So̱ꞌo̱ ni̱ xa̱a̱ a̱ kii̱ꞌ ni̱ sa̱ñuꞌuꞌ Jacob sa̱kuuꞌ siꞌe̱ ra̱
49
Sa̱kanꞌ te̱ ni̱ ka̱na̱ Jacob sa̱kuuꞌ siꞌe̱ ra̱, te̱ ni̱ kaꞌa̱n ra̱ ndii:
―Na̱kaya̱ sa̱kuuꞌ ndo̱ꞌ nuu̱ꞌ i̱, te̱ kaꞌa̱n i̱ xiinꞌ ndo̱ꞌ ndee ña̱ ku̱ndo̱ꞌo̱ ndo̱ꞌ nuu̱ꞌ kuꞌu̱n e̱ꞌ.
2 Ndoꞌó, siꞌe̱ yuꞌu̱, Jacob, ku̱ya̱ti̱n ndo̱ꞌ nuu̱ꞌ i̱,
te̱ ku̱ni̱ so̱ꞌo̱ ndo̱ꞌ ña̱ kaꞌa̱n i̱ xiinꞌ ndo̱ꞌ.
Ku̱ni̱ so̱ꞌo̱ ndo̱ꞌ ña̱ kaꞌa̱n yuꞌu̱, Israel yu̱vaꞌ ndo̱ꞌ xiinꞌ ndo̱ꞌ.
3 Rubén, yoꞌó nduuꞌ siꞌe̱ i̱ te̱ nu̱uꞌ,
yoꞌó nduuꞌ ndi̱e̱e̱ꞌ i̱, te̱ nduuꞌ u̱nꞌ siꞌe̱ i̱,
te̱ ni̱ tuvi̱ kii̱ꞌ kaꞌni̱ va̱ ña̱ ndi̱e̱eꞌ i̱ ña̱ nduuꞌ i̱ te̱ sa̱va̱.
Yoꞌó tu̱ nduuꞌ te̱ kuuꞌ nu̱uꞌ, te̱ kooꞌ tyukuuꞌ ka̱ u̱nꞌ.
4 Ndisu̱ kü̱ndu̱u̱ ka̱ u̱nꞌ te̱ nu̱uꞌ vi̱ti̱n,
sa̱kanꞌ ña̱ nduuꞌ u̱nꞌ nde̱e̱ naa ti̱kui i̱ꞌniꞌ kii̱ꞌ tisó raꞌ,
ku̱a̱tyi̱ ndii ni̱ ka̱nduꞌu̱ꞌ u̱nꞌ xiinꞌ i̱i̱n ñaꞌ siꞌi i̱,
te̱ ni̱ ku̱u̱ xeꞌnaꞌ u̱nꞌ xiinꞌ tunꞌ xto̱ miiꞌ kixín kii̱ꞌ ni̱ ka̱nduꞌu̱ꞌ u̱nꞌ xiinꞌ ñaꞌ siꞌi i̱.
5 Simeón xiinꞌ Leví, ndoꞌó ndii, ña̱ni̱ ndo̱ꞌ ku̱ni̱ taꞌanꞌ ndo̱ꞌ,
te̱ ityi̱ ndo̱ꞌ nduuꞌ nda̱tyuunꞌ ña̱ tiinꞌ ndo̱ꞌ te̱ xaaꞌ ndo̱ꞌ kuaꞌa̱ꞌ va̱ ña̱ ni̱a̱ꞌa.
6 Te̱ nde̱e̱ i̱i̱n kivi̱ꞌ käꞌán nimá i̱ kuꞌu̱n i̱ miiꞌ nakayá ndo̱ꞌ te̱ ndatuꞌunꞌ tuní ndo̱ꞌ,
te̱ ni̱ nde̱e̱ küní tu̱ i̱ ndu̱u̱ i̱i̱n i̱ xiinꞌ ndo̱ꞌ miiꞌ tyituní ndo̱ꞌ xaꞌa̱ꞌ ña̱ ki̱ni̱ ña̱ xaaꞌ ndo̱ꞌ.
Sa̱kanꞌ ña̱ kii̱ꞌ ni̱ na̱saa̱ꞌ ndo̱ꞌ ndii, ni̱ xa̱ꞌni̱ꞌ ndo̱ꞌ ne̱ yivi̱ꞌ,
te̱ xaꞌa̱ꞌ a̱ ña̱ ndii̱ꞌ ku̱i̱ti̱ꞌ ndo̱ꞌ, te̱ kendoso̱ꞌ ndo̱ꞌ xaꞌa̱ꞌ ki̱tiꞌ tiaku.
7 Na na̱tya̱ꞌa̱n ña̱ kuiꞌe̱ ndo̱ꞌ, te̱ na na̱tya̱ꞌa̱n tu̱ ña̱ i̱ꞌniꞌ ndo̱ꞌ.
Xaꞌa̱ꞌ a̱ ja̱a̱nꞌ na sa̱xi̱o̱o̱ i̱ ndoꞌó nuu̱ꞌ sa̱kuuꞌ ne̱ Israel taꞌanꞌ ndo̱ꞌ,
te̱ ki̱ku̱ꞌ i̱ ndoꞌó ka̱niiꞌ nuu̱ꞌ ñu̱ꞌuꞌ ne̱ vi̱ꞌe̱ Jacob.
8 Judá, yoꞌó ndii, ki̱ꞌi̱n kaꞌnuꞌ ña̱ni̱ mi̱iꞌ u̱nꞌ yoꞌó,
te̱ ka̱nandoo u̱nꞌ te̱ ndasiꞌ taꞌanꞌ xiinꞌ u̱nꞌ,
te̱ sa̱kuuꞌ ne̱ i̱i̱n kuuꞌ xiinꞌ u̱nꞌ ku̱i̱ta̱ xitiꞌ nuu̱ꞌ u̱nꞌ.
9 Judá, yu̱vaꞌ i̱, yoꞌó ndii, nduuꞌ u̱nꞌ nde̱e̱ naa i̱i̱n lion sa̱va̱,
tiꞌ xa̱ ni̱ ndi̱ꞌi̱ ni̱ xa̱xi̱ꞌ ki̱tiꞌ, tiꞌ ni̱ xa̱ꞌni̱ꞌ riꞌ,
te̱ ni̱ ku̱ndiꞌi̱ u̱nꞌ, te̱ ni̱ na̱ka̱nduꞌu̱ꞌ u̱nꞌ nde̱e̱ naa xaaꞌ i̱i̱n lion tyie̱,
uun nde̱e̱ naa xaaꞌ lion siꞌi, nde̱e̱ i̱i̱n tiꞌ ja̱a̱nꞌ ndii, köo̱ꞌ satañaꞌa̱ꞌ ña̱ꞌaꞌ te̱ ndo̱to̱ riꞌ.
10 Judá, yoꞌó ka̱ꞌndi̱a̱ tyuunꞌ te̱ köo̱ꞌ na̱ꞌi̱ ta̱tunꞌ nda̱ꞌaꞌ u̱nꞌ,
ni̱ nde̱e̱ köo̱ꞌ na̱ꞌi̱ tu̱ ta̱tunꞌ ja̱a̱nꞌ nda̱ꞌaꞌ te̱ si̱a̱niꞌ xikaꞌ u̱nꞌ,
nde̱e̱ ska̱tyiꞌ xaa̱ mi̱iꞌ te̱ ka̱ꞌndi̱a̱ tyuunꞌ xna̱ꞌa̱, te̱ xiinꞌ ña̱ꞌa̱ nu̱ꞌ.
Te̱ nuu̱ꞌ te̱ ja̱a̱nꞌ ndu̱u̱ i̱i̱n sa̱kuuꞌ ne̱ yivi̱ꞌ i̱i̱n yivi̱ꞌ, te̱ sa̱kaꞌnuꞌ ña̱ꞌaꞌ ni̱a̱.
11 Te̱ satiín ra̱ mburru sana̱ ra̱ xaꞌa̱ꞌ yo̱ꞌoꞌ uva,
te̱ satiín tu̱ ra̱ mburru siee, siꞌe̱ mburra sana̱ ra̱, xaꞌa̱ꞌ yo̱ꞌoꞌ uva nda̱tu̱nꞌ ka̱.
Te̱ natiaꞌ ra̱ toto̱ ra̱ xiinꞌ vino, te̱ xiinꞌ ti̱kui uva, natiaꞌ ra̱ toto̱ nani̱ꞌ niꞌnuꞌ ra̱.
12 Ndu̱tyiꞌ nuu̱ꞌ ra̱ ndii, kuaꞌa ka̱ a̱ te̱ sa̱kanꞌ vino,
te̱ nu̱ꞌu̱ ra̱ ndii, ya̱a̱ ka̱ a̱ te̱ sa̱kanꞌ letyin.
13 Zabulón, yoꞌó ndii, ya̱ti̱n yu̱ꞌuꞌ mi̱ni̱ ku̱nduꞌu̱ꞌ u̱nꞌ,
te̱ miiꞌ ku̱nduꞌu̱ꞌ u̱nꞌ ja̱a̱nꞌ ku̱ndu̱u̱ miiꞌ xaa̱ tundo̱oꞌ,
te̱ nde̱e̱ xeꞌinꞌ ñu̱ꞌuꞌ Sidón kuꞌu̱n ndi̱koꞌ ñu̱ꞌuꞌ yoꞌó.
14 Isacar, yoꞌó ndii, nduuꞌ u̱nꞌ nde̱e̱ naa mburru ndi̱e̱eꞌ, tiꞌ ndisoꞌ ña̱ꞌa̱,
te̱ nakanduꞌu̱ꞌ riꞌ te̱i̱n ña̱ ndisoꞌ riꞌ, nandiee̱ꞌ riꞌ.
15 Ndisu̱, kii̱ꞌ ku̱ni̱ u̱nꞌ ña̱ va̱ꞌa̱ kaaꞌ ñu̱ꞌuꞌ miiꞌ na̱ndiee̱ꞌ u̱nꞌ, te̱ köo̱ꞌ tu̱ndoꞌo̱ꞌ i̱kanꞌ ndii,
va̱ꞌa̱ kuni u̱nꞌ tyi̱ꞌni̱ u̱nꞌ soko̱ u̱nꞌ te̱ ku̱i̱so̱ tu̱ku̱u̱ u̱nꞌ ña̱ꞌa̱.
Te̱ na̱ku̱i̱i̱n yu̱ꞌuꞌ u̱nꞌ ku̱ndu̱u̱ u̱nꞌ te̱ xikaꞌ nuuꞌ so̱ꞌo̱ i̱kanꞌ.
16 Dan, yoꞌó ndii, ku̱ndu̱u̱ u̱nꞌ kuesí, te̱ ka̱ꞌndi̱a̱ tyuunꞌ vie̱ u̱nꞌ nuu̱ꞌ ne̱ vi̱ꞌe̱ mi̱iꞌ u̱nꞌ,
nde̱e̱ naa xaꞌndia tyuunꞌ i̱nga̱ te̱ vi̱ꞌe̱ Israel nuu̱ꞌ ne̱ taꞌanꞌ ra̱.
17 Te̱ ku̱ndu̱u̱ tu̱ u̱nꞌ nde̱e̱ naa koo̱ꞌ, tiꞌ kanduꞌu̱ꞌ yu̱ꞌuꞌ i̱tyiꞌ,
uun koo̱ꞌ xatu̱, tiꞌ kanduꞌu̱ꞌ xi̱i̱nꞌ i̱tyiꞌ, te̱ ka̱xi̱ꞌ riꞌ siꞌndi̱ xaꞌa̱ꞌ kuei,
te̱ sa̱namaꞌ riꞌ te̱ yoso̱ꞌ kuei ja̱a̱nꞌ.
18 Tákuiꞌe Ndiosí, ndiatuꞌ i̱ni̱ i̱ ña̱ sa̱kakú na ña̱ꞌaꞌ u̱n.
19 Gad, yoꞌó ndii, ko̱ꞌni̱ te̱ kuiꞌna̱ꞌ miiꞌ nduꞌu̱ꞌ u̱nꞌ te̱ sa̱kuiꞌnaꞌ ra̱ ña̱ꞌa̱ u̱nꞌ,
ndisu̱ ku̱ndiku̱n yoꞌó xata̱ꞌ ra̱, te̱ na̱tyiꞌi̱ꞌ u̱nꞌ ña̱ꞌa̱ u̱nꞌ nda̱ꞌaꞌ ra̱.
20 Aser, yoꞌó ndii, ko̱o̱ kuaꞌa̱ꞌ ña̱ ku̱ti̱a̱ku̱ u̱nꞌ,
te̱ xa̱ mi̱iꞌ ndiꞌiꞌ ña̱ xaxi̱ꞌ asi̱nꞌ ku̱xi̱ u̱nꞌ nde̱e̱ naa ña̱ xixiꞌ rey.
21 Neftalí, yoꞌó ndii, nduuꞌ u̱nꞌ nde̱e̱ naa i̱su̱, tiꞌ xikaꞌ ndiká,
te̱ nda̱tu̱nꞌ va̱ i̱su̱ kualiꞌ siꞌe̱ riꞌ yoo.
22 José, yoꞌó ndii, nduuꞌ u̱nꞌ nde̱e̱ naa i̱tunꞌ, tunꞌ iinꞌ yu̱ꞌuꞌ i̱ti̱a̱, tunꞌ kuunꞌ va̱ nduu̱ꞌ vixi̱ nda̱ꞌaꞌ,
te̱ kikú nda̱ꞌaꞌ nu̱ꞌ xata̱ꞌ nama̱ yuu̱ꞌ.
23 Te̱ xatia kuxi̱ ndii, ndasiꞌ ra̱ yoꞌó, te̱ xatia ra̱ kuxi̱ ra̱ xata̱ꞌ u̱nꞌ,
te̱ satañaꞌa̱ꞌ tyito̱ va̱ ra̱ yoꞌó.
24 Ndisu̱ yoꞌó ndii, kutu̱ꞌ va̱ tiinꞌ u̱nꞌ kuxi̱ u̱nꞌ xaꞌa̱ꞌ a̱ ña̱ ndi̱e̱eꞌ va̱ nda̱ꞌaꞌ u̱nꞌ.
Na tyi̱ndi̱e̱eꞌ na Ndiosí, ña̱ sa̱kuuꞌ a̱ ku̱vi̱, ña̱ xakaꞌnuꞌ yuꞌu̱ Jacob, yoꞌó.
Nda̱ꞌaꞌ Ndiosí, ña̱ pa̱xto e̱ꞌ, ña̱ nduuꞌ ña̱ xitoꞌ yooꞌ ne̱ vi̱ꞌe̱ Israel natiinꞌ u̱nꞌ ña̱ ndi̱e̱eꞌ.
25 Na tyi̱ndi̱e̱eꞌ na Ndiosí, ña̱ sa̱kuuꞌ a̱ ku̱vi̱, ña̱ ni̱ xa̱kaꞌnuꞌ yu̱vaꞌ u̱nꞌ yoꞌó, te̱ na sa̱ñuꞌuꞌ tu̱ a̱ yoꞌó,
xiinꞌ sa̱kuuꞌ ña̱ va̱ꞌa̱, ña̱ kuaxi̱ nde̱e̱ ndi̱viꞌ,
te̱ na sa̱ñuꞌuꞌ tu̱ a̱ yoꞌó xiinꞌ sa̱kuuꞌ ña̱ va̱ꞌa̱, ña̱ ñuꞌuꞌ ti̱xi̱n ñu̱ꞌuꞌ nde̱e̱ ma̱aꞌ,
te̱ na sa̱ñuꞌuꞌ tu̱ a̱ yoꞌó xiinꞌ ñaꞌ siꞌi u̱nꞌ, te̱ va̱ꞌa̱ va̱ na̱taꞌvi̱ꞌ ndo̱ꞌ,
te̱ na ko̱o̱ kuaꞌa̱ꞌ tu̱ letyin aꞌ ko̱ꞌo̱ siꞌe̱ ndo̱ꞌ.
26 Te̱ ña̱ sañuꞌuꞌ i̱ yoꞌó vi̱ti̱n ndii, kuaꞌa̱ꞌ ka̱ a̱ te̱ sa̱kanꞌ ña̱ ni̱ sa̱ñuꞌuꞌ yu̱vaꞌ i̱ yuꞌu̱,
te̱ kuaꞌa̱ꞌ ka̱ tu̱ a̱ te̱ sa̱kanꞌ ña̱ sukun i̱kuꞌ ña̱ ya̱taꞌ kivi̱ꞌ.
José, ña̱ sañuꞌuꞌ i̱ yoꞌó vi̱ti̱n ndii, ña̱ꞌa̱ yoꞌó ku̱i̱ti̱ꞌ nduuꞌ a̱,
xaꞌa̱ꞌ a̱ ña̱ te̱ kaꞌnuꞌ ka̱ nduuꞌ u̱nꞌ nuu̱ꞌ sa̱kuuꞌ ña̱ni̱ u̱nꞌ.
27 Yoꞌó, Benjamín ndii, nduuꞌ u̱nꞌ nde̱e̱ naa lobo ni̱a̱ꞌa,
tiꞌ xaxi̱ꞌ ni̱a̱ꞌa̱ va̱ tiꞌ ndasiꞌ taꞌanꞌ xiinꞌ riꞌ, te̱ xa̱kuaa̱ꞌ nataꞌviꞌ riꞌ, ña̱ ni̱ ndoo̱ ndo̱so̱ꞌ yu̱ꞌuꞌ riꞌ.
Ni̱ katyi̱ Jacob xiinꞌ sa̱kuuꞌ siꞌe̱ ra̱.
28 Sa̱kuuꞌ te̱ kaa̱ꞌ nduuꞌ te̱ uxi̱ uvi̱ ti̱ꞌvi̱ siꞌe̱ Jacob, te̱ ña̱ yo̱ꞌo̱ nduuꞌ ña̱ ni̱ kaꞌa̱n ra̱ xiinꞌ i̱ꞌi̱n siꞌe̱ ra̱ ja̱a̱nꞌ kii̱ꞌ ni̱ sa̱ñuꞌuꞌ ña̱ꞌaꞌ ra̱. Te̱ xa̱ ni̱ sa̱ñuꞌuꞌ xa̱ ni̱ sa̱ñuꞌuꞌ siinꞌ ra̱ i̱ꞌi̱n te̱ ja̱a̱nꞌ.
So̱ꞌo̱ ni̱ xa̱a̱ a̱ kii̱ꞌ ni̱ xiꞌi̱ Jacob
29 Untaꞌ ndii, ni̱ kaꞌa̱n tyuunꞌ Jacob nuu̱ꞌ siꞌe̱ ra̱ ndii:
―Nä̱ꞌanꞌ ka̱ te̱ ku̱vi̱ i̱, te̱ kuꞌu̱n ndu̱u̱ i̱i̱n i̱ xiinꞌ ne̱ xii̱ꞌ ya̱taꞌ i̱, te̱ kuní i̱ ña̱ na̱taa̱nꞌ ndo̱ꞌ yuꞌu̱ yavi̱ ña̱ iinꞌ nuu̱ꞌ ñu̱ꞌuꞌ Efrón, te̱ vi̱ꞌe̱ Het, ya̱ti̱n xi̱i̱nꞌ a̱ miiꞌ ñuꞌuꞌ ne̱ xii̱ꞌ ya̱taꞌ i̱ ja̱a̱nꞌ.
30 Yavi̱ ja̱a̱nꞌ ndii, iinꞌ a̱ nuu̱ꞌ ñu̱ꞌuꞌ Macpela xtoꞌniꞌ miiꞌ kanduꞌu̱ꞌ ñu̱u̱ Manré nuu̱ꞌ ñu̱ꞌuꞌ Canaán. Ñu̱ꞌuꞌ ja̱a̱nꞌ ndii, nuu̱ꞌ Efrón, te̱ vi̱ꞌe̱ Het ni̱ sa̱ta̱ꞌ ña̱ꞌaꞌ Abraham te̱ ku̱ndu̱u̱ a̱ pasanto miiꞌ ndiee̱ ñu̱ꞌuꞌ ndeꞌi̱ ne̱ i̱i̱n kuuꞌ xiinꞌ ra̱.
31 I̱kanꞌ ni̱ ndiee̱ ñu̱ꞌuꞌ ndeꞌi̱ Abraham, xiinꞌ ñaꞌ siꞌi ra̱ Sara, te̱ i̱kanꞌ ni̱ ndiee̱ tu̱ ñu̱ꞌuꞌ ndeꞌi̱ Isaac, xiinꞌ ñaꞌ siꞌi ra̱ Rebeca, te̱ i̱kanꞌ ni̱ ndiee̱ tu̱ ñu̱ꞌuꞌ ndeꞌi̱ Lea ni̱ xa̱a̱ i̱.
32 Ñu̱ꞌuꞌ ja̱a̱nꞌ xiinꞌ yavi̱ ja̱a̱nꞌ ndii, nuu̱ꞌ te̱ vi̱ꞌe̱ Heteo ni̱ sa̱ta̱ꞌ ña̱ꞌaꞌ ndii̱ xii̱ꞌ i̱ Abraham ―ni̱ katyi̱ ra̱.
33 Te̱ kii̱ꞌ ni̱ ndi̱ꞌi̱ ni̱ kaꞌa̱n tyuunꞌ Jacob ña̱ ja̱a̱nꞌ nuu̱ꞌ sa̱kuuꞌ tiaa̱ siꞌe̱ ra̱ ja̱a̱nꞌ, te̱ ni̱ na̱ka̱nduꞌu̱ꞌ ra̱ nuu̱ꞌ tunꞌ xto̱ ra̱, i̱kanꞌ te̱ ni̱ xiꞌi̱ ra̱, te̱ kuaꞌa̱n ndu̱u̱ i̱i̱n ra̱ xiinꞌ ne̱ xii̱ꞌ ya̱taꞌ ra̱.