Yoꞌoꞌ kaꞌán a̱ xaꞌa̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ i̱nga̱ ti̱ꞌvi̱ ne̱ vi̱ꞌe̱ Israel
18
Kii̱ꞌ ndi̱ꞌi̱ ni̱ na̱ꞌi̱ ne̱ vi̱ꞌe̱ Israel ka̱niiꞌ ñu̱ꞌuꞌ ja̱a̱nꞌ ndii,
ni̱ na̱kaya̱ sa̱kuuꞌ ni̱a̱ ñu̱u̱ Silo.
Te̱ i̱kanꞌ ni̱ xa̱ꞌa̱ ni̱a̱ vi̱ꞌe̱ toto̱ miiꞌ nakayá ni̱a̱ xakaꞌnuꞌ ni̱a̱ Ndiosí.
2 Ndisu̱ ni̱ ndoo̱ ka̱ uxa̱ taꞌan ti̱ꞌvi̱ ne̱ vi̱ꞌe̱ Israel,
ne̱ köo̱ꞌ ñu̱ꞌuꞌ ni̱ ne̱ꞌi̱ ku̱ndu̱u̱ ña̱ꞌa̱ ni̱a̱.
3 Sa̱kanꞌ te̱ ni̱ kaꞌa̱n Josué xiinꞌ ne̱ vi̱ꞌe̱ Israel ndii:
―¿Sa̱a̱ ka̱ vi̱ꞌ taꞌan kivi̱ꞌ kuni ku̱ndi̱a̱tu̱ ndoꞌó te̱ kuꞌu̱n na̱ꞌi̱ ndo̱ꞌ ñu̱ꞌuꞌ ña̱ ni̱ ta̱xi̱ Yahvé,
Ndiosí ña̱ ni̱ xa̱kaꞌnuꞌ te̱ xii̱ꞌ ya̱taꞌ e̱ꞌ,
nda̱ꞌaꞌ ndo̱ꞌ?
4 Na̱ka̱xi̱n kiꞌi̱ꞌ i̱ꞌi̱n ti̱ꞌvi̱ ndo̱ꞌ uni̱ taꞌan te̱ yivi̱ꞌ,
te̱ ti̱ꞌviꞌ ña̱ꞌaꞌ i̱ te̱ kuꞌu̱n ku̱nu̱ndu̱u̱ ra̱ ka̱niiꞌ nuu̱ꞌ ñu̱ꞌuꞌ ja̱a̱nꞌ,
te̱ ku̱ni̱ ra̱ sa̱a̱ kaaꞌ a̱,
ndi̱ꞌi̱ ja̱a̱nꞌ te̱ na̱ndi̱koꞌ ra̱ te̱ kaꞌa̱n ra̱ xiinꞌ i̱ sa̱a̱ ku̱vi̱ na̱ta̱ꞌviꞌ e̱ꞌ e̱ nda̱ꞌaꞌ i̱ꞌi̱n ti̱ꞌvi̱ ndo̱ꞌ.
5 Te̱ ñu̱ꞌuꞌ ja̱a̱nꞌ ndii,
kuní a̱ na̱ta̱ꞌviꞌ ra̱ a̱ uxa̱ taꞌan tuꞌu̱nꞌ,
te̱ ñu̱ꞌuꞌ te̱ vi̱ꞌe̱ Judá ndii,
ninu̱ ndoo̱ ña̱ ja̱a̱nꞌ miiꞌ xa̱ ndieeꞌ ra̱,
te̱ ñu̱ꞌuꞌ te̱ vi̱ꞌe̱ José ndii,
ni̱nu̱ ndoo̱ a̱ ja̱a̱nꞌ miiꞌ xa̱ ndieeꞌ ra̱ ja̱a̱nꞌ.
6 Te̱ kii̱ꞌ xa̱ ndi̱ꞌi̱ ni̱ xi̱nu̱ndu̱u̱ ndo̱ꞌ xeꞌinꞌ ñu̱ꞌuꞌ ja̱a̱nꞌ,
te̱ ni̱ na̱ti̱soꞌ ndo̱ꞌ sa̱a̱ kaaꞌ a̱ nuu̱ꞌ i̱i̱n tu̱tu̱ ndii,
ki̱xi̱n ndi̱a̱ka̱ ndo̱ꞌ a̱ nda̱ꞌaꞌ i̱.
Te̱ yuꞌu̱ ka̱ti̱n a̱ yoꞌoꞌ nuu̱ꞌ Yahvé,
Ndiosí e̱ꞌ,
te̱ ku̱ni̱ e̱ꞌ ndee ñu̱ꞌuꞌ ja̱a̱nꞌ ndoo̱ nda̱ꞌaꞌ i̱ꞌi̱n ti̱ꞌvi̱ ndo̱ꞌ.
7 Ndisu̱ ne̱ vi̱ꞌe̱ Leví ndii,
köo̱ꞌ ñu̱ꞌuꞌ na̱ti̱i̱n ne̱ ja̱a̱nꞌ te̱i̱n yooꞌ,
sa̱kanꞌ ña̱ tyu̱u̱n sutu̱ ña̱ ka̱ka̱ nu̱u̱ ra̱ nuu̱ꞌ Yahvé,
Ndiosí e̱ꞌ,
nduuꞌ ña̱ ndoo̱ nda̱ꞌaꞌ te̱ ja̱a̱nꞌ sa̱a̱ ra̱.
Te̱ sa̱kanꞌ tu̱ ne̱ vi̱ꞌe̱ Gad,
xiinꞌ ne̱ vi̱ꞌe̱ Rubén,
xiinꞌ taꞌvi̱ꞌ sa̱va̱ ne̱ vi̱ꞌe̱ Manasés ndii,
köo̱ꞌ ka̱ ñu̱ꞌuꞌ ne̱ꞌi̱ te̱ ja̱a̱nꞌ,
sa̱kanꞌ ña̱ xa̱ ni̱ ne̱ꞌi̱ ra̱ ñu̱ꞌuꞌ ña̱ ni̱ ta̱xi̱ Moisés,
te̱ ni̱ xika̱ nu̱u̱ nuu̱ꞌ Yahvé,
nda̱ꞌaꞌ ra̱ tu̱ku̱ taꞌviꞌ yu̱ꞌuꞌ i̱ti̱a̱ Jordán,
xtoꞌniꞌ miiꞌ ketá ñu̱ꞌu̱ ―ni̱ katyi̱ Josué xiinꞌ ra̱.
8 Te̱ kii̱ꞌ xa̱ yoo tu̱ꞌva̱ te̱ yivi̱ꞌ,
te̱ ni̱ na̱ka̱xi̱n ni̱a̱ kuꞌu̱n ko̱to̱ sa̱a̱ kaaꞌ ñu̱ꞌuꞌ ja̱a̱nꞌ,
te̱ ni̱ kaꞌa̱n Josué xiinꞌ ra̱ ndii:
―Kuaꞌan ndo̱ꞌ te̱ ko̱to̱ ndiꞌi̱ ndo̱ꞌ sa̱a̱ kaaꞌ ñu̱ꞌuꞌ ja̱a̱nꞌ,
te̱ ke̱ꞌi̱ ndo̱ꞌ a̱ nuu̱ꞌ i̱i̱n tu̱tu̱.
Te̱ kii̱ꞌ ndi̱ꞌi̱ sa̱a̱ ndo̱ꞌ ña̱ ja̱a̱nꞌ,
te̱ na̱ndi̱koꞌ ndo̱ꞌ nuu̱ꞌ i̱,
te̱ na̱ta̱ꞌviꞌ i̱ ñu̱ꞌuꞌ ja̱a̱nꞌ nda̱ꞌaꞌ ndo̱ꞌ xiinꞌ ña̱ ka̱ti̱n i̱ nuu̱ꞌ Yahvé,
Ndiosí e̱ꞌ,
ñu̱u̱ Silo miiꞌ ndieeꞌ yoꞌoꞌ ―ni̱ katyi̱ ra̱.
9 Sa̱kanꞌ na kuiiꞌ te̱ yivi̱ꞌ ja̱a̱nꞌ ndii,
ni̱ xa̱a̱ ra̱ sa̱kuuꞌ ña̱ ni̱ kaꞌa̱n tyuunꞌ Josué xiinꞌ ra̱,
te̱ ni̱ sa̱nianiaꞌ ra̱ nuu̱ꞌ i̱i̱n tu̱tu̱ ka̱niiꞌ nuu̱ꞌ ñu̱ꞌuꞌ ja̱a̱nꞌ,
te̱ ni̱ sa̱na̱kuatyiꞌ ra̱ a̱ uxa̱ taꞌan tuꞌu̱nꞌ,
te̱ ni̱ na̱ti̱soꞌ tu̱ ra̱ kivi̱ꞌ i̱ꞌi̱n ñu̱u̱ ña̱ ñuꞌuꞌ nuu̱ꞌ i̱ꞌi̱n tuꞌu̱nꞌ ñu̱ꞌuꞌ ja̱a̱nꞌ.
Sa̱kuuꞌ a̱ ni̱ na̱ti̱soꞌ ra̱ nuu̱ꞌ tu̱tu̱,
ndi̱ꞌi̱ ja̱a̱nꞌ te̱ ni̱ na̱ndi̱koꞌ ra̱ nuu̱ꞌ Josué ñu̱u̱ Silo miiꞌ nduꞌu̱ꞌ ra̱ vi̱ꞌe̱ toto̱.
10 Te̱ ñu̱u̱ Silo ja̱a̱nꞌ ni̱ ka̱ti̱n Josué ñu̱ꞌuꞌ ja̱a̱nꞌ nuu̱ꞌ Yahvé,
te̱ ku̱ni̱ ra̱ ndee tuꞌu̱nꞌ ñu̱ꞌuꞌ ja̱a̱nꞌ ndoo̱ nda̱ꞌaꞌ i̱ꞌi̱n ti̱ꞌvi̱ te̱ ja̱a̱nꞌ,
te̱ i̱kanꞌ tu̱ ni̱ na̱ta̱ꞌviꞌ ra̱ a̱ ni̱ ta̱xi̱ ra̱ nda̱ꞌaꞌ i̱ꞌi̱n ti̱ꞌvi̱ ra̱.
Yoꞌoꞌ kaꞌán a̱ xaꞌa̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ ti̱ꞌvi̱ ne̱ vi̱ꞌe̱ Benjamín
11 Te̱ kii̱ꞌ ni̱ ka̱ti̱n Josué ñu̱ꞌuꞌ ja̱a̱nꞌ ndii,
xi̱ꞌna̱ ka̱ ti̱ꞌvi̱ ne̱ vi̱ꞌe̱ Banjamín ni̱ ta̱xi̱ ra̱ ñu̱ꞌuꞌ nda̱ꞌaꞌ sa̱a̱ ka̱ taꞌan kuuꞌ ra̱.
Te̱ ñu̱ꞌuꞌ ña̱ ni̱ ta̱xi̱ ra̱ nda̱ꞌaꞌ te̱ ja̱a̱nꞌ ndii,
ma̱ꞌiꞌ ndoó a̱ te̱i̱n ñu̱ꞌuꞌ ña̱ ni̱ ta̱xi̱ ra̱ nda̱ꞌaꞌ ti̱ꞌvi̱ ne̱ vi̱ꞌe̱ Judá xiinꞌ ne̱ vi̱ꞌe̱ José.
12 Te̱ xeꞌinꞌ ñu̱ꞌuꞌ ne̱ vi̱ꞌe̱ Benjamín ja̱a̱nꞌ ndii,
xaꞌaꞌ a̱ yu̱ꞌuꞌ i̱ti̱a̱ Jordán ni̱nu̱,
te̱ kuaꞌa̱n ka̱a̱ a̱ xi̱i̱nꞌ ñu̱u̱ Jericó ni̱nu̱,
i̱kanꞌ te̱ kuaꞌa̱n ka̱a̱ a̱ nde̱e̱ te̱i̱n i̱kuꞌ xtoꞌniꞌ miiꞌ ketá ñu̱ꞌu̱,
te̱ naxaá a̱ nde̱e̱ miiꞌ i̱tyi kaaꞌ miiꞌ naniꞌ Bet-avén.
13 Te̱ nde̱e̱ i̱kanꞌ kieeꞌ a̱ te̱ xkaꞌndíá a̱ nde̱e̱ ñu̱u̱ Luz,
ña̱ naniꞌ tu̱ Bet-el,
xi̱i̱nꞌ a̱ ninu̱,
te̱ i̱kanꞌ kieeꞌ a̱ te̱ nakaa̱ꞌ a̱ nde̱e̱ ñu̱u̱ Atarot-adar,
te̱ nde̱e̱ ñu̱u̱ Atarot-adar ja̱a̱nꞌ kieeꞌ a̱ te̱ nakaa̱ꞌ a̱ nde̱e̱ te̱i̱n i̱kuꞌ ña̱ itaꞌ xi̱i̱nꞌ ñu̱u̱ Bet-horón ña̱ kanduꞌu̱ꞌ ninu̱.
14 Te̱ i̱kanꞌ kieeꞌ xeꞌinꞌ ja̱a̱nꞌ te̱ ndikoꞌ kuiín a̱ kuaꞌa̱n a̱ xtoꞌniꞌ miiꞌ ketá ñu̱ꞌu̱ xi̱i̱nꞌ i̱kuꞌ ña̱ itaꞌ ñu̱u̱ Bet-horón ninu̱,
te̱ xeꞌinꞌ ña̱ kuaꞌa̱n xtoꞌniꞌ miiꞌ ketá ñu̱ꞌu̱ ndii,
ku̱a̱xi̱ a̱ naxaá a̱ nde̱e̱ ñu̱u̱ Quiriat-baal,
ña̱ naniꞌ tu̱ Quiriat-jearim,
te̱ ñu̱u̱ ja̱a̱nꞌ nduuꞌ miiꞌ ndieeꞌ ne̱ vi̱ꞌe̱ Judá,
te̱ xtoꞌniꞌ miiꞌ ketá ñu̱ꞌu̱ nduuꞌ a̱ i̱kanꞌ.
15 Te̱ xeꞌinꞌ ña̱ kuaꞌa̱n ninu̱ ndii,
xaꞌaꞌ a̱ nde̱e̱ miiꞌ xaꞌa̱n ndi̱ꞌi̱ ñu̱u̱ Quiriat-jearim,
te̱ nde̱e̱ i̱kanꞌ kieeꞌ a̱ te̱ naxaá a̱ nde̱e̱ miiꞌ yoo ti̱ko̱ꞌyoꞌ ña̱ naniꞌ Neftoa,
16 te̱ i̱kanꞌ kieeꞌ xeꞌinꞌ ja̱a̱nꞌ te̱ nakaa̱ꞌ a̱ nde̱e̱ tu̱ku̱ taꞌviꞌ miiꞌ xaꞌa̱n ndi̱ꞌi̱ xiki̱ꞌ ña̱ itaꞌ xtoꞌniꞌ miiꞌ kanduꞌu̱ꞌ yo̱soꞌ,
ña̱ nduuꞌ ña̱ꞌa̱ tiaa̱ siꞌe̱ Hinom ña̱ naá ni̱nu̱ xi̱i̱nꞌ yo̱soꞌ miiꞌ xikaꞌ te̱ vi̱ꞌe̱ Refaim.
I̱kanꞌ kieeꞌ a̱ te̱ nakaa̱ꞌ a̱ xi̱i̱nꞌ yo̱soꞌ Hinom,
te̱ xkaꞌndíá a̱ xi̱i̱nꞌ a̱ ninu̱ miiꞌ ndieeꞌ ne̱ vi̱ꞌe̱ jebuseo,
te̱ i̱kanꞌ kieeꞌ a̱ te̱ nakaa̱ꞌ a̱ nde̱e̱ miiꞌ iinꞌ ti̱ko̱ꞌyoꞌ ña̱ naniꞌ Rogel.
17 Te̱ i̱kanꞌ ndikoꞌ kuiín a̱ te̱ kuaꞌa̱n a̱ ni̱nu̱,
te̱ naxaá a̱ nde̱e̱ ñu̱u̱ En-semes,
te̱ nde̱e̱ i̱kanꞌ kieeꞌ a̱ te̱ kuaꞌa̱n a̱ nde̱e̱ ñu̱u̱ Gelilot,
ña̱ kanduꞌu̱ꞌ xi̱i̱nꞌ a̱ miiꞌ kuaꞌa̱n ka̱a̱ i̱tyiꞌ ña̱ kuaꞌa̱n ñu̱u̱ Adumín.
Ndi̱ꞌi̱ ja̱a̱nꞌ te̱ nakaa̱ꞌ a̱ nde̱e̱ miiꞌ nduꞌu̱ꞌ ka̱va̱ꞌ ña̱ nduuꞌ ña̱ꞌa̱ Bohán,
tiaa̱ siꞌe̱ Rubén.
18 Te̱ i̱kanꞌ kieeꞌ a̱ te̱ xkaꞌndíá a̱ xi̱i̱nꞌ i̱kuꞌ ni̱nu̱ xtoꞌniꞌ Arabá ña̱ kanduꞌu̱ꞌ yu̱ꞌuꞌ i̱ti̱a̱ Jordán,
te̱ nde̱e̱ i̱kanꞌ kieeꞌ a̱ te̱ nakaa̱ꞌ a̱ naxinú a̱ nde̱e̱ Arabá ja̱a̱nꞌ.
19 Te̱ i̱kanꞌ kieeꞌ xeꞌinꞌ ja̱a̱nꞌ te̱ xkaꞌndíá a̱ ni̱nu̱ xi̱i̱nꞌ ñu̱u̱ Bet-hogla,
te̱ kuaꞌa̱n ndi̱ꞌi̱ a̱ nde̱e̱ miiꞌ yoo nda̱ꞌaꞌ mi̱ni̱ uꞌva̱ ni̱nu̱,
nde̱e̱ miiꞌ kuaꞌa̱n ndi̱ꞌi̱ i̱ti̱a̱ Jordán ninu̱,
ña̱ ja̱a̱nꞌ nduuꞌ xeꞌinꞌ ra̱ ña̱ kuaꞌa̱n ninu̱.
20 Te̱ i̱ti̱a̱ Jordán ja̱a̱nꞌ nduuꞌ xeꞌinꞌ ña̱ kuaꞌa̱n xtoꞌniꞌ miiꞌ ketaꞌ ñu̱ꞌu̱.
Te̱ ña̱ ja̱a̱nꞌ nduuꞌ ñu̱ꞌuꞌ ña̱ ni̱ ndoo̱ nda̱ꞌaꞌ i̱ꞌi̱n ti̱ꞌvi̱ ne̱ vi̱ꞌe̱ Benjamín sa̱a̱ ka̱ taꞌan kuuꞌ ni̱a̱.
21 Te̱ sa̱kuuꞌ ñu̱u̱ miiꞌ ni̱ ndiee̱ i̱ꞌi̱n ti̱ꞌvi̱ ne̱ vi̱ꞌe̱ Benjamín ña̱ sa̱a̱ ka̱ taꞌan kuuꞌ ni̱a̱ ndii:
ñu̱u̱ Jericó,
xiinꞌ ñu̱u̱ Bet-hogla,
xiinꞌ yo̱soꞌ ña̱ naniꞌ Casis,
22 xiinꞌ ñu̱u̱ Bet-arabá,
xiinꞌ ñu̱u̱ Zemaraim,
xiinꞌ ñu̱u̱ Bet-el,
23 xiinꞌ ñu̱u̱ Avim,
xiinꞌ ñu̱u̱ Pará,
xiinꞌ ñu̱u̱ Ofra,
24 xiinꞌ ñu̱u̱ Quefar-haamoni,
xiinꞌ ñu̱u̱ Ofni,
xiinꞌ ñu̱u̱ Geba.
Uxi̱ uvi̱ sa̱aꞌ ñu̱u̱ kaa̱ꞌ xiinꞌ nda̱ꞌaꞌ a̱ ni̱ ndoo̱ nda̱ꞌaꞌ ni̱a̱ nduuꞌ ña̱ꞌa̱ ni̱a̱.
25 Te̱ sa̱kanꞌ tu̱ ñu̱u̱ Gabaón,
xiinꞌ ñu̱u̱ Ramá,
xiinꞌ ñu̱u̱ Beerot,
26 xiinꞌ ñu̱u̱ Mizpa,
xiinꞌ ñu̱u̱ Cafira,
xiinꞌ ñu̱u̱ Mozah,
27 xiinꞌ ñu̱u̱ Requem,
xiinꞌ ñu̱u̱ Irpeel,
xiinꞌ ñu̱u̱ Tarala,
28 xiinꞌ ñu̱u̱ Zela,
xiinꞌ ñu̱u̱ Elef,
xiinꞌ ñu̱u̱ Jebús,
ña̱ naniꞌ tu̱ Jerusalén,
xiinꞌ ñu̱u̱ Gabaa,
xiinꞌ ñu̱u̱ Quiriat,
uxi̱ ku̱miꞌ sa̱aꞌ ñu̱u̱ kaa̱ꞌ xiinꞌ nda̱ꞌaꞌ a̱ ni̱ ndoo̱ nda̱ꞌaꞌ ni̱a̱ nduuꞌ ña̱ꞌa̱ ni̱a̱.
Sa̱kuuꞌ ña̱ kaa̱ꞌ nduuꞌ ñu̱u̱ ña̱ ni̱ ndoo̱ nda̱ꞌaꞌ i̱ꞌi̱n ti̱ꞌvi̱ ne̱ vi̱ꞌe̱ Benjamín sa̱a̱ ka̱ taꞌan kuuꞌ ni̱a̱.