Tu̱tu̱ ña̱ ni̱ ke̱ꞌi̱ Moisés xaꞌa̱ꞌ sa̱a̱ ni̱ xa̱a̱ a̱ kii̱ꞌ ni̱ ki̱e̱e̱ ne̱ vi̱ꞌe̱ Israel nuu̱ꞌ ñu̱ꞌuꞌ Egipto
So̱ꞌo̱ ni̱ xa̱a̱ a̱ kii̱ꞌ ndieeꞌ ne̱ Israel nuu̱ꞌ ñu̱ꞌuꞌ Egipto
1
Ña̱ yo̱ꞌo̱ꞌ nduuꞌ kivi̱ꞌ sa̱kuuꞌ tiaa̱ siꞌe̱ Jacob,
te̱ naniꞌ tu̱ Israel,
te̱ ni̱ xa̱a̱ xiinꞌ ra̱ nuu̱ꞌ ñu̱ꞌuꞌ Egipto,
i̱ꞌi̱n te̱ ja̱a̱nꞌ ni̱ xa̱a̱ i̱kanꞌ xiinꞌ ñaꞌ siꞌi ra̱ xiinꞌ siꞌe̱ ra̱.
2 Rubén naniꞌ te̱ nu̱uꞌ siꞌe̱ Jacob ja̱a̱nꞌ,
te̱ i̱nga̱ ra̱ naniꞌ Simeón,
te̱ i̱nga̱ ka̱ ra̱ naniꞌ Leví,
te̱ i̱nga̱ ra̱ naniꞌ Judá,
3 te̱ i̱nga̱ ra̱ naniꞌ Isacar,
te̱ i̱nga̱ ra̱ naniꞌ Zabulón,
te̱ i̱nga̱ ra̱ naniꞌ Benjamín,
4 te̱ i̱nga̱ ra̱ naniꞌ Dan,
te̱ i̱nga̱ ra̱ naniꞌ Neftalí,
te̱ i̱nga̱ ra̱ naniꞌ Gad,
te̱ i̱nga̱ ka̱ ra̱ naniꞌ Aser.
5 Te̱ ña̱ sa̱kuuꞌ ne̱ vi̱ꞌe̱ Jacob ndii,
uni̱ xi̱ko̱ uxi̱ ni̱ ku̱u̱ ni̱a̱ nde̱e̱ José,
te̱ xa̱ nduꞌu̱ꞌ nuu̱ꞌ ñu̱ꞌuꞌ Egipto ja̱a̱nꞌ.
6 Kii̱ꞌ ni̱ yaꞌa̱ ndii,
ni̱ xiꞌi̱ José,
te̱ ni̱ xiꞌi̱ tu̱ sa̱kuuꞌ ña̱ni̱ ra̱ xiinꞌ sa̱kuuꞌ ne̱ ni̱ xa̱ꞌnu̱ ingaꞌ xiinꞌ ra̱.
7 Ndisu̱ ne̱ vi̱ꞌe̱ Israel ja̱a̱nꞌ ndii,
va̱ꞌa̱ va̱ ni̱ na̱taꞌvi̱ꞌ ni̱a̱,
te̱ ni̱ ku̱kuaꞌa̱ꞌ xa̱va̱ꞌa̱ ni̱a̱,
ni̱ na̱ndu̱u̱ kuaꞌa̱ꞌ ni̱a̱,
te̱ ni̱ ku̱ndityi tu̱ ni̱a̱,
te̱ ni̱ kiku̱ ni̱a̱ ka̱niiꞌ nuu̱ꞌ ñu̱ꞌuꞌ ja̱a̱nꞌ ndieeꞌ ni̱a̱.
8 Te̱ kii̱ꞌ ni̱ yaꞌa̱ kuaꞌa̱ꞌ va̱ kuiya̱,
te̱ ni̱ na̱ꞌi̱ tyuunꞌ tu̱ku̱ rey xa̱aꞌ nuu̱ꞌ ñu̱ꞌuꞌ Egipto ja̱a̱nꞌ,
te̱ ja̱a̱nꞌ ndii,
nde̱e̱ siee xïní ra̱ xaꞌa̱ꞌ José,
ni̱ nde̱e̱ ña̱ ni̱ xa̱a̱ te̱ ja̱a̱nꞌ xaꞌa̱ꞌ ne̱ ñu̱u̱ ja̱a̱nꞌ,
sa̱kanꞌ na̱ ni̱ kaꞌa̱n ra̱ xiinꞌ ne̱ ñu̱u̱ ra̱ ndii:
9 ―Ko̱to̱ ndo̱ꞌ,
ne̱ vi̱ꞌe̱ Israel kaa̱ꞌ ndii,
nanduuꞌ kuaꞌa̱ꞌ xa̱va̱ꞌa̱ ni̱a̱ te̱ nde̱e̱ kooꞌ tyukuuꞌ ka̱ ni̱a̱ te̱ sa̱kanꞌ yooꞌ.
10 Sa̱kanꞌ na kuiiꞌ kuní a̱ tyi̱tuní si̱ꞌe e̱ꞌ i̱i̱n ña̱ sa̱a̱ e̱ꞌ xiinꞌ ni̱a̱ te̱ tä̱xi̱ e̱ꞌ na̱ndu̱u̱ kuaꞌa̱ꞌ ka̱ ni̱a̱,
ko̱to̱ ka̱ naaꞌ ku̱ntaꞌanꞌ e̱ꞌ xiinꞌ te̱ ndasiꞌ taꞌanꞌ xiinꞌ e̱ꞌ ndii,
kueinꞌ ndu̱i̱i̱n ni̱a̱ xiinꞌ te̱ ja̱a̱nꞌ te̱ ku̱ntaꞌanꞌ ni̱a̱ xiinꞌ e̱ꞌ,
te̱ ku̱nu̱ ni̱a̱ nuu̱ꞌ e̱ꞌ kii̱ꞌ ke̱ta̱ va̱ꞌa̱ ni̱a̱ xiinꞌ e̱ꞌ ―ni̱ katyi̱ ra̱.
11 Xaꞌa̱ꞌ a̱ ja̱a̱nꞌ na ni̱ sa̱kuisoꞌ tyuunꞌ ra̱ te̱ kuiꞌe̱ va̱ ka̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Israel ja̱a̱nꞌ,
te̱ ni̱ ti̱i̱n uꞌvi̱ ña̱ꞌaꞌ ra̱ te̱ sa̱a̱ ni̱a̱ tyu̱u̱n viee̱ va̱.
Sa̱kanꞌ na ni̱ xa̱ꞌa̱ ni̱a̱ ñu̱u̱ ña̱ naniꞌ Pitón xiinꞌ ña̱ naniꞌ Ramsés miiꞌ ni̱ ta̱xa̱ꞌa̱ Faraón rey nuu̱ꞌ ñu̱ꞌuꞌ Egipto ña̱ savi̱ꞌ ra̱.
12 Ndisu̱ tee̱ꞌ ndee kuaꞌa̱ꞌ ka̱ sandoꞌoꞌ ña̱ꞌaꞌ ra̱ ndii,
so̱ꞌo̱ nataꞌvíꞌ ka̱ ni̱a̱,
te̱ so̱ꞌo̱ kikú ka̱ tu̱ ni̱a̱ nuu̱ꞌ ñu̱ꞌuꞌ ja̱a̱nꞌ,
xaꞌa̱ꞌ a̱ ja̱a̱nꞌ na ni̱ yi̱ꞌvi va̱ sa̱kuuꞌ ne̱ Egipto ja̱a̱nꞌ.
13 Sa̱kanꞌ na kuiiꞌ ni̱ ta̱xi̱ ra̱ tyu̱u̱n viee̱ va̱ nuu̱ꞌ ne̱ ja̱a̱nꞌ sa̱a̱ ni̱a̱,
te̱ mi̱iꞌ va̱ ni̱ ku̱u̱ ra̱ xiinꞌ ni̱a̱.
14 Ni̱ sa̱ndoꞌoꞌ xa̱va̱ꞌa̱ ña̱ꞌaꞌ ra̱ satyiiꞌ ni̱a̱ ndeꞌi̱ te̱ xaꞌa ni̱a̱ ndo̱ꞌo̱,
te̱ xaaꞌ tu̱ ni̱a̱ nde̱e̱ ndiꞌiꞌ ni̱ nuu̱ꞌ tyu̱u̱n xaꞌa̱ꞌ kuꞌu̱ xaaꞌ ra̱.
Te̱ sa̱kuuꞌ tyu̱u̱n ña̱ ni̱ xa̱a̱ ni̱a̱ ja̱a̱nꞌ ndii,
mi̱iꞌ va̱ ni̱ ku̱u̱ ra̱ xiinꞌ ni̱a̱ te̱ ni̱ xa̱a̱ ni̱a̱ a̱.
15 Ni̱ yoo̱ uvi̱ taꞌan ña̱ꞌaꞌ ñaꞌ hebrea ñaꞌ sandoó i̱nga̱ ña̱ꞌaꞌ xiinꞌ siꞌe̱ ni̱a̱,
i̱i̱n aꞌ naniꞌ Sifrá,
te̱ i̱nga̱ aꞌ naniꞌ Fúa.
Ni̱ kaꞌa̱n tyuunꞌ tu̱ rey,
te̱ xaꞌndia tyuunꞌ nuu̱ꞌ ñu̱ꞌuꞌ Egipto,
xiinꞌ ne̱ ja̱a̱nꞌ ndii:
16 ―Kii̱ꞌ tyindieeꞌ ndo̱ꞌ ña̱ꞌaꞌ ne̱ hebrea te̱ ndoo̱ ni̱a̱ xiinꞌ siꞌe̱ ni̱a̱ ndii,
tyu̱nxaꞌaꞌ ndo̱ꞌ limaꞌ ña̱ kuañuꞌu̱ ña̱ ni̱ tuvi̱,
naaꞌ ña̱ꞌaꞌ nduuꞌ aꞌ ndii,
ta̱xi̱ ndo̱ꞌ ku̱ti̱a̱ku̱ aꞌ,
ndisu̱ naaꞌ tiaa̱ nduuꞌ ra̱ ndii,
ka̱ꞌni̱ꞌ ndo̱ꞌ ra̱ ―ni̱ katyi̱ ra̱.
17 Ndisu̱ ne̱ sandoó ña̱ꞌaꞌ ja̱a̱nꞌ ndii,
ni̱ yi̱ꞌvi ni̱a̱ Ndiosí,
sa̱kanꞌ na nï̱ xa̱a̱ ni̱a̱ ña̱ ni̱ kaꞌa̱n tyuunꞌ rey ja̱a̱nꞌ xiinꞌ ni̱a̱,
xaꞌa̱ꞌ a̱ ja̱a̱nꞌ na nï̱ xa̱ꞌni̱ꞌ ni̱a̱ tiaa̱ kualiꞌ ja̱a̱nꞌ.
18 Sa̱kanꞌ na kuiiꞌ ni̱ ka̱na̱ rey,
te̱ xaꞌndia tyuunꞌ nuu̱ꞌ ñu̱ꞌuꞌ Egipto ja̱a̱nꞌ ña̱ꞌaꞌ ja̱a̱nꞌ,
te̱ ni̱ kaꞌa̱n ra̱ xiinꞌ ni̱a̱ ndii:
―¿Ndiotyun na ni̱ xa̱a̱ ndo̱ꞌ ña̱ ja̱a̱nꞌ,
ña̱ nï̱ xa̱ꞌni̱ꞌ ndo̱ꞌ tiaa̱ kualiꞌ?
―ni̱ katyi̱ ra̱.
19 Sa̱kanꞌ te̱ ni̱ kaꞌa̱n ne̱ ja̱a̱nꞌ ndii:
―Sa̱kanꞌ ña̱ ña̱ꞌaꞌ,
ne̱ hebrea ndii,
ïinꞌ ni̱a̱ naa iinꞌ ña̱ꞌaꞌ ne̱ egipcia,
süu̱ꞌ ja̱a̱nꞌ ndii,
ndi̱e̱eꞌ ni̱a̱,
te̱ sa̱kuuꞌ i̱tyiꞌ kii̱ꞌ xaá ndu̱ miiꞌ sakakuꞌ ni̱a̱ ndii,
xa̱ ni̱ sa̱kakuꞌ ni̱a̱ siꞌe̱ ni̱a̱ ―ni̱ katyi̱ ña̱ꞌaꞌ ja̱a̱nꞌ.
20 Xaꞌa̱ꞌ a̱ ja̱a̱nꞌ na ni̱ nda̱sa̱kuaꞌa̱ꞌ ka̱ Ndiosí ne̱ vi̱ꞌe̱ Israel ja̱a̱nꞌ,
te̱ ni̱ ku̱ndityi tu̱ ni̱a̱.
Sa̱kanꞌ na ni̱ sa̱ñuꞌuꞌ tu̱ Ndiosí ne̱ sandoó ña̱ꞌaꞌ ja̱a̱nꞌ.
21 Te̱ xaꞌa̱ꞌ a̱ ña̱ ni̱ yi̱ꞌvi ña̱ꞌaꞌ ne̱ sandoó ne̱ yivi̱ꞌ xiinꞌ siꞌe̱ ni̱a̱ ja̱a̱nꞌ Ndiosí ndii,
ni̱ ta̱xi̱ a̱ ña̱ ko̱o̱ kuaꞌa̱ꞌ va̱ siꞌe̱ ni̱a̱.
22 Sa̱kanꞌ te̱ ni̱ kaꞌa̱n tyuunꞌ Faraón xiinꞌ ne̱ ñu̱u̱ ra̱ ndii:
―I̱ti̱a̱ Nilo ko̱ꞌni̱ ndo̱ꞌ sa̱kuuꞌ tiaa̱ kualiꞌ siꞌe̱ ne̱ vi̱ꞌe̱ hebreo,
te̱ tuví,
ndisu̱ sa̱kuuꞌ ña̱ꞌaꞌ ndii,
kä̱ꞌni̱ꞌ ña̱ꞌaꞌ ndo̱ꞌ ―ni̱ katyi̱ ra̱.