Yoꞌoꞌ kaꞌán a̱ xaꞌa̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ i̱ꞌi̱n ti̱ꞌvi̱ ne̱ si̱a̱niꞌ xikaꞌ Simeón
19
Te̱ ñu̱ꞌuꞌ ña̱ uvi̱ ña̱ ni̱ ka̱ti̱n Josué ndii,
nda̱ꞌaꞌ ne̱ si̱a̱niꞌ xikaꞌ Simeón ni̱ ndoo̱ a̱,
te̱ ku̱ndu̱u̱ a̱ ña̱ꞌa̱ ni̱a̱ miiꞌ ku̱ndi̱e̱e̱ ni̱a̱.
Te̱ ñu̱ꞌuꞌ ja̱a̱nꞌ ndii,
te̱i̱n ñu̱ꞌuꞌ ne̱ vi̱ꞌe̱ Judá naá i̱ꞌnu̱ a̱.
2 Te̱ nuu̱ꞌ ñu̱ꞌuꞌ ja̱a̱nꞌ ñuꞌuꞌ ñu̱u̱ Beerseba,
xiinꞌ ñu̱u̱ Seba,
xiinꞌ ñu̱u̱ Molada,
3 xiinꞌ ñu̱u̱ Hazar-sual,
xiinꞌ ñu̱u̱ Bala,
xiinꞌ Ezem,
4 xiinꞌ ñu̱u̱ Eltolad,
xiinꞌ ñu̱u̱ Betul,
xiinꞌ ñu̱u̱ Horma,
5 xiinꞌ ñu̱u̱ Siclag,
xiinꞌ ñu̱u̱ Bet-marcabot,
xiinꞌ ñu̱u̱ Hazar-susa,
6 xiinꞌ ñu̱u̱ Bet-lebaot,
xiinꞌ ñu̱u̱ Saruhén,
uxi̱ uni̱ sa̱aꞌ ñu̱u̱ kaa̱ꞌ xiinꞌ nda̱ꞌaꞌ a̱ ni̱ ne̱ꞌi̱ ne̱ vi̱ꞌe̱ Simeón ja̱a̱nꞌ nduuꞌ ña̱ꞌa̱ ni̱a̱.
7 Te̱ ni̱ ne̱ꞌi̱ tu̱ ni̱a̱ ñu̱u̱ Aín,
xiinꞌ ñu̱u̱ Rimón,
xiinꞌ ñu̱u̱ Eter,
xiinꞌ ñu̱u̱ Asán,
ku̱miꞌ sa̱aꞌ ñu̱u̱ kaa̱ꞌ xiinꞌ nda̱ꞌaꞌ a̱ ni̱ ne̱ꞌi̱ ni̱a̱ nduuꞌ ña̱ꞌa̱ ni̱a̱,
8 xiinꞌ sa̱kuuꞌ ñu̱u̱ kualiꞌ ña̱ ñuꞌuꞌ sa̱a̱ xinunduu xi̱i̱nꞌ a̱,
te̱ ni̱ xaꞌa̱n ndi̱koꞌ a̱ nde̱e̱ miiꞌ naá ñu̱u̱ Baalat-beer,
ña̱ naniꞌ tu̱ Ramat,
ña̱ kanduꞌu̱ꞌ nuu̱ꞌ ñu̱ꞌuꞌ Neguev.
Ña̱ ja̱a̱nꞌ nduuꞌ ñu̱ꞌuꞌ xiinꞌ ñu̱u̱ ña̱ ni̱ ndoo̱ nda̱ꞌaꞌ ne̱ si̱a̱niꞌ xikaꞌ Simeón,
sa̱a̱ ka̱ taꞌan kuuꞌ ni̱a̱.
9 Te̱ xaꞌa̱ꞌ a̱ ña̱ tyiee̱ va̱ ñu̱ꞌuꞌ ña̱ ni̱ ndoo̱ nda̱ꞌaꞌ ne̱ vi̱ꞌe̱ Judá ndii,
i̱kanꞌ ni̱ na̱ke̱ndiaa̱ꞌ Josué tyaaꞌ ñu̱ꞌuꞌ ni̱ ta̱xi̱ ra̱ nda̱ꞌaꞌ ne̱ si̱a̱niꞌ xikaꞌ Simeón ja̱a̱nꞌ,
sa̱kanꞌ na kuiiꞌ ñu̱ꞌuꞌ si̱a̱niꞌ xikaꞌ Simeón ja̱a̱nꞌ ndii,
ma̱ꞌiꞌ ñu̱ꞌuꞌ ne̱ vi̱ꞌe̱ Judá ni̱ ndoo̱ i̱ꞌnu̱ a̱.
Yoꞌoꞌ kaꞌán a̱ xaꞌa̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ si̱a̱niꞌ xikaꞌ Zabulón
10 Te̱ ñu̱ꞌuꞌ ña̱ uni̱,
ña̱ ni̱ ka̱ti̱n ra̱ ndii,
nda̱ꞌaꞌ ti̱ꞌvi̱ si̱a̱niꞌ xikaꞌ Zabulón ni̱ ndoo̱ a̱.
Te̱ xeꞌinꞌ ñu̱ꞌuꞌ ni̱a̱ ndii,
nde̱e̱ ñu̱u̱ Sarid kuaꞌa̱n ndi̱koꞌ a̱.
11 Te̱ i̱kanꞌ kieeꞌ a̱ te̱ kuaꞌa̱n ka̱a̱ a̱ nde̱e̱ ñu̱u̱ Marala,
ña̱ naá xtoꞌniꞌ miiꞌ ketaꞌ ñu̱ꞌu̱,
te̱ naxaá a̱ nde̱e̱ ñu̱u̱ Dabeset,
te̱ i̱kanꞌ kieeꞌ a̱ te̱ kuaꞌa̱n a̱ nde̱e̱ yivi̱ ña̱ xkaꞌndíá nuu̱ꞌ ñu̱u̱ Jocneam.
12 Te̱ ñu̱u̱ ja̱a̱nꞌ kieeꞌ a̱ te̱ ndikoꞌ kuiín a̱ kuaꞌa̱n a̱ xtoꞌniꞌ miiꞌ ketaꞌ ñu̱ꞌu̱,
te̱ kuaꞌa̱n ndi̱koꞌ a̱ nde̱e̱ miiꞌ yoo xeꞌinꞌ ñu̱u̱ Quislot-tabor,
te̱ nde̱e̱ i̱kanꞌ kieeꞌ a̱ te̱ naxaá a̱ nde̱e̱ ñu̱u̱ Daberat,
te̱ i̱kanꞌ kieeꞌ a̱ te̱ kuaꞌa̱n ka̱a̱ a̱ nde̱e̱ ñu̱u̱ Jafía.
13 Ndi̱ꞌi̱ ja̱a̱nꞌ te̱ xkaꞌndíá a̱ nde̱e̱ xi̱i̱nꞌ ñu̱u̱ Gat-hefer,
xiinꞌ ñu̱u̱ Ita-cazín xtoꞌniꞌ miiꞌ ketaꞌ ñu̱ꞌu̱,
te̱ naxaá a̱ nde̱e̱ ñu̱u̱ Rimón,
te̱ xinunduu a̱ ñu̱u̱ Nea.
14 Te̱ xeꞌinꞌ ñu̱ꞌuꞌ ni̱a̱ ña̱ kuaꞌa̱n ni̱nu̱ ndii,
ndikoꞌ kuiín a̱ nde̱e̱ ñu̱u̱ Hanatón,
te̱ ku̱a̱xi̱ a̱ naxaá a̱ nde̱e̱ yo̱soꞌ ña̱ naniꞌ Jefte-el,
15 te̱ kiꞌinꞌ a̱ sa̱kuuꞌ ñu̱u̱ Catat,
xiinꞌ ñu̱u̱ Naalal,
xiinꞌ ñu̱u̱ Simrón,
xiinꞌ ñu̱u̱ Idala,
xiinꞌ ñu̱u̱ Belén,
uxi̱ uvi̱ sa̱aꞌ ñu̱u̱ kaa̱ꞌ xiinꞌ nda̱ꞌaꞌ a̱ ni̱ ne̱ꞌi̱ ni̱a̱ nduuꞌ ña̱ꞌa̱ ni̱a̱.
16 Ña̱ ja̱a̱nꞌ nduuꞌ ñu̱ꞌuꞌ xiinꞌ ñu̱u̱ ña̱ ni̱ ndoo̱ nda̱ꞌaꞌ ne̱ si̱a̱niꞌ xikaꞌ Zabulón sa̱a̱ ka̱ taꞌan kuuꞌ ni̱a̱ sa̱kuuꞌ ñu̱u̱ ja̱a̱nꞌ xiinꞌ nda̱ꞌaꞌ a̱.
Yoꞌoꞌ kaꞌán a̱ xaꞌa̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ si̱a̱niꞌ xikaꞌ Isacar
17 Te̱ ñu̱ꞌuꞌ ña̱ ku̱miꞌ ña̱ ni̱ ka̱ti̱n Josué ndii,
nda̱ꞌaꞌ ti̱ꞌvi̱ si̱a̱niꞌ xikaꞌ Isacar ni̱ ndoo̱ a̱.
18 Te̱ ñu̱ꞌuꞌ ne̱ ja̱a̱nꞌ ndii,
ni̱ ki̱ꞌi̱n a̱ nde̱e̱ ñu̱u̱ Jezreel,
xiinꞌ ñu̱u̱ Quesulot,
xiinꞌ ñu̱u̱ Sunem,
19 xiinꞌ ñu̱u̱ Hafaraim,
xiinꞌ ñu̱u̱ Sihón,
xiinꞌ ñu̱u̱ Anaharat,
20 xiinꞌ ñu̱u̱ Rabit,
xiinꞌ ñu̱u̱ Quisión,
xiinꞌ ñu̱u̱ Abez,
21 xiinꞌ ñu̱u̱ Remet,
xiinꞌ ñu̱u̱ En-ganim,
xiinꞌ ñu̱u̱ En-hada,
xiinꞌ ñu̱u̱ Bet-pases.
22 Te̱ naxaá xeꞌinꞌ ja̱a̱nꞌ nde̱e̱ ñu̱u̱ Tabor,
xiinꞌ ñu̱u̱ Sahazima,
xiinꞌ ñu̱u̱ Bet-semes,
te̱ kuaꞌa̱n ndi̱koꞌ a̱ nde̱e̱ i̱ti̱a̱ Jordán.
Xaꞌu̱n i̱i̱n sa̱aꞌ ñu̱u̱ kaa̱ꞌ xiinꞌ nda̱ꞌaꞌ a̱ ni̱ na̱ꞌi̱ ni̱a̱ nduuꞌ ña̱ꞌa̱ ni̱a̱.
23 Ña̱ ja̱a̱nꞌ nduuꞌ ñu̱ꞌuꞌ xiinꞌ ñu̱u̱ ña̱ ni̱ ndoo̱ nda̱ꞌaꞌ ne̱ si̱a̱niꞌ xikaꞌ Isacar sa̱a̱ ka̱ taꞌan kuuꞌ ni̱a̱ sa̱kuuꞌ ñu̱u̱ ja̱a̱nꞌ xiinꞌ nda̱ꞌaꞌ a̱.
Yoꞌoꞌ kaꞌán a̱ xaꞌa̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ si̱a̱niꞌ xikaꞌ Aser
24 Te̱ ñu̱ꞌuꞌ ña̱ uꞌu̱n ña̱ ni̱ ka̱ti̱n ra̱ ndii,
nda̱ꞌaꞌ ti̱ꞌvi̱ si̱a̱niꞌ xikaꞌ Aser ni̱ ndoo̱ a̱,
25 te̱ ñu̱ꞌuꞌ ni̱a̱ ndii,
ni̱ ki̱ꞌi̱n a̱ nde̱e̱ ñu̱u̱ Helcat,
xiinꞌ ñu̱u̱ Halí,
xiinꞌ ñu̱u̱ Betén,
xiinꞌ ñu̱u̱ Acsaf,
26 xiinꞌ ñu̱u̱ Alamelec,
xiinꞌ ñu̱u̱ Amad,
xiinꞌ ñu̱u̱ Miseal,
te̱ naxaá nde̱e̱ xaꞌa̱ꞌ i̱kuꞌ ña̱ naniꞌ Carmelo xtoꞌniꞌ miiꞌ ketá ñu̱ꞌu̱,
xiinꞌ ñu̱u̱ Sihorlibnat.
27 Ndi̱ꞌi̱ ja̱a̱nꞌ te̱ ndikoꞌ kuiín a̱ kuaꞌa̱n a̱ nde̱e̱ ñu̱u̱ Bet-dagón xtoꞌniꞌ miiꞌ ketaꞌ ñu̱ꞌu̱,
te̱ naxaá a̱ nde̱e̱ ñu̱u̱ Zabulón ña̱ kanduꞌu̱ꞌ yo̱soꞌ Jefte-el.
Te̱ i̱kanꞌ kieeꞌ a̱ kuaꞌa̱n a̱ ni̱nu̱ nde̱e̱ miiꞌ ñuꞌuꞌ ñu̱u̱ Bet-emec,
xiinꞌ ñu̱u̱ Neiel.
Te̱ i̱kanꞌ kieeꞌ a̱ te̱ nakaá kuaꞌa̱n a̱ ni̱nu̱ nde̱e̱ miiꞌ ñuꞌuꞌ ñu̱u̱ Cabul,
28 xiinꞌ ñu̱u̱ Hebrón,
xiinꞌ ñu̱u̱ Rehob,
xiinꞌ ñu̱u̱ Hamón,
xiinꞌ ñu̱u̱ Caná,
te̱ naxaá a̱ nde̱e̱ miiꞌ naá ñu̱u̱ tyiee̱ Sidón.
29 Te̱ i̱kanꞌ kieeꞌ xeꞌinꞌ ja̱a̱nꞌ nakaá kuaꞌa̱n a̱ nde̱e̱ ñu̱u̱ Ramá,
te̱ nde̱e̱ ñu̱u̱ ja̱a̱nꞌ kieeꞌ a̱ te̱ naxaá a̱ nde̱e̱ ñu̱u̱ Tiro ña̱ ndasi kutu̱ꞌ xiinꞌ nama̱,
te̱ i̱kanꞌ kieeꞌ a̱ te̱ ndikoꞌ kuiín a̱ kuaꞌa̱n a̱ nde̱e̱ ñu̱u̱ Hosa,
te̱ naxaá a̱ nde̱e̱ mi̱ni̱ kaꞌnuꞌ nuu̱ꞌ ñu̱ꞌuꞌ ñu̱u̱ Aczib.
30 Te̱ ni̱ ki̱ꞌi̱n tu̱ a̱ nde̱e̱ ñu̱u̱ Uma,
xiinꞌ ñu̱u̱ Afec,
xiinꞌ ñu̱u̱ Rehob.
Te̱ ña̱ sa̱kuuꞌ a̱ ndii,
oko̱ uvi̱ taꞌan ñu̱u̱ xiinꞌ nda̱ꞌaꞌ a̱ kuuꞌ ña̱ ni̱ na̱ꞌi̱ ni̱a̱ nduuꞌ ña̱ꞌa̱ ni̱a̱.
31 Ña̱ ja̱a̱nꞌ nduuꞌ ñu̱ꞌuꞌ xiinꞌ ñu̱u̱ ña̱ ni̱ ndoo̱ nda̱ꞌaꞌ ne̱ si̱a̱niꞌ xikaꞌ Aser sa̱a̱ ka̱ taꞌan kuuꞌ ni̱a̱ sa̱kuuꞌ ñu̱u̱ ja̱a̱nꞌ xiinꞌ nda̱ꞌaꞌ a̱.
Yoꞌoꞌ kaꞌán a̱ xaꞌa̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ si̱a̱niꞌ xikaꞌ Neftalí
32 Te̱ ñu̱ꞌuꞌ ña̱ iñu̱ ña̱ ni̱ ka̱ti̱n ra̱ ndii,
nda̱ꞌaꞌ ti̱ꞌvi̱ si̱a̱niꞌ xikaꞌ Neftalí ni̱ ndoo̱ a̱.
33 Te̱ ñu̱ꞌuꞌ ne̱ ja̱a̱nꞌ ndii,
ni̱ ki̱ꞌi̱n a̱ nde̱e̱ ñu̱u̱ Helef,
xiinꞌ ñu̱u̱ Alón-saananim,
xiinꞌ ñu̱u̱ Adami-neceb,
xiinꞌ ñu̱u̱ Jabneel,
te̱ nakaá a̱ kuaꞌa̱n a̱ nde̱e̱ ñu̱u̱ Lacum,
te̱ naxinú a̱ nde̱e̱ i̱ti̱a̱ Jordán.
34 Te̱ i̱kanꞌ ndikoꞌ kuiín xeꞌinꞌ ñu̱ꞌuꞌ ni̱a̱ ja̱a̱nꞌ,
te̱ kuaꞌa̱n a̱ nde̱e̱ ñu̱u̱ Aznot-tabor,
xtoꞌniꞌ miiꞌ ketá ñu̱ꞌu̱,
te̱ i̱kanꞌ kieeꞌ a̱ te̱ xkaꞌndíá a̱ nde̱e̱ ñu̱u̱ Hucoc,
te̱ naxaá a̱ nde̱e̱ ñu̱u̱ Zabulón xi̱i̱nꞌ a̱ ninu̱,
te̱ nuu̱ꞌ ñu̱ꞌuꞌ Aser yoo xeꞌinꞌ a̱ xtoꞌniꞌ miiꞌ ketá ñu̱ꞌu̱,
te̱ i̱ti̱a̱ Jordán nduuꞌ xeꞌinꞌ a̱ xtoꞌniꞌ miiꞌ ketaꞌ ñu̱ꞌu̱.
35 Te̱ sa̱kuuꞌ ñu̱u̱ ña̱ ñuꞌuꞌ nuu̱ꞌ ñu̱ꞌuꞌ ja̱a̱nꞌ ña̱ ndasi i̱ꞌnu̱ kutu̱ꞌ xiinꞌ nama̱ naꞌnuꞌ ndii,
ñu̱u̱ Sidim,
xiinꞌ ñu̱u̱ Zer,
xiinꞌ ñu̱u̱ Hamat,
xiinꞌ ñu̱u̱ Racat,
xiinꞌ ñu̱u̱ Cineret,
36 xiinꞌ ñu̱u̱ Adama,
xiinꞌ ñu̱u̱ Ramá,
xiinꞌ ñu̱u̱ Hazor,
37 xiinꞌ ñu̱u̱ Cedes,
xiinꞌ ñu̱u̱ Edrei,
xiinꞌ ñu̱u̱ En-hazor,
38 xiinꞌ ñu̱u̱ Irón,
xiinꞌ ñu̱u̱ Migdal-el,
xiinꞌ ñu̱u̱ Horem,
xiinꞌ ñu̱u̱ Bet-anat,
xiinꞌ ñu̱u̱ Bet-semes,
xaꞌu̱n ku̱miꞌ sa̱aꞌ ñu̱u̱ kaa̱ꞌ xiinꞌ nda̱ꞌaꞌ a̱ ni̱ ne̱ꞌi̱ ni̱a̱ nduuꞌ ña̱ꞌa̱ ni̱a̱.
39 Ña̱ ja̱a̱nꞌ nduuꞌ ñu̱ꞌuꞌ xiinꞌ ñu̱u̱ ña̱ ni̱ ndoo̱ nda̱ꞌaꞌ ne̱ si̱a̱niꞌ xikaꞌ Neftalí sa̱a̱ ka̱ taꞌan kuuꞌ ni̱a̱,
sa̱kuuꞌ ñu̱u̱ ja̱a̱nꞌ xiinꞌ nda̱ꞌaꞌ a̱.
Yoꞌoꞌ kaꞌán a̱ xaꞌa̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ si̱a̱niꞌ xikaꞌ Dan
40 Te̱ ñu̱ꞌuꞌ ña̱ uxa̱ ña̱ ni̱ ka̱ti̱n ra̱ ndii,
nda̱ꞌaꞌ ti̱ꞌvi̱ si̱a̱niꞌ xikaꞌ Dan ni̱ ndoo̱ a̱ sa̱a̱ ka̱ taꞌan kuuꞌ ni̱a̱.
41 Te̱ ñu̱u̱ ña̱ ni̱ ndoo̱ nda̱ꞌaꞌ ni̱a̱ ku̱ndu̱u̱ ña̱ꞌa̱ ni̱a̱ ndii,
ni̱ ki̱ꞌi̱n a̱ nde̱e̱ ñu̱u̱ Zora,
xiinꞌ ñu̱u̱ Estaol,
xiinꞌ ñu̱u̱ Ir-semes,
42 xiinꞌ ñu̱u̱ Saalabín,
xiinꞌ ñu̱u̱ Ajalón,
xiinꞌ ñu̱u̱ Jetla,
43 xiinꞌ ñu̱u̱ Elón,
xiinꞌ ñu̱u̱ Timnat,
xiinꞌ ñu̱u̱ Ecrón,
44 xiinꞌ ñu̱u̱ Elteque,
xiinꞌ ñu̱u̱ Gibetón,
xiinꞌ ñu̱u̱ Baalat,
45 xiinꞌ ñu̱u̱ Jehúd,
xiinꞌ ñu̱u̱ Bene-berac,
xiinꞌ ñu̱u̱ Gat-rimón,
46 xiinꞌ ñu̱u̱ Mejarcón,
xiinꞌ ñu̱u̱ Racón,
xiinꞌ ñu̱ꞌuꞌ ña̱ kanduꞌu̱ꞌ nuu̱ꞌ ñu̱u̱ Jope.
47 Ndisu̱ te̱ vi̱ꞌe̱ Dan,
xaꞌa̱ꞌ a̱ ña̱ nï̱ kooꞌ tyukuuꞌ ra̱ na̱ꞌi̱ ra̱ ñu̱ꞌuꞌ miiꞌ ndoo̱ ra̱ ku̱ndi̱e̱e̱ ra̱ ndii,
ni̱ ka̱a̱ ra̱ ñu̱u̱ Lesem,
te̱ ni̱ ko̱ꞌni̱ ra̱ ñu̱u̱ ja̱a̱nꞌ,
te̱ ni̱ xa̱ꞌni̱ꞌ ndo̱o̱ ra̱ ne̱ ndieeꞌ ñu̱u̱ ja̱a̱nꞌ xiinꞌ ityi̱,
te̱ ni̱ ne̱ꞌi̱ ra̱ ñu̱ꞌuꞌ ne̱ ja̱a̱nꞌ ni̱ na̱ndu̱u̱ ña̱ꞌa̱ ra̱.
Sa̱kanꞌ te̱ ni̱ na̱ma̱ ra̱ kivi̱ꞌ ñu̱u̱ ja̱a̱nꞌ,
te̱ ni̱ tyi̱na̱niꞌ ra̱ a̱ Dan xaꞌa̱ꞌ ña̱ kiꞌinꞌ kaꞌnuꞌ ra̱ te̱ xii̱ꞌ ya̱taꞌ ra̱,
te̱ ni̱ na̱niꞌ Dan.
48 Ña̱ ja̱a̱nꞌ nduuꞌ ñu̱ꞌuꞌ xiinꞌ ñu̱u̱ ña̱ ni̱ ndoo̱ nda̱ꞌaꞌ ne̱ si̱a̱niꞌ xikaꞌ Dan sa̱a̱ ka̱ taꞌan kuuꞌ ni̱a̱,
sa̱kuuꞌ ñu̱u̱ ja̱a̱nꞌ xiinꞌ nda̱ꞌaꞌ a̱.
Yoꞌoꞌ kaꞌán a̱ xaꞌa̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ si̱a̱niꞌ xikaꞌ Josué
49 Te̱ kii̱ꞌ ndi̱ꞌi̱ ni̱ na̱ta̱ꞌviꞌ ra̱ ñu̱ꞌuꞌ ja̱a̱nꞌ nda̱ꞌaꞌ i̱ꞌi̱n te̱ ja̱a̱nꞌ ndii,
i̱ꞌi̱n te̱ vi̱ꞌe̱ Israel ni̱ ta̱xi̱ tyaaꞌ ñu̱ꞌuꞌ ra̱ nda̱ꞌaꞌ Josué,
siꞌe̱ Nun,
te̱i̱n ra̱ miiꞌ ndieeꞌ ra̱.
50 Sa̱kanꞌ ña̱ xa̱ ni̱ kaꞌa̱n Yahvé ña̱ ku̱vi̱ ku̱nduꞌu̱ꞌ Josué ndee ka̱ ñu̱u̱ kuní mi̱iꞌ ra̱,
sa̱kanꞌ na kuiiꞌ ni̱ na̱ka̱xi̱n ra̱ ñu̱u̱ Timnat-sera te̱i̱n i̱kuꞌ nuu̱ꞌ ñu̱ꞌuꞌ miiꞌ xikaꞌ Efraín.
Te̱ ni̱ na̱ka̱sa̱ꞌa̱ xa̱aꞌ ra̱ ñu̱u̱ ja̱a̱nꞌ,
te̱ ni̱ ndoo̱ ra̱ ni̱ nduꞌu̱ꞌ ra̱ i̱kanꞌ.
51 Sa̱kuuꞌ ña̱ kaa̱ꞌ nduuꞌ ñu̱ꞌuꞌ ña̱ ni̱ na̱ta̱ꞌviꞌ sutu̱ Eleazar,
xiinꞌ Josué,
siꞌe̱ Nun,
xiinꞌ sa̱kuuꞌ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ Israel ni̱ ta̱xi̱ ra̱ nda̱ꞌaꞌ i̱ꞌi̱n ti̱ꞌvi̱ ne̱ vi̱ꞌe̱ Israel xiinꞌ ña̱ kati̱n ra̱ nuu̱ꞌ Yahvé Ndiosí,
te̱ ku̱ndu̱u̱ a̱ ña̱ꞌa̱ ni̱a̱.
Te̱ sa̱kuuꞌ ña̱ ja̱a̱nꞌ ni̱ xa̱a̱ ra̱ ñu̱u̱ Silo yiꞌeꞌ vi̱ꞌe̱ toto̱ miiꞌ nakayá ni̱a̱ xakaꞌnuꞌ ni̱a̱ Ndiosí.
Sa̱kanꞌ vi̱ꞌ te̱ ni̱ sa̱ndiꞌiꞌ ra̱ ña̱ nataꞌviꞌ ra̱ ñu̱ꞌuꞌ ja̱a̱nꞌ nda̱ꞌaꞌ sa̱kuuꞌ ne̱ vi̱ꞌe̱ Israel.