Yoꞌoꞌ kaꞌán Josué i̱tyiꞌ ña̱ soꞌo̱ꞌ ndiꞌiꞌ nuu̱ꞌ ne̱ taꞌanꞌ ra̱, ne̱ Israel
23
Te̱ kii̱ꞌ xa̱ ni̱ xkaꞌndi̱a̱ kuaꞌa̱ꞌ kuiya̱ ndii,
ni̱ ta̱xi̱ Yahvé ña̱ ni̱ na̱ku̱ndiee̱ mani̱ꞌ ne̱ vi̱ꞌe̱ Israel xiinꞌ sa̱kuuꞌ ne̱ ndasiꞌ taꞌanꞌ xiinꞌ ni̱a̱,
ne̱ ndieeꞌ sa̱a̱ xinunduu miiꞌ ndieeꞌ ni̱a̱.
Te̱ Josué ndii,
xa̱ i̱i̱n te̱ xi̱xa̱ va̱ nduuꞌ ra̱ kii̱ꞌ sa̱kanꞌ.
2 Te̱ ni̱ ka̱na̱ ra̱ sa̱kuuꞌ ne̱ Israel,
xiinꞌ te̱ xi̱xa̱ nuu̱ꞌ ñu̱u̱ ni̱a̱,
xiinꞌ te̱ kuuꞌ nu̱uꞌ nuu̱ꞌ ni̱a̱,
xiinꞌ te̱ nduuꞌ kuesí ni̱a̱,
xiinꞌ te̱ xíinꞌ kuuꞌ nuu̱ꞌ,
te̱ ni̱ kaꞌa̱n ra̱ ndii:
―Yuꞌu̱ ndii,
xa̱ ni̱ xi̱xa̱ va̱ i̱,
te̱ xa̱ kuaꞌa̱ꞌ va̱ kuiya̱ kumiꞌ i̱.
3 Ndoꞌó ndii,
xa̱ ni̱ xi̱ni̱ ndo̱ꞌ sa̱kuuꞌ ña̱ ni̱ xa̱a̱ Yahvé xaꞌa̱ꞌ ña̱ va̱ꞌa̱ ndo̱ꞌ i̱i̱n ka̱niiꞌ kivi̱ꞌ ña̱ xikaꞌ i̱ i̱i̱n yivi̱ꞌ xiinꞌ ndo̱ꞌ.
Yahvé,
Ndiosí e̱ꞌ ndii,
ni̱ kuntaꞌanꞌ a̱ xiinꞌ te̱ ndasiꞌ taꞌanꞌ xiinꞌ ndo̱ꞌ xaꞌa̱ꞌ ndo̱ꞌ.
4 Xa̱ ni̱ na̱ta̱ꞌviꞌ i̱ ñu̱ꞌuꞌ xaꞌa̱ꞌ i̱ꞌi̱n ti̱ꞌvi̱ ndo̱ꞌ xiinꞌ ña̱ kati̱n te̱ ku̱ndu̱u̱ a̱ miiꞌ ku̱ndi̱e̱e̱ ndo̱ꞌ,
sa̱kuuꞌ ña̱ xa̱ ni̱ ka̱nandoo e̱ꞌ xiinꞌ ña̱ tiäꞌa̱an ka̱nandoo e̱ꞌ.
Ni̱ xa̱ꞌaꞌ a̱ nde̱e̱ i̱ti̱a̱ Jordán,
te̱ ni̱ xaꞌa̱n ndi̱koꞌ a̱ nde̱e̱ mi̱ni̱ kaꞌnuꞌ Mediterráneo xtoꞌniꞌ miiꞌ ketá ñu̱ꞌu̱.
5 Te̱ mi̱iꞌ Yahvé,
Ndiosí e̱ꞌ,
ta̱xiꞌ ne̱ ndieeꞌ nuu̱ꞌ ñu̱ꞌuꞌ ja̱a̱nꞌ,
te̱ ta̱va̱ꞌ ña̱ꞌaꞌ a̱ nuu̱ꞌ ndo̱ꞌ,
te̱ ne̱ꞌi̱ ndo̱ꞌ ñu̱ꞌuꞌ ni̱a̱ ku̱ndu̱u̱ ña̱ꞌa̱ ndo̱ꞌ sa̱a̱ niiꞌ ni̱ ta̱xiꞌ Yahvé,
Ndiosí e̱ꞌ,
kuento a̱ nuu̱ꞌ ndo̱ꞌ.
6 ’Xaꞌa̱ꞌ a̱ ja̱a̱nꞌ na kuní a̱ ña̱ sa̱xinú ndo̱ꞌ sa̱kuuꞌ ña̱ ni̱ ke̱ꞌi̱ Moisés nuu̱ꞌ tu̱tu̱ tu̱ꞌu̱n nde̱iꞌ,
te̱ nä̱ndoso̱ꞌ ndo̱ꞌ xaꞌa̱ꞌ nde̱e̱ i̱i̱n a̱,
süu̱ꞌ ja̱a̱nꞌ ndii,
sa̱xinú ndo̱o̱ ndo̱ꞌ sa̱kuuꞌ a̱.
7 Sa̱kanꞌ te̱ nä̱saka̱ ndo̱ꞌ xiinꞌ ne̱ yivi̱ꞌ,
ne̱ ndieeꞌ ka̱ te̱i̱n ndo̱ꞌ nuu̱ꞌ ñu̱ꞌuꞌ yoꞌoꞌ,
ni̱ nde̱e̱ kivi̱ꞌ ndiosí ña̱ xakaꞌnuꞌ ni̱a̱ käꞌa̱n ndo̱ꞌ,
ni̱ nde̱e̱ tï̱i̱n ndi̱a̱a̱ tu̱ ndo̱ꞌ kivi̱ꞌ ndiosí ña̱ xakaꞌnuꞌ ni̱a̱ ja̱a̱nꞌ kii̱ꞌ taxiꞌ ndo̱ꞌ kuento ndo̱ꞌ,
ni̱ nde̱e̱ kä̱ka̱ nu̱u̱ tu̱ ndo̱ꞌ nuu̱ꞌ ña̱ ja̱a̱nꞌ,
ni̱ nde̱e̱ kï̱ꞌi̱n kaꞌnuꞌ tu̱ ña̱ꞌaꞌ ndo̱ꞌ.
8 Süu̱ꞌ ja̱a̱nꞌ ndii,
ka̱ka̱ nu̱u̱ nda̱ku ndo̱ꞌ nuu̱ꞌ Yahvé,
Ndiosí e̱ꞌ,
sa̱a̱ niiꞌ xaaꞌ ndo̱ꞌ nde̱e̱ kivi̱ꞌ vi̱ti̱n.
9 ’Sa̱kanꞌ ña̱ xa̱ ni̱ xi̱ni̱ ndu̱tyiꞌ nuu̱ꞌ ndo̱ꞌ sa̱a̱ ni̱ ta̱va̱ꞌ Yahvé ne̱ yivi̱ꞌ nuu̱ꞌ ñu̱ꞌuꞌ yoꞌoꞌ tee̱ꞌ ndee kuaꞌa̱ꞌ xa̱va̱ꞌa̱ ni̱a̱,
te̱ kooꞌ tyukuuꞌ tu̱ ni̱a̱,
te̱ nde̱e̱ kivi̱ꞌ vi̱ti̱n ndii,
nde̱e̱ i̱i̱n ne̱ yivi̱ꞌ tiäꞌa̱an ku̱vi̱ ka̱nandoo ndoꞌó.
10 I̱i̱n nda̱a̱ꞌ ku̱i̱ti̱ꞌ ndoꞌó ndii,
ku̱vi̱ ta̱xiꞌ ndo̱ꞌ i̱i̱n mií te̱ yivi̱ꞌ,
te̱ ndasiꞌ taꞌanꞌ xiinꞌ ndo̱ꞌ,
sa̱kanꞌ ña̱ mi̱iꞌ Yahvé,
Ndiosí e̱ꞌ,
ku̱ntaꞌanꞌ xiinꞌ ra̱ xaꞌa̱ꞌ ndo̱ꞌ sa̱a̱ niiꞌ ni̱ ta̱xi̱ a̱ kuento a̱.
11 Sa̱kanꞌ na kuiiꞌ ko̱to̱ xiinꞌ miiꞌ va̱ ndo̱ꞌ te̱ ku̱ndani̱ ndo̱ꞌ Yahvé,
Ndiosí e̱ꞌ,
xiinꞌ ka̱niiꞌ nimá ndo̱ꞌ.
12 ’Sa̱kanꞌ ña̱ naaꞌ na̱ko̱o̱ ndo̱ꞌ Yahvé,
Ndiosí e̱ꞌ,
xata̱ꞌ ndo̱ꞌ,
te̱ ndu̱i̱i̱n ndo̱ꞌ xiinꞌ ne̱ ni̱ ndoo̱ ndieeꞌ ka̱ te̱i̱n ndo̱ꞌ ja̱a̱nꞌ,
te̱ naaꞌ tu̱ndaꞌa̱ꞌ ndo̱ꞌ xiinꞌ ni̱a̱ uun naaꞌ tu̱ndaꞌa̱ꞌ ni̱a̱ xiinꞌ ndo̱ꞌ,
te̱ ndu̱i̱i̱n ndo̱ꞌ xiinꞌ ni̱a̱ ndii,
13 kuní a̱ ku̱nda̱ni̱ ndo̱ꞌ ña̱ Yahvé,
Ndiosí e̱ꞌ ndii,
tä̱va̱ꞌ ka̱ a̱ ne̱ ja̱a̱nꞌ te̱i̱n ndo̱ꞌ nuu̱ꞌ ñu̱ꞌuꞌ ndo̱ꞌ ja̱a̱nꞌ,
süu̱ꞌ ja̱a̱nꞌ ndii,
ku̱ndu̱u̱ ni̱a̱ nde̱e̱ naa miiꞌ vi̱kuꞌu̱n ndo̱ꞌ,
te̱ sa̱kekiꞌí ni̱a̱ ndoꞌó.
Te̱ ku̱ndu̱u̱ tu̱ ni̱a̱ nde̱e̱ naa yo̱ꞌoꞌ ña̱ suku̱ꞌ te̱ yivi̱ꞌ xata̱ꞌ ndo̱ꞌ,
uun nde̱e̱ naa i̱ñu̱ꞌ ña̱ tuviꞌ ndu̱tyiꞌ nuu̱ꞌ ndo̱ꞌ,
nde̱e̱ ska̱tyiꞌ nduxi̱n xa̱tyiꞌ ndo̱ꞌ nuu̱ꞌ ñu̱ꞌuꞌ va̱ꞌa̱ ña̱ ni̱ ta̱xi̱ Yahvé,
Ndiosí e̱ꞌ,
nda̱ꞌaꞌ ndo̱ꞌ ku̱ndu̱u̱ ña̱ꞌa̱ ndo̱ꞌ.
14 ’Yuꞌu̱ ndii,
nä̱ꞌaꞌ ka̱ te̱ ku̱vi̱ i̱,
te̱ kuꞌu̱n i̱ miiꞌ kuaꞌa̱n sa̱kuuꞌ ne̱ yivi̱ꞌ i̱i̱n yivi̱ꞌ.
Sa̱kanꞌ na kuiiꞌ kuní a̱ na̱ku̱ni̱ ndo̱ꞌ xiinꞌ i̱i̱n ka̱niiꞌ nimá ndo̱ꞌ xiinꞌ i̱i̱n ka̱niiꞌ ne̱ nduuꞌ ndo̱ꞌ ña̱ ni̱ sa̱xinu̱ Yahvé,
Ndiosí e̱ꞌ,
sa̱kuuꞌ kuento va̱ꞌa̱ ña̱ ni̱ ta̱xi̱ a̱ nuu̱ꞌ e̱ꞌ,
te̱ nde̱e̱ i̱i̱n a̱ nï̱ na̱ko̱o̱ a̱.
15 Ndisu̱ sa̱a̱ niiꞌ ni̱ na̱ti̱i̱n ndo̱ꞌ sa̱kuuꞌ ña̱ kaꞌán kuento va̱ꞌa̱ ña̱ ni̱ ta̱xi̱ Yahvé,
Ndiosí e̱ꞌ,
nuu̱ꞌ e̱ꞌ ja̱a̱nꞌ ndii,
niiꞌ sa̱kanꞌ tu̱ ku̱vi̱ ka̱ni̱ a̱ ndoꞌó xiinꞌ sa̱kuuꞌ nuu̱ꞌ ña̱ ki̱ni̱ ña̱ ni̱ kaꞌa̱n a̱ xaꞌa̱ꞌ nde̱e̱ ska̱tyiꞌ sa̱nduxín xa̱tyiꞌ a̱ ndoꞌó nuu̱ꞌ ñu̱ꞌuꞌ va̱ꞌa̱ ña̱ ni̱ ta̱xi̱ a̱ nda̱ꞌaꞌ ndo̱ꞌ.
16 Naaꞌ kaꞌnu̱ ndo̱ꞌ kuento ña̱ ni̱ ta̱xi̱ Yahvé,
Ndiosí e̱ꞌ,
nuu̱ꞌ ndo̱ꞌ te̱ ku̱ndiku̱n ndo̱ꞌ i̱nga̱ ndiosí,
te̱ ki̱ꞌi̱n kaꞌnuꞌ ndo̱ꞌ a̱ ndii,
na̱saa̱ꞌ Yahvé,
Ndiosí e̱ꞌ,
ku̱ni̱ a̱ ndoꞌó,
te̱ yatyi̱ va̱ ka̱ni̱ a̱ ndoꞌó nde̱e̱ nduxi̱n xa̱tyiꞌ sa̱kuuꞌ ndo̱ꞌ nuu̱ꞌ ñu̱ꞌuꞌ va̱ꞌa̱ ña̱ ni̱ ta̱xi̱ a̱ nda̱ꞌaꞌ ndo̱ꞌ ―ni̱ katyi̱ ra̱.