So̱ꞌo̱ ni̱ xa̱a̱ a̱ kii̱ꞌ ni̱ ndiee̱ ñu̱ꞌuꞌ ndeꞌi̱ Jacob
50
Sa̱kanꞌ te̱ ni̱ nu̱mi̱ José ñu̱ꞌuꞌ ndeꞌi̱ yu̱vaꞌ ra̱, te̱ ni̱ xa̱ku̱ ra̱ tyíto ra̱ ñu̱ꞌuꞌ ndeꞌi̱ ja̱a̱nꞌ.
2 Te̱ ni̱ kaꞌa̱n tyuunꞌ ra̱ xiinꞌ te̱ tatanꞌ, te̱ xatyuunꞌ nuu̱ꞌ ra̱ te̱ sa̱kooꞌ tu̱ꞌva̱ ra̱ ñu̱ꞌuꞌ ndeꞌi̱ yu̱vaꞌ ra̱ ja̱a̱nꞌ, te̱ ni̱ xa̱a̱ te̱ tatanꞌ ja̱a̱nꞌ ña̱ ja̱a̱nꞌ xiinꞌ ñu̱ꞌuꞌ ndeꞌi̱ Jacob.
3 Niiꞌ uvi̱ xi̱ko̱ kivi̱ꞌ ni̱ xa̱tyuunꞌ te̱ tatanꞌ ja̱a̱nꞌ sa̱kooꞌ tu̱ꞌva̱ ra̱ ñu̱ꞌuꞌ ndeꞌi̱ Jacob ja̱a̱nꞌ, sa̱kanꞌ ña̱ ña̱ ja̱a̱nꞌ nduuꞌ kivi̱ꞌ ña̱ kuní a̱ nuu̱ꞌ te̱ tatanꞌ ja̱a̱nꞌ te̱ sa̱xinú ra̱ tyu̱u̱n ja̱a̱nꞌ. Te̱ ni̱ xa̱ku̱ sa̱kuuꞌ ne̱ Egipto niiꞌ uni̱ xi̱ko̱ uxi̱ kivi̱ꞌ xaꞌa̱ꞌ ña̱ ni̱ xiꞌi̱ Jacob.
4 Te̱ kii̱ꞌ ni̱ xkaꞌndi̱a̱ kivi̱ꞌ ña̱ ni̱ yoo̱ sutyiꞌ i̱ni̱ ne̱ yivi̱ꞌ ja̱a̱nꞌ xaꞌa̱ꞌ ña̱ ni̱ xiꞌi̱ Jacob ndii, ni̱ xaꞌa̱n José miiꞌ ndieeꞌ te̱ xatyuunꞌ nuu̱ꞌ Faraón, te̱ ni̱ kaꞌa̱n ra̱ xiinꞌ te̱ ja̱a̱nꞌ ndii:
―Naaꞌ te̱ yivi̱ꞌ va̱ꞌa̱ nduuꞌ i̱ nuu̱ꞌ ndo̱ꞌ ndii, sa̱a̱ ndo̱ꞌ ña̱ va̱ꞌa̱ te̱ kuꞌu̱n ndo̱ꞌ nuu̱ꞌ Faraón, te̱ kaꞌa̱n ndo̱ꞌ xiinꞌ ra̱ ña̱
5 kii̱ꞌ kuní ka̱ ku̱vi̱ yu̱vaꞌ i̱, te̱ ni̱ kaꞌa̱n tyuunꞌ ndi̱e̱eꞌ a̱ xiinꞌ i̱ ña̱ ta̱xi̱ i̱ kuento i̱ nuu̱ꞌ a̱, kaꞌán a̱ ndii: “Vi̱ti̱n ndii, nä̱ꞌanꞌ ka̱ te̱ ku̱vi̱ yuꞌu̱, sa̱kanꞌ na kaꞌán i̱ xiinꞌ u̱nꞌ ña̱ kuꞌu̱n tyi̱naá u̱nꞌ ñu̱ꞌuꞌ ndeꞌi̱ i̱ yavi̱ ndi̱i̱, ña̱ ni̱ xa̱ꞌa̱ mi̱iꞌ i̱ nuu̱ꞌ ñu̱ꞌuꞌ Canaán”, ni̱ katyi̱ a̱ xiinꞌ i̱. Xaꞌa̱ꞌ a̱ ja̱a̱nꞌ na kuaꞌan ndo̱ꞌ te̱ kaꞌa̱n ndo̱ꞌ xiinꞌ Faraón ndii: “Kaꞌán ndaꞌvi José xiinꞌ u̱nꞌ ña̱ sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ kuꞌu̱n na̱taa̱nꞌ ra̱ ñu̱ꞌuꞌ ndeꞌi̱ yu̱vaꞌ ra̱, te̱ na̱ndi̱koꞌ ra̱ kii̱ꞌ ndi̱ꞌi̱ tyi̱naá ña̱ꞌaꞌ ra̱ i̱kanꞌ”, katyi̱ ndo̱ꞌ ―ni̱ katyi̱ ra̱
6 Te̱ ni̱ kaꞌa̱n Faraón xiinꞌ te̱ yivi̱ꞌ ja̱a̱nꞌ ndii:
―Na kuꞌu̱n ra̱ te̱ na̱taa̱nꞌ ra̱ ñu̱ꞌuꞌ ndeꞌi̱ yu̱vaꞌ ra̱ i̱kanꞌ, sa̱a̱ ni̱ kaꞌa̱n tyuunꞌ te̱ ja̱a̱nꞌ xiinꞌ ra̱ ña̱ ta̱xi̱ ra̱ kuento ra̱ nuu̱ꞌ ra̱ ―ni̱ katyi̱ Faraón.
7 Sa̱kanꞌ te̱ ni̱ ke̱ta̱ José kuaꞌa̱n na̱taa̱nꞌ ra̱ ñu̱ꞌuꞌ ndeꞌi̱ yu̱vaꞌ ra̱, te̱ kuaꞌa̱n tu̱ sa̱kuuꞌ te̱ xikaꞌ nuuꞌ nuu̱ꞌ Faraón xiinꞌ ra̱, xiinꞌ te̱ xi̱xa̱, te̱ kaꞌán tuní ti̱xi̱n vi̱ꞌe̱ Faraón ja̱a̱nꞌ, xiinꞌ sa̱kuuꞌ te̱ kuuꞌ nu̱uꞌ nuu̱ꞌ ñu̱ꞌuꞌ Egipto.
8 Te̱ kuaꞌa̱n tu̱ sa̱kuuꞌ ne̱ ndieeꞌ vi̱ꞌe̱ mi̱iꞌ José xiinꞌ ra̱, xiinꞌ sa̱kuuꞌ ña̱ni̱ ra̱, xiinꞌ sa̱kuuꞌ ne̱ ndieeꞌ vi̱ꞌe̱ yu̱vaꞌ ra̱. Sa̱kanꞌ na kuiiꞌ ndee ne̱ kuatyi̱ꞌ kualiꞌ ku̱i̱ti̱ꞌ, xiinꞌ mbe̱e̱, xiinꞌ si̱ndiki̱ꞌ sana̱ ku̱i̱ti̱ꞌ ni̱a̱ ni̱ na̱ko̱o̱ ni̱a̱ nuu̱ꞌ ñu̱ꞌuꞌ Gosén ja̱a̱nꞌ.
9 Te̱ kuaꞌa̱n tu̱ kuaꞌa̱ꞌ xa̱va̱ꞌa̱ carreta te̱ xíinꞌ, xiinꞌ te̱ xíinꞌ, te̱ yoso̱ꞌ kuei, xiinꞌ José, sa̱kanꞌ na kuiiꞌ kuaꞌa̱ꞌ xa̱va̱ꞌa̱ ni̱ ku̱u̱ ne̱ yivi̱ꞌ, ne̱ ni̱ xaꞌa̱n xiinꞌ José i̱kanꞌ.
10 Te̱ kii̱ꞌ ni̱ xa̱a̱ ni̱a̱ miiꞌ kuu̱nꞌ ne̱ yivi̱ꞌ ndi̱kinꞌ trigo nuu̱ꞌ ñu̱ꞌuꞌ Atad, ña̱ kanduꞌu̱ꞌ tu̱ku̱ taꞌviꞌ i̱ti̱a̱ Jordán ndii, ndi̱e̱eꞌ xa̱va̱ꞌa̱ ni̱ xa̱ku̱ sutyiꞌ i̱ni̱ va̱ ni̱a̱ xaꞌa̱ꞌ Jacob, te̱ tiꞌeꞌ xa̱va̱ꞌa̱ ni̱ ku̱a̱aꞌ ni̱a̱ niiꞌ uxa̱ kivi̱ꞌ xaꞌa̱ꞌ ra̱.
11 Te̱ kii̱ꞌ ni̱ xi̱ni̱ te̱ Canaán, te̱ ndieeꞌ nuu̱ꞌ ñu̱ꞌuꞌ ja̱a̱nꞌ, ña̱ kuaaꞌ ne̱ ja̱a̱nꞌ xakuꞌ ni̱a̱ nuu̱ꞌ ñu̱ꞌuꞌ Atad ja̱a̱nꞌ, te̱ ni̱ kaꞌa̱n ra̱ ndii:
―I̱i̱n te̱ kaꞌnuꞌ xa̱va̱ꞌa̱ ni̱ xiꞌi̱ na̱taa̱nꞌ te̱ Egipto ―ni̱ katyi̱ ra̱.
Sa̱kanꞌ na kuiiꞌ ni̱ tyi̱nduꞌu̱ꞌ ra̱ kivi̱ꞌ ñu̱ꞌuꞌ ña̱ kanduꞌu̱ꞌ tu̱ku̱ taꞌviꞌ i̱ti̱a̱ Jordán ja̱a̱nꞌ naniꞌ a̱ Abel-mizraim.
12 Sa̱kanꞌ na kuiiꞌ siꞌe̱ Jacob ndii, ni̱ sa̱xinu̱ ra̱ sa̱kuuꞌ ña̱ ni̱ kaꞌa̱n tyuunꞌ te̱ ja̱a̱nꞌ xiinꞌ ra̱,
13 sa̱kanꞌ ña̱ ni̱ xaꞌa̱n ra̱ nde̱e̱ nuu̱ꞌ ñu̱ꞌuꞌ Canaán, te̱ ni̱ tyi̱naá ña̱ꞌaꞌ ra̱ yavi̱ ña̱ iinꞌ nuu̱ꞌ ñu̱ꞌuꞌ Macpela, ña̱ ni̱ sa̱ta̱ꞌ Abraham nuu̱ꞌ Efrón, te̱ vi̱ꞌe̱ Het, te̱ ku̱ndu̱u̱ a̱ pasanto miiꞌ ndiee̱ ne̱ i̱i̱n kuuꞌ xiinꞌ ni̱a̱. Te̱ ya̱ti̱n Manré kanduꞌu̱ꞌ ñu̱ꞌuꞌ miiꞌ iinꞌ yavi̱ ja̱a̱nꞌ.
14 Te̱ kii̱ꞌ ndi̱ꞌi̱ ni̱ na̱taa̱nꞌ José ñu̱ꞌuꞌ ndeꞌi̱ yu̱vaꞌ ra̱ ndii, ni̱ na̱ndi̱koꞌ ra̱ Egipto xiinꞌ ña̱ni̱ ra̱, xiinꞌ sa̱kuuꞌ ne̱ ni̱ xaꞌa̱n xiinꞌ ra̱.
So̱ꞌo̱ ni̱ xa̱a̱ a̱ kii̱ꞌ ni̱ xiꞌi̱ José
15 Te̱ xaꞌa̱ꞌ a̱ ña̱ xa̱ ni̱ xiꞌi̱ Jacob, na ni̱ kaꞌa̱n xiinꞌ taꞌanꞌ ña̱ni̱ José ndii:
―Tee̱ꞌ kueinꞌ ndasiꞌ José yooꞌ xaꞌa̱ꞌ sa̱kuuꞌ ña̱ ni̱a̱ꞌa ña̱ ni̱ xa̱a̱ e̱ꞌ xiinꞌ ra̱, te̱ i̱yo̱ naka̱n ra̱ kuenta nuu̱ꞌ e̱ꞌ ―ni̱ katyi̱ ra̱.
16 Sa̱kanꞌ na ni̱ ti̱ꞌviꞌ ra̱ i̱i̱n kuento nuu̱ꞌ José kaꞌán ra̱ ndii:
―Kii̱ꞌ kuní ka̱ ku̱vi̱ yu̱vaꞌ e̱ꞌ, te̱ ni̱ kaꞌa̱n tyuunꞌ a̱ xiinꞌ ndu̱ ña̱ kaꞌa̱n ndu̱ xiinꞌ u̱nꞌ ndii:
17 “Sa̱a̱ va̱ u̱nꞌ ña̱ va̱ꞌa̱ te̱ ko̱o̱ kaꞌnuꞌ i̱ni̱ u̱nꞌ xaꞌa̱ꞌ ña̱ ni̱a̱ꞌa ña̱ ni̱ xa̱a̱ ña̱ni̱ u̱nꞌ xiinꞌ u̱nꞌ”, ni̱ katyi̱ a̱. Sa̱kanꞌ na kuiiꞌ kaꞌán ndaꞌvi ndu̱ xiinꞌ u̱nꞌ vi̱ti̱n ña̱ ko̱o̱ kaꞌnuꞌ i̱ni̱ u̱nꞌ xaꞌa̱ꞌ ku̱a̱tyi̱ ndu̱, sa̱kanꞌ ña̱ te̱ xikaꞌ nuuꞌ nuu̱ꞌ Ndiosí, ña̱ ni̱ xa̱kaꞌnuꞌ yu̱vaꞌ e̱ꞌ ja̱a̱nꞌ, nduuꞌ ndu̱ ―ni̱ katyi̱ ra̱ xiinꞌ José.
Te̱ kii̱ꞌ kaꞌán te̱ ni̱ ti̱ꞌviꞌ ña̱ni̱ José xiinꞌ kuento ja̱a̱nꞌ itaꞌ ra̱ ndii, ni̱ xa̱ꞌaꞌ José xakuꞌ ra̱.
18 Sa̱kanꞌ te̱ ni̱ xa̱a̱ tu̱ ña̱ni̱ ra̱ i̱kanꞌ, te̱ ni̱ xi̱ku̱ndiee̱ ndi̱e̱e̱ sa̱kuuꞌ te̱ ja̱a̱nꞌ nuu̱ꞌ ra̱ nde̱e̱ ni̱ tondi̱a̱ nuu̱ꞌ ra̱ nde̱e̱ nuu̱ꞌ ñu̱ꞌuꞌ, kaꞌán ra̱ ndii:
―Ko̱to̱ u̱nꞌ, yoꞌoꞌ itaꞌ sa̱kuuꞌ ndu̱ te̱ ku̱ndu̱u̱ ndu̱ te̱ ka̱ka̱ nu̱u̱ nuu̱ꞌ u̱nꞌ ―ni̱ katyi̱ ra̱.
19 Te̱ ni̱ kaꞌa̱n José xiinꞌ ra̱ ndii:
―Kuäa̱n yi̱ꞌvi ndo̱ꞌ, süu̱ꞌ Ndiosí nduuꞌ yuꞌu̱ na sa̱ndoꞌoꞌ i̱ ndoꞌó.
20 Ña̱ nda̱ku nduuꞌ a̱ ndii, ña̱ ni̱a̱ꞌa nduuꞌ ña̱ ni̱ xa̱a̱ ndo̱ꞌ xiinꞌ i̱ sa̱aꞌ, ndisu̱ Ndiosí ndii, ni̱ nda̱sa̱nduuꞌ a̱ ña̱ ja̱a̱nꞌ ña̱ va̱ꞌa̱, ña̱ xaaꞌ i̱ yoꞌoꞌ ña̱ ku̱vi̱ xini e̱ꞌ vi̱ti̱n, te̱ sa̱kakú i̱ kuaꞌa̱ꞌ ne̱ yivi̱ꞌ, te̱ kü̱vi̱ ni̱a̱ so̱ko̱.
21 Sa̱kanꞌ na kuiiꞌ kuäa̱n yiꞌvi ndo̱ꞌ, ta̱xi̱ na taxiꞌ i̱ ña̱ ku̱xi̱ ndo̱ꞌ, xiinꞌ siꞌe̱ ndo̱ꞌ ―ni̱ katyi̱ ra̱.
Te̱ xiinꞌ kuento ja̱a̱nꞌ ni̱ sa̱kiꞌví José ña̱ni̱ ra̱, sa̱kanꞌ ña̱ mani̱ꞌ va̱ ni̱ kaꞌa̱n ra̱ xiinꞌ te̱ ja̱a̱nꞌ.
22 Sa̱kanꞌ na kuiiꞌ José xiinꞌ sa̱kuuꞌ ne̱ nduuꞌ kuenta vi̱ꞌe̱ yu̱vaꞌ ra̱ ndii, ni̱ ndoo̱ ni̱a̱ ndieeꞌ ni̱a̱ ñu̱ꞌuꞌ Egipto ja̱a̱nꞌ. Te̱ ni̱ tiaku̱ José ciento uxi̱ kuiya̱,
23 nde̱e̱ ni̱ xi̱ni̱ ra̱ ni̱ tuvi̱ si̱a̱niꞌ xikuaꞌ Efraín, te̱ ni̱ xi̱ni̱ tu̱ ra̱ ni̱ tuvi̱ siꞌe̱ Maquir, te̱ nduuꞌ tiaa̱ siꞌe̱ Manasés, te̱ siꞌe̱ Maquir ja̱a̱nꞌ ndii, ni̱ na̱ꞌi̱ ña̱ꞌaꞌ José sa̱kuaꞌnuꞌ ra̱, te̱ ni̱ nda̱sa̱nduuꞌ ña̱ꞌaꞌ ra̱ siꞌe̱ ra̱.
24 Untaꞌ ni̱ kaꞌa̱n José xiinꞌ ña̱ni̱ ra̱ ndii:
―Nä̱ꞌanꞌ ka̱ te̱ ku̱vi̱ yuꞌu̱, ndisu̱ Ndiosí ndii, tyi̱ndi̱e̱eꞌ a̱ ndoꞌó, te̱ ta̱va̱ꞌ tu̱ a̱ ndoꞌó nuu̱ꞌ ñu̱ꞌuꞌ yoꞌoꞌ, te̱ kuꞌu̱n ndi̱a̱ka̱ a̱ ndoꞌó nde̱e̱ nuu̱ꞌ ñu̱ꞌuꞌ ña̱ ni̱ kaꞌa̱n a̱ ta̱xi̱ a̱ nda̱ꞌaꞌ Abraham, xiinꞌ nda̱ꞌaꞌ Isaac, xiinꞌ nda̱ꞌaꞌ Jacob ―ni̱ katyi̱ ra̱.
25 Sa̱kanꞌ te̱ ni̱ kaꞌa̱n tyuunꞌ José nuu̱ꞌ ña̱ni̱ ra̱ ña̱ ta̱xi̱ te̱ ja̱a̱nꞌ kuento ra̱ nuu̱ꞌ ra̱ kaꞌán ra̱ ndii:
―Ña̱ nda̱ku nduuꞌ a̱ ndii, ki̱xi̱n xna̱ꞌa̱ Ndiosí e̱ꞌ te̱ ta̱va̱ꞌ a̱ ndoꞌó yoꞌoꞌ, te̱ kii̱ꞌ sa̱a̱ a̱ ña̱ ja̱a̱nꞌ ndii, na̱tyiꞌi̱ꞌ ndo̱ꞌ i̱kiꞌ i̱ te̱ kuꞌu̱n a̱ xiinꞌ ndo̱ꞌ miiꞌ kuꞌu̱n ndo̱ꞌ ja̱a̱nꞌ ―ni̱ katyi̱ ra̱.
26 Te̱ ni̱ xiꞌi̱ José ñu̱ꞌuꞌ Egipto ja̱a̱nꞌ kii̱ꞌ kumiꞌ ra̱ ciento uxi̱ kuiya̱, te̱ ni̱ sa̱kooꞌ tu̱ꞌva̱ te̱ tatanꞌ ñu̱ꞌuꞌ ndeꞌi̱ ra̱, te̱ ni̱ tyi̱naá ña̱ꞌaꞌ ra̱ ti̱xi̱n i̱i̱n xatu̱nꞌ.