Yoꞌoꞌ kaꞌán a̱ xaꞌa̱ꞌ kii̱ꞌ ni̱ na̱taa̱nꞌ Moisés ña̱ꞌa̱ ti̱xi̱n yu̱kunꞌ toto̱, te̱ ni̱ sa̱ñuꞌuꞌ tu̱ ra̱ a̱
40
Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
2 ―Kivi̱ꞌ nu̱uꞌ xaꞌa̱ꞌ yoo̱ꞌ nu̱uꞌ ndii,
kuní a̱ ko̱ꞌni̱ u̱nꞌ sa̱kuuꞌ ña̱ꞌa̱ ña̱ kuní a̱ ku̱i̱ta̱ ti̱xi̱n yu̱kunꞌ toto̱,
yu̱kunꞌ toto̱ miiꞌ nduuꞌ iinꞌ yuꞌu̱,
Ndiosí,
xiinꞌ ne̱ yivi̱ꞌ.
3 I̱kanꞌ ka̱ni̱ u̱nꞌ naa kuuꞌ xatu̱nꞌ miiꞌ naá kuento ña̱ ni̱ ndoo̱ i̱ xiinꞌ ndo̱ꞌ.
Te̱ ka̱ta̱xkoꞌ tu̱ u̱nꞌ toto̱ ña̱ taꞌnuꞌ te̱ tüviꞌ iinꞌ xatu̱nꞌ ja̱a̱nꞌ.
4 Te̱ sa̱ndiꞌví tu̱ u̱nꞌ mesa ti̱xi̱n vi̱ꞌe̱ toto̱ ja̱a̱nꞌ xiinꞌ kandelabro,
te̱ ka̱ta̱ tu̱ u̱nꞌ sa̱kuuꞌ ka̱a̱ tuún ña̱ itaꞌ nuu̱ꞌ a̱.
5 Te̱ altar miiꞌ xixí su̱xa̱ tyu̱ꞌma,
ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro ndii,
so̱ꞌo̱ ka̱ni̱ u̱nꞌ u̱n nuu̱ꞌ a̱ miiꞌ iinꞌ xatu̱nꞌ miiꞌ naá kuento ña̱ ni̱ ndoo̱ yuꞌu̱ꞌ,
Ndiosí,
xiinꞌ ndo̱ꞌ,
te̱ ka̱ta̱xkoꞌ u̱nꞌ toto̱ ndiká yiꞌeꞌ yu̱kunꞌ toto̱ ja̱a̱nꞌ.
6 Ndi̱ꞌi̱ ja̱a̱nꞌ te̱ ka̱ni̱ u̱nꞌ altar miiꞌ xixí ki̱tiꞌ nuu̱ꞌ a̱ miiꞌ yoo yiꞌeꞌ yu̱kunꞌ toto̱ ja̱a̱nꞌ,
yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ ja̱a̱nꞌ.
7 Te̱ te̱i̱n altar xiinꞌ yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ ja̱a̱nꞌ ka̱ni̱ u̱nꞌ pila miiꞌ naá ti̱kui teꞌ natiaꞌ sutu̱ nda̱ꞌaꞌ ra̱ xiinꞌ xaꞌa̱ꞌ ra̱,
te̱ sa̱kutuꞌ u̱nꞌ pila ja̱a̱nꞌ xiinꞌ ti̱kui.
8 Te̱ sa̱kanꞌ tu̱ nda̱si̱ i̱ꞌnu̱ u̱nꞌ nuu̱ꞌ ki̱ꞌe̱ sa̱a̱ xinunduu xi̱i̱nꞌ yu̱kunꞌ toto̱ ja̱a̱nꞌ,
te̱ ka̱ta̱xkoꞌ tu̱ u̱nꞌ toto̱ ndiká yiꞌeꞌ miiꞌ koꞌniꞌ ne̱ yivi̱ꞌ nuu̱ꞌ ki̱ꞌe̱ yu̱kunꞌ ja̱a̱nꞌ.
9 ’Ndi̱ꞌi̱ ja̱a̱nꞌ te̱ ki̱ꞌi̱n u̱nꞌ xa̱ꞌa̱n oliva ña̱ tiinꞌ sutu̱ te̱ sañuꞌuꞌ ra̱,
te̱ ka̱ti̱a̱ ndo̱so̱ꞌ u̱nꞌ u̱n xata̱ꞌ yu̱kunꞌ toto̱ ja̱a̱nꞌ te̱ sa̱ñuꞌuꞌ u̱nꞌ,
te̱ sa̱ñuꞌuꞌ tu̱ u̱nꞌ sa̱kuuꞌ ña̱ yoo ti̱xi̱n a̱,
te̱ ndoo̱ a̱ ku̱ndu̱u̱ a̱ ndi̱ti̱a̱ yuꞌu̱,
Ndiosí.
10 Te̱ sa̱kanꞌ tu̱ sa̱ñuꞌuꞌ u̱nꞌ altar miiꞌ xixí ki̱tiꞌ xiinꞌ sa̱kuuꞌ nda̱tyuunꞌ ña̱ kuaꞌa̱n xiinꞌ a̱,
sa̱ñuꞌuꞌ u̱nꞌ sa̱kuuꞌ a̱,
te̱ ndoo̱ a̱ ku̱ndu̱u̱ a̱ ndi̱ti̱a̱ yuꞌu̱,
Ndiosí.
11 Te̱ sa̱kanꞌ tu̱ ka̱ki̱n u̱nꞌ xa̱ꞌa̱n oliva ja̱a̱nꞌ xata̱ꞌ pila xiinꞌ xaꞌa̱ꞌ a̱ miiꞌ iinꞌ a̱,
te̱ ndoo̱ a̱ ku̱ndu̱u̱ a̱ ndi̱ti̱a̱ yuꞌu̱,
Ndiosí.
12 ’Ndi̱ꞌi̱ ja̱a̱nꞌ te̱ kuꞌu̱n ndi̱a̱ka̱ u̱nꞌ Aarón xiinꞌ tiaa̱ siꞌe̱ ra̱ yiꞌeꞌ yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ,
te̱ kaꞌa̱n tyuunꞌ u̱nꞌ xiinꞌ ra̱ na ku̱tyi̱ ra̱.
13 Sa̱na̱kuiꞌnú u̱nꞌ Aarón toto̱ nani̱ꞌ su̱ꞌu̱n,
te̱ sa̱ñuꞌuꞌ ña̱ꞌaꞌ u̱nꞌ xiinꞌ xa̱ꞌa̱n oliva,
te̱ sa̱na̱nduuꞌ ña̱ꞌaꞌ u̱nꞌ sutu̱ ndi̱ti̱a̱ i̱.
14 Ndi̱ꞌi̱ ja̱a̱nꞌ te̱ sa̱ku̱yatinꞌ u̱nꞌ tiaa̱ siꞌe̱ ra̱,
te̱ sa̱na̱kuiꞌnú ña̱ꞌaꞌ u̱nꞌ toto̱ nani̱ꞌ su̱ꞌu̱n.
15 Te̱ sa̱ñuꞌuꞌ ña̱ꞌaꞌ u̱nꞌ xiinꞌ xa̱ꞌa̱n oliva sa̱a̱ niiꞌ ni̱ sa̱ñuꞌuꞌ u̱nꞌ yu̱vaꞌ ra̱,
te̱ ku̱ndu̱u̱ ra̱ sutu̱ ndi̱ti̱a̱ i̱ nde̱e̱ ndiꞌiꞌ ni̱ kivi̱ꞌ,
te̱ sa̱kanꞌ tu̱ sa̱kuuꞌ tiaa̱ si̱a̱niꞌ ra̱ nuu̱ꞌ kuꞌu̱n e̱ꞌ ―ni̱ katyi̱ Ndiosí.
16 Te̱ ni̱ xa̱a̱ Moisés sa̱kuuꞌ ña̱ ni̱ kaꞌa̱n tyuunꞌ Yahvé xiinꞌ ra̱.
17 Sa̱kanꞌ na kuiiꞌ ni̱ xa̱ꞌaꞌ so̱ꞌo̱ kivi̱ꞌ nu̱uꞌ xaꞌa̱ꞌ yoo̱ꞌ nu̱uꞌ kii̱ꞌ ni̱ ki̱ꞌi̱n kuiya̱ ña̱ uvi̱ ña̱ ni̱ ki̱e̱e̱ ne̱ vi̱ꞌe̱ Israel nuu̱ꞌ ñu̱ꞌuꞌ Egipto,
te̱ ni̱ tyu̱ꞌu̱n taꞌanꞌ Moisés yu̱kunꞌ toto̱ ja̱a̱nꞌ,
te̱ ni̱ xa̱ni̱ ra̱ a̱.
18 Te̱ kii̱ꞌ ni̱ nda̱ni̱ꞌi̱ Moisés yu̱kunꞌ toto̱ ja̱a̱nꞌ ndii,
xi̱ꞌna̱ xaꞌa̱ꞌ a̱ ni̱ tyi̱nduꞌu̱ꞌ ra̱,
te̱ ni̱ xa̱ta̱ tu̱ ra̱ vitu̱ꞌ xaꞌa̱ꞌ a̱ xiinꞌ i̱tunꞌ,
tunꞌ taꞌnuꞌ ndi̱xi̱n xi̱i̱nꞌ a̱,
te̱ ni̱ xa̱ta̱ tu̱ ra̱ ndu̱yu̱ xaꞌa̱ꞌ a̱.
19 Te̱ ni̱ tyi̱ka̱nuꞌ tu̱ ra̱ toto̱ ndiká xata̱ꞌ yu̱kunꞌ ja̱a̱nꞌ,
te̱ xata̱ꞌ toto̱ ja̱a̱nꞌ ni̱ tyi̱ka̱nuꞌ ra̱ i̱i̱nꞌ ti̱xuꞌu̱ꞌ ña̱ ni̱ xa̱ꞌa̱ ra̱ ndasi xata̱ꞌ yu̱kunꞌ toto̱ ja̱a̱nꞌ sa̱a̱ niiꞌ ni̱ kaꞌa̱n tyuunꞌ Yahvé xiinꞌ ra̱.
20 Ndi̱ꞌi̱ ja̱a̱nꞌ te̱ ni̱ ki̱ꞌi̱n Moisés vitu̱ꞌ yuu̱ꞌ miiꞌ yoso̱ꞌ kuento ña̱ ni̱ ndoo̱ Ndiosí xiinꞌ yooꞌ,
ne̱ Israel,
te̱ ni̱ sko̱ꞌniꞌ ra̱ ti̱xi̱n xatu̱nꞌ,
tunꞌ ni̱ xa̱ꞌa̱ ra̱ ja̱a̱nꞌ.
Te̱ i̱kanꞌ tu̱ ni̱ tyi̱naá ra̱ ka̱roti,
tunꞌ kiꞌiꞌ so̱ꞌo̱ xatu̱nꞌ ja̱a̱nꞌ,
te̱ xata̱ꞌ xatu̱nꞌ ja̱a̱nꞌ ni̱ tyi̱nduꞌu̱ꞌ ra̱ tunꞌ ndasi yu̱ꞌuꞌ nu̱ꞌ miiꞌ xatia sutu̱ níiꞌ ki̱tiꞌ xaꞌa̱ ku̱a̱tyi̱ ne̱ yivi̱ꞌ.
21 Ndi̱ꞌi̱ ja̱a̱nꞌ te̱ ni̱ ta̱xa̱ꞌa̱ ra̱ xatu̱nꞌ ja̱a̱nꞌ ti̱xi̱n yu̱kunꞌ toto̱ ja̱a̱nꞌ.
I̱kanꞌ te̱ ni̱ ka̱ta̱ꞌnu̱ ra̱ i̱i̱n toto̱ ndiká ti̱xi̱n yu̱kunꞌ ja̱a̱nꞌ,
te̱ ni̱ sa̱na̱kaá ra̱ a̱,
te̱ ni̱ nda̱si̱ a̱ miiꞌ iinꞌ xatu̱nꞌ ja̱a̱nꞌ sa̱a̱ niiꞌ ni̱ kaꞌa̱n tyuunꞌ Yahvé xiinꞌ ra̱.
22 Ni̱ xa̱ni̱ tu̱ Moisés mesa ninu̱ ti̱xi̱n yu̱kunꞌ toto̱ miiꞌ nduuꞌ iinꞌ Ndiosí xiinꞌ ne̱ yivi̱ꞌ ja̱a̱nꞌ,
ndisu̱ xata̱ꞌ toto̱ ndiká ña̱ taꞌnuꞌ ti̱xi̱n yu̱kunꞌ ja̱a̱nꞌ ni̱ xa̱ni̱ ra̱ nu̱ꞌ.
23 Te̱ nuu̱ꞌ mesa ja̱a̱nꞌ ni̱ tyi̱ndi̱e̱e̱ yuku̱n va̱ꞌa̱ va̱ ra̱ xita̱ꞌ va̱ꞌa̱ ña̱ nasoko̱ꞌ sutu̱ sa̱a̱ niiꞌ ni̱ kaꞌa̱n tyuunꞌ Yahvé xiinꞌ ra̱.
24 Te̱ ti̱xi̱n yu̱kunꞌ toto̱ miiꞌ nduuꞌ iinꞌ Ndiosí xiinꞌ ne̱ yivi̱ꞌ ja̱a̱nꞌ ni̱nu̱ xi̱i̱nꞌ toto̱ ndiká ña̱ taꞌnuꞌ ti̱xi̱n a̱ ya̱ti̱n nuu̱ꞌ a̱ miiꞌ iinꞌ mesa ja̱a̱nꞌ ni̱ xa̱ni̱ ra̱ kandelabro.
25 Sa̱kanꞌ te̱ ni̱ na̱ku̱nꞌ ra̱ ka̱a̱ tuún ja̱a̱nꞌ nuu̱ꞌ Yahvé sa̱a̱ niiꞌ ni̱ kaꞌa̱n tyuunꞌ a̱ xiinꞌ ra̱.
26 Ndi̱ꞌi̱ ja̱a̱nꞌ te̱ ni̱ xa̱ni̱ Moisés altar ña̱ ni̱ ku̱a̱ꞌa̱ xiinꞌ mi̱iꞌ ndi̱ꞌi̱ oro ti̱xi̱n yu̱kunꞌ toto̱ miiꞌ nduuꞌ iinꞌ Ndiosí xiinꞌ ne̱ yivi̱ꞌ ja̱a̱nꞌ ya̱ti̱n miiꞌ taaꞌ toto̱ ndiká.
27 Te̱ ni̱ xa̱ꞌmi̱ ra̱ su̱xa̱ tyu̱ꞌma ña̱ xavixínꞌ xa̱va̱ꞌa̱ nuu̱ꞌ Yahvé sa̱a̱ niiꞌ ni̱ kaꞌa̱n tyuunꞌ a̱ xiinꞌ ra̱.
28 Te̱ ni̱ ka̱ta̱xkoꞌ tu̱ ra̱ toto̱ ndiká yiꞌeꞌ yu̱kunꞌ toto̱ ja̱a̱nꞌ.
29 Te̱ ya̱ti̱n yiꞌeꞌ yu̱kunꞌ toto̱,
yu̱kunꞌ toto̱ miiꞌ nduuꞌ iinꞌ Ndiosí xiinꞌ ne̱ yivi̱ꞌ ja̱a̱nꞌ,
ni̱ xa̱ni̱ tu̱ Moisés altar miiꞌ xaꞌmiꞌ sutu̱ ki̱tiꞌ,
tiꞌ nasoko̱ꞌ ne̱ yivi̱ꞌ nuu̱ꞌ Ndiosí.
Te̱ ni̱ xa̱ꞌmi̱ ra̱ ki̱tiꞌ xiinꞌ ndi̱kinꞌ trigo nuu̱ꞌ altar ja̱a̱nꞌ sa̱a̱ niiꞌ ni̱ kaꞌa̱n tyuunꞌ Yahvé xiinꞌ ra̱.
30 Te̱ te̱i̱n yu̱kunꞌ toto̱ miiꞌ nduuꞌ iinꞌ Ndiosí xiinꞌ ne̱ yivi̱ꞌ ja̱a̱nꞌ xiinꞌ altar miiꞌ xaꞌmiꞌ sutu̱ ki̱tiꞌ,
ni̱ xa̱ni̱ Moisés pila miiꞌ naá ti̱kui natiaꞌ sutu̱ nda̱ꞌaꞌ ra̱ xiinꞌ xaꞌa̱ꞌ ra̱,
te̱ ni̱ ta̱a̱nꞌ ra̱ ti̱kui ti̱xi̱n a̱ nde̱e̱ ni̱ tyi̱tuꞌ a̱,
te̱ xiinꞌ ti̱kui ja̱a̱nꞌ ndasandooꞌ xiinꞌ miiꞌ sutu̱.
31 Te̱ pila ja̱a̱nꞌ tava̱ꞌ Moisés,
xiinꞌ Aarón,
xiinꞌ tiaa̱ siꞌe̱ ra̱ ja̱a̱nꞌ ti̱kui,
te̱ natiaꞌ ra̱ nda̱ꞌaꞌ ra̱ xiinꞌ xaꞌa̱ꞌ ra̱.
32 Kii̱ꞌ koꞌniꞌ ra̱ ti̱xi̱n yu̱kunꞌ toto̱ miiꞌ nduuꞌ iinꞌ Ndiosí xiinꞌ ne̱ yivi̱ꞌ ja̱a̱nꞌ,
uun kii̱ꞌ kuyatinꞌ ra̱ nuu̱ꞌ altar ndii,
natiaꞌ ra̱ nda̱ꞌaꞌ ra̱ xiinꞌ xaꞌa̱ꞌ ra̱ sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés.
33 Te̱ kii̱ꞌ ni̱ ndi̱ꞌi̱ sa̱kuuꞌ ña̱ ja̱a̱nꞌ ni̱ tyu̱ꞌu̱n taꞌanꞌ Moisés nuu̱ꞌ ki̱ꞌe̱ sa̱a̱ xinunduu xi̱i̱nꞌ yu̱kunꞌ toto̱ ja̱a̱nꞌ xiinꞌ altar,
te̱ ni̱ ka̱ta̱xkoꞌ ra̱ toto̱ ndiká yiꞌeꞌ nuu̱ꞌ ki̱ꞌe̱ ja̱a̱nꞌ.
Sa̱kanꞌ vi̱ꞌ te̱ ni̱ sa̱ndiꞌiꞌ Moisés sa̱kuuꞌ tyu̱u̱n ña̱ ni̱ kaꞌa̱n Ndiosí xiinꞌ ra̱ sa̱a̱ ra̱.
Yoꞌoꞌ kaꞌán a̱ xaꞌa̱ꞌ ña̱ ni̱ sa̱kutuꞌ Ndiosí ña̱ nda̱tu̱nꞌ a̱ ti̱xi̱n yu̱kunꞌ toto̱
34 Sa̱kanꞌ te̱ ni̱ nu̱u̱ i̱i̱n viko̱ꞌ,
te̱ ni̱ nda̱si̱ ndo̱o̱ a̱ yu̱kunꞌ toto̱ miiꞌ nduuꞌ iinꞌ Ndiosí xiinꞌ ne̱ yivi̱ꞌ ja̱a̱nꞌ,
te̱ ni̱ tyi̱tuꞌ ka̱niiꞌ miiꞌ iinꞌ yu̱kunꞌ toto̱ ja̱a̱nꞌ ni̱ xa̱a̱ ña̱ kaꞌnuꞌ Yahvé.
35 Te̱ Moisés ndii,
nï̱ ku̱vi̱ ndiꞌvi̱ ra̱ ti̱xi̱n yu̱kunꞌ toto̱ miiꞌ nduuꞌ iinꞌ Ndiosí xiinꞌ ne̱ yivi̱ꞌ,
sa̱kanꞌ ña̱ ni̱ nda̱si̱ ndo̱o̱ a̱ ni̱ xa̱a̱ viko̱ꞌ,
te̱ tyituꞌ vi̱ꞌ ti̱xi̱n yu̱kunꞌ ja̱a̱nꞌ ni̱ xa̱a̱ ña̱ kaꞌnuꞌ Yahvé.
36 Te̱ kii̱ꞌ nundiaꞌá viko̱ꞌ ja̱a̱nꞌ xata̱ꞌ yu̱kunꞌ toto̱ ja̱a̱nꞌ ndii,
sa̱kanꞌ vi̱ꞌ te̱ ni̱ ndo̱ni̱ꞌi̱ ne̱ vi̱ꞌe̱ Israel yu̱kunꞌ toto̱ ja̱a̱nꞌ te̱ yaꞌá ni̱a̱ kuaꞌa̱n ni̱a̱.
Sa̱kanꞌ ni̱ xa̱a̱ ni̱a̱ ka̱niiꞌ i̱tyiꞌ kii̱ꞌ yaꞌá ni̱a̱ kuaꞌa̱n ni̱a̱.
37 Ndisu̱ naaꞌ nï̱ nu̱ndiaꞌa̱ viko̱ꞌ ja̱a̱nꞌ xata̱ꞌ yu̱kunꞌ toto̱ ja̱a̱nꞌ ndii,
nï̱ ndo̱ꞌni̱ꞌi̱ ni̱a̱ a̱ miiꞌ iinꞌ a̱ nde̱e̱ ska̱tyiꞌ ni̱ xa̱a̱ kivi̱ꞌ ña̱ ni̱ nu̱ta̱ viko̱ꞌ ja̱a̱nꞌ xata̱ꞌ yu̱kunꞌ ja̱a̱nꞌ.
38 Sa̱kanꞌ ña̱ i̱i̱n keꞌinꞌ ndii,
viko̱ꞌ ja̱a̱nꞌ ni̱ nduuꞌ ña̱ niaꞌá ña̱ yoo Ndiosí xiinꞌ ni̱a̱ xata̱ꞌ yu̱kunꞌ toto̱ ja̱a̱nꞌ,
te̱ ñu̱u ndii,
ñuꞌu̱ ndatin ña̱ kaaꞌ nde̱e̱ naa i̱i̱n ndu̱yu̱ ni̱ nduu̱ ña̱ niaꞌá ña̱ yoo a̱ xiinꞌ ni̱a̱ te̱i̱n viko̱ꞌ ja̱a̱nꞌ xata̱ꞌ yu̱kunꞌ ja̱a̱nꞌ,
nuu̱ꞌ niꞌnuꞌ ne̱ vi̱ꞌe̱ Israel ndieeꞌ ni̱a̱ i̱kanꞌ.