Yoꞌoꞌ kaꞌán a̱ xaꞌa̱ꞌ sa̱a̱ yoo toto̱ ña̱ niꞌnuꞌ sutu̱
Éx 28:1-43
39
Toto̱ ña̱ ni̱ naku̱ niꞌnuꞌ sutu̱ kii̱ꞌ xatyuunꞌ ra̱ ti̱xi̱n yu̱kunꞌ toto̱,
xiinꞌ toto̱ su̱ꞌu̱n ña̱ niꞌnuꞌ Aarón ndii,
xiinꞌ toto̱ ndi̱ꞌeꞌ,
xiinꞌ toto̱ ndu̱kunꞌ,
xiinꞌ toto̱ kuaꞌa ni̱ xa̱ꞌa̱ ra̱ a̱ sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés.
2 Te̱ soo̱ꞌ tikoo̱ꞌ ña̱ niꞌnuꞌ sutu̱ ndii,
xiinꞌ yuꞌva̱ oro nii̱ꞌ ni̱ xa̱ꞌa̱ ra̱ a̱,
xiinꞌ toto̱ ndi̱ꞌeꞌ,
xiinꞌ toto̱ ndu̱kunꞌ,
xiinꞌ toto̱ kuaꞌa,
xiinꞌ toto̱ lino va̱ꞌa̱ va̱ ña̱ xaꞌa nda̱ꞌaꞌ ne̱ yivi̱ꞌ.
3 Te̱ xiinꞌ ka̱a̱ vie̱ ni̱ tu̱xiꞌ ra̱ oro,
te̱ ni̱ ku̱u̱ yaxinꞌ a̱ te̱ ni̱ xaꞌa̱ꞌ ra̱ yuꞌva̱ nii̱ꞌ va̱,
te̱ ni̱ na̱ku̱ ra̱ a̱ xiinꞌ yuꞌva̱ ndi̱ꞌeꞌ,
xiinꞌ yuꞌva̱ ndu̱kunꞌ,
xiinꞌ yuꞌva̱ kuaꞌa,
xiinꞌ yuꞌva̱ lino ña̱ sakuunꞌ nda̱ꞌaꞌ ne̱ yivi̱ꞌ,
te̱ va̱ꞌa̱ va̱ ni̱ na̱ku̱ ra̱ soo̱ꞌ ti̱koo̱ꞌ ja̱a̱nꞌ.
4 Te̱ ni̱ tyi̱nduꞌu̱ꞌ ra̱ uvi̱ taꞌan toto̱ níiꞌ soko̱ soo̱ꞌ ti̱kooꞌ ja̱a̱nꞌ,
te̱ ni̱ ndu̱i̱i̱n nuu̱ꞌ uvi̱ sa̱aꞌ a̱ soko̱ꞌ ra̱ ja̱a̱nꞌ,
te̱ taxkoꞌ a̱ nuu̱ꞌ ra̱ xiinꞌ xata̱ꞌ ra̱.
5 Te̱ toto̱ níiꞌ ña̱ tiín to̱koꞌ ra̱,
ña̱ kanuꞌ xata̱ꞌ soo̱ꞌ ti̱koo̱ꞌ ja̱a̱nꞌ ndii,
i̱i̱n katyi ni̱ xa̱ꞌa̱ ra̱ xiinꞌ yuꞌva̱ oro,
xiinꞌ yuꞌva̱ ndi̱ꞌeꞌ,
xiinꞌ yuꞌva̱ ndu̱kunꞌ,
xiinꞌ yuꞌva̱ kuaꞌa níiꞌ,
xiinꞌ yuꞌva̱ ña̱ kunu nda̱ꞌaꞌ ne̱ yivi̱ꞌ sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés.
6 Te̱ uvi̱ ta̱ꞌanꞌ yuu̱ꞌ nda̱tu̱nꞌ ña̱ naniꞌ ónice ni̱ tyi̱ꞌni̱ ra̱ xata̱ꞌ ka̱a̱ yaxinꞌ ña̱ ni̱ ku̱a̱ꞌa̱ xiinꞌ oro ña̱ ndieeꞌ soko̱ soo̱ꞌ ti̱koo̱ꞌ ña̱ niꞌnuꞌ sutu̱,
te̱ xata̱ꞌ yuu̱ꞌ ja̱a̱nꞌ ni̱ ke̱ꞌi̱ ra̱ kivi̱ꞌ i̱ꞌi̱n ti̱ꞌvi̱ te̱ uxi̱ uvi̱ siꞌe̱ Israel nde̱e̱ naa xaaꞌ te̱ yivi̱ꞌ kii̱ꞌ sanianiaꞌ ra̱ kivi̱ꞌ ra̱ nuu̱ꞌ sello.
7 Ni̱ tyi̱ndi̱e̱e̱ Bezaleel yuu̱ꞌ nda̱tu̱nꞌ ja̱a̱nꞌ xata̱ꞌ toto̱ nii̱ꞌ ña̱ kanuꞌ soko̱ soo̱ꞌ ti̱koo̱ꞌ ja̱a̱nꞌ,
te̱ na̱ka̱ꞌanꞌ ra̱ ña̱ sutu̱,
te̱ niꞌnuꞌ toto̱ ja̱a̱nꞌ nduuꞌ te̱ xikuiꞌní xaꞌa̱ꞌ ne̱ vi̱ꞌe̱ Israel nuu̱ꞌ Ndiosí.
Te̱ ni̱ xa̱a̱ ra̱ sa̱kuuꞌ tyu̱u̱n ja̱a̱nꞌ sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés.
Yoꞌoꞌ kaꞌán xaꞌa̱ꞌ sa̱a̱ ku̱a̱ꞌa̱ toto̱ kukunꞌ ña̱ ku̱na̱nduꞌu̱ꞌ ti̱a̱ꞌni̱ sutu̱ miiꞌ ku̱ndo̱ndi̱a̱ uxi̱ uvi̱ taꞌan yuu̱ꞌ nda̱tu̱nꞌ
8 Te̱ ni̱ xa̱ꞌa̱ tu̱ Bezaleel toto̱ kukunꞌ ña̱ ndianduꞌu̱ꞌ ti̱a̱ꞌni̱ sutu̱ꞌ te̱ i̱i̱n te̱ tyu̱u̱n va̱ ni̱ xa̱ꞌa̱ a̱.
Te̱ i̱i̱n katyi ni̱ xa̱ꞌa̱ ra̱ a̱ nde̱e̱ naa ni̱ ku̱a̱ꞌa̱ soo̱ꞌ ti̱koo̱ꞌ ña̱ niꞌnuꞌ sutu̱ ja̱a̱nꞌ,
sa̱kanꞌ ña̱ ni̱ xa̱ꞌa̱ ra̱ xiinꞌ yuꞌva̱ oro,
xiinꞌ yuꞌva̱ ndi̱ꞌeꞌ,
xiinꞌ yuꞌva̱ ndu̱kunꞌ,
xiinꞌ yuꞌva̱ kuaꞌa,
xiinꞌ yuꞌva̱ lino ña̱ ni̱ sa̱kuiyoꞌ nda̱ꞌaꞌ ne̱ yivi̱ꞌ.
9 Kukunꞌ yoo a̱,
te̱ yoo titutunꞌ tu̱ a̱,
te̱ ña̱ ndiká a̱ ndii,
i̱i̱n kuarta kanuꞌ i̱i̱n nuu̱ꞌ nda̱ꞌaꞌ kuuꞌ ta̱taꞌviꞌ a̱.
10 Te̱ ni̱ tyi̱ndo̱ndi̱a̱ ra̱ ku̱miꞌ taꞌan yuku̱n yuu̱ꞌ nda̱tu̱nꞌ xata̱ꞌ toto̱ kukunꞌ ja̱a̱nꞌ.
Yuku̱n nu̱uꞌ ndii,
i̱i̱n yuu̱ꞌ ña̱ naniꞌ sárdica ni̱ tyi̱ndikún ra̱,
xiinꞌ i̱i̱n yuu̱ꞌ ña̱ naniꞌ topacio ni̱ tyi̱ndikún ra̱,
xiinꞌ i̱i̱n yuu̱ꞌ ña̱ naniꞌ carbunclo ni̱ tyi̱ndikún ra̱.
11 Te̱ yuku̱n ña̱ uvi̱ ndii,
i̱i̱n yuu̱ꞌ ña̱ naniꞌ esmeralda ni̱ tyi̱ndikún ra̱,
xiinꞌ i̱i̱n yuu̱ꞌ ña̱ naniꞌ zafiro ni̱ tyi̱ndikún ra̱,
xiinꞌ i̱i̱n yuu̱ꞌ ña̱ naniꞌ diamante ni̱ tyi̱ndikún ra̱.
12 Te̱ yuku̱n ña̱ uni̱ ndii,
i̱i̱n yuu̱ꞌ ña̱ naniꞌ jacinto,
ni̱ tyi̱ndikún ra̱,
xiinꞌ i̱i̱n yuu̱ꞌ ña̱ naniꞌ ágata ni̱ tyi̱ndikún ra̱,
xiinꞌ i̱i̱n yuu̱ꞌ ña̱ naniꞌ amatista ni̱ tyi̱ndikún ra̱.
13 Te̱ yuku̱n ña̱ ku̱miꞌ ndii,
i̱i̱n yuu̱ꞌ ña̱ naniꞌ berilo ni̱ tyi̱ndikún ra̱,
xiinꞌ i̱i̱n yuu̱ꞌ ña̱ naniꞌ ónice ni̱ tyi̱ndikún ra̱,
xiinꞌ i̱i̱n yuu̱ꞌ ña̱ naniꞌ jaspe ni̱ tyi̱ndikún ra̱.
Te̱ sa̱kuuꞌ yuu̱ꞌ ja̱a̱nꞌ ni̱ tyi̱ndo̱ndi̱a̱ ra̱ nuu̱ꞌ oro.
14 Te̱ ña̱ sa̱kuuꞌ yuu̱ꞌ ja̱a̱nꞌ ndii,
uxi̱ uvi̱ taꞌan kuuꞌ a̱,
sa̱kanꞌ ña̱ uxi̱ uvi̱ taꞌan kuuꞌ tiaa̱ siꞌe̱ Israel,
te̱ xata̱ꞌ i̱ꞌi̱n yuu̱ꞌ ja̱a̱nꞌ ni̱ na̱ko̱so̱ꞌ kivi̱ꞌ i̱ꞌi̱n te̱ uxi̱ uvi̱ ja̱a̱nꞌ nde̱e̱ naa xaaꞌ te̱ xaꞌa sello.
15 Te̱ ni̱ xa̱ꞌa̱ tu̱ ra̱ yuꞌva̱ ña̱ kuꞌu̱n yu̱ꞌuꞌ toto̱ kukunꞌ ña̱ ndianduꞌu̱ꞌ ti̱a̱ꞌni̱ sutu̱ꞌ ja̱a̱nꞌ xiinꞌ mi̱iꞌ ndiꞌiꞌ oro,
te̱ ni̱ xa̱ꞌa̱ ra̱ a̱ nde̱e̱ naa iinꞌ laso i̱xiꞌ xíniꞌ ne̱ yivi̱ꞌ.
16 Te̱ ni̱ xa̱ꞌa̱ tu̱ ra̱ uvi̱ ta̱ꞌan ka̱a̱ yaxinꞌ xiinꞌ yuꞌva̱ oro xiinꞌ uvi̱ taꞌan ka̱a̱ tivi̱ xiinꞌ mi̱iꞌ ndiꞌiꞌ oro,
te̱ ni̱ tyi̱ndo̱ndi̱a̱ ra̱ uvi̱ sa̱aꞌ ka̱a̱ tivi̱ ja̱a̱nꞌ ni̱nu̱ xiki̱ꞌ toto̱ kukunꞌ ña̱ ndianduꞌu̱ꞌ ti̱a̱ꞌni̱ sutu̱ꞌ ja̱a̱nꞌ.
17 Ni̱ sa̱tiín ra̱ uvi̱ sa̱aꞌ yuꞌva̱ ña̱ ni̱ xa̱ꞌa̱ ra̱ xiinꞌ mi̱iꞌ ndiꞌiꞌ oro ja̱a̱nꞌ ka̱a̱ tivi̱ ña̱ ndondia yu̱ꞌuꞌ toto̱ kukunꞌ ña̱ ndianduꞌu̱ꞌ ti̱a̱ꞌni̱ sutu̱ꞌ ja̱a̱nꞌ.
18 Te̱ uvi̱ sa̱aꞌ nuu̱ꞌ yuꞌva̱ ja̱a̱nꞌ ndii,
ni̱ sa̱tiín ra̱ uvi̱ sa̱aꞌ taꞌviꞌ xiki̱ꞌ uvi̱ sa̱aꞌ ka̱a̱ yaxinꞌ ña̱ ndieeꞌ soko̱ soo̱ꞌ ti̱koo̱ꞌ ña̱ niꞌnuꞌ sutu̱.
19 Te̱ ni̱ xa̱ꞌa̱ tu̱ ra̱ uvi̱ taꞌan ka̱a̱ tivi̱ xiinꞌ mi̱iꞌ ndiꞌiꞌ oro,
te̱ ni̱ tyi̱ndo̱ndi̱a̱ ra̱ a̱ uvi̱ sa̱aꞌ taꞌviꞌ yu̱ꞌuꞌ toto̱ kukunꞌ ña̱ ndianduꞌu̱ꞌ ti̱a̱ꞌni̱ sutu̱ꞌ ja̱a̱nꞌ.
Te̱ yu̱ꞌuꞌ a̱ ninu̱ miiꞌ nduuꞌ iinꞌ a̱ xiinꞌ soo̱ꞌ ti̱koo̱ꞌ ña̱ niꞌnuꞌ sutu̱ ni̱ tyi̱nduꞌu̱ꞌ ra̱ ka̱a̱ tivi̱ ja̱a̱nꞌ.
20 Te̱ ni̱ xa̱ꞌa̱ ka̱ tu̱ ra̱ i̱nga̱ uvi̱ taꞌan ka̱a̱ tivi̱ xiinꞌ mi̱iꞌ ndiꞌiꞌ oro,
te̱ ni̱ tyi̱ndo̱ndi̱a̱ ra̱ a̱ ti̱xi̱n toto̱ nii̱ꞌ ña̱ kiꞌiꞌ soo̱ꞌ ti̱koo̱ꞌ ña̱ niꞌnuꞌ sutu̱ kaꞌnuꞌ,
te̱ ka̱a̱ tivi̱ ja̱a̱nꞌ ndii,
ni̱ tyi̱ndo̱ndi̱a̱ ra̱ a̱ nuu̱ꞌ to̱koꞌ sutu̱ xi̱i̱nꞌ a̱ ni̱nu̱ miiꞌ xkaꞌndíá toto̱ níiꞌ ña̱ tiín to̱koꞌ ra̱ miiꞌ ni̱ naku̱ soo̱ꞌ ti̱koo̱ꞌ ja̱a̱nꞌ.
21 Sa̱kanꞌ te̱ ni̱ sa̱ndu̱i̱i̱n ra̱ ka̱a̱ tivi̱ ña̱ ndondia yu̱ꞌuꞌ toto̱ kukunꞌ ña̱ ndianduꞌu̱ꞌ ti̱a̱ꞌni̱ sutu̱ꞌ ja̱a̱nꞌ xiinꞌ ka̱a̱ tivi̱ ña̱ ndondia toto̱ nii̱ꞌ ña̱ yoo soko̱ soo̱ꞌ ti̱koo̱ꞌ ña̱ niꞌnuꞌ ra̱,
te̱ ka̱a̱ ja̱a̱nꞌ ko̱tii̱n xiinꞌ i̱i̱n yuꞌva̱ ndi̱ꞌeꞌ,
sa̱kanꞌ te̱ toto̱ kukunꞌ ña̱ ndianduꞌu̱ꞌ ti̱a̱ꞌni̱ sutu̱ꞌ ja̱a̱nꞌ ndii,
xata̱ꞌ toto̱ nii̱ꞌ ña̱ tiín to̱koꞌ ra̱ ndoo̱ a̱ te̱ ndäxi̱nꞌ a̱ sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés.
Yoꞌoꞌ kaꞌán a̱ xaꞌa̱ꞌ i̱nga̱ nuu̱ꞌ toto̱ ña̱ niꞌnuꞌ sutu̱
22 Te̱ toto̱ nani̱ꞌ ndi̱ꞌeꞌ,
ña̱ naá ti̱xi̱n soo̱ꞌ ti̱koo̱ꞌ ña̱ niꞌnuꞌ sutu̱ ndii,
xiinꞌ mi̱iꞌ ndiꞌiꞌ yuꞌva̱ ndi̱ꞌeꞌ ni̱ xa̱ꞌa̱ ra̱ ka̱niiꞌ a̱.
23 Te̱ ni̱ xa̱ꞌa̱ tu̱ ra̱ yavi̱ suku̱nꞌ a̱ miiꞌ sa̱ndiꞌví sutu̱ ja̱a̱nꞌ xíniꞌ ra̱,
te̱ ni̱ na̱ku̱ kutu̱ꞌ ra̱ yu̱ꞌuꞌ yavi̱ suku̱nꞌ a̱ ja̱a̱nꞌ,
sa̱kanꞌ te̱ ku̱ä̱tyi̱ a̱.
24 Te̱ ni̱ nda̱sa̱nda̱tu̱nꞌ ra̱ yu̱ꞌuꞌ toto̱ nani̱ꞌ ndi̱ꞌeꞌ ja̱a̱nꞌ xiinꞌ nu̱ꞌni̱ yuꞌva̱ ndi̱ꞌeꞌ,
xiinꞌ nu̱ꞌni̱ yuꞌva̱ ndu̱kunꞌ,
xiinꞌ nu̱ꞌni̱ yuꞌva̱ kuaꞌa,
te̱ ni̱ na̱ku̱ tu̱ ra̱ xiinꞌ nu̱ꞌni̱ yuꞌva̱ lino ña̱ kuu̱nꞌ nda̱ꞌaꞌ ne̱ yivi̱ꞌ.
25 Te̱ ni̱ xa̱ꞌa̱ tu̱ ra̱ i̱i̱n siki̱ ka̱a̱ xiinꞌ mi̱iꞌ ndiꞌiꞌ oro taxkoꞌ yu̱ꞌuꞌ toto̱ nani̱ꞌ ja̱a̱nꞌ,
te̱ taxkoꞌ tu̱ i̱i̱n nu̱ꞌni̱ yuꞌva̱ yu̱ꞌuꞌ toto̱ ja̱a̱nꞌ te̱i̱n siki̱ ka̱a̱ ja̱a̱nꞌ,
te̱ i̱i̱n sa̱kanꞌ kaaꞌ ka̱niiꞌ yu̱ꞌuꞌ toto̱ nani̱ꞌ ndi̱ꞌeꞌ ja̱a̱nꞌ.
26 Sa̱kanꞌ na kuiiꞌ i̱i̱n siki̱ ka̱a̱ taxkoꞌ ña̱ ni̱ ku̱a̱ꞌa̱ xiinꞌ oro yu̱ꞌuꞌ toto̱ ja̱a̱nꞌ,
i̱kanꞌ te̱ taxkoꞌ tu̱ i̱i̱n nu̱ꞌni̱ yuꞌva̱ i̱kanꞌ,
te̱ tu̱ku̱ ni̱ taxkoꞌ i̱i̱n siki̱ ka̱a̱,
te̱ taxkoꞌ ka̱ tu̱ i̱i̱n nu̱ꞌni̱ yuꞌva̱ ja̱a̱nꞌ,
te̱ i̱i̱n sa̱kanꞌ kaaꞌ sa̱a̱ kuaꞌa̱n ka̱niiꞌ yu̱ꞌuꞌ toto̱ nani̱ꞌ ndi̱ꞌeꞌ ja̱a̱nꞌ sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés.
27 Te̱ ni̱ na̱ku̱ tu̱ ra̱ toto̱ nani̱ꞌ ndiká xiinꞌ mi̱iꞌ ndiꞌiꞌ yuꞌva̱ lino va̱ꞌa̱ niꞌnuꞌ Aarón xiinꞌ tiaa̱ siꞌe̱ ra̱.
28 Te̱ xiinꞌ yuꞌva̱ lino ja̱a̱nꞌ tu̱ ni̱ na̱ku̱ ra̱ i̱i̱n xíniꞌ siee,
te̱ xiinꞌ ña̱ ja̱a̱nꞌ tu̱ ni̱ na̱ku̱ nda̱tu̱nꞌ va̱ ra̱ i̱i̱n toto̱ níiꞌ ña̱ ko̱tii̱n to̱koꞌ sutu̱ xiinꞌ xa̱tu̱ siee ra̱ ña̱ naxaá nde̱e̱ kondo̱ ra̱.
29 I̱kanꞌ te̱ ni̱ na̱ku̱ tu̱ ra̱ i̱i̱n toto̱ nii̱ꞌ ña̱ tiín to̱koꞌ sutu̱ xiinꞌ mi̱iꞌ ndiꞌiꞌ yuꞌva̱ lino va̱ꞌa̱,
xiinꞌ yuꞌva̱ ndi̱ꞌeꞌ,
xiinꞌ yuꞌva̱ ndu̱kunꞌ,
xiinꞌ yuꞌva̱ kuaꞌa,
te̱ nda̱tu̱nꞌ va̱ ni̱ na̱ku̱ ra̱ toto̱ ja̱a̱nꞌ sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés.
30 Te̱ ni̱ xa̱ꞌa̱ tu̱ ra̱ i̱i̱n ka̱a̱ yaxinꞌ xiinꞌ mi̱iꞌ ndiꞌiꞌ oro ña̱ ku̱nduꞌu̱ꞌ xata̱ꞌ xíniꞌ su̱ꞌu̱n ña̱ yoso̱ꞌ sutu̱,
te̱ ni̱ ke̱ꞌi̱ ra̱ xata̱ꞌ a̱ nde̱e̱ naa keꞌi te̱ yivi̱ꞌ xata̱ꞌ sello ña̱ kaꞌán ndii:
NDI̱TI̱A YAHVÉ,
katyi a̱.
31 Te̱ ni̱ sa̱tiín ra̱ ka̱a̱ yaxinꞌ ña̱ su̱ꞌu̱n ja̱a̱nꞌ xiinꞌ i̱i̱n yuꞌva̱ ndi̱ꞌeꞌ,
te̱ ku̱nduꞌu̱ꞌ kutu̱ꞌ a̱ tiꞌe̱ xíniꞌ siee ña̱ yoso̱ꞌ sutu̱ ja̱a̱nꞌ.
Te̱ ni̱ xa̱a̱ ra̱ sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés.
Yoꞌoꞌ kaꞌán a̱ xaꞌa̱ꞌ kii̱ꞌ ni̱ xinu̱ yu̱kunꞌ toto̱
Ex. 35.10-19
32 Te̱ ni̱ xinu̱ tyu̱u̱n ña̱ xaꞌa te̱ yivi̱ꞌ yu̱kunꞌ toto̱ ña̱ nduuꞌ yu̱kunꞌ miiꞌ nduuꞌ iinꞌ Ndiosi xiinꞌ ne̱ vi̱ꞌe̱ Israel.
Sa̱kanꞌ na kuiiꞌ ni̱ xa̱a̱ ne̱ vi̱ꞌe̱ Israel sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés.
33 Sa̱kanꞌ te̱ ni̱ sa̱na̱kuaꞌa ra̱ yu̱kunꞌ toto̱ ja̱a̱nꞌ nda̱ꞌaꞌ Moisés kii̱ꞌ ni̱ xinu̱ a̱.
Ni̱ sa̱na̱kuaꞌa ra̱ yu̱kunꞌ toto̱ ja̱a̱nꞌ xiinꞌ sa̱kuuꞌ nda̱tyuunꞌ ña̱ yoo ti̱xi̱n a̱,
naa kuuꞌ ka̱a̱ ki̱ꞌiꞌ,
xiinꞌ vitu̱ꞌ,
xiinꞌ i̱tunꞌ,
tunꞌ taꞌnuꞌ ndi̱xi̱n,
xiinꞌ ndu̱yu̱,
xiinꞌ ka̱a̱ ña̱ kiꞌiꞌ xaꞌa̱ꞌ nu̱ꞌ,
34 xiinꞌ ña̱ ndasi xata̱ꞌ a̱,
ña̱ nduuꞌ i̱i̱nꞌ mbe̱e̱ tyiee̱,
ña̱ ni̱ na̱keꞌi̱ kuaꞌa,
xiinꞌ i̱i̱nꞌ ti̱xuꞌu̱ꞌ,
ña̱ va̱ꞌa̱ va̱ ndasi xata̱ꞌ a̱,
xiinꞌ toto̱ ndiká ña̱ taxkoꞌ ti̱xi̱n yu̱kun toto̱ꞌ,
te̱ tiasi a̱ miiꞌ iinꞌ xatu̱nꞌ miiꞌ naá kuento ña̱ ni̱ ndoo̱ Ndiosí xiinꞌ e̱ꞌ.
35 Te̱ ni̱ sa̱na̱kuaꞌa tu̱ ra̱ xatu̱nꞌ miiꞌ naá kuento ña̱ ni̱ ndoo̱ Ndiosí xiinꞌ e̱ꞌ,
xiinꞌ ka̱roti,
tunꞌ kiꞌiꞌ so̱ꞌo̱ nu̱ꞌ te̱ niꞌiꞌ te̱ yivi̱ꞌ nu̱ꞌ,
xiinꞌ tunꞌ ndasi yu̱ꞌuꞌ xatu̱nꞌ miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ ja̱a̱nꞌ,
36 xiinꞌ mesa,
xiinꞌ sa̱kuuꞌ nda̱tyuunꞌ ña̱ itaꞌ nuu̱ꞌ nu̱ꞌ,
xiinꞌ xita̱ꞌ va̱ꞌa̱ ña̱ nduuꞌ ndi̱ti̱a̱ Ndiosí.
37 Te̱ ni̱ sa̱na̱kuaꞌa tu̱ ra̱ kandelabro ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro,
xiinꞌ ka̱a̱ tuún ña̱ itaꞌ yuku̱n nda̱ꞌaꞌ a̱,
xiinꞌ sa̱kuuꞌ ña̱ kumiꞌ a̱,
xiinꞌ xa̱ꞌa̱n ña̱ ñuꞌuꞌ ti̱xi̱n a̱ te̱ tuún a̱.
38 Te̱ ni̱ sa̱na̱kuaꞌa tu̱ ra̱ altar ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro,
xiinꞌ xa̱ꞌa̱n oliva ña̱ tiinꞌ sutu̱ kii̱ꞌ sañuꞌuꞌ ra̱,
xiinꞌ su̱xa̱ tyu̱ꞌma xavixínꞌ,
xiinꞌ toto̱ ndiká ña̱ taxkoꞌ yiꞌeꞌ yu̱kunꞌ toto̱ ja̱a̱nꞌ,
39 xiinꞌ altar ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ bronce,
xiinꞌ ka̱a̱ ndiki̱ ña̱ kuaꞌa̱n xi̱i̱nꞌ a̱,
ña̱ ni̱ ku̱a̱ꞌa̱ xiinꞌ bronce,
xiinꞌ ka̱roti,
tunꞌ kiꞌiꞌ so̱ꞌo̱ a̱,
xiinꞌ sa̱kuuꞌ nda̱tyuunꞌ ña̱ nitaꞌanꞌ xiinꞌ a̱,
xiinꞌ pila,
xiinꞌ xaꞌa̱ꞌ a̱ miiꞌ naá ti̱kui natiaꞌ ra̱ nda̱ꞌaꞌ ra̱ xiinꞌ xaꞌa̱ꞌ ra̱.
40 Te̱ ni̱ sa̱na̱kuaꞌa tu̱ ra̱ toto̱ ndiká ña̱ ndasi nuu̱ꞌ ki̱ꞌe̱ yu̱kunꞌ toto̱ ja̱a̱nꞌ,
xiinꞌ ndu̱yu̱,
xiinꞌ ka̱a̱ ña̱ kiꞌiꞌ xaꞌa̱ꞌ ndu̱yu̱ ja̱a̱nꞌ,
xiinꞌ toto̱ ndiká ña̱ ndasi miiꞌ koꞌniꞌ sutu̱ nuu̱ꞌ ki̱ꞌe̱ yu̱kunꞌ toto̱ ja̱a̱nꞌ,
xiinꞌ yo̱ꞌoꞌ ña̱ tiín toto̱,
xiinꞌ ti̱kundu̱,
tunꞌ tiín yo̱ꞌoꞌ ja̱a̱nꞌ,
xiinꞌ sa̱kuuꞌ nda̱tyuunꞌ ña̱ tiinꞌ sutu̱ kii̱ꞌ xikaꞌ nuuꞌ ra̱ ti̱xi̱n yu̱kunꞌ toto̱ ja̱a̱nꞌ,
yu̱kunꞌ toto̱ miiꞌ nduuꞌ iinꞌ ne̱ yivi̱ꞌ xiinꞌ Ndiosí,
41 xiinꞌ sa̱kuuꞌ nuu̱ꞌ toto̱ ña̱ niꞌnuꞌ sutu̱ kii̱ꞌ xikaꞌ nuuꞌ ra̱ nuu̱ꞌ Ndiosí ti̱xi̱n yu̱kunꞌ ja̱a̱nꞌ,
xiinꞌ toto̱ ña̱ ni̱ naku̱ niꞌnuꞌ sutu̱ Aarón,
xiinꞌ toto̱ ña̱ niꞌnuꞌ sutu̱ siꞌe̱ ra̱.