So̱ꞌo̱ ni̱ xa̱a̱ a̱ kii̱ꞌ ni̱ sa̱ñuꞌuꞌ Jacob Efraín xiinꞌ Manasés
48
Ni̱ yaꞌa̱ ndiaꞌviꞌ kivi̱ꞌ, te̱ ni̱ xi̱ni̱ José kuento ña̱ kuni ku̱vi̱ yu̱vaꞌ ra̱, sa̱kanꞌ na ni̱ na̱ka̱ ra̱ uvi̱ sa̱aꞌ tiaa̱ siꞌe̱ ra̱, Manasés xiinꞌ Efraín, te̱ ni̱ xaꞌa̱n ko̱to̱ ra̱ yu̱vaꞌ ra̱.
2 Te̱ kii̱ꞌ ni̱ xi̱ni̱ Jacob kuento ña̱ ni̱ xa̱a̱ José, siꞌe̱ ra̱, miiꞌ nduꞌu̱ꞌ ra̱ te̱ ko̱to̱ ña̱ꞌaꞌ ra̱ ndii, ni̱ xa̱a̱ ra̱ ña̱ nduxa̱ꞌ, te̱ ni̱ ndo̱koo̱ ra̱ nuu̱ꞌ tunꞌ xto̱ ra̱,
3 te̱ ni̱ kaꞌa̱n ra̱ xiinꞌ José ndii:
―Ni̱ tuvi̱ Ndiosí ña̱ sa̱kuuꞌ a̱ ku̱vi̱ nuu̱ꞌ i̱ i̱i̱n xaanꞌ miiꞌ naniꞌ a̱ Luz nuu̱ꞌ ñu̱ꞌuꞌ Canaán, te̱ ni̱ sa̱ñuꞌuꞌ a̱ yuꞌu̱,
4 kaꞌa̱n a̱ xiinꞌ ndii: “Ko̱to̱ u̱nꞌ, na̱taꞌvi̱ꞌ va̱ u̱nꞌ sa̱a̱ i̱, te̱ nda̱sa̱kuaꞌa̱ꞌ tu̱ i̱ ne̱ si̱a̱niꞌ xikaꞌ u̱nꞌ nde̱e̱ na̱ndu̱u̱ ni̱a̱ kiꞌinꞌ ñu̱u̱ kaꞌnuꞌ, te̱ sa̱kanꞌ tu̱ nda̱ꞌaꞌ si̱a̱niꞌ xikaꞌ u̱nꞌ ja̱a̱nꞌ na̱ta̱xi̱ i̱ ñu̱ꞌuꞌ yoꞌoꞌ ku̱ndu̱u̱ ña̱ꞌa̱ ni̱a̱ nde̱e̱ ndiꞌiꞌ ni̱ kivi̱ꞌ“, ni̱ katyi̱ a̱ xiinꞌ i̱.
5 Va̱ꞌa̱, nde̱e̱ vi̱ti̱n ndii, uvi̱ sa̱aꞌ siꞌe̱ u̱nꞌ, te̱ nduuꞌ Efraín xiinꞌ Manasés, te̱ ni̱ tuvi̱ nuu̱ꞌ ñu̱ꞌuꞌ Egipto yoꞌoꞌ ña̱ kuní ka̱ xaa̱ i̱ ndii, siꞌe̱ yuꞌu̱ na̱ndu̱u̱ ra̱, nde̱e̱ naa nduuꞌ Rubén xiinꞌ Simeón siꞌe̱ i̱.
6 Te̱ siꞌe̱ u̱nꞌ, te̱ ko̱o̱ nuu̱ꞌ kuꞌu̱n e̱ꞌ, ku̱ndu̱u̱ kuenta mi̱iꞌ u̱nꞌ, te̱ xaꞌa̱ꞌ a̱ ña̱ ña̱ni̱ Efraín, xiinꞌ Manasés ku̱ndu̱u̱ ra̱ ndii, kande̱iꞌ na̱ti̱i̱n tu̱ te̱ ja̱a̱nꞌ ñu̱ꞌuꞌ ña̱ xitoꞌ ndoo̱ nda̱ꞌaꞌ Efraín xiinꞌ Manasés ja̱a̱nꞌ kii̱ꞌ ku̱vi̱ u̱nꞌ.
7 Kii̱ꞌ ni̱ na̱ndi̱koꞌ i̱ kuaxi̱ i̱ ña̱ ni̱ nduꞌu̱ꞌ i̱ nuu̱ꞌ ñu̱ꞌuꞌ Padán-arám ndii, ni̱ xiꞌi̱ si̱ꞌiꞌ u̱nꞌ miiꞌ naá i̱i̱n ñu̱u̱ ña̱ naniꞌ Efrata, ña̱ kanduꞌu̱ꞌ nuu̱ꞌ ñu̱ꞌuꞌ Canaán, te̱ i̱kanꞌ ni̱ tyi̱naá i̱ ñu̱ꞌuꞌ ndeꞌi̱ aꞌ ya̱ti̱n xi̱i̱nꞌ i̱tyiꞌ ña̱ kuaꞌa̱n miiꞌ naá ñu̱u̱ Efrata ja̱a̱nꞌ, ña̱ naniꞌ Belén vi̱ti̱n ―ni̱ katyi̱ ra̱.
8 Te̱ kii̱ꞌ ni̱ xi̱ni̱ Jacob uvi̱ sa̱aꞌ te̱ kualiꞌ siꞌe̱ José ja̱a̱nꞌ, te̱ ni̱ kaꞌa̱n ra̱ xiinꞌ ra̱ ndii:
―¿Yo̱o̱ nduuꞌ tu̱ te̱ kualiꞌ kaa̱ꞌ? ―ni̱ katyi̱ ra̱.
9 Te̱ ni̱ kaꞌa̱n José xiinꞌ ra̱ ndii:
―Siꞌe̱ i̱, te̱ ni̱ ta̱xi̱ Ndiosí nda̱ꞌaꞌ i̱ nuu̱ꞌ ñu̱ꞌuꞌ Egipto yoꞌoꞌ, nduuꞌ ra̱ ―ni̱ katyi̱ ra̱.
Te̱ ni̱ kaꞌa̱n Jacob xiinꞌ ra̱ ndii:
―Sa̱ku̱yatinꞌ u̱nꞌ ra̱ nuu̱ꞌ i̱ te̱ sa̱ñuꞌuꞌ ña̱ꞌaꞌ i̱ ―ni̱ katyi̱ ra̱.
10 Te̱ xaꞌa̱ꞌ a̱ ña̱ i̱i̱n te̱ xi̱xa̱ va̱ nduuꞌ Jacob ndii, xa̱ sa̱kanꞌ te̱ nda̱si̱ kuii ndu̱tyiꞌ nuu̱ꞌ ra̱. Te̱ kii̱ꞌ ni̱ sa̱ku̱yatinꞌ José te̱ kualiꞌ ja̱a̱nꞌ nuu̱ꞌ ra̱ ndii, ni̱ tyi̱to ra̱ nuu̱ꞌ te̱ ja̱a̱nꞌ, te̱ ni̱ nu̱mi̱ tu̱ ña̱ꞌaꞌ ra̱.
11 Sa̱kanꞌ te̱ ni̱ kaꞌa̱n ra̱ xiinꞌ José ndii:
―Nï̱ xa̱ni̱ni̱ ka̱ i̱ naaꞌ ku̱ni̱ ka̱ i̱ nuu̱ꞌ u̱nꞌ, ndisu̱ ni̱ ta̱xi̱ Ndiosí ña̱ ku̱ni̱ tu̱ i̱ nde̱e̱ nuu̱ꞌ te̱ kuatyi̱ꞌ siꞌe̱ u̱nꞌ ―ni̱ katyi̱ ra̱.
12 Sa̱kanꞌ te̱ ni̱ sa̱nu̱ndiaꞌá José te̱ kualiꞌ ja̱a̱nꞌ nuu̱ꞌ kondo̱ yu̱vaꞌ ra̱, te̱ ni̱ na̱ka̱nduꞌu̱ꞌ ndieeꞌ ra̱ nde̱e̱ ni̱ tondi̱a̱ nuu̱ꞌ ra̱ nde̱e̱ nuu̱ꞌ ñu̱ꞌuꞌ nuu̱ꞌ te̱ ja̱a̱nꞌ.
13 I̱kanꞌ te̱ ni̱ ki̱ꞌi̱n José uvi̱ sa̱aꞌ te̱ kualiꞌ ja̱a̱nꞌ, Efraín xiinꞌ Manasés. Efraín ni̱ xa̱ni̱ ra̱ nda̱ꞌaꞌ ku̱a̱ꞌa̱ ra̱, te̱ Manasés ni̱ xa̱ni̱ ra̱ nda̱ꞌaꞌ i̱ti̱n ra̱, sa̱kanꞌ na kuiiꞌ nda̱ꞌaꞌ i̱ti̱n Jacob ni̱ ii̱n Efraín ja̱a̱nꞌ, te̱ nda̱ꞌaꞌ ku̱a̱ꞌa̱ ra̱ ni̱ ii̱n Manasés.
14 Ndisu̱ kii̱ꞌ ni̱ sa̱na̱kaá Jacob nda̱ꞌaꞌ ra̱ te̱ sa̱ñuꞌuꞌ ra̱ te̱ kualiꞌ ja̱a̱nꞌ ndii, ni̱ na̱ma̱ ra̱ nda̱ꞌaꞌ ra̱, nda̱ꞌaꞌ ku̱a̱ꞌa̱ ra̱ ni̱ tyi̱nduꞌu̱ꞌ ra̱ xíniꞌ Efraín te̱ siee, te̱ nda̱ꞌaꞌ i̱ti̱n ra̱ ni̱ tyi̱nduꞌu̱ꞌ ra̱ xíniꞌ Manasés, te̱ xkuaꞌa̱ꞌ.
15 Sa̱kanꞌ te̱ ni̱ sa̱ñuꞌuꞌ ra̱ José kaꞌán ra̱ ndii:
―Na sa̱ñuꞌuꞌ na Ndiosí te̱ kualiꞌ yoꞌoꞌ, Ndiosí, ña̱ ni̱ xa̱kaꞌnuꞌ ndii̱ velo xii̱ꞌ i̱ Abraham, te̱ ni̱ xa̱kaꞌnuꞌ tu̱ ña̱ꞌaꞌ ndii̱ yu̱vaꞌ i̱ Isaac. Te̱ Ndiosí ja̱a̱nꞌ tu̱ xitoꞌ yuꞌu̱ nde̱e̱ kii̱ꞌ ni̱ tuvi̱ i̱ te̱ nde̱e̱ kivi̱ꞌ vi̱ti̱n,
16 te̱ ni̱ ti̱ꞌviꞌ tu̱ a̱ ángele, te̱ ni̱ sa̱kakú a̱ yuꞌu̱ nuu̱ꞌ sa̱kuuꞌ ña̱ ni̱a̱ꞌa, na sa̱ñuꞌuꞌ na a̱ te̱ kualiꞌ siꞌe̱ u̱nꞌ kaa̱ꞌ. Te̱ xiinꞌ te̱ kaa̱ꞌ na̱ka̱ꞌanꞌ na nakaꞌanꞌ ne̱ yivi̱ꞌ xaꞌa̱ꞌ i̱, xiinꞌ xaꞌa̱ꞌ ndii̱ xii̱ꞌ i̱ Abraham, xiinꞌ xaꞌa̱ꞌ ndii̱ yu̱vaꞌ i̱ Isaac, te̱ na nda̱sa̱kuaꞌa̱ꞌ ña̱ꞌaꞌ Ndiosí ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ ―ni̱ katyi̱ ra̱.
17 Ndisu̱ nï̱ xta̱ni̱ xa̱tyiꞌ José kii̱ꞌ ni̱ xi̱ni̱ ra̱ ña̱ ni̱ tyi̱nduꞌu̱ꞌ Jacob nda̱ꞌaꞌ ku̱a̱ꞌa̱ ra̱ xíniꞌ Efraín, sa̱kanꞌ na ni̱ ti̱i̱n ra̱ nda̱ꞌaꞌ ku̱a̱ꞌa̱ yu̱vaꞌ ra̱ ja̱a̱nꞌ, te̱ ni̱ kuni̱ ra̱ tyi̱nduꞌu̱ꞌ ra̱ a̱ xíniꞌ Manasés.
18 Te̱ ni̱ kaꞌa̱n ra̱ xiinꞌ yu̱vaꞌ ra̱ ndii:
―Sä̱a̱ u̱nꞌ sa̱kanꞌ tataa̱, te̱ yo̱ꞌo̱ nduuꞌ te̱ xkuaꞌa̱ꞌ, va̱ꞌa̱ ka̱ xíniꞌ te̱ yo̱ꞌo̱ tyi̱nduꞌu̱ꞌ u̱nꞌ nda̱ꞌaꞌ ku̱a̱ꞌa̱ u̱nꞌ ―ni̱ katyi̱ ra̱.
19 Ndisu̱ nï̱ xi̱i̱n yu̱vaꞌ ra̱ sa̱a̱ ra̱ ña̱ ja̱a̱nꞌ, te̱ ni̱ kaꞌa̱n ra̱ ndii:
―Xa̱ xiní i̱, yu̱vaꞌ i̱, xa̱ xiní i̱. Sa̱kanꞌ tu̱ te̱ kaa̱ꞌ ndii, ku̱kuaꞌa̱ꞌ xa̱va̱ꞌa̱ tu̱ ne̱ si̱a̱niꞌ xikaꞌ ra̱, nde̱e̱ xaa̱ ni̱a̱ ku̱ndu̱u̱ ni̱a̱ i̱i̱n ñu̱u̱ kaꞌnuꞌ. Ndisu̱ ña̱ni̱ ra̱, te̱ siee, ku̱ndu̱u̱ te̱ kaꞌnuꞌ ka̱ te̱ sa̱kanꞌ te̱ kaa̱ꞌ, nde̱e̱ xaa̱ ne̱ si̱a̱niꞌ xikaꞌ ra̱ ku̱ndu̱u̱ ni̱a̱ kiꞌinꞌ ñu̱u̱ kaꞌnuꞌ ―ni̱ katyi̱ ra̱.
20 Te̱ xa̱ kivi̱ꞌ ja̱a̱nꞌ ni̱ sa̱ñuꞌuꞌ ña̱ꞌaꞌ Jacob kaꞌán ra̱ ndii:
―Ne̱ vi̱ꞌe̱ Israel ndii, ti̱i̱n ndi̱a̱a̱ ni̱a̱ ndoꞌó te̱ kaꞌa̱n ni̱a̱ ndii: “Na sa̱ñuꞌuꞌ Ndiosí yoꞌó nde̱e̱ naa ni̱ xa̱a̱ a̱ xiinꞌ Efraín xiinꞌ Manasés”, katyi̱ ni̱a̱ ―ni̱ katyi̱ ra̱.
Xaꞌa̱ꞌ a̱ ja̱a̱nꞌ na xi̱ꞌna̱ ka̱ Efraín ni̱ xa̱ni̱ ra̱, te̱ sa̱kanꞌ Manasés.
21 I̱kanꞌ te̱ ni̱ kaꞌa̱n ra̱ xiinꞌ José ndii:
―Yuꞌu̱ ndii, nä̱ꞌanꞌ ka̱ te̱ ku̱vi̱ i̱, ndisu̱ Ndiosí ndii, ko̱o̱ a̱ xiinꞌ ndo̱ꞌ te̱ sa̱na̱ndikoꞌ a̱ ndoꞌó nuu̱ꞌ ñu̱ꞌuꞌ ne̱ xii̱ꞌ ya̱taꞌ e̱ꞌ.
22 Te̱ xaꞌa̱ꞌ a̱ ña̱ te̱ kaꞌnuꞌ ka̱ nduuꞌ yoꞌó nuu̱ꞌ sa̱kuuꞌ ña̱ni̱ u̱nꞌ ndii, taxiꞌ siinꞌ ka̱ i̱ nda̱ꞌaꞌ u̱nꞌ ñu̱ꞌuꞌ ña̱ ni̱ tu̱ꞌu̱n i̱ nda̱ꞌaꞌ te̱ vi̱ꞌe̱ amorreo kii̱ꞌ ni̱ ku̱ntaꞌanꞌ i̱ xiinꞌ ra̱ xiinꞌ ityi̱ i̱, xiinꞌ kuxi̱ i̱ ―ni̱ katyi̱ ra̱.