Yoꞌoꞌ kaꞌán a̱ xaꞌa̱ꞌ ña̱ ni̱ ka̱ꞌvi̱ Nehemías tu̱ꞌu̱n nde̱iꞌ Ndiosí, ña̱ ni̱ ke̱ꞌi̱ Moisés nuu̱ꞌ sa̱kuuꞌ ne̱ vi̱ꞌe̱ Israel
13
Te̱ kivi̱ꞌ ja̱a̱nꞌ ndii,
ni̱ ka̱ꞌvi̱ sutu̱ tu̱tu̱ miiꞌ yoso̱ꞌ tu̱ꞌu̱n nde̱iꞌ Ndiosí ña̱ ni̱ ke̱ꞌi̱ Moisés nuu̱ꞌ sa̱kuuꞌ ne̱ yivi̱ꞌ,
te̱ nuu̱ꞌ ña̱ ja̱a̱nꞌ ni̱ xi̱ni̱ ra̱ yoso̱ꞌ i̱i̱n nde̱iꞌ ña̱ kaꞌán ña̱ ne̱ vi̱ꞌe̱ Moab xiinꞌ ne̱ vi̱ꞌe̱ Amon ndii,
kü̱vi̱ xa̱tyiꞌ ko̱ꞌni̱ ni̱a̱ miiꞌ nakayá ne̱ Israel xakaꞌnuꞌ ni̱a̱ Ndiosí,
2 sa̱kanꞌ ña̱ nï̱ ta̱xi̱ ne̱ ja̱a̱nꞌ xita̱ꞌ va̱ꞌa̱ ku̱xi̱ ne̱ vi̱ꞌe̱ Israel,
ni̱ nde̱e̱ nï̱ ta̱xi̱ tu̱ ni̱a̱ ti̱kui ko̱ꞌo̱ ne̱ ja̱a̱nꞌ,
süu̱ꞌ ja̱a̱nꞌ ndii,
ni̱ tya̱ꞌvi̱ꞌ ni̱a̱ i̱i̱n te̱ naniꞌ Balaam,
te̱ ni̱ sa̱na̱tyaꞌanꞌ ra̱ ne̱ Israel ja̱a̱nꞌ,
ndisu̱ nï̱ ta̱xi̱ Ndiosí sa̱na̱tyaꞌanꞌ ña̱ꞌaꞌ ra̱,
süu̱ꞌ ja̱a̱nꞌ ndii,
ni̱ sa̱ñuꞌuꞌ ña̱ꞌaꞌ a̱ xiinꞌ ña̱ ni̱ sa̱na̱tyaꞌanꞌ ña̱ꞌaꞌ ra̱ ja̱a̱nꞌ.
3 Te̱ kii̱ꞌ ni̱ xi̱ni̱ so̱ꞌo̱ ne̱ yivi̱ꞌ ña̱ kaꞌán tu̱ꞌu̱n nde̱iꞌ ja̱a̱nꞌ ndii,
xa̱ numi̱ꞌ sa̱kanꞌ,
te̱ ni̱ ta̱va̱ꞌ ni̱a̱ sa̱kuuꞌ ne̱ tukuꞌ,
ne̱ kaꞌni̱ te̱i̱n ni̱a̱.
4 Ndisu̱ ña̱ kuní ka̱ ko̱o̱ sa̱kuuꞌ ña̱ ja̱a̱nꞌ ndii,
Eliasib ni̱ nduu̱ te̱ xitoꞌ yaka̱ yu̱kunꞌ Ndiosí,
ña̱ xakaꞌnuꞌ e̱ꞌ,
te̱ xaꞌa̱ꞌ a̱ ña̱ iinꞌ kuuꞌ ra̱ xiinꞌ Tobías ndii,
5 ni̱ ta̱xi̱ ra̱ nda̱ꞌaꞌ te̱ ja̱a̱nꞌ i̱i̱n vi̱ꞌe̱ tyiee̱ xa̱va̱ꞌa̱,
te̱ vi̱ꞌe̱ ja̱a̱nꞌ ndii,
yaka̱ miiꞌ nakoó va̱ꞌa̱ sa̱kuuꞌ tu̱mani̱ꞌ,
xiinꞌ su̱xa̱ xavixínꞌ,
xiinꞌ sa̱kuuꞌ nda̱tyuunꞌ,
ña̱ tiinꞌ sutu̱ ti̱xi̱n yu̱kunꞌ,
xiinꞌ ña̱ uxi̱ ña̱ tyaꞌvi̱ꞌ ne̱ yivi̱ꞌ xata̱ꞌ i̱ꞌi̱n siento ndi̱kinꞌ trigo,
xiinꞌ vino,
xiinꞌ xa̱ꞌa̱n oliva ña̱ tiinꞌ te̱ vi̱ꞌe̱ Leví,
xiinꞌ te̱ xitaꞌ ya̱a̱,
xiinꞌ te̱ xitoꞌ yiꞌeꞌ,
te̱ i̱kanꞌ tu̱ xi nakoó va̱ꞌa̱ tu̱mani̱ꞌ ña̱ kuaꞌa̱n nda̱ꞌaꞌ sutu̱.
6 Te̱ kii̱ꞌ ni̱ xkaꞌndi̱a̱ sa̱kuuꞌ ña̱ ja̱a̱nꞌ ndii,
köo̱ꞌ yuꞌu̱ nduꞌu̱ꞌ ñu̱u̱ Jerusalén,
sa̱kanꞌ ña̱ kii̱ꞌ xa̱ kuaꞌa̱n oko̱ uxi̱ uvi̱ kuiya̱ ña̱ xaꞌndia tyuunꞌ rey Artajerjes nuu̱ꞌ ñu̱ꞌuꞌ Babilonia ndii,
ni̱ na̱ndi̱koꞌ i̱ te̱ ka̱ka̱ nu̱u̱ i̱ nuu̱ꞌ ra̱,
ndisu̱ ndiaꞌviꞌ kivi̱ꞌ ni̱ yaꞌa̱,
te̱ ni̱ xika̱n i̱ likensia nuu̱ꞌ ra̱
7 te̱ ta̱xi̱ ra̱ na̱ndi̱koꞌ tu̱ku̱u̱ i̱ ñu̱u̱ Jerusalén.
Te̱ ni̱ xi̱ni̱ i̱ ña̱ vä̱ꞌa̱ ña̱ ni̱ xa̱a̱ sutu̱ Eliasib ña̱ ni̱ ta̱xi̱ ra̱ i̱i̱n vi̱ꞌe̱ tyiee̱ va̱ nduꞌu̱ꞌ Tobías ja̱a̱nꞌ nuu̱ꞌ ki̱ꞌe̱ yu̱kunꞌ Ndiosí,
ña̱ xakaꞌnuꞌ e̱ꞌ.
8 Te̱ kii̱ꞌ ni̱ xi̱ni̱ i̱ ña̱ ni̱ xa̱a̱ ra̱ ja̱a̱nꞌ ndii,
ni̱ na̱saa̱ꞌ xa̱va̱ꞌa̱ i̱,
te̱ ni̱ ta̱va̱ꞌ i̱ sa̱kuuꞌ ña̱ꞌa̱ Tobías ja̱a̱nꞌ ti̱xi̱n vi̱ꞌe̱ ja̱a̱nꞌ,
te̱ ni̱ xa̱ti̱a̱ i̱ sa̱kuuꞌ a̱ ki̱ꞌe̱.
9 Sa̱kanꞌ te̱ ni̱ kaꞌa̱n tyuunꞌ i̱ ña̱ nda̱sa̱ndo̱o̱ va̱ꞌa̱ va̱ te̱ yivi̱ꞌ vi̱ꞌe̱ ja̱a̱nꞌ,
te̱ sa̱ñuꞌuꞌ sutu̱ a̱,
te̱ na̱ko̱ꞌni̱ tu̱ku̱u̱ ra̱ nda̱tyuunꞌ su̱ꞌu̱n ña̱ xa̱ ni̱ ndiee̱ i̱kanꞌ,
ña̱ nduuꞌ kuenta yu̱kunꞌ Ndiosí.
10 Ni̱ xi̱ni̱ tu̱ i̱ kuento ña̱ nï̱ ta̱xi̱ Eliasib nda̱ꞌaꞌ te̱ vi̱ꞌe̱ Leví ña̱ xaxi̱ꞌ ña̱ xataꞌa̱n na̱ꞌi̱ ra̱,
xaꞌa̱ꞌ a̱ ja̱a̱nꞌ na ni̱ xi̱nu̱ te̱ vi̱ꞌe̱ Leví xiinꞌ te̱ xitaꞌ ya̱a̱,
te̱ ndisoꞌ tyuunꞌ nuu̱ꞌ ña̱ xakaꞌnuꞌ ne̱ yivi̱ꞌ Ndiosí,
te̱ i̱ꞌi̱n ra̱ kuaꞌa̱n nuꞌu̱ꞌ nuu̱ꞌ ñu̱ꞌuꞌ mi̱iꞌ ra̱.
11 Xaꞌa̱ꞌ a̱ ja̱a̱nꞌ na ndi̱e̱eꞌ va̱ ni̱ ka̱ni̱ kuento i̱ te̱ kuuꞌ nu̱uꞌ nuu̱ꞌ te̱ xatyuunꞌ ti̱xi̱n yu̱kunꞌ ja̱a̱nꞌ ni̱ kaꞌa̱n i̱ xiinꞌ ra̱ ndii:
―¿Ndiotyun na ni̱ na̱ko̱o̱ xa̱tyiꞌ ndo̱ꞌ yu̱kunꞌ Ndiosí e̱ꞌ?
―ni̱ katyi̱ i̱ xiinꞌ ra̱.
Sa̱kanꞌ te̱ ni̱ na̱ka̱ya̱ ña̱ꞌaꞌ i̱,
te̱ tu̱ku̱ sa̱kanꞌ ni̱ na̱tyi̱ndi̱e̱e̱ ña̱ꞌaꞌ i̱ nuu̱ꞌ tyu̱u̱n ña̱ xaaꞌ i̱ꞌi̱n ra̱.
12 Te̱ sa̱kuuꞌ ne̱ vi̱ꞌe̱ Judá ni̱ ki̱xi̱n ndi̱a̱ka̱ uxi̱ litro ndi̱kinꞌ trigo xata̱ꞌ i̱ꞌi̱n siento litro,
xiinꞌ vino,
xiinꞌ xa̱ꞌa̱n oliva te̱ na̱koo̱ va̱ꞌa̱ a̱ sa̱kuuꞌ a̱ ti̱xi̱n yaka̱ yu̱kunꞌ kaꞌnuꞌ.
13 Te̱ ni̱ sa̱kuisoꞌ tyuunꞌ i̱ ndiaꞌviꞌ te̱ yivi̱ꞌ te̱ ko̱to̱ yaka̱ ja̱a̱nꞌ.
Te̱ nduuꞌ sutu̱ Selemías,
xiinꞌ te̱ keꞌi tu̱tu̱,
te̱ naniꞌ Sadoc,
xiinꞌ i̱i̱n te̱ vi̱ꞌe̱ Leví,
te̱ naniꞌ Pedaías,
te̱ ni̱ tyi̱nduꞌu̱ꞌ tu̱ i̱ i̱i̱n te̱ tyi̱ndi̱e̱eꞌ taꞌanꞌ xiinꞌ ra̱,
te̱ naniꞌ Hanán,
siꞌe̱ Zacur,
te̱ siꞌe̱ Matanías nduuꞌ Zacur ja̱a̱nꞌ.
Ni̱ sa̱kuisoꞌ tyuunꞌ i̱ te̱ ja̱a̱nꞌ sa̱kanꞌ ña̱ te̱ xatyuunꞌ nda̱ku nduuꞌ ra̱,
te̱ te̱ ja̱a̱nꞌ nduuꞌ te̱ nataꞌviꞌ i̱i̱n katyi ña̱ꞌa̱ ña̱ kuaꞌa̱n nda̱ꞌaꞌ sa̱kuuꞌ ne̱ vi̱ꞌe̱ Leví,
taꞌanꞌ ra̱.
14 ¡Sa̱kanꞌ na kuiiꞌ sa̱a̱ u̱nꞌ ña̱ va̱ꞌa̱,
Ndiosí mi̱iꞌ i̱,
te̱ na̱ka̱ꞌanꞌ u̱nꞌ xaꞌa̱ꞌ sa̱kuuꞌ ña̱ ni̱ xa̱a̱ i̱ ja̱a̱nꞌ,
te̱ nä̱ndoso̱ꞌ u̱nꞌ xaꞌa̱ꞌ sa̱kuuꞌ ña̱ va̱ꞌa̱ ña̱ ni̱ xa̱a̱ i̱ xaꞌa̱ꞌ yu̱kunꞌ miiꞌ xakaꞌnuꞌ ndu̱ yoꞌó,
Ndiosí kuaꞌa!
15 Te̱ kivi̱ꞌ ja̱a̱nꞌ ndii,
ni̱ xi̱ni̱ i̱ sa̱va̱ ne̱ vi̱ꞌe̱ Judá kivi̱ꞌ ña̱ xi nandiee̱ꞌ e̱ꞌ xeꞌní ni̱a̱ uva te̱ ka̱sa̱ꞌa̱ ni̱a̱ vino,
te̱ sa̱va̱ tu̱ku̱ ni̱a̱ xikoꞌ ndi̱kinꞌ trigo,
te̱ sa̱va̱ tu̱ku̱ ni̱a̱ xikoꞌ vino,
xiinꞌ yutu̱ naꞌnuꞌ uva,
xiinꞌ ndo̱koꞌ higo,
xiinꞌ sa̱kuuꞌ nuu̱ꞌ ña̱ ku̱vi̱ ndisoꞌ ki̱tiꞌ.
Te̱ kuaꞌa̱n xi̱ko̱ꞌ ni̱a̱ ña̱ ja̱a̱nꞌ ñu̱u̱ Jerusalén kivi̱ꞌ ña̱ xinandiee̱ꞌ e̱ꞌ ja̱a̱nꞌ.
Xaꞌa̱ꞌ a̱ ja̱a̱nꞌ na ni̱ xiꞌe̱ i̱ nuu̱ꞌ ni̱a̱ ña̱ xiko̱ꞌ ni̱a̱ ña̱ꞌa̱ kivi̱ꞌ ja̱a̱nꞌ.
16 Sa̱va̱ ne̱ ni̱ ki̱e̱e̱ ñu̱u̱ Tiro,
ne̱ ndieeꞌ ñu̱u̱ Jerusalén kii̱ꞌ sa̱kanꞌ ndii,
ni̱ ki̱xi̱n xi̱ko̱ꞌ ni̱a̱ ti̱a̱kaꞌ xiinꞌ sa̱kuuꞌ nuu̱ꞌ i̱nga̱ ña̱ꞌa̱,
te̱ ni̱ xi̱ko̱ꞌ ni̱a̱ ña̱ ja̱a̱nꞌ nuu̱ꞌ ne̱ viꞌe Judá kivi̱ꞌ ña̱ xinandiee̱ꞌ e̱ꞌ.
17 Sa̱kanꞌ te̱ ni̱ ka̱na̱ i̱ te̱ kuuꞌ nu̱uꞌ nuu̱ꞌ ne̱ vi̱ꞌe̱ Judá,
te̱ ni̱ ka̱ni̱ ña̱ꞌaꞌ i̱ kuento kaꞌán i̱ xiinꞌ ra̱ ndii:
―Vä̱ꞌa̱ xa̱tyiꞌ yoo ña̱ xaaꞌ ndoꞌó ña̱ xïtoꞌ kaꞌnuꞌ ndo̱ꞌ kivi̱ꞌ ña̱ xinandiee̱ꞌ e̱ꞌ.
18 ¿Ñáá näkaꞌanꞌ ndo̱ꞌ ña̱ sa̱kanꞌ tu̱ ni̱ xa̱a̱ ne̱ xíiꞌ ya̱taꞌ e̱ꞌ,
te̱ xaꞌa̱ꞌ a̱ ja̱a̱nꞌ na kuiiꞌ kuaꞌa̱ꞌ va̱ tu̱ndoꞌo̱ꞌ ni̱ ti̱ꞌviꞌ Ndiosí ndoꞌoꞌ e̱ꞌ,
te̱ ni̱ ti̱ꞌviꞌ tu̱ ña̱ꞌaꞌ a̱ ndoꞌoꞌ sa̱kuuꞌ ne̱ ndieeꞌ ñu̱u̱ yoꞌoꞌ?
¿Ñáá kuní ndo̱ꞌ sa̱na̱saáꞌ kuaꞌa̱ꞌ ka̱ ndo̱ꞌ Ndiosí,
te̱ sa̱ndoꞌoꞌ ka̱ a̱ yooꞌ,
ne̱ Israel,
xaꞌa̱ꞌ a̱ ña̱ xïtoꞌ kaꞌnuꞌ ndo̱ꞌ kivi̱ꞌ ña̱ xinandiee̱ꞌ e̱ꞌ?
―ni̱ katyi̱ i̱ xiinꞌ ra̱.
19 Sa̱kanꞌ te̱ ni̱ kaꞌa̱n tyuunꞌ i̱ ña̱ nda̱si̱ te̱ yivi̱ꞌ sa̱kuuꞌ yiꞌeꞌ ñu̱u̱ Jerusalén kii̱ꞌ xa̱ kuxaníá kuaꞌa̱n ña̱ kuní ka̱ xa̱ꞌaꞌ kivi̱ꞌ ña̱ xinandiee̱ꞌ e̱ꞌ,
te̱ nü̱niaꞌ ra̱ a̱ nde̱e̱ xkaꞌndi̱a̱ kivi̱ꞌ ña̱ xinandiee̱ꞌ e̱ꞌ ja̱a̱nꞌ.
Te̱ ni̱ xa̱ta̱ tu̱ i̱ sa̱va̱ te̱ xikaꞌ nuuꞌ nuu̱ꞌ i̱ yiꞌeꞌ ja̱a̱nꞌ te̱ tä̱xi̱ ra̱ xkaꞌndi̱a̱ nde̱e̱ i̱i̱n ne̱ yivi̱ꞌ xiinꞌ ña̱ꞌa̱ te̱ xi̱ko̱ꞌ ni̱a̱ a̱ kivi̱ꞌ ña̱ xinandiee̱ꞌ e̱ꞌ ja̱a̱nꞌ.
20 Xaꞌa̱ꞌ a̱ ja̱a̱nꞌ na ni̱ ndoo̱ sa̱va̱ ne̱ xiko̱ꞌ ña̱ꞌa̱ xiinꞌ ne̱ sata̱ꞌ a̱ ki̱ꞌe̱ ñu̱u̱ Jerusalén ndiaꞌviꞌ i̱tyiꞌ,
te̱ i̱kanꞌ ni̱ kixi̱n ni̱a̱.
21 Sa̱kanꞌ na kuiiꞌ ni̱ ka̱ni̱ ña̱ꞌaꞌ i̱ kuento kaꞌán i̱ xiinꞌ ni̱a̱ ndii:
―¿Ndiotyun na kixín ndo̱ꞌ xata̱ꞌ nama̱ ñu̱u̱ yoꞌoꞌ?
Naaꞌ sa̱a̱ te̱ sa̱a̱ ndo̱ꞌ sa̱kanꞌ ndii,
na̱ti̱i̱n i̱ ndoꞌó ta̱a̱nꞌ i̱ vi̱ꞌe̱ ka̱a̱ ―ni̱ katyi̱ i̱ xiinꞌ ni̱a̱.
Te̱ nde̱e̱ kii̱ꞌ sa̱kanꞌ ndii,
köo̱ꞌ kivi̱ꞌ ka̱ ni̱ ki̱xi̱n nde̱e̱ i̱i̱n ni̱a̱ kivi̱ꞌ ña̱ xinandiee̱ꞌ e̱ꞌ.
22 Ndi̱ꞌi̱ ja̱a̱nꞌ te̱ ni̱ kaꞌa̱n tyuunꞌ i̱ xiinꞌ te̱ vi̱ꞌe̱ Leví te̱ kuꞌu̱n ko̱to̱ ra̱ yiꞌeꞌ,
sa̱kanꞌ te̱ ko̱to̱ kaꞌnuꞌ sa̱kuuꞌ ne̱ yivi̱ꞌ kivi̱ꞌ ña̱ xinandiee̱ꞌ e̱ꞌ.
Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ na̱ka̱ꞌanꞌ tu̱ u̱nꞌ xaꞌa̱ꞌ sa̱kuuꞌ ña̱ kaa̱ꞌ,
te̱ ko̱o̱ kaꞌnuꞌ i̱ni̱ u̱nꞌ ku̱ni̱ u̱nꞌ yuꞌu̱ xaꞌa̱ꞌ a̱ ña̱ kuaꞌa̱ꞌ va̱ kuvita i̱ni̱ u̱nꞌ xaꞌa̱ꞌ i̱.
23 Te̱ kivi̱ꞌ ja̱a̱nꞌ tu̱ ni̱ xi̱ni̱ i̱ kuento ña̱ ni̱ tu̱ndaꞌa̱ꞌ sa̱va̱ te̱ vi̱ꞌe̱ Judá xiinꞌ ne̱ tukuꞌ,
ne̱ ndieeꞌ ñuu Asdod,
xiinꞌ nuu̱ꞌ ñu̱ꞌuꞌ Amón xiinꞌ ne̱ ndieeꞌ nuu̱ꞌ ñu̱ꞌuꞌ Moab.
24 Taꞌvi̱ꞌ sa̱va̱ siꞌe̱ ni̱a̱ ndatuꞌunꞌ tu̱ꞌu̱n ña̱ ndatuꞌunꞌ ne̱ ndieeꞌ ñuu Asdod,
uun tu̱ꞌu̱n ña̱ ndatuꞌunꞌ ne̱ ndieeꞌ nuu̱ꞌ tu̱ku̱ ñu̱ꞌuꞌ,
ndisu̱ xïní ni̱a̱ tu̱ꞌu̱n ña̱ ndatuꞌunꞌ nduꞌu̱,
ne̱ Israel.
25 Sa̱kanꞌ na kuiiꞌ ni̱ ka̱ni̱ taꞌanꞌ i̱ kuento xiinꞌ ra̱,
te̱ ni̱ sa̱na̱tyaꞌanꞌ ña̱ꞌaꞌ i̱,
te̱ ni̱ sa̱tu̱xuꞌví tu̱ i̱ sa̱va̱ ra̱,
te̱ ni̱ tu̱ꞌu̱n tu̱ i̱ i̱xiꞌ xíniꞌ ra̱,
te̱ ni̱ ti̱i̱n uꞌvi̱ ña̱ꞌaꞌ i̱,
te̱ ni̱ ta̱xi̱ ra̱ kuento ra̱ nuu̱ꞌ Ndiosí ña̱ tä̱xi̱ ka̱ ra̱ tu̱ndaꞌa̱ꞌ ña̱ꞌaꞌ siꞌe̱ ra̱,
uun tiaa̱ siꞌe̱ ra̱ xiinꞌ siꞌe̱ ne̱ tukuꞌ ja̱a̱nꞌ,
ni̱ nde̱e̱ nä̱ti̱i̱n tu̱ ra̱ ña̱ꞌaꞌ siꞌe̱ ne̱ ja̱a̱nꞌ tu̱ndaꞌa̱ꞌ xiinꞌ tiaa̱ siꞌe̱ ra̱,
uun ñaꞌ tu̱ndaꞌa̱ꞌ xiinꞌ mi̱iꞌ ra̱,
26 kaꞌán i̱ xiinꞌ ra̱ ndii:
―¿Ñáá näkaꞌanꞌ ndo̱ꞌ ña̱ ni̱ xa̱a̱ rey Salomón?
Tee̱ꞌ ndee nï̱ yoo̱ nde̱e̱ i̱i̱n rey nde̱e̱ naa te̱ ja̱a̱nꞌ i̱i̱n kaniiꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ ni̱ ku̱ndani̱ va̱ tu̱ ña̱ꞌaꞌ Ndiosí,
ña̱ xakaꞌnuꞌ ra̱,
te̱ ni̱ sa̱na̱nduuꞌ ña̱ꞌaꞌ a̱ rey nuu̱ꞌ sa̱kuuꞌ ne̱ Israel ndii,
nde̱e̱ te̱ ja̱a̱nꞌ ni̱ xa̱a̱ ku̱a̱tyi̱ ña̱ kuuꞌ ña̱ꞌaꞌ ne̱ tukuꞌ.
27 Sa̱kanꞌ na kuiiꞌ tä̱xi̱ ka̱ tu̱ nduꞌu̱ ña̱ sa̱a̱ tu̱ ndoꞌó ku̱a̱tyi̱ tyiee̱ nia naa ña̱ ja̱a̱nꞌ nuu̱ꞌ Ndiosí,
ña̱ tu̱ndaꞌa̱ꞌ ndo̱ꞌ xiinꞌ ña̱ꞌaꞌ,
ne̱ tukuꞌ ―ni̱ katyi̱ i̱ xiinꞌ ra̱.
28 Te̱ i̱i̱n tiaa̱ siꞌe̱ Joiada,
te̱ nduuꞌ siꞌe̱ sutu̱ kuuꞌ nu̱uꞌ te̱ naniꞌ Eliasib,
ni̱ tu̱ndaꞌa̱ꞌ xiinꞌ ñaꞌ siꞌe̱ Sambalat,
te̱ ni̱ ki̱e̱e̱ ñu̱u̱ Horón,
xaꞌa̱ꞌ a̱ ja̱a̱nꞌ na ni̱ ta̱xiꞌ ña̱ꞌaꞌ i̱.
29 Sa̱a̱ u̱nꞌ ña̱ va̱ꞌa̱,
Tákuiꞌe Ndiosí,
te̱ na̱ka̱ꞌanꞌ u̱nꞌ xaꞌa̱ꞌ sa̱kuuꞌ te̱ mi̱iꞌ ni̱ ku̱u̱ xiinꞌ tyu̱u̱n sutu̱ te̱ sa̱ndoꞌoꞌ ña̱ꞌaꞌ u̱nꞌ,
sa̱kanꞌ ña̱ nï̱ sa̱xinú ra̱ kuento ra̱ ña̱ ni̱ ta̱xi̱ ra̱ nuu̱ꞌ sutu̱ xiinꞌ nuu̱ꞌ te̱ vi̱ꞌe̱ Leví.
30 Sa̱kanꞌ na kuiiꞌ ni̱ ta̱va̱ꞌ xa̱tyiꞌ i̱ sa̱kuuꞌ te̱ tukuꞌ te̱i̱n ra̱,
te̱ ni̱ nda̱sa̱i̱i̱n i̱ sa̱kuuꞌ sutu̱,
xiinꞌ te̱ vi̱ꞌe̱ Leví,
te̱ ni̱ ta̱xi̱ i̱ tyu̱u̱n nda̱ꞌaꞌ i̱ꞌi̱n ra̱ sa̱a̱ ra̱.
31 Te̱ sa̱kanꞌ tu̱ ni̱ na̱ka̱xi̱n i̱ ne̱ ki̱xi̱n ndi̱a̱ka̱ tu̱tunꞌ,
tunꞌ kuní yu̱kunꞌ,
te̱ ni̱ tyi̱nduꞌu̱ꞌ i̱ ndee kivi̱ꞌ kuní a̱ ki̱xi̱n ndi̱a̱ka̱ i̱ꞌi̱n ni̱a̱ tu̱tunꞌ ja̱a̱nꞌ.
Te̱ sa̱kanꞌ tu̱ ni̱ tyi̱nduꞌu̱ꞌ i̱ ndee kivi̱ꞌ kuní a̱ sa̱na̱kuaꞌa ni̱a̱ tu̱mani̱ꞌ sa̱kuuꞌ ña̱ saviꞌ ña̱ nakuixaꞌ nu̱uꞌ nuu̱ꞌ ñu̱ꞌuꞌ ni̱a̱.
Tákuiꞌe Ndiosí sa̱a̱ u̱nꞌ ña̱ va̱ꞌa̱ te̱ sa̱ñuꞌuꞌ u̱nꞌ yuꞌu̱.