Yoꞌoꞌ kaꞌán a̱ xaꞌa̱ꞌ kii̱ꞌ ni̱ xa̱ꞌaꞌ te̱ yivi̱ꞌ xaꞌa ra̱ yiꞌeꞌ xiinꞌ nama̱ ñu̱u̱ Jerusalén
3
Sa̱kanꞌ te̱ ni̱ xa̱ꞌaꞌ sutu̱ Eliasib xiinꞌ i̱nga̱ ka̱ sutu̱,
taꞌanꞌ ra̱,
nakasaꞌa ra̱ vitu̱ꞌ yiꞌeꞌ nama̱ ñu̱u̱ Jerusalén ña̱ naniꞌ Mbe̱e̱.
Ni̱ na̱ka̱ta̱ ra̱ sa̱kuuꞌ vitu̱ꞌ yiꞌeꞌ ja̱a̱nꞌ,
te̱ ni̱ sa̱ñuꞌuꞌ ra̱ a̱.
Te̱ ni̱ xa̱ꞌa̱ nama̱ ñu̱u̱ ja̱a̱nꞌ ndii,
ni̱ xa̱ꞌaꞌ ra̱ nde̱e̱ miiꞌ iinꞌ vi̱ꞌe̱ sukun ña̱ naniꞌ Hamea,
te̱ ni̱ xaꞌa̱n ndi̱koꞌ ra̱ ndee miiꞌ iinꞌ i̱nga̱ vi̱ꞌe̱ sukun,
ña̱ naniꞌ Hananeel,
te̱ ni̱ sa̱ñuꞌuꞌ tu̱ ra̱ ña̱ ja̱a̱nꞌ kii̱ꞌ ni̱ xinu̱ a̱.
2 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ni̱ xa̱ꞌa̱ te̱ ndieeꞌ ñu̱u̱ Jericó,
te̱ i̱nga̱ ka̱ tuꞌu̱nꞌ a̱ ni̱ xa̱ꞌa̱ Zacur,
te̱ nduuꞌ siꞌe̱ Imrí.
3 Te̱ vi̱ꞌe̱ Senaa ni̱ xa̱ꞌa̱ yiꞌeꞌ ña̱ naniꞌ Ti̱a̱kaꞌ,
ni̱ xa̱ta̱ ra̱ tunꞌ tiinꞌ yiꞌeꞌ ja̱a̱nꞌ,
te̱ ni̱ tyi̱ꞌni̱ tu̱ ra̱ ka̱a̱ ña̱ ndasi a̱ xiinꞌ ka̱a̱ ña̱ kiꞌiꞌ ti̱xi̱n yiꞌeꞌ.
4 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
te̱ vi̱ꞌe̱ Meremot ni̱ xa̱ꞌa̱ a̱.
Te̱ ja̱a̱nꞌ ndii,
si̱a̱niꞌ xikaꞌ ndii̱ xkuaa̱ꞌ Cos nduuꞌ ra̱,
sa̱kanꞌ ña̱ siꞌe̱ Urías nduuꞌ ra̱.
Te̱ i̱nga̱ tuꞌu̱nꞌ nama̱ ja̱a̱nꞌ ni̱ xa̱ꞌa̱ te̱ vi̱ꞌe̱ Mesulam.
Te̱ ja̱a̱nꞌ ndii,
si̱a̱niꞌ ndii̱ xkuaa̱ꞌ Mesezabeel nduuꞌ ra̱,
sa̱kanꞌ ña̱ siꞌe̱ Berequías nduuꞌ ra̱.
Te̱ i̱nga̱ tuꞌu̱nꞌ nama̱ ja̱a̱nꞌ ni̱ xa̱ꞌa̱ te̱ vi̱ꞌe̱ Sadoc,
siꞌe̱ Baana.
5 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
te̱ ñu̱u̱ Tecoa ni̱ xa̱ꞌa̱ a̱,
ndisu̱ te̱ vika̱ꞌ ndii,
nï̱ xi̱i̱n te̱ ja̱a̱nꞌ tyi̱ndi̱e̱eꞌ ra̱ te̱ xaꞌndia tyuunꞌ nuu̱ꞌ ra̱,
te̱ xaꞌa nama̱ ja̱a̱nꞌ.
6 Te̱ yiꞌeꞌ ya̱taꞌ ña̱ naniꞌ Jesaná ndii,
Joiada,
siꞌe̱ Paseah,
xiinꞌ Mesulam,
siꞌe̱ Besodías,
ni̱ nda̱sa̱va̱ꞌa̱ a̱.
Ni̱ nda̱sa̱va̱ꞌa̱ ra̱ yiꞌeꞌ ja̱a̱nꞌ,
te̱ ni̱ xa̱ta̱ tu̱ ra̱ tunꞌ tiinꞌ yiꞌeꞌ ja̱a̱nꞌ,
te̱ ni̱ tyi̱ꞌni̱ tu̱ ra̱ ka̱a̱ ña̱ ndasi a̱,
xiinꞌ ka̱a̱ ña̱ kiꞌiꞌ ti̱xi̱n yiꞌeꞌ.
7 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Melatías,
te̱ ni̱ ki̱e̱e̱ nuu̱ꞌ ñu̱ꞌuꞌ Gabaón,
xiinꞌ Jadón,
te̱ ndieeꞌ nuu̱ꞌ ñu̱ꞌuꞌ Meronot,
xiinꞌ te̱ ndieeꞌ ñu̱ꞌuꞌ Gabaón ja̱a̱nꞌ,
xiinꞌ te̱ ndieeꞌ ñu̱u̱ Mizpa.
Te̱ sa̱kuuꞌ ñu̱u̱ ja̱a̱nꞌ ñuꞌuꞌ nuu̱ꞌ ñu̱ꞌuꞌ miiꞌ xaꞌndia tyuunꞌ te̱ ndieeꞌ tu̱ku̱ taꞌviꞌ yu̱ꞌuꞌ i̱ti̱a̱ Éufrates,
xtoꞌniꞌ miiꞌ ketá ñu̱ꞌu̱.
8 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Uziel,
siꞌe̱ Harhaía,
ni̱ xa̱ꞌa̱ a̱.
Te̱ Harhaía ja̱a̱nꞌ ndii,
i̱i̱n te̱ xaꞌa ka̱a̱ plata nduuꞌ ra̱.
Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
te̱ nduuꞌ Hananías ni̱ xa̱ꞌa̱ a̱,
te̱ ja̱a̱nꞌ ndii,
i̱i̱n te̱ xaꞌa ti̱kui xavixínꞌ nduuꞌ ra̱.
Te̱ uvi̱ sa̱aꞌ te̱ ja̱a̱nꞌ ni̱ nda̱sa̱va̱ꞌa̱ nama̱ ñu̱u̱ Jerusalén nde̱e̱ ni̱ xaꞌa̱n ndi̱koꞌ ra̱ nde̱e̱ miiꞌ iinꞌ nama̱ ña̱ naniꞌ Nama̱ Ndiká.
9 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Refaías,
siꞌe̱ Hur,
ni̱ xa̱ꞌa̱ a̱,
te̱ Hur ja̱a̱nꞌ nduuꞌ te̱ xaꞌndia tyuunꞌ nuu̱ꞌ taꞌvi̱ꞌ sa̱va̱ ne̱ ndieeꞌ ñu̱u̱ Jerusalén ja̱a̱nꞌ kii̱ꞌ sa̱kanꞌ.
10 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Jedaías,
siꞌe̱ Harumaf,
ni̱ xa̱ꞌa̱ a̱,
sa̱kanꞌ ña̱ ya̱ti̱n yiꞌeꞌ vi̱ꞌe̱ miiꞌ nduꞌu̱ꞌ ra̱ xkaꞌndíá nama̱ ja̱a̱nꞌ.
Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Hatús,
siꞌe̱ Hasabnías,
ni̱ xa̱ꞌa̱ a̱.
11 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Malquías,
siꞌe̱ Harim xiinꞌ Hasub,
siꞌe̱ Pahat-moab,
ni̱ xa̱ꞌa̱ a̱,
te̱ ni̱ xa̱ꞌa̱ tu̱ ra̱ vi̱ꞌe̱ sukun ña̱ naniꞌ Xitu̱n Miiꞌ Naꞌmiꞌ Te̱ Yivi̱ꞌ Ñuꞌu̱.
12 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Salum,
siꞌe̱ Halohes,
xiinꞌ ña̱ꞌaꞌ siꞌe̱ ra̱ ni̱ xa̱ꞌa̱ a̱.
Te̱ Halohes ja̱a̱nꞌ nduuꞌ te̱ xaꞌndia tyuunꞌ nuu̱ꞌ taꞌvi̱ꞌ sa̱va̱ ne̱ ndieeꞌ ñu̱u̱ Jerusalén ja̱a̱nꞌ kii̱ꞌ sa̱kanꞌ.
13 Te̱ i̱nga̱ yiꞌeꞌ nama̱ ñu̱u̱ ja̱a̱nꞌ,
ña̱ naniꞌ Yo̱soꞌ Hinóm ndii,
Hanún xiinꞌ te̱ ndieeꞌ ñu̱u̱ Zanoa ni̱ xa̱ꞌa̱ a̱.
Ni̱ xa̱ꞌa̱ ra̱ vitu̱ꞌ yiꞌeꞌ a̱,
te̱ ni̱ na̱ka̱ta̱ tu̱ ra̱ nu̱ꞌ,
te̱ ni̱ tyi̱ꞌni̱ tu̱ ra̱ ka̱a̱ ña̱ ndasi a̱ xiinꞌ ka̱a̱ ña̱ kiꞌiꞌ ti̱xi̱n yiꞌeꞌ.
Ni̱ xa̱ꞌa̱ tu̱ ra̱ ku̱miꞌ siento yoso̱ꞌ sa̱va̱ metro nama̱ ñu̱u̱ ja̱a̱nꞌ,
te̱ ni̱ xaꞌa̱n ndi̱koꞌ ra̱ nde̱e̱ miiꞌ iinꞌ yiꞌeꞌ ña̱ naniꞌ miiꞌ xitíá mi̱ꞌiꞌ.
14 Te̱ Malquías,
siꞌe̱ Recab,
te̱ xaꞌndia tyuunꞌ nuu̱ꞌ ñu̱ꞌuꞌ Bet-haquerem,
ni̱ xa̱ꞌa̱ vitu̱ꞌ yiꞌeꞌ ña̱ naniꞌ Miiꞌ Xitíá Mi̱ꞌiꞌ,
te̱ ni̱ na̱ka̱ta̱ tu̱ ra̱ nu̱ꞌ,
te̱ ni̱ tyi̱ꞌni̱ ra̱ ka̱a̱ ña̱ ndasi a̱ xiinꞌ ka̱a̱ ña̱ kiꞌiꞌ ti̱xi̱n yiꞌeꞌ.
15 Te̱ yiꞌeꞌ ña̱ naniꞌ Ti̱ko̱ꞌyoꞌ ndii,
Salum,
siꞌe̱ Col-hoze,
te̱ xaꞌndia tyuunꞌ tyaaꞌ nuu̱ꞌ ñu̱ꞌuꞌ Mizpa,
ni̱ xa̱ꞌa̱ a̱.
Ni̱ xa̱ꞌa̱ ra̱ miiꞌ iinꞌ vitu̱ꞌ yiꞌeꞌ ja̱a̱nꞌ,
te̱ ni̱ nda̱si̱ tu̱ ra̱ xata̱ꞌ a̱,
ni̱ na̱ka̱ni̱ ra̱ vitu̱ꞌ yiꞌeꞌ,
te̱ ni̱ tyi̱ꞌni̱ tu̱ ra̱ ka̱a̱ ña̱ ndasi a̱ xiinꞌ ka̱a̱ ña̱ kiꞌiꞌ ti̱xi̱n yiꞌeꞌ.
Ni̱ xa̱ꞌa̱ tu̱ ra̱ nama̱ ña̱ ndasi mi̱ni̱ siee ña̱ naniꞌ Siloé ña̱ naá ya̱ti̱n miiꞌ kanduꞌu̱ꞌ ña̱ ta̱ta̱ rey,
te̱ ni̱ xaꞌa̱n ndi̱koꞌ a̱ nde̱e̱ miiꞌ yoo kuato̱ ña̱ na̱kaa̱ꞌ ne̱ yivi̱ꞌ kuaꞌa̱n ni̱a̱ miiꞌ naá ñu̱u̱ David.
16 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ miiꞌ sukun ndii,
Nehemías,
siꞌe̱ Azbuc,
te̱ xaꞌndia tyuunꞌ taꞌvi̱ꞌ sa̱va̱ nuu̱ꞌ ñu̱ꞌuꞌ Bet-sur,
ni̱ xa̱ꞌa̱ a̱.
Te̱ ni̱ xaꞌa̱n ndi̱koꞌ ra̱ xiinꞌ a̱ nde̱e̱ nuu̱ꞌ a̱ miiꞌ kanduꞌu̱ꞌ ñañaꞌ miiꞌ naá ñu̱ꞌuꞌ ndeꞌi̱ David.
I̱kanꞌ te̱ ni̱ ki̱ꞌi̱n nama̱ ja̱a̱nꞌ kuaꞌa̱n a̱ nde̱e̱ ni̱ na̱xaa̱ ra̱ xiinꞌ a̱ nde̱e̱ miiꞌ ni̱ xa̱ꞌa̱ te̱ yivi̱ꞌ i̱i̱n mi̱ni̱ naá ti̱kui,
te̱ ni̱ yaꞌa̱ a̱ kuaꞌa̱n a̱ nde̱e̱ ni̱ na̱xaa̱ a̱ nde̱e̱ miiꞌ iinꞌ vi̱ꞌe̱ miiꞌ ndieeꞌ te̱ xíinꞌ,
te̱ ndi̱eni,
te̱ xitoꞌ rey.
17 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
te̱ vi̱ꞌe̱ Leví ni̱ xa̱ꞌa̱ a̱,
Rehum,
siꞌe̱ Bani.
Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Hasabías ni̱ nduu̱ te̱ kuuꞌ nu̱uꞌ nuu̱ꞌ te̱ xaꞌa nama̱ ja̱a̱nꞌ nuu̱ꞌ ñu̱ꞌuꞌ miiꞌ xaꞌndia tyuunꞌ mi̱iꞌ ku̱i̱ti̱ꞌ ra̱,
te̱ i̱i̱n te̱ xaꞌndia tyuunꞌ nuu̱ꞌ taꞌvi̱ꞌ sa̱va̱ ñu̱ꞌuꞌ Keila nduuꞌ tu̱ ra̱.
18 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
te̱ taꞌanꞌ ra̱ Bavai,
siꞌe̱ Henadad,
nduuꞌ te̱ ni̱ xa̱ꞌa̱ nama̱ ja̱a̱nꞌ,
te̱ te̱ xaꞌndia tyuunꞌ i̱nga̱ taꞌvi̱ꞌ sa̱va̱ nuu̱ꞌ ñu̱ꞌuꞌ Keila ni̱ nduu̱ Henadad ja̱a̱nꞌ.
19 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Ezer,
siꞌe̱ Jesúa,
te̱ xaꞌndia tyuunꞌ ñu̱u̱ Mizpa,
ni̱ xa̱ꞌa̱ a̱ ña̱ iinꞌ miiꞌ kuaꞌa̱n ka̱a̱ i̱tyiꞌ xiki̱ꞌ nama̱ miiꞌ iinꞌ vi̱ꞌe̱ miiꞌ taxaꞌa te̱ xíinꞌ sa̱kuuꞌ nda̱tyuunꞌ ra̱.
20 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ,
ña̱ xa̱ꞌaꞌ a̱ nde̱e̱ xiki̱ꞌ a̱ miiꞌ iinꞌ vi̱ꞌe̱ ja̱a̱nꞌ te̱ naxaá a̱ nde̱e̱ miiꞌ iinꞌ yiꞌeꞌ vi̱ꞌe̱ sutu̱,
te̱ naniꞌ Eliasib ndii,
Baruc,
siꞌe̱ Zabai,
ni̱ xa̱ꞌa̱ a̱.
21 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ña̱ xa̱ꞌaꞌ a̱ nde̱e̱ yiꞌeꞌ vi̱ꞌe̱ sutu̱ Eliasib ja̱a̱nꞌ,
te̱ ni̱ xaꞌa̱n ndi̱koꞌ a̱ nde̱e̱ ñu̱ꞌuꞌ miiꞌ iinꞌ vi̱ꞌe̱ ra̱ ja̱a̱nꞌ ndii,
Meremot,
siꞌe̱ Urías,
ni̱ xa̱ꞌa̱ a̱.
Te̱ Cos ni̱ nduu̱ yu̱vaꞌ Urías ja̱a̱nꞌ.
22 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
sutu̱,
te̱ ndieeꞌ ya̱ti̱n yo̱soꞌ i̱ti̱a̱ Jordán,
ni̱ xa̱ꞌa̱ a̱.
23 Te̱ Benjamín xiinꞌ Hasub ni̱ xa̱ꞌa̱ i̱nga̱ tuꞌu̱nꞌ nama̱ ña̱ xkaꞌndíá ya̱ti̱n yiꞌeꞌ ra̱.
Te̱ Azarías,
siꞌe̱ Maasías,
ni̱ xa̱ꞌa̱ i̱nga̱ tuꞌu̱nꞌ nama̱ ja̱a̱nꞌ ña̱ xkaꞌndíá ya̱ti̱n yiꞌeꞌ ra̱.
Te̱ Ananías ni̱ nduu̱ yu̱vaꞌ Maasías ja̱a̱nꞌ.
24 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Binúi,
siꞌe̱ Henadad,
ni̱ xa̱ꞌa̱ a̱ ña̱ xa̱ꞌaꞌ a̱ nde̱e̱ miiꞌ iinꞌ vi̱ꞌe̱ Azarías,
te̱ ni̱ xaꞌa̱n ndi̱koꞌ a̱ nde̱e̱ miiꞌ yoo xiki̱ꞌ nama̱ ja̱a̱nꞌ,
miiꞌ ni̱ ka̱ni̱a̱ xaꞌa̱ꞌ a̱.
25 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Pelal,
siꞌe̱ Uzai,
ni̱ xa̱ꞌa̱ a̱,
xtoꞌniꞌ miiꞌ ni̱ sa̱kaaꞌ ra̱ xaꞌa̱ꞌ nama̱ ja̱a̱nꞌ ya̱ti̱n miiꞌ iinꞌ vi̱ꞌe̱ sukun,
kanutaꞌ a̱ miiꞌ iinꞌ vi̱ꞌe̱ rey,
ya̱ti̱n nuu̱ꞌ ki̱ꞌe̱ miiꞌ ndieeꞌ te̱ xíinꞌ.
Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Pedaías,
siꞌe̱ Faros,
ni̱ xa̱ꞌa̱ a̱.
26 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
te̱ xikaꞌ nuuꞌ ti̱xi̱n yu̱kunꞌ kaꞌnuꞌ,
te̱ ndieeꞌ tindu̱ꞌ ña̱ naniꞌ Ofel ni̱ xa̱ꞌa̱ a̱,
te̱ ni̱ xaꞌa̱n ndi̱koꞌ ra̱ nde̱e̱ miiꞌ yoo yiꞌeꞌ,
ña̱ naniꞌ Miiꞌ Yooꞌ Ti̱kui,
xtoꞌniꞌ miiꞌ ketaꞌ ñu̱ꞌu̱,
ya̱ti̱n miiꞌ iinꞌ i̱i̱n ti̱ko̱ꞌyoꞌ ña̱ naniꞌ Gihon,
te̱ ya̱ti̱n ja̱a̱nꞌ tu̱ iinꞌ vi̱ꞌe̱ sukun ña̱ tuviꞌ kanutaꞌ miiꞌ iinꞌ vi̱ꞌe̱ rey.
27 Te̱ nuu̱ꞌ a̱ ja̱a̱nꞌ ni̱ na̱ꞌi̱ te̱ ndieeꞌ ñu̱u̱ Tecoa ni̱ xa̱ꞌa̱ ra̱ nama̱ ja̱a̱nꞌ,
ni̱ xa̱ꞌaꞌ ra̱ nde̱e̱ ya̱ti̱n miiꞌ iinꞌ vi̱ꞌe̱ sukun ja̱a̱nꞌ,
te̱ ni̱ xaꞌa̱n ndi̱koꞌ ra̱ nde̱e̱ miiꞌ iinꞌ nama̱ ña̱ ndasi tindu̱ꞌ ña̱ naniꞌ Ofel ja̱a̱nꞌ.
28 Te̱ i̱ꞌi̱n sutu̱ ndii,
mi̱iꞌ ra̱ ni̱ xa̱ꞌa̱ nama̱ ja̱a̱nꞌ ña̱ xkaꞌndíá ya̱ti̱n yiꞌeꞌ miiꞌ ndieeꞌ ra̱,
ña̱ xa̱ꞌaꞌ a̱ nde̱e̱ yiꞌeꞌ ña̱ naniꞌ Kuei.
29 Te̱ Sadoc,
siꞌe̱ Imer,
ni̱ xa̱ꞌa̱ i̱nga̱ tuꞌu̱nꞌ nama̱ ja̱a̱nꞌ,
sa̱kanꞌ ña̱ sa̱va̱ ni̱ yiꞌeꞌ ra̱ xkaꞌndíá a̱.
Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Semaías,
siꞌe̱ Secanías,
ni̱ xa̱ꞌa̱ a̱,
te̱ Semaías ja̱a̱nꞌ ni̱ nduu̱ te̱ xitoꞌ yiꞌeꞌ ñu̱u̱ Jerusalén,
ña̱ yoo xtoꞌniꞌ miiꞌ ketaꞌ ñu̱ꞌu̱.
30 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Hananías,
siꞌe̱ Selemías xiinꞌ Hanún,
te̱ iñu̱ siꞌe̱ Salaf,
ni̱ xa̱ꞌa̱ a̱.
Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Mesulam,
siꞌe̱ Berequías,
ni̱ xa̱ꞌa̱ a̱,
xtoꞌniꞌ miiꞌ iinꞌ vi̱ꞌe̱ nduꞌu̱ꞌ ra̱.
31 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
Malquías,
te̱ xatyuunꞌ xiinꞌ ka̱a̱ plata,
ni̱ xa̱ꞌa̱ a̱,
te̱ ni̱ xaꞌa̱n ndi̱koꞌ ra̱ xiinꞌ a̱ nde̱e̱ miiꞌ itaꞌ vi̱ꞌe̱ te̱ xikaꞌ nuuꞌ ti̱xi̱n yu̱kunꞌ kaꞌnuꞌ,
xiinꞌ miiꞌ itaꞌ vi̱ꞌe̱ te̱ xiko̱ꞌ ña̱ꞌa̱.
Te̱ ya̱ti̱n i̱kanꞌ tu̱ yoo yiꞌeꞌ ña̱ naniꞌ Miiꞌ Xitoꞌ Ra̱ Ne̱ Yivi̱ꞌ,
te̱ ni̱ xaꞌa̱n ndi̱koꞌ ra̱ xiinꞌ nama̱ ja̱a̱nꞌ nde̱e̱ xiki̱ꞌ a̱ miiꞌ iinꞌ vi̱ꞌe̱ ndieeꞌ te̱ xíinꞌ,
te̱ xitoꞌ ñu̱u̱ ja̱a̱nꞌ.
32 Te̱ i̱nga̱ tuꞌu̱nꞌ nama̱ ñu̱u̱ ja̱a̱nꞌ ndii,
te̱ xatyuunꞌ xiinꞌ ka̱a̱ plata ja̱a̱nꞌ xiinꞌ te̱ xiko̱ꞌ ña̱ꞌa̱ ni̱ xa̱ꞌa̱ a̱.
Ni̱ xa̱ꞌaꞌ ra̱ nde̱e̱ xiki̱ꞌ a̱ miiꞌ iinꞌ vi̱ꞌe̱ ndieeꞌ te̱ xíinꞌ te̱ xitoꞌ ñu̱u̱ ja̱a̱nꞌ,
te̱ ni̱ xaꞌa̱n ndi̱koꞌ ra̱ xiinꞌ a̱ nde̱e̱ yiꞌeꞌ ña̱ naniꞌ Mbe̱e̱.