Yoꞌoꞌ kaꞌán a̱ xaꞌa̱ꞌ uxi̱ uvi̱ taꞌan yuu̱ꞌ ña̱ ni̱ ta̱va̱ꞌ ne̱ Israel ma̱ꞌiꞌ i̱ti̱a̱ Jordán
4
Kii̱ꞌ ni̱ ndi̱ꞌi̱ sa̱kuuꞌ ne̱ vi̱ꞌe̱ Israel ni̱ xkaꞌndi̱a̱ i̱ti̱a̱ Jordán ja̱a̱nꞌ,
te̱ ni̱ kaꞌa̱n Yahvé xiinꞌ Josué ndii:
2 ―Na̱ka̱xi̱n uxi̱ uvi̱ taꞌan te̱ yivi̱ꞌ,
i̱i̱n nda̱a̱ꞌ ra̱ xaꞌa̱ꞌ i̱ꞌi̱n ti̱ꞌvi̱ ndo̱ꞌ.
3 Te̱ kaꞌa̱n tyuunꞌ u̱nꞌ xiinꞌ ra̱ ndii:
“Na̱ka̱ya̱ ndo̱ꞌ uxi̱ uvi̱ taꞌan yuu̱ꞌ ma̱ꞌiꞌ i̱ti̱a̱ yoꞌoꞌ ña̱ ndieeꞌ sa̱va̱ ni̱ xaꞌa̱ꞌ sutu̱ miiꞌ itaꞌ ra̱ yoꞌoꞌ,
na̱ꞌi̱ ndo̱ꞌ a̱ te̱ ko̱ni̱ꞌi̱ ndo̱ꞌ a̱ kuꞌu̱n ndo̱ꞌ nde̱e̱ miiꞌ na̱ndiee̱ꞌ ndo̱ꞌ ñu̱u vi̱ti̱n,
te̱ ta̱ndi̱e̱e̱ mo̱to ndo̱ꞌ a̱ i̱kanꞌ”,
katyi̱ u̱nꞌ ―ni̱ katyi̱ a.
4 Sa̱kanꞌ te̱ ni̱ ka̱na̱ Josué na̱ndaa̱ꞌ te̱ uxi̱ uvi̱ te̱ ni̱ na̱ka̱xi̱n ra̱ xaꞌa̱ꞌ i̱ꞌi̱n ti̱ꞌvi̱ ne̱ Israel ja̱a̱nꞌ.
5 Te̱ ni̱ kaꞌa̱n Josué xiinꞌ ra̱ ndii:
―Kuaꞌan ndo̱ꞌ nde̱e̱ ma̱ꞌiꞌ i̱ti̱a̱ miiꞌ itaꞌ sutu̱ xiinꞌ xatu̱nꞌ miiꞌ naá tu̱tu̱ Yahvé,
Ndiosí e̱ꞌ,
te̱ na̱ꞌi̱ i̱ꞌi̱n ndo̱ꞌ i̱i̱n yuu̱ꞌ,
te̱ tyi̱nduꞌu̱ꞌ ndo̱ꞌ a̱ soko̱ ndo̱ꞌ,
te̱ uxi̱ uvi̱ taꞌan kuní a̱ ku̱u̱ a̱ ña̱ sa̱kuuꞌ a̱,
sa̱kanꞌ ña̱ na̱ndaa̱ꞌ a̱ xaꞌa̱ꞌ i̱ꞌi̱n ti̱ꞌvi̱ yooꞌ,
ne̱ Israel.
6 Te̱ xiinꞌ yuu̱ꞌ ja̱a̱nꞌ ka̱sa̱ꞌa̱ e̱ꞌ i̱i̱n altar ña̱ sa̱na̱kaꞌanꞌ ndoꞌó.
Te̱ ki̱taꞌa̱n kii̱ꞌ nda̱tuꞌu̱nꞌ siꞌe̱ ndo̱ꞌ ndoꞌó ndii:
“¿Ndee ña̱ kuni katyi̱ altar yuu̱ꞌ kaa̱ꞌ?”,
katyi̱ ni̱a̱.
7 Te̱ kaꞌa̱n ndo̱ꞌ xiinꞌ ni̱a̱ ndii:
“Yuu̱ꞌ kaa̱ꞌ sa̱na̱kaꞌanꞌ yooꞌ ña̱ ni̱ nuni̱a̱ꞌ i̱ti̱a̱ Jordán,
te̱ nï̱ na̱kaa̱ꞌ ka̱ ti̱kui kii̱ꞌ ni̱ xkaꞌndi̱a̱ sutu̱ niꞌiꞌ ra̱ xatu̱nꞌ miiꞌ naá kuento ña̱ ni̱ ndoo̱ Yahvé xiinꞌ e̱ꞌ,
te̱ yuu̱ꞌ kaa̱ꞌ ku̱ndu̱u̱ ña̱ sa̱na̱kaꞌanꞌ sa̱kuuꞌ yooꞌ,
ne̱ vi̱ꞌe̱ Israel,
nde̱e̱ ndiꞌiꞌ ni̱ kivi̱ꞌ ña̱ ni̱ yoo̱ i̱kanꞌ”,
katyi̱ ndo̱ꞌ xiinꞌ ni̱a̱ ―ni̱ katyi̱ ra̱.
8 Sa̱kanꞌ na kuiiꞌ ni̱ sa̱xinu̱ te̱ uxi̱ uvi̱ ja̱a̱nꞌ ña̱ ni̱ kaꞌa̱n tyuunꞌ Josué xiinꞌ ra̱,
te̱ ni̱ ki̱ꞌi̱n ra̱ uxi̱ uvi̱ taꞌan yuu̱ꞌ ma̱ꞌiꞌ i̱ti̱a̱ Jordán ja̱a̱nꞌ,
na̱ndaa̱ꞌ a̱ xaꞌa̱ꞌ i̱ꞌi̱n ti̱ꞌvi̱ ra̱,
sa̱a̱ niiꞌ ni̱ kaꞌa̱n tyuunꞌ Yahvé xiinꞌ Josué.
Ni̱ na̱tyiꞌi̱ꞌ ra̱ a̱ te̱ kuaꞌa̱n ra̱ xiinꞌ a̱ miiꞌ ni̱ na̱ndiee̱ꞌ ra̱ ñu̱u ja̱a̱nꞌ,
te̱ ni̱ ta̱ndi̱e̱e̱ mo̱to ra̱ yuu̱ꞌ ja̱a̱nꞌ i̱kanꞌ.
9 Te̱ ni̱ ta̱ndi̱e̱e̱ tu̱ Josué i̱nga̱ uxi̱ uvi̱ taꞌan yuu̱ꞌ ma̱ꞌiꞌ i̱ti̱a̱ Jordán ja̱a̱nꞌ,
sa̱va̱ ni̱ miiꞌ ni̱ ita̱ sutu̱ xiinꞌ xatu̱nꞌ miiꞌ naá kuento ña̱ ni̱ ndoo̱ Ndiosí xiinꞌ e̱ꞌ,
te̱ ndieeꞌ ka̱ yuu̱ꞌ ja̱a̱nꞌ i̱kanꞌ nde̱e̱ kivi̱ꞌ vi̱ti̱n.
10 Te̱ sutu̱,
te̱ niꞌiꞌ xatu̱nꞌ ja̱a̱nꞌ ndii,
ni̱ ita̱ ra̱ ma̱ꞌiꞌ i̱ti̱a̱ ja̱a̱nꞌ nde̱e̱ ni̱ ndi̱ꞌi̱ ni̱ xinu̱ sa̱kuuꞌ ña̱ ni̱ kaꞌa̱n tyuunꞌ Yahvé xiinꞌ Moisés,
te̱ ni̱ sa̱yaꞌá ra̱ nda̱ꞌaꞌ Josué.
Te̱ sa̱kuuꞌ ne̱ yivi̱ꞌ ndii,
numi̱ꞌ va̱ ni̱ xkaꞌndi̱a̱ ni̱a̱ i̱ti̱a̱ ja̱a̱nꞌ.
11 Te̱ kii̱ꞌ ni̱ ndi̱ꞌi̱ ni̱ xkaꞌndi̱a̱ sa̱kuuꞌ ni̱a̱ i̱ti̱a̱ ja̱a̱nꞌ ndii,
ni̱ xkaꞌndi̱a̱ tu̱ sutu̱,
te̱ niꞌiꞌ xatu̱nꞌ miiꞌ naá tu̱tu̱ Yahvé ja̱a̱nꞌ,
nuu̱ꞌ sa̱kuuꞌ ne̱ yivi̱ꞌ ja̱a̱nꞌ itaꞌ ni̱a̱ i̱kanꞌ.
12 Te̱ sa̱kanꞌ tu̱ tiaa̱ siꞌe̱ Rubén,
xiinꞌ tiaa̱ siꞌe̱ Gad,
xiinꞌ taꞌvi̱ꞌ sa̱va̱ tiaa̱ siꞌe̱ Manasés ndii,
niꞌiꞌ i̱tyiꞌ ra̱ nuu̱ꞌ ne̱ Israel kuaꞌa̱n ra̱ kii̱ꞌ ni̱ xkaꞌndi̱a̱ ni̱a̱ i̱ti̱a̱ Jordán ja̱a̱nꞌ,
ndisoꞌ sa̱kuuꞌ ra̱ kuxi̱ ra̱ sa̱a̱ niiꞌ ni̱ kaꞌa̱n tyuunꞌ Moisés xiinꞌ ra̱.
13 Te̱ ña̱ sa̱kuuꞌ ra̱ ndii,
kuyatinꞌ uvi̱ xi̱ko̱ mií kuuꞌ ra̱,
te̱ xa̱ yoo tu̱ꞌva̱ ra̱ te̱ ku̱ntaꞌanꞌ ra̱,
te̱ kuaꞌa̱n tu̱ mi̱iꞌ Yahvé xiinꞌ ra̱ kii̱ꞌ ni̱ xkaꞌndi̱a̱ ra̱ yo̱soꞌ nuu̱ꞌ ñu̱ꞌuꞌ Jericó.
14 Te̱ kii̱ꞌ sa̱kanꞌ ndii,
ni̱ nda̱sa̱kaꞌnuꞌ va̱ Yahvé Josué nuu̱ꞌ sa̱kuuꞌ ne̱ Israel,
te̱ ni̱ xi̱to̱ kaꞌnuꞌ ña̱ꞌaꞌ ni̱a̱ sa̱kuuꞌ kivi̱ꞌ ña̱ ni̱ xika̱ ra̱ nuu̱ꞌ ñu̱ꞌuꞌ i̱i̱n yivi̱ꞌ,
sa̱a̱ niiꞌ ni̱ xi̱to̱ kaꞌnuꞌ ni̱a̱ Moisés.
15 Sa̱kanꞌ te̱ ni̱ kaꞌa̱n Yahvé xiinꞌ Josué ndii:
16 ―Kaꞌa̱n tyuunꞌ u̱nꞌ xiinꞌ sutu̱,
te̱ niꞌiꞌ xatu̱nꞌ miiꞌ naá kuento i̱ ñaa̱ꞌ,
na ki̱e̱e̱ ra̱ ma̱ꞌiꞌ i̱ti̱a̱ kaa̱ꞌ ―ni̱ katyi̱ a̱.
17 Sa̱kanꞌ na kuiiꞌ ni̱ kaꞌa̱n tyuunꞌ Josué xiinꞌ sutu̱ ja̱a̱nꞌ ña̱ ki̱e̱e̱ ra̱ i̱ti̱a̱.
18 Te̱ kii̱ꞌ ni̱ ki̱e̱e̱ so̱ꞌo̱ sutu̱,
te̱ niꞌiꞌ xatu̱nꞌ miiꞌ naá tu̱tu̱ ña̱ ni̱ ndoo̱ Yahvé,
Ndiosí e̱ꞌ,
xiinꞌ e̱ꞌ ma̱ꞌiꞌ i̱ti̱a̱ ja̱a̱nꞌ,
te̱ ni̱ xeꞌni̱ ra̱ ñu̱ꞌuꞌ i̱tyi ndii,
xa̱kaꞌánꞌ e̱ꞌ,
te̱ ni̱ na̱kaa̱ꞌ ti̱kui i̱ti̱a̱,
teꞌ ni̱ xku̱naa̱ mi̱ni̱ ja̱a̱nꞌ,
te̱ ni̱ na̱kaa̱ raꞌ kuaꞌa̱n ni̱ tu̱ku̱u̱ raꞌ nde̱e̱ naa ni̱ xa̱a̱ raꞌ sa̱aꞌ.
19 Kii̱ꞌ ni̱ xkaꞌndi̱a̱ ne̱ vi̱ꞌe̱ Israel i̱ti̱a̱ Jordán ja̱a̱nꞌ ndii,
kivi̱ꞌ ña̱ uxi̱ xikaꞌ yoo̱ꞌ nu̱uꞌ xaꞌa̱ꞌ kuiya̱ nduuꞌ a̱,
te̱ ni̱ xi̱ku̱ndiee̱ ni̱a̱ nuu̱ꞌ ñu̱ꞌuꞌ Gilgal ya̱ti̱n xi̱i̱nꞌ ñu̱u̱ Jericó xtoꞌniꞌ miiꞌ ketaꞌ ñu̱ꞌu̱.
20 Te̱ ni̱ xa̱ta̱ Josué uxi̱ uvi̱ sa̱aꞌ yuu̱ꞌ ña̱ ni̱ na̱ka̱ya̱ ra̱ i̱ti̱a̱ Jordán ja̱a̱nꞌ nuu̱ꞌ ñu̱ꞌuꞌ Gilgal ja̱a̱nꞌ.
21 Sa̱kanꞌ te̱ ni̱ kaꞌa̱n ra̱ xiinꞌ sa̱kuuꞌ ne̱ vi̱ꞌe̱ Israel ndii:
―Naá kivi̱ꞌ kii̱ꞌ nda̱tuꞌu̱nꞌ si̱a̱niꞌ xikaꞌ ndo̱ꞌ ndoꞌó,
te̱ kaꞌa̱n ni̱a̱ ndii:
“¿Ndee ña̱ kuni katyi̱ yuu̱ꞌ kaa̱ꞌ?”,
katyi̱ ni̱a̱.
22 Te̱ na̱ku̱i̱i̱n ndoꞌó nuu̱ꞌ ni̱a̱ ndii:
“Yoꞌoꞌ nduuꞌ miiꞌ ni̱ nuni̱a̱ꞌ ti̱kui i̱ti̱a̱,
te̱ ni̱ xkaꞌndi̱a̱ ne̱ vi̱ꞌe̱ Israel,
ne̱ xii̱ꞌ ya̱taꞌ ndo̱ꞌ,
nuu̱ꞌ ñu̱ꞌuꞌ i̱tyi”,
katyi̱ ndo̱ꞌ.
23 Sa̱kanꞌ ña̱ Yahvé,
Ndiosí e̱ꞌ ndii,
ni̱ nu̱niaꞌ a̱ ti̱kui i̱ti̱a̱ kaa̱ꞌ nuu̱ꞌ ndu̱ kii̱ꞌ ni̱ xkaꞌndi̱a̱ ndu̱,
te̱ na̱ꞌaꞌ ni̱ yoo̱ nuniaꞌ raꞌ nde̱e̱ ni̱ ndi̱ꞌi̱ ndu̱ ni̱ xkaꞌndi̱a̱,
sa̱a̱ niiꞌ ni̱ xa̱a̱ a̱ xiinꞌ ti̱kui Mi̱ni̱ Kuaꞌa kii̱ꞌ ni̱ nu̱niaꞌ a̱ ti̱kui mi̱ni̱ ja̱a̱nꞌ nde̱e̱ ni̱ ndi̱ꞌi̱ ndu̱ ni̱ xkaꞌndi̱a̱ nuu̱ꞌ ñu̱ꞌuꞌ i̱tyiꞌ.
24 Ni̱ xa̱a̱ a̱ sa̱kanꞌ te̱ ku̱ni̱ sa̱kuuꞌ ne̱ yivi̱ꞌ,
ne̱ ndieeꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
ña̱ ña̱ kaꞌnuꞌ kooꞌ tyukuuꞌ nduuꞌ Yahvé Ndiosí,
te̱ ku̱yi̱ꞌvi tu̱ ndoꞌó Yahvé,
Ndiosí e̱ꞌ,
nde̱e̱ ndiꞌiꞌ,
katyi̱ ndo̱ꞌ xiinꞌ ni̱a̱ ―ni̱ katyi̱ ra̱.