tyi̱nda̱ni a̱.
Xiinꞌ Bacbuquías,
te̱ nduuꞌ te̱ uvi̱ nuu̱ꞌ sa̱kuuꞌ ña̱ni̱ ra̱,
xiinꞌ Abda,
te̱ nduuꞌ siꞌe̱ Samúa,
te̱ siꞌe̱ Galal nduuꞌ Samúa,
te̱ siꞌe̱ Jedutún nduuꞌ Galal.
18 Te̱ ña̱ sa̱kuuꞌ te̱ vi̱ꞌe̱ Leví,
te̱ ni̱ ndoo̱ ndieeꞌ ñu̱u̱ su̱ꞌu̱n Jerusalén ndii,
uvi̱ siento ku̱miꞌ xi̱ko̱ ku̱miꞌ kuuꞌ ra̱.
19 Te̱ xitoꞌ yiꞌeꞌ ndii,
i̱i̱n ra̱ naniꞌ Acub,
te̱ i̱nga̱ ra̱ naniꞌ Talmón xiinꞌ sa̱kuuꞌ ña̱ni̱ ra̱,
ña̱ sa̱kuuꞌ ra̱ ndii,
sineto uni̱ xi̱ko̱ uxi̱ uvi̱ kuuꞌ ra̱.
20 Te̱ sa̱kuuꞌ i̱nga̱ ka̱ ne̱ vi̱ꞌe̱ Israel,
xiinꞌ sutu̱,
xiinꞌ te̱ vi̱ꞌe̱ Leví ndii,
tu̱ku̱ xaanꞌ ni̱ na̱ku̱ndiee̱ ni̱a̱,
i̱ꞌi̱n ni̱a̱ ni̱ na̱ku̱ndiee̱ ñu̱u̱ mi̱iꞌ ni̱a̱ ña̱ ñuꞌuꞌ nuu̱ꞌ ñu̱ꞌuꞌ Judá.
21 Te̱ xatyuunꞌ ti̱xi̱n yu̱kunꞌ kaꞌnuꞌ ndii,
xiki̱ꞌ ña̱ naniꞌ Ofel ni̱ xi̱ku̱ndiee̱ ra̱,
te̱ Ziha,
xiinꞌ Gispa ni̱ nduu̱ te̱ xaꞌndia tyuunꞌ nuu̱ꞌ ra̱.
22 Te̱ xaꞌndia tyuunꞌ nuu̱ꞌ te̱ vi̱ꞌe̱ Leví ñu̱u̱ Jerusalén ndii,
Uzi nduuꞌ ra̱,
te̱ siꞌe̱ Bani nduuꞌ ra̱,
te̱ siꞌe̱ Hasabías nduuꞌ Bani ja̱a̱nꞌ,
te̱ siꞌe̱ Matanías nduuꞌ Hasabías,
te̱ siꞌe̱ Micaía nduuꞌ Matanías,
te̱ si̱a̱niꞌ xikaꞌ Asaf nduuꞌ sa̱kuuꞌ te̱ kaa̱ꞌ.
Te̱ su̱vi̱ tu̱ ra̱ nduuꞌ te̱ xaꞌaꞌ xiinꞌ ya̱a̱ kii̱ꞌ xakaꞌnuꞌ ne̱ yivi̱ꞌ Ndiosí ti̱xi̱n yu̱kunꞌ.
23 Te̱ mi̱iꞌ rey ni̱ tyi̱nduꞌu̱ꞌ i̱i̱n nde̱iꞌ ña̱ kaꞌán sa̱a̱ kuní a̱ sa̱tyuunꞌ i̱ꞌi̱n te̱ ja̱a̱nꞌ i̱ꞌi̱n kivi̱ꞌ kii̱ꞌ xitaꞌ ra̱,
te̱ kaꞌán tu̱ a̱ sa̱a̱ kuní a̱ sa̱mani̱ꞌ ña̱ꞌaꞌ ne̱ yivi̱ꞌ ña̱ xaxi̱ꞌ i̱ꞌi̱n kivi̱ꞌ kuaꞌa̱n.
24 Te̱ Petaías,
siꞌe̱ Mesezabeel,
te̱ nduuꞌ si̱a̱niꞌ xikaꞌ Zera,
te̱ nduuꞌ siꞌe̱ Judá,
ni̱ nduu̱ te̱ tyuunꞌ ne̱ vi̱ꞌe̱ Israel,
te̱ xikuiꞌní xaꞌa̱ꞌ ni̱a̱ nuu̱ꞌ rey xaꞌa̱ꞌ ndee ka̱ ña̱ ndoꞌoꞌ ni̱a̱.
Yoꞌoꞌ kaꞌán a̱ xaꞌa̱ꞌ ne̱ judío, ne̱ ni̱ xi̱ku̱ndiee̱ nda̱ꞌaꞌ ñu̱u̱ xikaꞌ ñu̱u̱ Jerusalén
25 Te̱ sa̱va̱ ne̱ judío ni̱ xi̱ku̱ndiee̱ ñu̱u̱ ña̱ ñuꞌuꞌ xikaꞌ nda̱ꞌaꞌ ñu̱u̱ Jerusalén,
xiinꞌ ñu̱ꞌuꞌ a̱:
Sa̱va̱ ni̱a̱ ni̱ xi̱ku̱ndiee̱ ñu̱u̱ Quiriat-arba xiinꞌ ñu̱ꞌuꞌ a̱,
xiinꞌ ñu̱u̱ Dibón xiinꞌ ñu̱ꞌuꞌ a̱,
xiinꞌ ñu̱u̱ Jecabseel xiinꞌ ñu̱ꞌuꞌ a̱,
26 xiinꞌ ñu̱u̱ Jesúa xiinꞌ ñu̱ꞌuꞌ a̱,
xiinꞌ ñu̱u̱ Molada xiinꞌ ñu̱ꞌuꞌ a̱,
xiinꞌ ñu̱u̱ Bet-pelet xiinꞌ ñu̱ꞌuꞌ a̱,
27 xiinꞌ ñu̱u̱ Hazar-sual,
xiinꞌ ñu̱u̱ Beerseba xiinꞌ ñu̱ꞌuꞌ uvi̱ sa̱aꞌ ñu̱u̱ ja̱a̱nꞌ,
28 xiinꞌ ñu̱u̱ Siclag,
xiinꞌ ñu̱u̱ Mecona xiinꞌ ñu̱ꞌuꞌ uvi̱ sa̱aꞌ ñu̱u̱ ja̱a̱nꞌ,
29 xiinꞌ ñu̱u̱ En-rimón,
xiinꞌ ñu̱u̱ Zora,
xiinꞌ ñu̱u̱ Jarmut,
30 xiinꞌ ñu̱u̱ Zanoa,
xiinꞌ ñu̱u̱ Adulam xiinꞌ ñu̱ꞌuꞌ a̱,
xiinꞌ ñu̱u̱ Laquis xiinꞌ ñu̱ꞌuꞌ a̱,
xiinꞌ ñu̱u̱ Azeca xiinꞌ ñu̱ꞌuꞌ a̱.
Te̱ ni̱ ndiee̱ ni̱a̱ kaniiꞌ nuu̱ꞌ ñu̱ꞌuꞌ Beerseba ja̱a̱nꞌ,
te̱ ni̱ xaꞌa̱n ndi̱koꞌ a̱ nde̱e̱ miiꞌ ndaa̱ nuu̱ꞌ ñu̱ꞌuꞌ Hinom.
31 Te̱ si̱a̱niꞌ xikaꞌ Benjamín ni̱ xa̱ꞌaꞌ ndieeꞌ nde̱e̱ ñu̱u̱ Geba,
xiinꞌ ñu̱u̱ Micmas,
xiinꞌ ñu̱u̱ Aía,
xiinꞌ ñu̱u̱ Bet-el xiinꞌ ñu̱ꞌuꞌ sa̱kuuꞌ ñu̱u̱ ja̱a̱nꞌ,
32 xiinꞌ ñu̱u̱ Anatot,
xiinꞌ ñu̱u̱ Nob,
xiinꞌ ñu̱u̱ Ananías,
33 xiinꞌ ñu̱u̱ Hazor,
xiinꞌ ñu̱u̱ Ramá,
xiinꞌ ñu̱u̱ Gitaim,
34 xiinꞌ ñu̱u̱ Hadid,
xiinꞌ ñu̱u̱ Seboim,
xiinꞌ ñu̱u̱ Nebalat,
35 xiinꞌ ñu̱u̱ Lod,
xiinꞌ ñu̱u̱ Ono ña̱ ñuꞌuꞌ yo̱soꞌ miiꞌ ndieeꞌ te̱ xaꞌa ki̱si̱ xiinꞌ ñu̱ꞌuꞌ kixinꞌ.
36 Te̱ sa̱va̱ te̱ vi̱ꞌe̱ Leví ni̱ xi̱ku̱ndiee̱ nuu̱ꞌ ñu̱ꞌuꞌ Judá,
xiinꞌ nuu̱ꞌ ñu̱ꞌuꞌ te̱ vi̱ꞌe̱ Benjamín.