So̱ꞌo̱ ni̱ xa̱a̱ a̱ kii̱ꞌ ni̱ ti̱ꞌviꞌ Josué te̱ yivi̱ꞌ, te̱ ni̱ xaꞌa̱n ko̱to̱ si̱ꞌe sa̱a̱ kaaꞌ ñu̱u̱ Jericó
2
Sa̱kanꞌ te̱ nde̱e̱ ñu̱u̱ Sitim miiꞌ nduꞌu̱ꞌ Josué,
siꞌe̱ Nun,
ni̱ ti̱ꞌviꞌ ra̱ uvi̱ taꞌanꞌ te̱ yivi̱ꞌ te̱ kuꞌu̱n ko̱to̱ si̱ꞌe ra̱ sa̱a̱ kaaꞌ ñu̱u̱ Jericó,
kaꞌán ra̱ xiinꞌ te̱ ja̱a̱nꞌ ndii:
―Kuaꞌan ndo̱ꞌ te̱ ko̱to̱ ndiꞌi̱ ndo̱ꞌ sa̱a̱ kaaꞌ nuu̱ꞌ ñu̱ꞌuꞌ tu̱ku̱ taꞌviꞌ yu̱ꞌuꞌ i̱ti̱a̱ Jordán kaa̱ꞌ,
ndisu̱ ko̱to̱ kaxiꞌ ka̱ ndo̱ꞌ sa̱a̱ kaaꞌ ñu̱u̱ Jericó ―ni̱ katyi̱ ra̱.
Sa̱kanꞌ te̱ ni̱ ki̱e̱e̱ te̱ ja̱a̱nꞌ kuaꞌa̱n ra̱,
te̱ ni̱ xa̱a̱ ra̱ vi̱ꞌe̱ i̱i̱n ña̱ꞌaꞌ ñaꞌ xiko̱ꞌ xiinꞌ miiꞌ ñaꞌ naniꞌ Rahab,
te̱ i̱kanꞌ ni̱ kixi̱n ra̱ ñu̱u kivi̱ꞌ ja̱a̱nꞌ.
2 Te̱ ni̱ xaꞌa̱n kaꞌa̱n ne̱ yivi̱ꞌ xiinꞌ rey,
te̱ xaꞌndia tyuunꞌ ñu̱u̱ Jericó ja̱a̱nꞌ ndii:
―Ni̱ nde̱ku̱i̱e̱e̱ ndiaꞌviꞌ te̱ vi̱ꞌe̱ Israel ñu̱u ndiꞌe̱ꞌ ñu̱u̱ yoꞌoꞌ te̱ ko̱to̱ ndiꞌi̱ ra̱ sa̱a̱ kaaꞌ a̱ ―ni̱ katyi̱ ra̱.
3 Sa̱kanꞌ te̱ ni̱ ti̱ꞌviꞌ rey,
te̱ xaꞌndia tyuunꞌ ñu̱u̱ ja̱a̱nꞌ,
kuento kaꞌán tyuunꞌ ra̱ xiinꞌ Rahab ndii:
―Ta̱va̱ꞌ te̱ yivi̱ꞌ,
te̱ ni̱ xa̱a̱ vi̱ꞌe̱ u̱nꞌ,
ki̱ꞌe̱,
sa̱kanꞌ ña̱ te̱ ku̱a̱xi̱ ko̱to̱ maña sa̱a̱ kaaꞌ nuu̱ꞌ ñu̱ꞌuꞌ e̱ꞌ nduuꞌ ra̱ ―ni̱ katyi̱ ra̱.
4 Ndisu̱ ña̱ꞌaꞌ ja̱a̱nꞌ ndii,
ni̱ na̱ka̱ aꞌ uvi̱ sa̱aꞌ te̱ yivi̱ꞌ ja̱a̱nꞌ,
te̱ ni̱ ti̱si̱ꞌe ña̱ꞌaꞌ,
te̱ ni̱ kaꞌa̱n aꞌ ndii:
―Ña̱ nda̱ku xna̱ꞌa̱ nduuꞌ a̱ ndii,
ni̱ ki̱xi̱n uvi̱ taꞌan te̱ yivi̱ vi̱ꞌe̱ i̱,
ndisu̱ xïní i̱ miiꞌ ni̱ ki̱e̱e̱ ra̱.
5 Te̱ kii̱ꞌ xa̱ tüviꞌ ka̱ te̱ ni̱ ki̱e̱e̱ ra̱ kuaꞌa̱n ra̱,
ña̱ kuní ka̱ nda̱si̱ yiꞌeꞌ ñu̱u̱,
te̱ xïní i̱ miiꞌ ni̱ ki̱ꞌi̱n ra̱ kuaꞌa̱n ra̱.
Naaꞌ numi̱ꞌ ndo̱ꞌ ku̱ndiku̱n ña̱ꞌaꞌ ndo̱ꞌ ndii,
kueinꞌ na̱niꞌi̱ꞌ ña̱ꞌaꞌ ndo̱ꞌ i̱tyiꞌ ―ni̱ katyi̱ aꞌ.
6 Ndisu̱ ñaꞌ ja̱a̱nꞌ ndii,
ni̱ sa̱kaaꞌ ra̱ xata̱ꞌ vi̱ꞌe̱ aꞌ,
te̱ ni̱ ti̱si̱ꞌe ña̱ꞌaꞌ aꞌ te̱i̱n nu̱ꞌni̱ ndaku̱a̱ ña̱ naniꞌ lino ña̱ ni̱ tyi̱ndi̱e̱e̱ aꞌ i̱kanꞌ.
7 Sa̱kanꞌ na ni̱ ki̱e̱e̱ te̱ yivi̱ꞌ,
te̱ ni̱ ti̱ꞌviꞌ rey ja̱a̱nꞌ,
kuaꞌa̱n ra̱ ka̱niiꞌ i̱tyiꞌ te̱ na̱ndu̱kuꞌ ra̱ te̱ ni̱ xaꞌa̱n ko̱to̱ sa̱a̱ kaaꞌ ñu̱u̱ ja̱a̱nꞌ.
Ni̱ xaꞌa̱n na̱ndu̱kuꞌ ña̱ꞌaꞌ ra̱ nde̱e̱ miiꞌ xkaꞌndíá i̱tyiꞌ i̱ti̱a̱ Jordán,
te̱ kii̱ꞌ ndi̱ꞌi̱ ni̱ ki̱e̱e̱ te̱ xíinꞌ ja̱a̱nꞌ kuaꞌa̱n ra̱ ndii,
ni̱ nda̱si̱ te̱ yivi̱ꞌ yiꞌeꞌ ñu̱u̱ Jericó ja̱a̱nꞌ.
8 Te̱ kii̱ꞌ kuní ka̱ kusu̱n te̱ ni̱ xaꞌa̱n ko̱to̱ sa̱a̱ kaaꞌ ñu̱u̱ Jericó ja̱a̱nꞌ ndii,
ni̱ ka̱a̱ Rahab ja̱a̱nꞌ xata̱ꞌ vi̱ꞌe̱ miiꞌ ndieeꞌ ra̱,
te̱ ni̱ kaꞌa̱n aꞌ xiinꞌ ra̱ ndii:
9 ―Xa̱ xiní i̱ ña̱ xa̱ ni̱ na̱ta̱xi̱ Yahvé ñu̱ꞌuꞌ yoꞌoꞌ nda̱ꞌaꞌ ndo̱ꞌ,
sa̱kanꞌ na kuiiꞌ yiꞌvi xa̱va̱ꞌa̱ ndu̱ xini ndu̱ ndoꞌó,
te̱ sa̱kuuꞌ ne̱ yiviꞌ,
ne̱ ndieeꞌ nuu̱ꞌ ñu̱ꞌuꞌ yoꞌoꞌ ndii,
kisiꞌ vi̱ꞌ ña̱ꞌaꞌ a̱ ña̱ yiꞌvi xa̱va̱ꞌa̱ ni̱a̱ xini ni̱a̱ ndoꞌó.
10 Sa̱kanꞌ ña̱ xini ndu̱ kuento ña̱ ni̱ nu̱niaꞌ Yahvé i̱tyiꞌ miiꞌ ni̱ xkaꞌndi̱a̱ ndo̱ꞌ ma̱ꞌiꞌ ti̱kui mi̱ni̱ kuaꞌa kii̱ꞌ ni̱ ki̱e̱e̱ ndo̱ꞌ nuu̱ꞌ ñu̱ꞌuꞌ Egipto.
Te̱ xini tu̱ ndu̱ kuento xaꞌa̱ꞌ ña̱ ni̱ xa̱a̱ ndo̱ꞌ tu̱ku̱ taꞌviꞌ i̱ti̱a̱ Jordán xiinꞌ uvi̱ ta̱ꞌan rey,
te̱ xaꞌndia tyuunꞌ nuu̱ꞌ ne̱ vi̱ꞌe̱ amorreo,
te̱ nduuꞌ rey Sehón xiinꞌ rey Og.
Te̱ ja̱a̱nꞌ ndii,
ni̱ sa̱ndo̱ñuꞌuꞌ xa̱tyiꞌ ña̱ꞌaꞌ ndo̱ꞌ.
11 Te̱ xaꞌa̱ꞌ a̱ ña̱ ni̱ xi̱ni̱ so̱ꞌo̱ ndu̱ sa̱kuuꞌ ña̱ ni̱ xa̱a̱ ndo̱ꞌ ja̱a̱nꞌ ndii,
ni̱ yi̱ꞌvi xa̱va̱ꞌa̱ ndu̱,
te̱ köo̱ꞌ ka̱ nde̱e̱ i̱i̱n te̱ yivi̱ꞌ yoꞌoꞌ te̱ kuni ku̱ntaꞌanꞌ xiinꞌ ndoꞌó,
sa̱kanꞌ ña̱ Yahvé,
Ndiosí ña̱ xakaꞌnuꞌ ndoꞌó,
nduuꞌ Ndiosí ndi̱viꞌ,
te̱ su̱vi̱ tu̱ a̱ nduuꞌ Ndiosí nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ.
12 ’Sa̱kanꞌ na kuiiꞌ kaꞌán ndaꞌvi i̱ xiinꞌ ndo̱ꞌ vi̱ti̱n ña̱ ta̱xi̱ ndo̱ꞌ kuento ndo̱ꞌ nuu̱ꞌ Yahvé ña̱ naa ni̱ ku̱vi̱ta i̱ni̱ yuꞌu̱ xaꞌa̱ꞌ ndo̱ꞌ ndii,
niiꞌ sa̱kanꞌ tu̱ kuní yuꞌu̱ ña̱ ku̱vi̱ta i̱ni̱ ndoꞌó xaꞌa̱ꞌ yu̱vaꞌ siꞌiꞌ i̱.
Ndisu̱ kuní a̱ ña̱ ta̱xi̱ ndo̱ꞌ i̱i̱n ña̱ niaꞌá nda̱ku
13 ña̱ ko̱o̱ kaꞌnuꞌ i̱ni̱ ndo̱ꞌ xaꞌa̱ꞌ yu̱vaꞌ i̱,
xiinꞌ xaꞌa̱ꞌ si̱ꞌiꞌ i̱,
xaꞌa̱ꞌ tiaa̱ taꞌanꞌ i̱,
xiinꞌ xaꞌa̱ꞌ ña̱ꞌaꞌ taꞌanꞌ i̱,
xiinꞌ sa̱kuuꞌ ne̱ i̱i̱n kuuꞌ xiinꞌ ni̱a̱,
te̱ kä̱ꞌni̱ꞌ ña̱ꞌaꞌ ndo̱ꞌ ―ni̱ katyi̱ aꞌ.
14 Te̱ ni̱ kaꞌa̱n te̱ ja̱a̱nꞌ xiinꞌ aꞌ ndii:
―Kivi̱ꞌ ñu̱u̱ mi̱iꞌ ndu̱ tyikandia ndu̱ xaꞌa̱ꞌ kivi̱ꞌ ñu̱u̱ ndoꞌó.
Naaꞌ käꞌa̱n u̱nꞌ ña̱ yoꞌoꞌ ndieeꞌ ndu̱ ndii,
sa̱xinú ndu̱ kuento ndu̱ ña̱ ni̱ ta̱xi̱ ndu̱ nuu̱ꞌ u̱nꞌ,
te̱ ku̱vi̱ta i̱ni̱ ndu̱ xaꞌa̱ꞌ ndo̱ꞌ kii̱ꞌ ta̱xi̱ Yahvé ñu̱ꞌuꞌ yoꞌoꞌ nda̱ꞌaꞌ ndu̱ ―ni̱ katyi̱ ra̱.
15 Sa̱kanꞌ te̱ ni̱ sa̱nuuꞌ ña̱ꞌaꞌ Rahab yavi̱ ña̱ iinꞌ to̱koꞌ nama̱ ñu̱u̱ ja̱a̱nꞌ xiinꞌ i̱i̱n yo̱ꞌoꞌ,
sa̱kanꞌ ña̱ xaꞌa̱ꞌ nama̱ ja̱a̱nꞌ iinꞌ vi̱ꞌe̱ aꞌ,
te̱ i̱kanꞌ ni̱ nduꞌu̱ꞌ aꞌ.
16 Sa̱kanꞌ ña̱ xa̱ ni̱ kaꞌa̱n aꞌ xiinꞌ ra̱ ndii:
―Kuaꞌan ndo̱ꞌ xaꞌa̱ꞌ kuꞌu̱ te̱ kü̱ni̱ te̱ yivi̱ꞌ,
te̱ ndikún ndoꞌó,
miiꞌ kuaꞌa̱n ndo̱ꞌ,
te̱ i̱kanꞌ ku̱ꞌu̱n si̱ꞌe ndo̱ꞌ uni̱ kivi̱ꞌ,
te̱ kii̱ꞌ na̱ndi̱koꞌ te̱ ja̱a̱nꞌ ñu̱u̱ yoꞌoꞌ ndii,
ku̱vi̱ na̱kaa̱ꞌ ndo̱ꞌ kuꞌu̱n ndo̱ꞌ ―ni̱ katyi̱ aꞌ.
17 Te̱ kii̱ꞌ kuní ka̱ ki̱e̱e̱ te̱ yivi̱ꞌ ja̱a̱nꞌ kuꞌu̱n ra̱,
te̱ ni̱ kaꞌa̱n ra̱ xiinꞌ aꞌ ndii:
―Sa̱xinú ndu̱ kuento ña̱ ni̱ xika̱n u̱nꞌ nuu̱ꞌ ndu̱ sa̱a̱ ndu̱ xaꞌa̱ꞌ u̱nꞌ,
sa̱kanꞌ te̱ ndoo̱ ndiká ndu̱ nuu̱ꞌ ndee ka̱ ña̱ ku̱ndo̱ꞌo̱ ndo̱ꞌ.
18 Ndisu̱ kii̱ꞌ ko̱ꞌni̱ ndu̱ ñu̱u̱ yoꞌoꞌ ndii,
kuní a̱ sa̱tiín u̱nꞌ toto̱ kuaꞌa yoꞌoꞌ yavi̱ ña̱ iinꞌ to̱koꞌ nama̱ miiꞌ sa̱nuuꞌ u̱nꞌ ndu̱ vi̱ti̱n,
te̱ na̱ka̱ya̱ u̱nꞌ sa̱kuuꞌ ne̱ i̱i̱n kuuꞌ xiinꞌ u̱nꞌ ku̱ndi̱e̱e̱ vi̱ꞌe̱ u̱nꞌ yoꞌoꞌ,
yu̱vaꞌ u̱nꞌ,
xiinꞌ si̱ꞌiꞌ u̱nꞌ,
xiinꞌ tiaa̱ taꞌanꞌ u̱nꞌ,
xiinꞌ sa̱kuuꞌ ne̱ i̱i̱n kuuꞌ xiinꞌ yu̱vaꞌ siꞌiꞌ u̱nꞌ.
19 Naaꞌ ki̱e̱e̱ sa̱va̱ ni̱a̱ ki̱ꞌe̱ te̱ ka̱ꞌni̱ꞌ ña̱ꞌaꞌ te̱ yivi̱ꞌ ndii,
mi̱iꞌ ni̱a̱ kumiꞌ ku̱a̱tyi̱ xaꞌa̱ꞌ ña̱ ku̱ndo̱ꞌo̱ ni̱a̱,
ndisu̱ naaꞌ ka̱ꞌni̱ꞌ te̱ yivi̱ꞌ ne̱ ndieeꞌ ti̱xi̱n vi̱ꞌe̱ u̱nꞌ yoꞌoꞌ ndii,
nduꞌu̱ nduuꞌ te̱ ku̱miꞌ ku̱a̱tyi̱ xaꞌa̱ꞌ ña̱ ku̱vi̱ ne̱ ja̱a̱nꞌ.
20 Ndisu̱ naaꞌ kaꞌa̱n vixi̱ u̱nꞌ xaꞌa̱ꞌ ndu̱ nuu̱ꞌ rey ndii,
kuäsa̱ꞌ ka̱ kande̱iꞌ sa̱xinú ndu̱ kuento ña̱ ni̱ kaꞌa̱n u̱nꞌ xiinꞌ ndu̱ ta̱xi̱ ndu̱ nuu̱ꞌ u̱nꞌ ja̱a̱nꞌ ―ni̱ katyi̱ ra̱.
21 Sa̱kanꞌ te̱ ni̱ kaꞌa̱n ñaꞌ ja̱a̱nꞌ ndii:
―Nakuiinꞌ yu̱ꞌuꞌ ndu ña̱ ko̱o̱ a̱ sa̱a̱ niiꞌ ni̱ kaꞌa̱n ndo̱ꞌ ja̱a̱nꞌ ―ni̱ katyi̱ aꞌ.
Sa̱kanꞌ te̱ ni̱ nde̱iꞌ ña̱ꞌaꞌ aꞌ,
te̱ ni̱ ki̱e̱e̱ ra̱ kuaꞌa̱n ra̱,
te̱ ni̱ sa̱tiín aꞌ toto̱ kuaꞌa ja̱a̱nꞌ yavi̱ ña̱ iinꞌ to̱koꞌ nama̱ ja̱a̱nꞌ.
22 Sa̱kanꞌ te̱ ni̱ ka̱a̱ te̱ ni̱ xaꞌa̱n ko̱to̱ sa̱a̱ kaaꞌ nuu̱ꞌ ñu̱ꞌuꞌ ja̱a̱nꞌ te̱i̱n i̱kuꞌ kuaꞌa̱n ra̱,
te̱ ni̱ ndoo̱ ra̱ i̱kanꞌ uni̱ kivi̱ꞌ,
te̱ te̱ xíinꞌ,
te̱ ni̱ ndiku̱n nandukuꞌ ña̱ꞌaꞌ ndii,
ni̱ na̱ndu̱kuꞌ ña̱ꞌaꞌ ra̱ sa̱a̱ kuaꞌa̱n i̱tyiꞌ,
ndisu̱ nï̱ xi̱ni̱ ra̱ miiꞌ kuaꞌa̱n te̱ ja̱a̱nꞌ.
Te̱ soꞌo̱ꞌ ndiꞌiꞌ,
te̱ ni̱ na̱ndi̱koꞌ ra̱ ñu̱u̱ Jericó ja̱a̱nꞌ.
23 Ndi̱ꞌi̱ ja̱a̱nꞌ te̱ ni̱ na̱ndi̱koꞌ uvi̱ sa̱aꞌ te̱ ni̱ xaꞌa̱n ko̱to̱ sa̱a̱ kaaꞌ nuu̱ꞌ ñu̱ꞌuꞌ ja̱a̱nꞌ,
te̱ ni̱ na̱kaa̱ꞌ ra̱ nde̱e̱ i̱ti̱a̱ Jordán,
te̱ ni̱ xkaꞌndi̱a̱ ra̱ i̱ti̱a̱ ja̱a̱nꞌ te̱ kuaꞌa̱n ra̱ nde̱e̱ miiꞌ nduꞌu̱ꞌ Josué,
siꞌe̱ Nun.
Te̱ ni̱ kaꞌa̱n ra̱ xiinꞌ te̱ ja̱a̱nꞌ sa̱kuuꞌ ña̱ ni̱ ndo̱ꞌo̱ ra̱ miiꞌ ni̱ xaꞌa̱n ra̱ ja̱a̱nꞌ
24 kaꞌán ra̱ ndii:
―Ña̱ ndi̱xa̱ nduuꞌ a̱ ndii,
xa̱ ni̱ sa̱na̱kuaꞌa Yahvé ñu̱ꞌuꞌ ja̱a̱nꞌ nda̱ꞌaꞌ e̱ꞌ,
sa̱kanꞌ ña̱ sa̱kuuꞌ ne̱ ndieeꞌ i̱kanꞌ ndii,
yiꞌvi xa̱va̱ꞌa̱ ni̱a̱ yooꞌ nde̱e̱ kisiꞌ vi̱ꞌ ña̱ꞌaꞌ a̱ ―ni̱ katyi̱ ra̱.