Tu̱tu̱ yoꞌoꞌ kaꞌán xaꞌa̱ꞌ ña̱ ni̱ xa̱a̱ Josué
Yoꞌoꞌ sakooꞌ tu̱ꞌva̱ Ndiosí Josué te̱ ko̱ꞌni̱ ra̱ ne̱ vi̱ꞌe̱ Israel nuu̱ꞌ ñu̱ꞌuꞌ Canaán
1
Te̱ kii̱ꞌ ni̱ xkaꞌndi̱a̱ ña̱ ni̱ xiꞌi̱ Moisés,
te̱ ni̱ xika̱ nu̱u̱ nuu̱ꞌ Yahvé ndii,
ni̱ kaꞌa̱n Yahvé xiinꞌ te̱ ni̱ xika̱ nu̱u̱ nuu̱ꞌ Moisés,
te̱ nduuꞌ Josué,
siꞌe̱ Nun,
kaꞌán a̱ ndii:
2 ―Xa̱ ni̱ xiꞌi̱ Moisés,
te̱ ni̱ xika̱ nu̱u̱ nuu̱ꞌ i̱,
sa̱kanꞌ na kuiiꞌ vi̱ti̱n ndii,
xa̱ ni̱ xa̱a̱ kivi̱ꞌ ña̱ ki̱ꞌi̱n yoꞌó i̱tyiꞌ nuu̱ꞌ ne̱ ñu̱u̱ u̱nꞌ kaa̱ꞌ,
ne̱ vi̱ꞌe̱ Israel,
te̱ ku̱ndi̱a̱ka̱ ña̱ꞌaꞌ u̱nꞌ te̱ xkaꞌndi̱a̱ u̱nꞌ i̱ti̱a̱ Jordán kaa̱ꞌ xiinꞌ sa̱kuuꞌ ni̱a̱,
te̱ ko̱ꞌni̱ ndo̱ꞌ nuu̱ꞌ ñu̱ꞌuꞌ ña̱ ta̱xi̱ i̱ nda̱ꞌaꞌ ndo̱ꞌ ku̱ndi̱e̱e̱ ndo̱ꞌ.
3 Taxiꞌ i̱ kuento i̱ nuu̱ꞌ u̱nꞌ naa ni̱ ta̱xi̱ i̱ e̱ nuu̱ꞌ Moisés ña̱ ka̱niiꞌ nuu̱ꞌ ñu̱ꞌuꞌ miiꞌ ni̱ xkaꞌndi̱a̱ ndo̱ꞌ xeꞌní ndo̱ꞌ ndii,
xa̱ ni̱ ta̱xi̱ i̱ e̱ nda̱ꞌaꞌ ndo̱ꞌ nduuꞌ ña̱ꞌa̱ ndo̱ꞌ.
4 Xa̱ꞌaꞌ a̱ nde̱e̱ miiꞌ i̱tyi kaaꞌ nuu̱ꞌ ñu̱ꞌuꞌ Neguev,
te̱ xkaꞌndi̱a̱ a̱ nde̱e̱ nuu̱ꞌ ñu̱ꞌuꞌ Líbano,
te̱ kuꞌu̱n ndi̱koꞌ a̱ nde̱e̱ miiꞌ kuaꞌa̱n i̱ti̱a̱ tyiee̱ ña̱ naniꞌ Éufrates,
te̱ sa̱kanꞌ tu̱ ka̱niiꞌ nuu̱ꞌ ñu̱ꞌuꞌ ne̱ vi̱ꞌe̱ heteo,
te̱ kuꞌu̱n ndi̱koꞌ a̱ nde̱e̱ yu̱ꞌuꞌ mi̱ni̱ ña̱ naniꞌ Mediterráneo ña̱ naá xtoꞌniꞌ miiꞌ ketá ñu̱ꞌu̱.
Sa̱kuuꞌ ñu̱ꞌuꞌ ja̱a̱nꞌ ku̱ndu̱u̱ ña̱ꞌa̱ ndo̱ꞌ.
5 Nde̱e̱ i̱i̱n köo̱ꞌ ke̱ta̱ va̱ꞌa̱ xiinꞌ u̱nꞌ sa̱kuuꞌ kivi̱ꞌ ña̱ tiaku u̱nꞌ,
sa̱kanꞌ ña̱ yuꞌu̱ ko̱to̱ yoꞌó nde̱e̱ naa ni̱ xi̱to̱ i̱ Moisés,
köo̱ꞌ kivi̱ꞌ na̱ko̱o̱ i̱i̱n nda̱a̱ꞌ i̱ yoꞌó,
te̱ nde̱e̱ i̱i̱n kivi̱ꞌ kü̱xikaꞌ tu̱ i̱ nuu̱ꞌ u̱nꞌ.
6 ’Na̱tyi̱naá u̱nꞌ ndi̱e̱e̱ꞌ u̱nꞌ,
te̱ sa̱ndi̱e̱ni xiinꞌ mi̱iꞌ tu̱ u̱nꞌ,
sa̱kanꞌ ña̱ yoꞌó nduuꞌ te̱ na̱ta̱ꞌviꞌ ñu̱ꞌuꞌ,
te̱ ta̱xi̱ u̱nꞌ u̱n nda̱ꞌaꞌ i̱ꞌi̱n ti̱ꞌvi̱ ne̱ Israel ku̱ndu̱u̱ ña̱ꞌa̱ ni̱a̱,
ñu̱ꞌuꞌ ña̱ ni̱ ta̱xi̱ i̱ kuento i̱ nuu̱ꞌ te̱ xii̱ꞌ ya̱taꞌ ndo̱ꞌ ña̱ ta̱xi̱ i̱ nda̱ꞌaꞌ ndo̱ꞌ.
7 Ña̱ kuní ku̱i̱ti̱ꞌ a̱ sa̱a̱ u̱nꞌ ndii,
na̱tyi̱naá u̱nꞌ ndi̱e̱e̱ꞌ u̱nꞌ,
te̱ sa̱ndi̱e̱ni xiinꞌ mi̱iꞌ va̱ tu̱ u̱nꞌ.
Te̱ ku̱i̱raro va̱ ko̱o̱ u̱nꞌ te̱ sa̱xinú u̱nꞌ sa̱kuuꞌ tu̱ꞌu̱n nde̱iꞌ ña̱ ni̱ sa̱yaꞌá Moisés,
te̱ ni̱ xika̱ nu̱u̱ nuu̱ꞌ i̱,
nda̱ꞌaꞌ u̱nꞌ.
Nde̱e̱ i̱i̱n kivi̱ꞌ nä̱ko̱o̱ u̱nꞌ ña̱ sa̱xinú u̱nꞌ ña̱ kaꞌán tyuunꞌ tu̱ꞌu̱n nde̱iꞌ kaa̱ꞌ,
sa̱kanꞌ te̱ sa̱ñuꞌuꞌ yuꞌu̱,
Ndiosí,
yoꞌó xiinꞌ sa̱kuuꞌ ña̱ sa̱a̱ u̱nꞌ.
8 Sa̱a̱ kivi̱ꞌ ka̱ꞌvi̱ u̱nꞌ tu̱tu̱ miiꞌ yoso̱ꞌ tu̱ꞌu̱n nde̱iꞌ yuꞌu̱,
Ndiosí,
te̱ ndu̱viꞌ xiinꞌ ñu̱u ka̱ni̱ni̱ tu̱ u̱nꞌ xaꞌa̱ꞌ a̱,
sa̱kanꞌ te̱ ku̱vi̱ sa̱a̱ u̱nꞌ ña̱ kaꞌán a̱,
te̱ sa̱xinú tu̱ u̱nꞌ sa̱kuuꞌ ña̱ yoso̱ꞌ nuu̱ꞌ tu̱tu̱ yoꞌoꞌ.
Naaꞌ sa̱a̱ u̱nꞌ sa̱kanꞌ ndii,
sa̱ñuꞌuꞌ yuꞌu̱,
Ndiosí,
yoꞌó,
te̱ ke̱ta̱ va̱ꞌa̱ tu̱ u̱nꞌ xiinꞌ sa̱kuuꞌ ña̱ sa̱a̱ u̱nꞌ.
9 Ña̱ kaꞌán tyuunꞌ ku̱i̱ti̱ꞌ i̱ xiinꞌ u̱nꞌ sa̱a̱ u̱nꞌ ndii,
na̱tyi̱naá u̱nꞌ ndi̱e̱e̱ꞌ u̱nꞌ,
te̱ sa̱ndi̱e̱ni xiinꞌ mi̱iꞌ va̱ tu̱ u̱nꞌ.
Kü̱yi̱ꞌvi u̱nꞌ te̱ kä̱ka̱ tu̱ nimá u̱nꞌ,
sa̱kanꞌ ña̱ yuꞌu̱,
Yahvé Ndiosí u̱nꞌ ndii,
ko̱o̱ i̱ xiinꞌ u̱nꞌ miiꞌ ka̱ kuꞌu̱n u̱nꞌ ―ni̱ katyi̱ Ndiosí xiinꞌ ra̱.
10 Ndi̱ꞌi̱ ja̱a̱nꞌ te̱ ni̱ kaꞌa̱n tyuunꞌ Josué xiinꞌ te̱ xaꞌndia tyuunꞌ nuu̱ꞌ i̱ꞌi̱n ti̱ꞌvi̱ ne̱ Israel,
kaꞌán ra̱ ndii:
11 ―Kuaꞌan ndo̱ꞌ miiꞌ itaꞌ vi̱ꞌe̱ toto̱ miiꞌ ndieeꞌ ne̱ yivi̱ꞌ,
te̱ kaꞌa̱n ndo̱ꞌ xiinꞌ ni̱a̱ na sa̱kooꞌ tu̱ꞌva̱ ni̱a̱ ña̱ xaxi̱ꞌ ña̱ ka̱xi̱ꞌ ni̱a̱ i̱tyiꞌ,
sa̱kanꞌ ña̱ ndee uni̱ kivi̱ꞌ kuní te̱ xkaꞌndi̱a̱ e̱ꞌ i̱ti̱a̱ Jordán kaa̱ꞌ,
te̱ na̱ꞌi̱ e̱ꞌ ñu̱ꞌuꞌ ña̱ ta̱xi̱ Yahvé Ndiosí e̱ꞌ nda̱ꞌaꞌ e̱ꞌ ku̱ndu̱u̱ ña̱ꞌa̱ e̱ꞌ ―ni̱ katyi̱ ra̱.
12 Sa̱kanꞌ te̱ ni̱ na̱ka̱ya̱ tu̱ Josué ti̱ꞌvi̱ ne̱ vi̱ꞌe̱ Rubén,
xiinꞌ ti̱ꞌvi̱ ne̱ vi̱ꞌe̱ Gad,
xiinꞌ taꞌvi̱ꞌ sa̱va̱ ti̱ꞌvi̱ ne̱ vi̱ꞌe̱ Manasés,
te̱ ni̱ kaꞌa̱n ra̱ xiinꞌ ni̱a̱ ndii:
13 ―Na̱ka̱ꞌanꞌ ndo̱ꞌ ña̱ ni̱ kaꞌa̱n tyuunꞌ Moisés,
te̱ ni̱ xika̱ nu̱u̱ nuu̱ꞌ Yahvé,
kii̱ꞌ ni̱ kaꞌa̱n ra̱ xiinꞌ ndo̱ꞌ ndii:
“Yahvé,
Ndiosí e̱ꞌ ndii,
ta̱xi̱ a̱ na̱ndiee̱ꞌ ndo̱ꞌ nuu̱ꞌ ñu̱ꞌuꞌ kaa̱ꞌ”,
ni̱ katyi̱ ra̱.
14 ’Sa̱kanꞌ na kuiiꞌ ñaꞌ siꞌi ndo̱ꞌ,
xiinꞌ sa̱kuuꞌ siꞌe̱ ndo̱ꞌ,
xiinꞌ ki̱tiꞌ sana̱ ndo̱ꞌ ndii,
ku̱vi̱ ndoo̱ ni̱a̱ xiinꞌ riꞌ nuu̱ꞌ ñu̱ꞌuꞌ tu̱ku̱ taꞌviꞌ i̱ti̱a̱ Jordán yoꞌoꞌ miiꞌ ni̱ ta̱xi̱ Moisés nda̱ꞌaꞌ ndo̱ꞌ,
ndisu̱ sa̱kuuꞌ tiaa̱,
te̱ xa̱ ku̱vi̱ ku̱ntaꞌanꞌ ndii,
na xkaꞌndi̱a̱ ra̱ tu̱ku̱ taꞌviꞌ i̱ti̱a̱ kaa̱ꞌ te̱ tyi̱ndi̱e̱eꞌ ra̱ ne̱ taꞌanꞌ ra̱,
15 nde̱e̱ ska̱tyiꞌ ta̱xi̱ Yahvé ñu̱ꞌuꞌ miiꞌ ku̱ndi̱e̱e̱ ni̱a̱ sa̱a̱ ni̱ xa̱a̱ a̱ xiinꞌ ndoꞌó,
te̱ nde̱e̱ kii̱ꞌ na̱ꞌi̱ tu̱ ne̱ ja̱a̱nꞌ ñu̱ꞌuꞌ ku̱ndu̱u̱ ña̱ꞌa̱ ni̱a̱,
ñu̱ꞌuꞌ ña̱ ni̱ ta̱xi̱ Yahvé nda̱ꞌaꞌ ni̱a̱.
Sa̱kanꞌ vi̱ꞌ te̱ ku̱vi̱ na̱ndi̱koꞌ ndoꞌó te̱ ndoo̱ ndo̱ꞌ ku̱ndi̱e̱e̱ ndo̱ꞌ nuu̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ ndo̱ꞌ yoꞌoꞌ,
ña̱ ni̱ ta̱xi̱ Moisés,
te̱ ni̱ xika̱ nu̱u̱ nuu̱ꞌ Yahvé,
nda̱ꞌaꞌ ndo̱ꞌ tu̱ku̱ taꞌviꞌ i̱ti̱a̱ Jordán xtoꞌniꞌ miiꞌ ketaꞌ ñu̱ꞌu̱ ―ni̱ katyi̱ ra̱.
16 Te̱ ni̱ kaꞌa̱n te̱ ja̱a̱nꞌ xiinꞌ Josué ndii:
―Sa̱xinu̱ ndu̱ sa̱kuuꞌ ña̱ kaꞌán tyuunꞌ u̱nꞌ xiinꞌ ndu̱,
te̱ kuꞌu̱n tu̱ ndu̱ miiꞌ ka̱ ti̱ꞌviꞌ u̱nꞌ ndu̱.
17 Sa̱xinu̱ ndu̱ sa̱kuuꞌ ña̱ kaꞌa̱n tyuunꞌ u̱nꞌ xiinꞌ ndu̱ sa̱a̱ niiꞌ ni̱ sa̱xinú ndu̱ ña̱ ni̱ kaꞌa̱n tyuunꞌ Moisés xiinꞌ ndu̱.
Te̱ kaꞌán tu̱ nimá ndu̱ ña̱ ko̱o̱ na Yahvé xiinꞌ u̱nꞌ sa̱a̱ niiꞌ ni̱ yoo̱ a̱ xiinꞌ Moisés.
18 Te̱ yo̱o̱ ka̱ tä̱xi̱ so̱ꞌo̱ ña̱ kaꞌa̱n tyuunꞌ u̱nꞌ xiinꞌ ni̱a̱,
te̱ sä̱xinú tu̱ ni̱a̱ sa̱kuuꞌ ña̱ kaꞌa̱n tyuunꞌ u̱nꞌ ja̱a̱nꞌ,
köo̱ꞌ a̱ xaaꞌ a̱ yo̱o̱ ka̱ nduuꞌ ni̱a̱ ndii,
nde̱e̱ tyaaꞌ ka̱ na ku̱vi̱ ni̱a̱.
Ndisu̱ yoꞌó ndii,
kuní a̱ na̱tyi̱naá u̱nꞌ ndi̱e̱e̱ꞌ u̱nꞌ,
te̱ sa̱ndi̱e̱ni xiinꞌ miiꞌ tu̱ u̱nꞌ ―ni̱ katyi̱ ra̱ xiinꞌ Josué.