Yoꞌoꞌ kaꞌán Josué ndee ñu̱u̱ ku̱vi̱ ku̱nu̱ i̱i̱n ne̱ yivi̱ꞌ kuꞌu̱n ku̱nduꞌu̱ꞌ ni̱a̱ naaꞌ ni̱ xa̱ꞌni̱ꞌ kueinꞌ ni̱a̱ i̱i̱n ne̱ yivi̱ꞌ
20
Te̱ ni̱ kaꞌa̱n Yahvé xiinꞌ Josué ndii:
2 ―Na̱ka̱ya̱ u̱nꞌ sa̱kuuꞌ ne̱ taꞌanꞌ u̱nꞌ,
ne̱ Israel,
te̱ kaꞌa̱n u̱nꞌ xiinꞌ ni̱a̱ ña̱ na na̱ka̱xi̱n ni̱a̱ ndiaꞌviꞌ ñu̱u̱ miiꞌ ku̱vi̱ ku̱nu̱ i̱i̱n ne̱ yivi̱ꞌ kuꞌu̱n ku̱nduꞌu̱ꞌ ni̱a̱ te̱ kaku̱ ni̱a̱ naaꞌ ni̱ xa̱ꞌni̱ꞌ kueinꞌ ni̱a̱ i̱i̱n ne̱ yivi̱,
sa̱a̱ niiꞌ xa̱ ni̱ kaꞌa̱n i̱ xiinꞌ Moisés.
3 Te̱ ndiaa ka̱ ñu̱u̱ ja̱a̱nꞌ ku̱vi̱ kuꞌu̱n ku̱ndi̱e̱e̱ yo̱o̱ ka̱ nduuꞌ ne̱ yivi̱ naaꞌ ni̱ xa̱ꞌni̱ꞌ kueinꞌ ni̱a̱ ne̱ yivi̱ꞌ,
te̱ nï̱ kaꞌa̱n nimá ni̱a̱ sa̱a̱ ni̱a̱ ña̱ ja̱a̱nꞌ.
I̱kanꞌ ku̱ndu̱u̱ miiꞌ kaku̱ ni̱a̱ naaꞌ na̱ndu̱kuꞌ ña̱ꞌaꞌ ne̱ i̱i̱n kuuꞌ xiinꞌ ne̱ ni̱ xa̱ꞌni̱ꞌ ni̱a̱ ja̱a̱nꞌ te̱ ka̱ꞌni̱ꞌ ña̱ꞌaꞌ ni̱a̱.
4 ’Yo̱o̱ ka̱ ni̱ xa̱ꞌni̱ꞌ kueinꞌ ne̱ yivi̱ꞌ,
te̱ kuni kuꞌu̱n ku̱nduꞌu̱ꞌ ni̱a̱ ndee ka̱ ñu̱u̱ ja̱a̱nꞌ ndii,
kuní a̱ kuꞌu̱n ni̱a̱ xi̱ꞌna̱ yiꞌeꞌ ñu̱u̱ miiꞌ nakayá te̱ xi̱xa̱ nuu̱ꞌ ñu̱u̱ ja̱a̱nꞌ,
te̱ kaꞌa̱n ni̱a̱ nuu̱ꞌ ra̱ ña̱ ni̱ xa̱a̱ ni̱a̱.
Sa̱kanꞌ te̱ ta̱xi̱ te̱ xi̱xa̱ ja̱a̱nꞌ yaꞌa̱ ni̱a̱ ñu̱u̱ ja̱a̱nꞌ,
te̱ ta̱xi̱ tu̱ ra̱ i̱i̱n xaanꞌ miiꞌ ku̱ndi̱e̱e̱ ni̱a̱.
5 Te̱ naaꞌ ki̱xi̱n ne̱ i̱i̱n kuuꞌ xiinꞌ ne̱ ni̱ xiꞌi̱ ja̱a̱nꞌ te̱ kuni ka̱ꞌni̱ꞌ ni̱a̱ te̱ ni̱ xa̱ꞌni̱ꞌ ne̱ i̱i̱n kuuꞌ xiinꞌ ni̱a̱ ja̱a̱nꞌ ndii,
sä̱na̱kuaꞌa te̱ xi̱xa̱,
te̱ kuuꞌ nu̱uꞌ nuu̱ꞌ ne̱ ndieeꞌ ñu̱u̱ ja̱a̱nꞌ,
te̱ ni̱ xa̱ꞌni̱ꞌ ja̱a̱nꞌ nda̱ꞌaꞌ ni̱a̱,
sa̱kanꞌ ña̱ ni̱ xa̱ꞌni̱ꞌ kueinꞌ ña̱ꞌaꞌ ra̱,
te̱ kuäsa̱ꞌ ndasiꞌ ña̱ꞌaꞌ ra̱ ña̱ kuní ka̱ ka̱ꞌni̱ꞌ ña̱ꞌaꞌ ra̱.
6 Te̱ ndoo̱ ra̱ ku̱nduꞌu̱ꞌ ra̱ ñu̱u̱ ja̱a̱nꞌ nde̱e̱ sa̱naꞌmá ña̱ꞌaꞌ ne̱ ndieeꞌ ñu̱u̱ ja̱a̱nꞌ kii̱ꞌ ka̱sa̱ꞌa̱ ni̱a̱ kunta kaꞌnuꞌ ñu̱u̱ ja̱a̱nꞌ,
te̱ i̱kanꞌ kaꞌa̱n ni̱a̱ sa̱a̱ ko̱o̱ ra̱ xaꞌa̱ꞌ ña̱ ja̱a̱nꞌ.
Te̱ ndoo̱ ra̱ ku̱nduꞌu̱ꞌ ra̱ ñu̱u̱ ja̱a̱nꞌ nde̱e̱ ku̱vi̱ sutu̱ kuuꞌ nu̱uꞌ,
te̱ xatyuunꞌ ti̱xi̱n yu̱kunꞌ kii̱ꞌ ni̱ ndo̱kueinꞌ te̱ ja̱a̱nꞌ.
Sa̱kanꞌ vi̱ꞌ te̱ ku̱vi̱ na̱ndi̱koꞌ ra̱ vi̱ꞌe̱ ra̱,
ñu̱u̱ miiꞌ ni̱ nduꞌu̱ꞌ ra̱ ―ni̱ katyi̱ a̱.
7 Sa̱kanꞌ te̱ ni̱ na̱ka̱xi̱n ra̱ ñu̱u̱ Cedes,
ña̱ naá nuu̱ꞌ ñu̱ꞌuꞌ Galilea,
te̱i̱n i̱kuꞌ miiꞌ xikaꞌ ne̱ vi̱ꞌe̱ Neftalí,
xiinꞌ ñu̱u̱ Siquem,
ña̱ naá te̱i̱n i̱kuꞌ miiꞌ xikaꞌ ne̱ vi̱ꞌe̱ Efraín,
xiinꞌ ñu̱u̱ Quiriat-arba,
ña̱ naniꞌ tu̱ Hebrón,
ña̱ naá nuu̱ꞌ ñu̱ꞌuꞌ te̱i̱n i̱kuꞌ miiꞌ xikaꞌ ne̱ vi̱ꞌe̱ Judá.
8 Te̱ tu̱ku̱ taꞌviꞌ i̱ti̱a̱ Jordán xi̱i̱nꞌ ñu̱u̱ Jericó xtoꞌniꞌ miiꞌ ketaꞌ ñu̱ꞌu̱ ni̱ na̱ka̱xi̱n ra̱ ñu̱u̱ Beser,
ña̱ kanduꞌu̱ꞌ yo̱soꞌ miiꞌ i̱tyi kaaꞌ nuu̱ꞌ ñu̱ꞌuꞌ miiꞌ xikaꞌ ne̱ vi̱ꞌe̱ Rubén,
xiinꞌ ñu̱u̱ Ramot,
ña̱ kanduꞌu̱ꞌ nuu̱ꞌ ñu̱ꞌuꞌ Galaad,
ña̱ nduuꞌ ñu̱ꞌuꞌ miiꞌ xikaꞌ ne̱ vi̱ꞌe̱ Gad,
xiinꞌ ñu̱u̱ Golán,
ña̱ kanduꞌu̱ꞌ nuu̱ꞌ ñu̱ꞌuꞌ Basán,
ña̱ nduuꞌ ñu̱ꞌuꞌ miiꞌ xikaꞌ ne̱ vi̱ꞌe̱ Manasés.
9 Sa̱kuuꞌ ñu̱u̱ ja̱a̱nꞌ nduuꞌ ña̱ ni̱ na̱ka̱xi̱n ra̱,
te̱ ku̱ndi̱e̱e̱ sa̱kuuꞌ ne̱ vi̱ꞌe̱ Israel xiinꞌ sa̱kuuꞌ te̱ tukuꞌ,
te̱ ndieeꞌ te̱i̱n ni̱a̱,
te̱ i̱kanꞌ kuꞌu̱n ku̱ndi̱e̱e̱ yo̱o̱ ka̱ nduuꞌ ne̱ ja̱a̱nꞌ naaꞌ ka̱ꞌni̱ꞌ kueinꞌ ni̱a̱ i̱i̱n ne̱ yivi̱,
sa̱kanꞌ te̱ kä̱ꞌni̱ꞌ ña̱ꞌaꞌ ne̱ i̱i̱n kuuꞌ xiinꞌ ne̱ ni̱ xa̱ꞌni̱ꞌ ni̱a̱ ja̱a̱nꞌ,
ña̱ kuní ka̱ sa̱naꞌmá ña̱ꞌaꞌ te̱ xi̱xa̱ nuu̱ꞌ ñu̱u̱ ja̱a̱nꞌ kii̱ꞌ ko̱o̱ kunta kaꞌnuꞌ.