Yoꞌoꞌ kaꞌán a̱ xaꞌa̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ ne̱ vi̱ꞌe̱ Manasés
17
Te̱ ni̱ ka̱ti̱n tu̱ ra̱ ñu̱ꞌuꞌ ña̱ ndoo̱ nda̱ꞌaꞌ ti̱ꞌvi̱ te̱ vi̱ꞌe̱ Manasés,
sa̱kanꞌ ña̱ tiaa̱ siꞌe̱ nu̱uꞌ José nduuꞌ te̱ ja̱a̱nꞌ.
Te̱ ni̱ ka̱ti̱n tu̱ ra̱ ñu̱ꞌuꞌ ña̱ ndoo̱ nda̱ꞌaꞌ te̱ vi̱ꞌe̱ Maquir te̱ nduuꞌ tiaa̱ siꞌe̱ nu̱uꞌ Manasés,
te̱ te̱ ja̱a̱nꞌ ni̱ nduu̱ te̱ xíiꞌ ya̱taꞌ te̱ vi̱ꞌe̱ Galaad,
te̱ sa̱kuuꞌ te̱ ja̱a̱nꞌ ni̱ nduu̱ te̱ xíinꞌ,
te̱ tyu̱u̱n va̱ ku̱ntaꞌanꞌ,
te̱ ñu̱ꞌuꞌ Galaad,
xiinꞌ ñu̱ꞌuꞌ Basán,
ña̱ kanduꞌu̱ꞌ tu̱ku̱ taꞌviꞌ i̱ti̱a̱ Jordán,
xtoꞌniꞌ miiꞌ ketaꞌ ñu̱ꞌu̱ ni̱ ndoo̱ nda̱ꞌaꞌ sa̱kuuꞌ te̱ ja̱a̱nꞌ ku̱ndu̱u̱ ña̱ꞌa̱ ra̱.
2 Sa̱kanꞌ na kuiiꞌ ni̱ ka̱ti̱n tu̱ku̱u̱ ra̱,
te̱ ni̱ xi̱ni̱ ra̱ ndee ñu̱ꞌuꞌ ndoo̱ nda̱ꞌaꞌ i̱nga̱ ti̱ꞌvi̱ siꞌe̱ Manasés,
sa̱a̱ ka̱ taꞌan kuuꞌ ni̱a̱:
ne̱ nduuꞌ ne̱ vi̱ꞌe̱ Abiezer,
xiinꞌ ne̱ vi̱ꞌe̱ Helec,
xiinꞌ ne̱ vi̱ꞌe̱ Asriel,
xiinꞌ ne̱ vi̱ꞌe̱ Siquem,
xiinꞌ ne̱ vi̱ꞌe̱ Hefer,
xiinꞌ ne̱ vi̱ꞌe̱ Semida.
Sa̱kuuꞌ te̱ ja̱a̱nꞌ ni̱ nduu̱ tiaa̱ siꞌe̱ Manasés,
te̱ xii̱ꞌ sa̱kuuꞌ ra̱ ni̱ nduu̱ José.
3 Ndisu̱ Zelofehad ndii,
köo̱ꞌ nde̱e̱ i̱i̱n tiaa̱ siꞌe̱ ra̱ ni̱ yoo̱,
süu̱ꞌ ja̱a̱nꞌ ndii,
ña̱ꞌaꞌ siꞌe̱ ku̱i̱ti̱ꞌ ra̱ ni̱ yoo̱ uꞌu̱n taꞌan:
i̱i̱n aꞌ ni̱ na̱niꞌ Maala,
te̱ i̱nga̱ aꞌ ni̱ na̱niꞌ Noa,
te̱ i̱nga̱ aꞌ ni̱ na̱niꞌ Hogla,
te̱ i̱nga̱ aꞌ ni̱ na̱niꞌ Milca,
te̱ i̱nga̱ ka̱ aꞌ ni̱ na̱niꞌ Tirsa.
Te̱ Zelofehad ja̱a̱nꞌ ndii,
siꞌe̱ Hefer,
te̱ nduuꞌ si̱a̱niꞌ Galaad ni̱ nduu̱ ra̱,
te̱ Galaad ja̱a̱nꞌ ndii,
siꞌe̱ Maquir,
te̱ nduuꞌ si̱a̱niꞌ Manasés ni̱ nduu̱ ra̱.
4 Te̱ ni̱ xaꞌa̱n ña̱ꞌaꞌ siꞌe̱ ra̱ ja̱a̱nꞌ nuu̱ꞌ sutu̱ Eleazar,
xiinꞌ nuu̱ꞌ Josué,
siꞌe̱ Nun,
xiinꞌ nuu̱ꞌ sa̱kuuꞌ te̱ xi̱xa̱ nuu̱ꞌ ne̱ vi̱ꞌe̱ Israel,
te̱ ni̱ kaꞌa̱n ni̱a̱ xiinꞌ ra̱ ndii:
―Ni̱ kaꞌa̱n tyuunꞌ Yahvé xiinꞌ Moisés ña̱ ta̱xi̱ ndo̱ꞌ ñu̱ꞌuꞌ nda̱ꞌaꞌ ndu̱ ku̱ndu̱u̱ ña̱ꞌa̱ ndu̱ nde̱e̱ naa xaaꞌ ndo̱ꞌ xiinꞌ sa̱kuuꞌ tiaa̱ te̱ i̱i̱n kuuꞌ xiinꞌ e̱ꞌ ―ni̱ katyi̱ ni̱a̱.
Sa̱kanꞌ na kuiiꞌ ni̱ ta̱xi̱ ra̱ ñu̱ꞌuꞌ nda̱ꞌaꞌ ni̱a̱ ku̱ndu̱u̱ ña̱ꞌa̱ ni̱a̱ nde̱e̱ naa ni̱ xa̱a̱ ra̱ xiinꞌ sa̱kuuꞌ xi̱to̱ ni̱a̱,
te̱ nduuꞌ ña̱ni̱ yu̱vaꞌ ni̱a̱,
sa̱a̱ niiꞌ ni̱ kaꞌa̱n tyuunꞌ Yahvé.
5 Xaꞌa̱ꞌ a̱ ja̱a̱nꞌ na te̱ vi̱ꞌe̱ Manasés ndii,
ni̱ na̱ti̱i̱n ra̱ uxi̱ taꞌan ka̱ ñu̱ꞌuꞌ ku̱ndu̱u̱ ña̱ꞌa̱ ra̱,
te̱ xa̱ i̱i̱n kuuꞌ miiꞌ ñu̱ꞌuꞌ Galaad xiinꞌ ñu̱ꞌuꞌ Basán ña̱ ndieeꞌ tu̱ku̱ taꞌviꞌ i̱ti̱a̱ Jordán.
6 Sa̱kanꞌ ña̱ ni̱ na̱ti̱i̱n tu̱ ña̱ꞌaꞌ siꞌe̱ Manasés ja̱a̱nꞌ ñu̱ꞌuꞌ ku̱ndu̱u̱ ña̱ꞌa̱ ni̱a̱ nde̱e̱ naa ni̱ xa̱a̱ ra̱ xiinꞌ sa̱kuuꞌ tiaa̱ siꞌe̱ ra̱.
Sa̱kanꞌ ña̱ ñu̱ꞌuꞌ Galaad ndii,
nda̱ꞌaꞌ tu̱ku̱ tiaa̱ siꞌe̱ Manasés ja̱a̱nꞌ ni̱ ndoo̱ a̱ ku̱ndu̱u̱ ña̱ꞌa̱ ra̱.
7 Te̱ xeꞌinꞌ ñu̱ꞌuꞌ ña̱ ni̱ ndoo̱ nda̱ꞌaꞌ si̱a̱niꞌ xikaꞌ Manasés ndii,
nakaá a̱ kuaꞌa̱n a̱ nde̱e̱ miiꞌ xaꞌaꞌ xeꞌinꞌ nuu̱ꞌ ñu̱ꞌuꞌ Aser,
te̱ naxaá a̱ nde̱e̱ ñu̱u̱ Micmetat,
ña̱ kanduꞌu̱ꞌ xtoꞌniꞌ miiꞌ naá ñu̱u̱ Siquem,
te̱ i̱kanꞌ kieeꞌ a̱ te̱ kuaꞌa̱n a̱ nde̱e̱ ninu̱,
nde̱e̱ nuu̱ꞌ ñu̱ꞌuꞌ miiꞌ i̱i̱n ti̱ko̱ꞌyoꞌ ña̱ naniꞌ Tapúa.
8 Tee̱ꞌ ndee ña̱ꞌa̱ ne̱ vi̱ꞌe̱ Manasés ni̱ nduu̱ ñu̱ꞌuꞌ Tapúa ja̱a̱nꞌ,
ndisu̱ mi̱iꞌ ñu̱u̱ Tapúa,
ña̱ kanduꞌu̱ꞌ xeꞌinꞌ ñu̱ꞌuꞌ ne̱ vi̱ꞌe̱ Manasés ndii,
ña̱ꞌa̱ ne̱ vi̱ꞌe̱ Efraín ni̱ nduu̱ a̱.
9 Te̱ xeꞌinꞌ ñu̱ꞌuꞌ ja̱a̱nꞌ ndii,
nakaa̱ꞌ a̱ nde̱e̱ yivi̱ ña̱ naniꞌ Caná xi̱i̱nꞌ a̱ ninu̱,
te̱ naxinú a̱ nde̱e̱ mi̱ni̱ kaꞌnuꞌ Mediterráneo.
Te̱ kiꞌinꞌ ñu̱u̱ miiꞌ ndieeꞌ ne̱ vi̱ꞌe̱ Manasés ja̱a̱nꞌ ñuꞌuꞌ yu̱ꞌuꞌ yivi̱ Caná ja̱a̱nꞌ,
ndisu̱ ñu̱ꞌuꞌ ne̱ vi̱ꞌe̱ Efraín nduuꞌ a̱ i̱kanꞌ.
10 Ñu̱ꞌuꞌ te̱ vi̱ꞌe̱ Efraín ndii,
yu̱ꞌuꞌ yivi̱ Caná ninu̱ yooꞌ xeꞌinꞌ a̱,
te̱ ñu̱ꞌuꞌ te̱ vi̱ꞌe̱ Manasés ndii,
yu̱ꞌuꞌ yivi̱ꞌ ni̱nu̱ yoo xeꞌinꞌ a̱,
te̱ kuaꞌa̱n ndi̱ꞌi̱ a̱ nde̱e̱ yu̱ꞌuꞌ mi̱ni̱ kaꞌnuꞌ Mediterráneo.
Te̱ xeꞌinꞌ ñu̱ꞌuꞌ Manasés ni̱nu̱ nduiinꞌ ñu̱ꞌuꞌ ra̱ xiinꞌ ñu̱ꞌuꞌ te̱ vi̱ꞌe̱ Aser,
te̱ xeꞌinꞌ a̱ xtoꞌniꞌ miiꞌ ketaꞌ ñu̱ꞌu̱ ndii,
nduiinꞌ a̱ xiinꞌ ñu̱ꞌuꞌ te̱ vi̱ꞌe̱ Isacar.
11 Te̱ ni̱ yoo̱ tu̱ kiꞌinꞌ ñu̱u̱ xiinꞌ nda̱ꞌaꞌ a̱ ña̱ ñuꞌuꞌ ya̱ti̱n ña̱ ni̱ nduu̱ ña̱ꞌa̱ ne̱ vi̱ꞌe̱ Manasés nuu̱ꞌ ñu̱ꞌuꞌ miiꞌ ndieeꞌ ne̱ vi̱ꞌe̱ Isacar xiinꞌ miiꞌ ndieeꞌ ne̱ vi̱ꞌe̱ Aser:
Ñu̱u̱ Bet-seán xiinꞌ nda̱ꞌaꞌ a̱,
xiinꞌ ñu̱u̱ Ibleam xiinꞌ nda̱ꞌaꞌ a̱,
xiinꞌ ñu̱u̱ Dor,
ña̱ naniꞌ tu̱ Nafot-dor,
xiinꞌ ñu̱u̱ Endor,
xiinꞌ ñu̱u̱ Taanac,
xiinꞌ ñu̱u̱ Meguido,
xiinꞌ sa̱kuuꞌ ne̱ yivi̱ꞌ,
ne̱ ndieeꞌ i̱ꞌi̱n uni̱ sa̱aꞌ nda̱ꞌaꞌ ñu̱u̱ ja̱a̱nꞌ.
12 Ndisu̱ nï̱ ku̱vi̱ ku̱ndi̱e̱e̱ ne̱ vi̱ꞌe̱ Manasés nde̱e̱ i̱i̱n ñu̱u̱ ja̱a̱nꞌ,
sa̱kanꞌ ña̱ nï̱ ku̱vi̱ ta̱va̱ꞌ ni̱a̱ ne̱ vi̱ꞌe̱ cananeo,
ne̱ ndieeꞌ i̱kanꞌ.
13 Nde̱e̱ sa̱a̱ ka̱ ni̱ ndii,
kii̱ꞌ ni̱ na̱koo̱ kuaꞌa̱ꞌ ka̱ ndi̱e̱e̱ꞌ ne̱ vi̱ꞌe̱ Israel ndii,
ni̱ ti̱i̱n uꞌvi̱ ni̱a̱ sa̱kuuꞌ ne̱ vi̱ꞌe̱ cananeo ja̱a̱nꞌ,
te̱ ni̱ nda̱sa̱ nduuꞌ ña̱ꞌaꞌ ni̱a̱ ne̱ xikaꞌ nuuꞌ so̱ꞌo̱ nuu̱ꞌ ni̱a̱,
ndisu̱ nï̱ ta̱va̱ꞌ ña̱ꞌaꞌ ni̱a̱ nuu̱ꞌ ñu̱ꞌuꞌ ja̱a̱nꞌ.
14 Untaꞌ ndii,
ni̱ xaꞌa̱n tiaa̱ si̱a̱niꞌ xikaꞌ José nuu̱ꞌ Josué,
te̱ ni̱ kaꞌa̱n ra̱ ndii:
―¿Ndiotyun na kii̱ꞌ ni̱ ka̱ti̱n ndo̱ꞌ ndii,
ni̱ ta̱xi̱ u̱nꞌ siee ku̱i̱ti̱ꞌ ñu̱ꞌuꞌ ku̱ndi̱e̱e̱ ndu̱?
Ni̱ sa̱ñuꞌuꞌ xa̱va̱ꞌa̱ Yahvé nduꞌu̱,
te̱ vi̱ti̱n ndii,
ni̱ ku̱u̱ kuaꞌa̱ꞌ va̱ ndu̱,
te̱ nï̱a̱ni̱ ka̱ nuu̱ꞌ ñu̱ꞌuꞌ ja̱a̱nꞌ ku̱ndi̱e̱e̱ ndu̱ ―ni̱ katyi̱ ra̱.
15 Sa̱kanꞌ te̱ ni̱ kaꞌa̱n Josué xiinꞌ ra̱ ndii:
―Naaꞌ kuaꞌa̱ꞌ yaꞌa̱ ndo̱ꞌ tuu ndo̱ꞌ ndii,
kuaꞌan ka̱a̱ ndo̱ꞌ te̱i̱n i̱kuꞌ te̱ ku̱tu̱ ndo̱ꞌ ka̱niiꞌ i̱kanꞌ ku̱ndi̱e̱e̱ ndo̱ꞌ nuu̱ꞌ ñu̱ꞌuꞌ ne̱ vi̱ꞌe̱ ferezeo xiinꞌ nuu̱ꞌ ñu̱ꞌuꞌ ne̱ vi̱ꞌe̱ Refaim,
naaꞌ nï̱a̱ni̱ ka̱ nuu̱ꞌ ñu̱ꞌuꞌ ne̱ vi̱ꞌe̱ Efraín ku̱ndi̱e̱e̱ ndo̱ꞌ ―ni̱ katyi̱ ra̱.
16 Te̱ ni̱ na̱ku̱i̱i̱n si̱a̱niꞌ José kaꞌán ra̱ ndii:
―Ña̱ nda̱ku nduuꞌ a̱ ndii,
nï̱a̱ni̱ te̱i̱n i̱kuꞌ kaa̱ꞌ ku̱ndi̱e̱e̱ ndu̱.
Ndisu̱ te̱ vi̱ꞌe̱ cananeo,
te̱ ndieeꞌ yo̱soꞌ ndii,
kumiꞌ ra̱ carreta,
tunꞌ ni̱ ku̱a̱ꞌa̱ xiinꞌ ka̱a̱ tiꞌeꞌ va̱,
te̱ sa̱kanꞌ tu̱ te̱ ndieeꞌ ñu̱u̱ Bet-seán xiinꞌ nda̱ꞌaꞌ a̱,
te̱ sa̱kanꞌ tu̱ te̱ ndieeꞌ yo̱soꞌ ña̱ naniꞌ Jezreel ―ni̱ katyi̱ ra̱.
17 Sa̱kanꞌ te̱ ni̱ kaꞌa̱n Josué xiinꞌ ne̱ vi̱ꞌe̱ José,
xiinꞌ ne̱ vi̱ꞌe̱ Efraín,
xiinꞌ ne̱ vi̱ꞌe̱ Manasés ndii:
―Kuaꞌa̱ꞌ xa̱va̱ꞌa̱ ndoꞌó,
te̱ kooꞌ tyukuuꞌ xa̱va̱ꞌa̱ tu̱ ndo̱ꞌ.
Süu̱ꞌ i̱i̱n xaanꞌ ku̱i̱ti̱ꞌ ko̱o̱ ñu̱ꞌuꞌ ndo̱ꞌ,
18 süu̱ꞌ ja̱a̱nꞌ ndii,
ña̱ꞌa̱ tu̱ ndo̱ꞌ ku̱ndu̱u̱ xiki̱ꞌ kaa̱ꞌ,
sa̱kanꞌ ña̱ tee̱ꞌ ndee kuꞌu̱ xi̱xa̱ va̱ nduuꞌ a̱ ndii,
ndoꞌó ku̱tu̱ ka̱niiꞌ a̱ te̱ ku̱ndi̱e̱e̱ ndo̱ꞌ nuu̱ꞌ a̱ nde̱e̱ miiꞌ ni̱ xaꞌa̱n ndi̱koꞌ xeꞌinꞌ a̱.
Sa̱kanꞌ ña̱ ndoꞌó ta̱va̱ꞌ te̱ vi̱ꞌe̱ cananeo,
tee̱ꞌ ndee kumiꞌ ra̱ carreta,
tunꞌ ni̱ ku̱a̱ꞌa̱ xiinꞌ ka̱a̱ tiꞌeꞌ va̱,
te̱ kooꞌ tyukuuꞌ va̱ tu̱ ra̱ ―ni̱ katyi̱ ra̱.