So̱ꞌo̱ ni̱ xa̱a̱ a̱ kii̱ꞌ ni̱ xkaꞌndi̱a̱ ne̱ Israel i̱ti̱a̱ Jordán
3
Te̱ ni̱a̱ꞌa̱ va̱ ku̱a̱xi̱ kitúꞌ tu̱ku̱ kivi̱ꞌ,
te̱ ni̱ keta̱ Josué xiinꞌ sa̱kuuꞌ ne̱ vi̱ꞌe̱ Israel nuu̱ꞌ ñu̱ꞌuꞌ Sitim,
te̱ ni̱ xa̱a̱ ni̱a̱ nde̱e̱ yu̱ꞌuꞌ i̱ti̱a̱ Jordán,
ndisu̱ ña̱ kuní ka̱ xkaꞌndi̱a̱ ni̱a̱ i̱ti̱a̱ ja̱a̱nꞌ ndii,
ni̱ ndoo̱ ni̱a̱ ndieeꞌ ni̱a̱ i̱kanꞌ.
2 Te̱ kii̱ꞌ ni̱ xkaꞌndi̱a̱ uni̱ kivi̱ꞌ ndieeꞌ ni̱a̱ i̱kanꞌ ndii,
ni̱ xi̱nuꞌni̱ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ni̱a̱ te̱i̱n vi̱ꞌe̱ toto̱ miiꞌ ndieeꞌ ni̱a̱
3 kaꞌán tyuunꞌ ra̱ ndii:
―Kii̱ꞌ ku̱ni̱ ndo̱ꞌ kuaꞌa̱n sutu̱,
te̱ vi̱ꞌe̱ Leví,
niꞌiꞌ ra̱ xatu̱nꞌ miiꞌ naá kuento ña̱ ni̱ ndoo̱ Yahvé,
Ndiosí e̱ꞌ,
xiinꞌ e̱ꞌ ndii,
na̱ko̱o̱ ndo̱ꞌ ña̱ xaaꞌ ndo̱ꞌ te̱ ku̱ndiku̱n ndo̱ꞌ xata̱ꞌ nu̱ꞌ.
4 Sa̱kanꞌ te̱ ku̱ni̱ ndo̱ꞌ miiꞌ kuꞌu̱n ndo̱ꞌ,
sa̱kanꞌ ña̱ nde̱e̱ i̱i̱n kivi̱ꞌ tiäꞌa̱an kuꞌu̱n ndoꞌó i̱tyiꞌ yoꞌoꞌ,
te̱ ja̱a̱nꞌ nduuꞌ te̱ niaꞌa̱ ndoꞌó miiꞌ kuaꞌa̱n i̱tyiꞌ.
Ndisu̱ kü̱ya̱ti̱n ndo̱ꞌ miiꞌ kuaꞌa̱n xatu̱nꞌ ja̱a̱nꞌ,
süu̱ꞌ ja̱a̱nꞌ ndii,
nde̱e̱ xikaꞌ ku̱ndiku̱n ndo̱ꞌ xata̱ꞌ nu̱ꞌ,
yatinꞌ i̱i̱n mií metro,
te̱ kü̱ya̱ti̱n ndikui ndo̱ꞌ xata̱ꞌ nu̱ꞌ ―ni̱ katyi̱ ra̱.
5 Te̱ ni̱ kaꞌa̱n Josué xiinꞌ ne̱ yivi̱ꞌ ndii:
―Nda̱sa̱ndo̱o̱ xiinꞌ miiꞌ ndo̱ꞌ,
sa̱kanꞌ ña̱ tiaa̱n sa̱a̱ Yahvé tyu̱u̱n kaꞌnuꞌ te̱i̱n ndo̱ꞌ ―ni̱ katyi̱ ra̱.
6 I̱kanꞌ te̱ ni̱ kaꞌa̱n ra̱ xiinꞌ sutu̱ ndii:
―Na̱ꞌi̱ ndo̱ꞌ xatu̱nꞌ miiꞌ naá kuento ña̱ ni̱ ndoo̱ Ndiosí xiinꞌ e̱ꞌ,
te̱ ki̱ꞌi̱n i̱tyiꞌ ndo̱ꞌ nuu̱ꞌ sa̱kuuꞌ ne̱ yivi̱ꞌ te̱ kuꞌu̱n e̱ꞌ ―ni̱ katyi̱ ra̱.
Sa̱kanꞌ na kuiiꞌ ni̱ ki̱ꞌi̱n i̱tyiꞌ te̱ ja̱a̱nꞌ nuu̱ꞌ ne̱ yivi̱ꞌ ja̱a̱nꞌ niꞌiꞌ ra̱ xatu̱nꞌ ja̱a̱nꞌ kuaꞌa̱n ra̱.
7 Sa̱kanꞌ te̱ ni̱ kaꞌa̱n Yahvé xiinꞌ Josué ndii:
―Nde̱e̱ kivi̱ꞌ vi̱ti̱n xa̱ꞌaꞌ i̱ sa̱na̱nduuꞌ i̱ yoꞌó te̱ kaꞌnuꞌ ka̱ nuu̱ꞌ sa̱kuuꞌ ne̱ Israel,
te̱ ku̱nda̱ni̱ ni̱a̱ ña̱ yoo i̱ xiinꞌ u̱nꞌ sa̱a̱ niiꞌ ni̱ yoo̱ i̱ xiinꞌ Moisés.
8 Te̱ kaꞌa̱n tyuunꞌ u̱nꞌ xiinꞌ sutu̱,
te̱ niꞌiꞌ xatu̱nꞌ miiꞌ naá kuento ña̱ ni̱ ndoo̱ i̱ xiinꞌ ndo̱ꞌ ndii:
“Kii̱ꞌ na̱xaa̱ ndo̱ꞌ yu̱ꞌuꞌ i̱ti̱a̱ Jordán ndii,
kuꞌu̱n ndo̱ꞌ siee ma̱ꞌiꞌ i̱ti̱a̱,
te̱ i̱kanꞌ ndoo̱ ndo̱ꞌ ku̱i̱ta̱ ndo̱ꞌ”,
katyi̱ u̱nꞌ xiinꞌ ra̱ ―ni̱ katyi̱ a̱.
9 Sa̱kanꞌ te̱ ni̱ kaꞌa̱n Josué xiinꞌ ne̱ Israel ndii:
―Ni̱a̱ꞌa̱ ndo̱ꞌ te̱ ku̱ni̱ so̱ꞌo̱ ndo̱ꞌ ña̱ kaꞌán Yahvé,
Ndiosí e̱ꞌ,
xiinꞌ ndo̱ꞌ ―ni̱ katyi̱ ra̱.
10 Te̱ ni̱ kaꞌa̱n ka̱ ra̱ xiinꞌ ni̱a̱ ndii:
―Vi̱ti̱n ku̱nda̱ni̱ ndo̱ꞌ ña̱ yoo Ndiosí tiaku xiinꞌ ndo̱ꞌ,
te̱ su̱vi̱ a̱ ki̱ꞌi̱n i̱tyiꞌ nuu̱ꞌ ndo̱ꞌ kuꞌu̱n a̱,
te̱ ta̱va̱ꞌ a̱ ne̱ vi̱ꞌe̱ cananeo,
xiinꞌ ne̱ vi̱ꞌe̱ heteo,
xiinꞌ ne̱ vi̱ꞌe̱ heveo,
xiinꞌ ne̱ vi̱ꞌe̱ ferezeo,
xiinꞌ ne̱ vi̱ꞌe̱ gergeseo,
xiinꞌ ne̱ vi̱ꞌe̱ amorreo,
xiinꞌ ne̱ vi̱ꞌe̱ jebuseo,
ne̱ ndieeꞌ ka̱niiꞌ nuu̱ꞌ ñu̱ꞌuꞌ miiꞌ kuaꞌa̱n ndo̱ꞌ vi̱ti̱n.
11 Ko̱to̱ ndo̱ꞌ,
xi̱ꞌna̱ ka̱ xatu̱nꞌ miiꞌ naá kuento ña̱ ni̱ ndoo̱ Ndiosí xiinꞌ e̱ꞌ ki̱ꞌi̱n i̱tyiꞌ nuu̱ꞌ e̱ꞌ xkaꞌndi̱a̱ e̱ꞌ i̱ti̱a̱ Jordán kaa̱ꞌ.
Te̱ Ndiosí ja̱a̱nꞌ nduuꞌ ña̱ xiinꞌ ña̱ꞌa̱ ka̱niiꞌ ñu̱ꞌuꞌ i̱i̱n yivi̱ꞌ.
12 Sa̱kanꞌ na kuiiꞌ vi̱ti̱n ndii,
na̱ka̱xi̱n ndo̱ꞌ uxi̱ uvi̱ taꞌan te̱ yivi̱ꞌ te̱i̱n mi̱iꞌ ndoꞌó,
ne̱ Israel,
na̱ndaa̱ꞌ ra̱ xaꞌa̱ꞌ i̱ꞌi̱n ti̱ꞌvi̱ ndo̱ꞌ.
13 Te̱ kii̱ꞌ kueꞌni̱ sutu̱,
te̱ niꞌiꞌ xatu̱nꞌ miiꞌ naá tu̱tu̱ Ndiosí,
ña̱ xiinꞌ ña̱ꞌa̱ ka̱niiꞌ ñu̱ꞌuꞌ i̱i̱n yivi̱ꞌ,
ti̱kui i̱ti̱a̱ Jordán ja̱a̱nꞌ ndii,
vi̱kuii̱n raꞌ,
sa̱kanꞌ ña̱ teꞌ ku̱a̱xi̱ ni̱nu̱ ndii,
vi̱kuii̱n raꞌ,
te̱ na̱kaya̱ ti̱ꞌvi̱ mi̱iꞌ raꞌ i̱kanꞌ,
te̱ yäꞌa̱ ka̱ raꞌ kuꞌu̱n ra̱ ―ni̱ katyi̱ ra̱.
14 Sa̱kanꞌ te̱ ni̱ ki̱e̱e̱ sa̱kuuꞌ ne̱ vi̱ꞌe̱ Israel,
te̱ xkaꞌndi̱a̱ ni̱a̱ i̱ti̱a̱ Jordán ja̱a̱nꞌ,
te̱ sutu̱,
te̱ niꞌiꞌ xatu̱nꞌ miiꞌ naá kuento ña̱ ni̱ ndoo̱ Ndiosí xiinꞌ e̱ꞌ,
niꞌiꞌ i̱tyiꞌ nuu̱ꞌ ni̱a̱ kuaꞌa̱n ni̱a̱.
15 Te̱ kii̱ꞌ sa̱kanꞌ ndii,
sa̱va̱ ni̱ kivi̱ꞌ ña̱ nakaya ne̱ yivi̱ꞌ ña̱ saviꞌ nduuꞌ a̱,
te̱ i̱ti̱a̱ Jordán ja̱a̱nꞌ ndii,
kuaꞌa̱ꞌ va̱ ti̱kui nakayá kivi̱ꞌ ja̱a̱nꞌ.
Ndisu̱ kii̱ꞌ ni̱ tondi̱a̱ so̱ꞌo̱ xaꞌa̱ꞌ sutu̱,
te̱ niꞌiꞌ xatu̱nꞌ ja̱a̱nꞌ,
ti̱kui yu̱ꞌuꞌ i̱ti̱a̱ ja̱a̱nꞌ ndii,
16 ni̱ xi̱kuii̱n ti̱kui,
teꞌ ku̱a̱xi̱ ni̱nu̱,
te̱ nï̱ na̱kaa̱ꞌ ka̱ raꞌ,
te̱ ni̱ xa̱ꞌaꞌ ra̱ nakayá ra̱ xikaꞌ miiꞌ naá ñu̱u̱ ña̱ naniꞌ Adam,
ña̱ kanduꞌu̱ꞌ xi̱i̱nꞌ ñu̱u̱ Saretán.
Te̱ ti̱kui,
teꞌ nakaa̱ꞌ kuaꞌa̱n ninu̱ miiꞌ naá mi̱ni̱ Arabá,
ña̱ nduuꞌ mi̱ni̱ uꞌva̱ kaꞌnuꞌ ndii,
ni̱ na̱kaa̱ꞌ ndo̱o̱ raꞌ nde̱e̱ ni̱ na̱ya̱a̱ sa̱kuuꞌ xi̱tu̱n ña̱ yoo i̱ti̱a̱ ja̱a̱nꞌ.
Ndi̱ꞌi̱ ja̱a̱nꞌ,
te̱ ni̱ xkaꞌndi̱a̱ sa̱kuuꞌ ne̱ Israel,
te̱ ni̱ xa̱a̱ ni̱a̱ ya̱ti̱n miiꞌ naá ñu̱u̱ Jericó.
17 Te̱ sutu̱,
te̱ niꞌiꞌ xatu̱nꞌ miiꞌ naá kuento ña̱ ni̱ ndoo̱ Yahvé xiinꞌ e̱ꞌ ndii,
ni̱ ndoo̱ ra̱ itaꞌ ra̱ ñu̱ꞌuꞌ i̱tyi ma̱ꞌiꞌ i̱ti̱a̱ Jordán ja̱a̱nꞌ nde̱e̱ ni̱ ndi̱ꞌi̱ sa̱kuuꞌ ne̱ Israel ni̱ xkaꞌndi̱a̱ i̱ti̱a̱ ja̱a̱nꞌ,
te̱ sa̱kuuꞌ ni̱a̱ ni̱ xkaꞌndi̱a̱ nuu̱ꞌ ñu̱ꞌuꞌ i̱tyi.