Yoꞌoꞌ kaꞌán a̱ xaꞌa̱ꞌ ña̱ ni̱ na̱ndi̱koꞌ ne̱ vi̱ꞌe̱ Rubén, xiinꞌ ne̱ vi̱ꞌe̱ Gad, xiinꞌ taꞌvi̱ꞌ sa̱va̱ ne̱ vi̱ꞌe̱ Manasés nuu̱ꞌ ñu̱ꞌuꞌ mi̱iꞌ ni̱a̱
22
Sa̱kanꞌ te̱ ni̱ na̱ka̱ya̱ Josué sa̱kuuꞌ ne̱ vi̱ꞌe̱ Rubén,
xiinꞌ ne̱ vi̱ꞌe̱ Gad,
xiinꞌ taꞌvi̱ꞌ sa̱va̱ ne̱ vi̱ꞌe̱ Manasés,
2 te̱ ni̱ kaꞌa̱n ra̱ xiinꞌ ni̱a̱ ndii:
―Ndoꞌó ndii,
ni̱ xa̱a̱ ndo̱ꞌ sa̱kuuꞌ ña̱ ni̱ kaꞌa̱n tyuunꞌ Moisés,
te̱ ni̱ xika̱ nu̱u̱ nuu̱ꞌ Yahvé,
xiinꞌ ndo̱ꞌ,
te̱ ni̱ sa̱xinu̱ tu̱ ndo̱ꞌ sa̱kuuꞌ ña̱ ni̱ kaꞌa̱n tyuunꞌ yuꞌu̱ xiinꞌ ndo̱ꞌ.
3 Te̱ sa̱kuuꞌ kivi̱ꞌ ña̱ ni̱ ki̱xi̱n kaa̱ꞌ ndii,
nï̱ na̱ko̱o̱ i̱i̱n nda̱a̱ꞌ ndo̱ꞌ i̱nga̱ ti̱ꞌvi̱ ne̱ taꞌanꞌ ndo̱ꞌ,
süu̱ꞌ ja̱a̱nꞌ ndii,
ni̱ sa̱xinu̱ ndo̱ꞌ sa̱kuuꞌ ña̱ ni̱ kaꞌa̱n tyuunꞌ Yahvé Ndiosí e̱ꞌ xiinꞌ ndo̱ꞌ nde̱e̱ kivi̱ꞌ vi̱ti̱n.
4 Te̱ vi̱ti̱n ndii,
xa̱ ni̱ ta̱xi̱ Yahvé,
Ndiosí e̱ꞌ,
ña̱ na̱ndiee̱ꞌ ne̱ taꞌanꞌ ndo̱ꞌ kaa̱ꞌ sa̱a̱ niiꞌ ni̱ ta̱xi̱ a̱ kuento a̱,
sa̱kanꞌ na kuiiꞌ xa̱ ku̱vi̱ na̱ndi̱koꞌ sa̱kuuꞌ ndo̱ꞌ vi̱ꞌe̱ ndo̱ꞌ nuu̱ꞌ ñu̱ꞌuꞌ ña̱ ni̱ na̱ta̱ꞌviꞌ Moisés,
te̱ ni̱ xika̱ nu̱u̱ nuu̱ꞌ Yahvé,
Ndiosí e̱ꞌ,
nda̱ꞌaꞌ ndo̱ꞌ ku̱ndu̱u̱ ña̱ꞌa̱ ndo̱ꞌ tu̱ku̱ taꞌviꞌ yu̱ꞌuꞌ i̱ti̱a̱ Jordán.
5 Ndisu̱ nä̱ndoso̱ꞌ ndo̱ꞌ ña̱ sa̱xinu̱ ndo̱ꞌ sa̱kuuꞌ ña̱ ni̱ kaꞌa̱n tyuunꞌ Moisés,
te̱ ni̱ xika̱ nu̱u̱ nuu̱ꞌ Yahvé,
Ndiosí e̱ꞌ.
Te̱ nä̱ndoso̱ꞌ tu̱ ndo̱ꞌ tu̱ꞌu̱n nde̱iꞌ ña̱ ni̱ ta̱xi̱ ra̱ nda̱ꞌaꞌ ndo̱ꞌ ña̱ ku̱ndani̱ ndo̱ꞌ Yahvé,
Ndiosí e̱ꞌ,
xiinꞌ ña̱ ka̱ka̱ naa ka̱ka̱ ndo̱ꞌ i̱tyiꞌ a̱,
xiinꞌ ña̱ sa̱xinu̱ ndo̱ꞌ sa̱kuuꞌ ña̱ kaꞌán tyuunꞌ a̱,
xiinꞌ ña̱ ku̱ndiku̱n ki̱xinꞌ ña̱ꞌaꞌ ndo̱ꞌ,
te̱ ka̱ka̱ nu̱u̱ ndo̱ꞌ nuu̱ꞌ a̱ xiinꞌ ka̱niiꞌ nimá ndo̱ꞌ xiinꞌ ka̱niiꞌ te̱ nduuꞌ ndo̱ꞌ ―ni̱ katyi̱ ra̱.
6 Sa̱kanꞌ te̱ ni̱ sa̱ñuꞌuꞌ ña̱ꞌaꞌ Josué,
te̱ ni̱ nde̱iꞌ ña̱ꞌaꞌ ra̱,
te̱ ni̱ ki̱e̱e̱ te̱ ja̱a̱nꞌ kuaꞌa̱n nuꞌu̱ꞌ ra̱ vi̱ꞌe̱ toto̱ miiꞌ ndieeꞌ ra̱.
7 Taꞌvi̱ꞌ sa̱va̱ ne̱ vi̱ꞌe̱ Manasés ndii,
nuu̱ꞌ ñu̱ꞌuꞌ Basán ni̱ ta̱xi̱ Moisés nda̱ꞌaꞌ ni̱a̱ ku̱ndu̱u̱ ña̱ꞌa̱ ni̱a̱ tu̱ku̱ taꞌviꞌ yu̱ꞌuꞌ i̱ti̱a̱ Jordán xtoꞌniꞌ miiꞌ ketaꞌ ñu̱ꞌu̱,
te̱ i̱nga̱ tu̱ku̱ taꞌvi̱ꞌ sa̱va̱ ni̱a̱ ndii,
Josué ni̱ ta̱xi̱ ñu̱ꞌuꞌ nda̱ꞌaꞌ ni̱a̱ ku̱ndu̱u̱ ña̱ꞌa̱ ni̱a̱ te̱i̱n ne̱ taꞌanꞌ ni̱a̱ xtoꞌniꞌ miiꞌ ketá ñu̱ꞌu̱ i̱nga̱ taꞌviꞌ yu̱ꞌuꞌ i̱ti̱a̱ Jordán.
Te̱ ni̱ nde̱iꞌ tu̱ ra̱ ne̱ ja̱a̱nꞌ ña̱ kuní ka̱ ki̱e̱e̱ ni̱a̱ kuꞌu̱n ni̱a̱ kii̱ꞌ ndi̱ꞌi̱ ni̱ sa̱ñuꞌuꞌ ña̱ꞌaꞌ ra̱,
te̱ ni̱ ki̱e̱e̱ ni̱a̱ kuaꞌa̱n ni̱a̱.
8 Te̱ ni̱ kaꞌa̱n Josué xiinꞌ ra̱ ndii:
―Na̱ndi̱koꞌ ndo̱ꞌ vi̱ꞌe̱ ndo̱ꞌ xiinꞌ sa̱kuuꞌ ña̱ vikaꞌ ña̱ ni̱ na̱tyiꞌi̱ꞌ ndo̱ꞌ nda̱ꞌaꞌ te̱ ndasiꞌ taꞌanꞌ xiinꞌ ndo̱ꞌ,
xiinꞌ kuaꞌa̱ꞌ si̱ndiki̱ꞌ,
xiinꞌ kuaꞌa̱ꞌ tu̱ xu̱ꞌunꞌ plata,
xiinꞌ kuaꞌa̱ꞌ tu̱ oro,
xiinꞌ kuaꞌa̱ꞌ tu̱ ka̱a̱ bronce,
xiinꞌ kuaꞌa̱ꞌ tu̱ toto̱,
te̱ ta̱xi̱ na ndo̱ꞌ nda̱ꞌaꞌ ne̱ taꞌanꞌ ndo̱ꞌ tyaaꞌ ña̱ꞌa̱,
ña̱ ni̱ ne̱ꞌi̱ ndo̱ꞌ nda̱ꞌaꞌ ne̱ ndasiꞌ taꞌanꞌ xiinꞌ ndo̱ꞌ ñaa̱ꞌ ―ni̱ katyi̱ ra̱.
9 Sa̱kanꞌ te̱ ni̱ na̱ko̱o̱ ne̱ vi̱ꞌe̱ Rubén,
xiinꞌ ne̱ vi̱ꞌe̱ Gad,
xiinꞌ taꞌvi̱ꞌ sa̱va̱ ne̱ vi̱ꞌe̱ Manasés,
sa̱kuuꞌ i̱nga̱ ti̱ꞌvi̱ ne̱ vi̱ꞌe̱ Israel,
taꞌanꞌ ni̱a̱,
ñu̱u̱ Silo,
ña̱ naá nuu̱ꞌ ñu̱ꞌuꞌ Canaán,
te̱ ni̱ ki̱e̱e̱ ni̱a̱ kuaꞌa̱n nuꞌu̱ꞌ ni̱a̱ nuu̱ꞌ ñu̱ꞌuꞌ Galaad,
ña̱ nduuꞌ ñu̱ꞌuꞌ mi̱iꞌ ni̱a̱,
ña̱ ni̱ ndoo̱ nda̱ꞌaꞌ ni̱a̱ nduuꞌ ña̱ꞌa̱ ni̱a̱ sa̱a̱ niiꞌ ni̱ kaꞌa̱n tyuunꞌ Yahvé xiinꞌ nda̱ꞌaꞌ Moisés.
10 Te̱ kii̱ꞌ ni̱ xa̱a̱ sa̱kuuꞌ ne̱ vi̱ꞌe̱ Rubén,
xiinꞌ ne̱ vi̱ꞌe̱ Gad,
xiinꞌ taꞌvi̱ꞌ sa̱va̱ ne̱ vi̱ꞌe̱ Manasés miiꞌ kuaꞌa̱n ndi̱koꞌ i̱ti̱a̱ Jordán,
ña̱ xkaꞌndíá nuu̱ꞌ ñu̱ꞌuꞌ Canaán ndii,
ni̱ xa̱ꞌa̱ ni̱a̱ i̱i̱n altar kaꞌnuꞌ tyiee̱ va̱ yu̱ꞌuꞌ i̱ti̱a̱ Jordán ja̱a̱nꞌ.
11 Te̱ i̱nga̱ ti̱ꞌvi̱ ne̱ vi̱ꞌe̱ Israel ndii,
ni̱ xi̱ni̱ ni̱a̱ kuento kaꞌán ne̱ yivi̱ꞌ ña̱ ne̱ vi̱ꞌe̱ Rubén,
xiinꞌ ne̱ vi̱ꞌe̱ Gad,
xiinꞌ taꞌvi̱ꞌ sa̱va̱ ne̱ vi̱ꞌe̱ Manasés ndii,
ni̱ xa̱ꞌa̱ ni̱a̱ i̱i̱n altar xtoꞌniꞌ miiꞌ naá ñu̱ꞌuꞌ Canaán,
miiꞌ xaꞌa̱n ndi̱koꞌ i̱ti̱a̱ Jordán tu̱ku̱ taꞌviꞌ xtoꞌniꞌ miiꞌ ketá ñu̱ꞌu̱.
12 Kii̱ꞌ ni̱ xi̱ni̱ ne̱ vi̱ꞌe̱ Israel kuento xaꞌa̱ꞌ ña̱ ja̱a̱nꞌ ndii,
ni̱ na̱kaya̱ sa̱kuuꞌ ni̱a̱ ñu̱u̱ Silo ja̱a̱nꞌ te̱ kuꞌu̱n ku̱ntaꞌanꞌ ni̱a̱ xiinꞌ ne̱ ja̱a̱nꞌ.
13 Ndisu̱ ña̱ kuní ka̱ kuꞌu̱n ni̱a̱ ndii,
ni̱ ti̱ꞌviꞌ ni̱a̱ i̱i̱n uvi̱ te̱ yivi̱ꞌ xiinꞌ i̱i̱n te̱ naniꞌ Finees,
te̱ nduuꞌ siꞌe̱ sutu̱,
te̱ naniꞌ Eleazar,
nuu̱ꞌ ñu̱ꞌuꞌ Galaad te̱ nda̱tuꞌunꞌ ra̱ xiinꞌ ne̱ vi̱ꞌe̱ Rubén,
xiinꞌ ne̱ vi̱ꞌe̱ Gad,
xiinꞌ taꞌvi̱ꞌ sa̱va̱ ne̱ vi̱ꞌe̱ Manasés.
14 Te̱ kuaꞌa̱n uxi̱ taꞌan te̱ kuuꞌ kaꞌnuꞌ xiinꞌ Finees ja̱a̱nꞌ,
te̱ i̱ꞌi̱n te̱ ja̱a̱nꞌ nduuꞌ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ Israel,
te̱ su̱vi̱ ra̱ nduuꞌ tu̱ te̱ xaꞌndia tyuunꞌ nuu̱ꞌ ne̱ vi̱ꞌe̱ mi̱iꞌ ra̱.
15 Te̱ sa̱kuuꞌ te̱ ja̱a̱nꞌ ni̱ xaꞌa̱n nuu̱ꞌ ñu̱ꞌuꞌ Galaad miiꞌ ndieeꞌ ne̱ vi̱ꞌe̱ Rubén,
xiinꞌ ne̱ vi̱ꞌe̱ Gad,
xiinꞌ taꞌvi̱ꞌ sa̱va̱ ne̱ vi̱ꞌe̱ Manasés,
te̱ ni̱ kaꞌa̱n ra̱ xiinꞌ ni̱a̱ ndii:
16 ―Sa̱kuuꞌ ne̱ nduuꞌ kuenta Yahvé kaꞌán ndii:
“¿Ndiotyun na ni̱ na̱ko̱o̱ ndo̱ꞌ Yahvé xata̱ꞌ ndo̱ꞌ?
¿Te̱ ndiotyun na xaꞌa ndo̱ꞌ i̱i̱n altar miiꞌ sa̱kaꞌnuꞌ ndo̱ꞌ i̱nga̱ ndiosí,
te̱ xateiꞌ ndo̱ꞌ nuu̱ꞌ Yahvé?
17 ¿Ñáá näkaꞌanꞌ ka̱ ndo̱ꞌ xaꞌa̱ꞌ ku̱a̱tyi̱ ki̱ni̱ ña̱ ni̱ xa̱a̱ e̱ꞌ ya̱ti̱n miiꞌ itaꞌ i̱kuꞌ ña̱ naniꞌ Peor?
Tiäꞌa̱an ndi̱ꞌi̱ ndu̱ndo̱o̱ e̱ꞌ xaꞌa̱ꞌ ku̱a̱tyi̱ ja̱a̱nꞌ nde̱e̱ kivi̱ꞌ vi̱ti̱n,
te̱ xiní ndo̱ꞌ ña̱ kuaꞌa̱ꞌ va̱ ne̱ nduuꞌ kuenta Yahvé ni̱ xiꞌi̱ xaꞌa̱ꞌ ku̱a̱tyi̱ ja̱a̱nꞌ.
18 Te̱ vi̱ti̱n ndii,
nakooꞌ ndo̱ꞌ Yahvé xata̱ꞌ ndo̱ꞌ.
Te̱ naaꞌ sa̱teiꞌ ndo̱ꞌ vi̱ti̱n nuu̱ꞌ Yahvé,
Ndiosí e̱ꞌ ndii,
na̱saa̱ꞌ a̱ ku̱ni̱ a̱ sa̱kuuꞌ yooꞌ ne̱ Israel tiaa̱n.
19 Naaꞌ tuu ndo̱ꞌ ña̱ vä̱ꞌa̱ ka̱sa̱ꞌa̱ ndo̱ꞌ i̱i̱n altar miiꞌ sa̱kaꞌnuꞌ ndo̱ꞌ Ndiosí nuu̱ꞌ ñu̱ꞌuꞌ ña̱ ni̱ na̱ꞌi̱ ndo̱ꞌ nduuꞌ ña̱ꞌa̱ ndo̱ꞌ ndii,
ku̱vi̱ ki̱xi̱n ndo̱ꞌ nuu̱ꞌ ñu̱ꞌuꞌ ña̱ nduuꞌ kuenta mi̱iꞌ Yahvé miiꞌ iinꞌ vi̱ꞌe̱ toto̱ miiꞌ ni̱ kaꞌa̱n mi̱iꞌ a̱ sa̱kaꞌnuꞌ ña̱ꞌaꞌ e̱ꞌ,
te̱ ki̱ꞌi̱n ndo̱ꞌ siee ñu̱ꞌuꞌ ja̱a̱nꞌ,
te̱ ka̱sa̱ꞌa̱ ndo̱ꞌ miiꞌ sa̱kaꞌnuꞌ ña̱ꞌaꞌ ndo̱ꞌ.
Ndisu̱ sä̱teiꞌ ndo̱ꞌ nuu̱ꞌ Yahvé,
Ndiosí e̱ꞌ,
ni̱ nde̱e̱ sä̱teiꞌ tu̱ ndo̱ꞌ nuu̱ꞌ nduꞌu̱,
te̱ ka̱sa̱ꞌa̱ ka̱ ndo̱ꞌ i̱nga̱ altar,
tee̱ꞌ ndee xa̱ iinꞌ altar miiꞌ xakaꞌnuꞌ e̱ꞌ Yahvé,
Ndiosí e̱ꞌ.
20 Na̱ka̱ꞌanꞌ ndo̱ꞌ kii̱ꞌ ni̱ xa̱a̱ Acán,
siꞌe̱ Zera,
ku̱a̱tyi̱ ña̱ ni̱ na̱ꞌi̱ ra̱ ña̱ nduuꞌ ndi̱ti̱a̱ Yahvé ni̱ xi̱xi̱ ra̱ ndii,
süu̱ꞌ i̱i̱n nda̱a̱ꞌ mi̱iꞌ ku̱i̱ti̱ꞌ ra̱ ni̱ xa̱ꞌni̱ꞌ a̱ xaꞌa̱ꞌ ku̱a̱tyi̱ ja̱a̱nꞌ” ―ni̱ katyi̱ ra̱.
21 Sa̱kanꞌ te̱ ni̱ na̱ku̱i̱i̱n ne̱ vi̱ꞌe̱ Rubén,
xiinꞌ ne̱ vi̱ꞌe̱ Gad,
xiinꞌ taꞌvi̱ꞌ sa̱va̱ ne̱ vi̱ꞌe̱ Manasés kaꞌán ni̱a̱ xiinꞌ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ Israel ja̱a̱nꞌ ndii:
22 ―Yahvé ndii,
Ndiosí kaꞌnuꞌ ka̱ nduuꞌ a̱ te̱ sa̱kanꞌ ndiaa ka̱ ndiosí.
Te̱ xiní a̱ ña̱ süu̱ꞌ ni̱ xa̱ꞌa̱ ndu̱ altar kaa̱ꞌ te̱ sa̱teiꞌ ndu̱ nuu̱ꞌ a̱,
uun ni̱ xa̱ꞌa̱ ndu̱ a̱ te̱ na̱ko̱o̱ ña̱ꞌaꞌ ndu̱ xata̱ꞌ ndu̱.
Xiní ña̱ ja̱a̱nꞌ ña̱ süu̱ꞌ sa̱kanꞌ nduuꞌ a̱,
te̱ sa̱kuniꞌ tu̱ a̱ sa̱kuuꞌ ndoꞌó,
ne̱ Israel,
ne̱ taꞌanꞌ ndu̱.
Naaꞌ ni̱ xa̱ꞌa̱ ndu̱ altar ja̱a̱nꞌ xaꞌa̱ꞌ a̱ ña̱ xateiꞌ ndu̱ nuu̱ꞌ a̱,
uun te̱ na̱ko̱o̱ ña̱ꞌaꞌ ndu̱ xata̱ꞌ ndu̱ ndii,
na ka̱ꞌni̱ꞌ a̱ sa̱kuuꞌ ndu̱ kivi̱ꞌ vi̱ti̱n.
23 Naaꞌ ni̱ xa̱ꞌa̱ ndu̱ altar kaa̱ꞌ xaꞌa̱ꞌ mi̱iꞌ ndu̱ te̱ na̱ko̱o̱ ndu̱ Yahvé xata̱ꞌ ndu̱,
uun te̱ ka̱ꞌmi̱ ndu̱ ki̱tiꞌ nuu̱ꞌ i̱nga̱ ndiosí,
uun ña̱ na̱soko̱ꞌ ndu̱ ña̱ꞌa̱ nuu̱ꞌ ndiosí ja̱a̱nꞌ,
uun ña̱ na̱soko̱ꞌ ndu̱ ña̱ꞌa̱ ña̱ na̱koo̱ ndu̱ ña̱ mani̱ꞌ xiinꞌ i̱nga̱ ndiosí ndii,
mi̱iꞌ Yahvé na ka̱ni̱ ndu̱ xaꞌa̱ꞌ ña̱ ja̱a̱nꞌ.
24 ’¡Ndisu̱ süu̱ꞌ sa̱kanꞌ nduuꞌ a̱!
Süu̱ꞌ ja̱a̱nꞌ ndii,
ni̱ xa̱ꞌa̱ ndu̱ altar kaa̱ꞌ xaꞌa̱ꞌ a̱ ña̱ yiꞌvi ndu̱ ña̱ naá kivi̱ꞌ ndii,
kaꞌa̱n siꞌe̱ ndoꞌó xiinꞌ siꞌe̱ nduꞌu̱ ndii:
“Köo̱ꞌ xa̱tyiꞌ nde̱e̱ i̱i̱n xaꞌa̱ꞌ ña̱ sa̱kaꞌnuꞌ ndoꞌó Yahvé,
Ndiosí ña̱ xakaꞌnuꞌ nduꞌu̱,
ne̱ Israel.
25 Sa̱kanꞌ ña̱ Yahvé ndii,
xa̱ ni̱ tyi̱nduꞌu̱ꞌ a̱ i̱ti̱a̱ Jordán ku̱ndu̱u̱ xeꞌinꞌ te̱i̱n nduꞌu̱ xiinꞌ ndoꞌó,
ne̱ vi̱ꞌe̱ Rubén,
xiinꞌ ne̱ vi̱ꞌe̱ Gad.
Te̱ köo̱ꞌ nde̱e̱ i̱i̱n xaꞌa̱ꞌ ña̱ kaꞌa̱n ndo̱ꞌ ña̱ kuenta Yahvé nduuꞌ ndo̱ꞌ”,
katyi̱ ra̱.
Sa̱kanꞌ sa̱a̱ te̱ si̱a̱niꞌ xikaꞌ ndo̱ꞌ ja̱a̱nꞌ xiinꞌ si̱a̱niꞌ xikaꞌ nduꞌu̱,
te̱ tä̱xi̱ ra̱ ña̱ sa̱kaꞌnuꞌ ni̱a̱ Yahvé.
26 ’Sa̱kanꞌ na kuiiꞌ ni̱ ndoo̱ ndu̱ kuento ña̱ ka̱sa̱ꞌa̱ ndu̱ i̱i̱n altar,
ndisu̱ süu̱ꞌ miiꞌ ka̱ꞌmi̱ ndu̱ ki̱tiꞌ nuu̱ꞌ i̱nga̱ ndiosí ku̱ndu̱u̱ a̱,
ni̱ nde̱e̱ süu̱ꞌ miiꞌ na̱soko̱ꞌ ndu̱ ña̱ꞌa̱ nuu̱ꞌ i̱nga̱ ndiosí ja̱a̱nꞌ ku̱ndu̱u̱ tu̱ a̱.
27 Süu̱ꞌ ja̱a̱nꞌ ndii,
ni̱ xa̱ꞌa̱ ndu̱ a̱ te̱ ku̱ndu̱u̱ a̱ ña̱ sa̱na̱kaꞌanꞌ yooꞌ,
te̱ sa̱na̱kaꞌanꞌ tu̱ a̱ si̱a̱niꞌ xikaꞌ nduꞌu̱ xiinꞌ te̱ si̱a̱niꞌ xikaꞌ ndoꞌó,
te̱ ku̱nda̱ni̱ ra̱ ña̱ ku̱vi̱ sa̱kaꞌnuꞌ tu̱ nduꞌu̱ Yahvé ti̱xi̱n yu̱kunꞌ kaꞌnuꞌ,
ña̱ ka̱ꞌmi̱ ndu̱ ki̱tiꞌ nuu̱ꞌ a̱,
xiinꞌ ña̱ na̱soko̱ꞌ ndu̱ ña̱ꞌa̱ nuu̱ꞌ a̱,
xiinꞌ ña̱ na̱soko̱ꞌ ndu̱ ña̱ꞌa̱,
ña̱ nakoó ndu̱ ña̱ mani̱ꞌ xiinꞌ a̱,
te̱ käꞌa̱n si̱a̱niꞌ xikaꞌ ndo̱ꞌ ja̱a̱nꞌ naá kivi̱ꞌ xiinꞌ si̱a̱niꞌ xikaꞌ ndu̱ ja̱a̱nꞌ ndii:
“Ndoꞌó ndii,
köo̱ꞌ nde̱e̱ i̱i̱n xaꞌa̱ꞌ ña̱ sa̱kaꞌnuꞌ ndo̱ꞌ Yahvé”,
katyi̱ ra̱.
28 ’Sa̱kanꞌ na kuiiꞌ ni̱ nda̱tuꞌunꞌ ndu̱ ndii:
Naaꞌ naá kivi̱ꞌ kaꞌa̱n ra̱ sa̱kanꞌ xiinꞌ ndu̱,
uun xiinꞌ si̱a̱niꞌ xikaꞌ ndu̱ ndii,
na̱ku̱i̱i̱n ndu̱ kaꞌa̱n ndu̱ ndii:
“Ko̱to̱ ndo̱ꞌ,
kaa̱ꞌ iinꞌ altar ña̱ nduuꞌ kuenta Yahvé,
ña̱ ni̱ xa̱ꞌa̱ te̱ xii̱ꞌ ya̱taꞌ ndu̱,
süu̱ꞌ ni̱ xa̱ꞌa̱ ra̱ a̱ te̱ ka̱ꞌmi̱ ndu̱ ki̱tiꞌ nuu̱ꞌ a̱,
uun te̱ na̱soko̱ꞌ ndu̱ ña̱ꞌa̱ nuu̱ꞌ a̱,
süu̱ꞌ ja̱a̱nꞌ ndii,
ni̱ xa̱ꞌa̱ ra̱ a̱ te̱ ku̱ndu̱u̱ a̱ ña̱ sa̱na̱kaꞌanꞌ nduꞌu̱ xiinꞌ ndoꞌó.
29 Sa̱kanꞌ ña̱ köo̱ꞌ kivi̱ꞌ sa̱teiꞌ ndu̱ nuu̱ꞌ Yahvé,
ni̱ nde̱e̱ nä̱ko̱o̱ tu̱ ña̱ꞌaꞌ ndu̱ xata̱ꞌ ndu̱ vi̱ti̱n,
te̱ ka̱sa̱ꞌa̱ ndu̱ i̱i̱n altar xaꞌa̱ꞌ mi̱iꞌ ndu̱ miiꞌ ka̱ꞌmi̱ ndu̱ ki̱tiꞌ,
uun na̱soko̱ꞌ ndu̱ ña̱ꞌa̱,
uun na̱soko̱ꞌ ndu̱ i̱nga̱ nuu̱ꞌ ña̱ꞌa̱ nuu̱ꞌ i̱nga̱ ndiosí.
I̱i̱n nda̱a̱ꞌ altar ña̱ iinꞌ ti̱xi̱n vi̱ꞌe̱ toto̱ miiꞌ xakaꞌnuꞌ e̱ꞌ Yahvé ku̱i̱ti̱ꞌ nduuꞌ miiꞌ ku̱vi̱ na̱soko̱ꞌ e̱ꞌ sa̱kuuꞌ ña̱ ja̱a̱nꞌ nuu̱ꞌ Ndiosí” ―ni̱ katyi̱ ra̱.
30 Kii̱ꞌ ni̱ xi̱ni̱ sutu̱ Finees,
xiinꞌ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ Israel,
xiinꞌ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ i̱i̱n kuuꞌ xiinꞌ miiꞌ ra̱ ña̱ ni̱ kaꞌa̱n ne̱ vi̱ꞌe̱ Rubén,
xiinꞌ ne̱ vi̱ꞌe̱ Gad,
xiinꞌ taꞌvi̱ꞌ sa̱va̱ ne̱ vi̱ꞌe̱ Manasés ndii,
ni̱ na̱kuita̱ kuento ra̱ xiinꞌ te̱ ja̱a̱nꞌ.
31 Sa̱kanꞌ te̱ ni̱ kaꞌa̱n Finees,
siꞌe̱ sutu̱ Eleazar,
xiinꞌ ra̱ ndii:
―Vi̱ti̱n ku̱ndani̱ ndu̱ ña̱ yoo Yahvé te̱i̱n e̱ꞌ,
sa̱kanꞌ ña̱ nï̱ xika̱ ndo̱ꞌ na̱ko̱o̱ ndo̱ꞌ Yahvé xata̱ꞌ ndo̱ꞌ kii̱ꞌ ni̱ xa̱ꞌa̱ ndo̱ꞌ altar kaa̱ꞌ nde̱e̱ naa ni̱ xa̱ni̱ni̱ ndu̱.
Te̱ vi̱ti̱n ndii,
kä̱ꞌni̱ꞌ Yahvé yooꞌ,
ne̱ Israel,
xaꞌa̱ꞌ ña̱ ja̱a̱nꞌ ―ni̱ katyi̱ ra̱.
32 Sa̱kanꞌ te̱ ni̱ na̱ko̱o̱ Finees,
siꞌe̱ sutu̱ Eleazar,
xiinꞌ te̱ kuuꞌ nu̱uꞌ ja̱a̱nꞌ ne̱ vi̱ꞌe̱ Rubén,
xiinꞌ ne̱ vi̱ꞌe̱ Gad,
te̱ ni̱ na̱ndi̱koꞌ ra̱ ñu̱u̱ Galaad,
ña̱ naá nuu̱ꞌ Canaán,
miiꞌ ndieeꞌ taꞌanꞌ ra̱,
ne̱ Israel.
Te̱ ni̱ kaꞌa̱n ra̱ xiinꞌ ne̱ ja̱a̱nꞌ sa̱kuuꞌ ña̱ ni̱ kaꞌa̱n ne̱ ndieeꞌ miiꞌ ni̱ xaꞌa̱n na̱ ja̱a̱nꞌ xiinꞌ ra̱.
33 Te̱ va̱ꞌa̱ yoo sa̱kuuꞌ ña̱ ja̱a̱nꞌ ni̱ katyi̱ sa̱kuuꞌ ne̱ vi̱ꞌe̱ Israel,
te̱ ni̱ xa̱kaꞌnuꞌ ni̱a̱ Yahvé,
te̱ nï̱ nda̱tuꞌunꞌ ka̱ ni̱a̱ ña̱ ku̱ntaꞌanꞌ ni̱a̱ xiinꞌ ne̱ ja̱a̱nꞌ te̱ sa̱ndo̱ñuꞌuꞌ ni̱a̱ ñu̱ꞌuꞌ miiꞌ ndieeꞌ ne̱ vi̱ꞌe̱ Rubén xiinꞌ ne̱ vi̱ꞌe̱ Gad.
34 Te̱ ni̱ tyi̱nduꞌu̱ꞌ ne̱ vi̱ꞌe̱ Rubén xiinꞌ ne̱ vi̱ꞌe̱ Gad kivi̱ꞌ altar ja̱a̱nꞌ naniꞌ a̱,
“ña̱ ndieeꞌ yu̱ꞌuꞌ”,
sa̱kanꞌ ña̱ ni̱ kaꞌa̱n ni̱a̱ ndii:
“Ña̱ kaa̱ꞌ ku̱ndu̱u̱ ña̱ sa̱na̱kaꞌanꞌ yooꞌ,
te̱ sa̱na̱kaꞌanꞌ tu̱ a̱ ne̱ ja̱a̱nꞌ ña̱ i̱i̱n nda̱a̱ꞌ Yahvé ku̱i̱ti̱ꞌ nduuꞌ Ndiosí e̱ꞌ”,
ni̱ katyi̱ ni̱a̱.