Yoꞌoꞌ kaꞌán xaꞌa̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ ne̱ vi̱ꞌe̱ Efraín xiinꞌ ne̱ vi̱ꞌe̱ Manasés
16
Te̱ kii̱ꞌ kati̱n ra̱ ñu̱ꞌuꞌ ndii,
ni̱ xi̱ni̱ ra̱ ña̱ ñu̱ꞌuꞌ ña̱ ndoo̱ nda̱ꞌaꞌ tiaa̱ siꞌe̱ José ndii,
xa̱ꞌaꞌ a̱ nde̱e̱ yu̱ꞌuꞌ i̱ti̱a̱ Jordán,
miiꞌ yoo ti̱ko̱ꞌyoꞌ ñu̱u̱ Jericó,
xtoꞌniꞌ miiꞌ ketaꞌ ñu̱ꞌu̱,
te̱ i̱kanꞌ kieeꞌ a̱ te̱ kuaꞌa̱n ka̱a̱ a̱ nde̱e̱ te̱i̱n i̱kuꞌ miiꞌ kanduꞌu̱ꞌ ñu̱u̱ Bet-el.
2 Te̱ nde̱e̱ ñu̱u̱ Bet-el ja̱a̱nꞌ kieeꞌ a̱ te̱ kuaꞌa̱n a̱ naxaá a̱ nde̱e̱ miiꞌ kanduꞌu̱ꞌ ñu̱u̱ Luz,
te̱ xkaꞌndíá sa̱a̱ kuaꞌa̱n nuu̱ꞌ ñu̱ꞌuꞌ te̱ vi̱ꞌe̱ arquita,
te̱ naxaá a̱ nde̱e̱ ñu̱u̱ Atarot,
3 te̱ i̱kanꞌ kieeꞌ a̱ te̱ nakaa̱ꞌ a̱ nde̱e̱ nuu̱ꞌ ñu̱ꞌuꞌ ne̱ vi̱ꞌe̱ jafleteo xtoꞌniꞌ miiꞌ ketá ñu̱ꞌu̱,
te̱ naxaá a̱ nde̱e̱ ñu̱u̱ Bet-horón ña̱ kanduꞌu̱ꞌ ninu̱,
te̱ i̱kanꞌ kieeꞌ a̱ te̱ kuaꞌa̱n a̱ nde̱e̱ ñu̱u̱ Gezer,
te̱ naxaá a̱ nde̱e̱ mi̱ni̱ kaꞌnuꞌ Mediterráneo.
4 Sa̱kuuꞌ ña̱ ja̱a̱nꞌ nduuꞌ ñu̱ꞌuꞌ ña̱ ni̱ na̱ti̱i̱n si̱a̱niꞌ xikaꞌ José ku̱ndu̱u̱ ña̱ꞌa̱ ni̱a̱,
ne̱ vi̱ꞌe̱ Efraín xiinꞌ ne̱ vi̱ꞌe̱ Manasés.
5 Yoꞌoꞌ kaꞌán a̱ xaꞌa̱ꞌ miiꞌ kuaꞌa̱n xeꞌinꞌ ñu̱ꞌuꞌ ña̱ ni̱ ndoo̱ nda̱ꞌaꞌ ne̱ vi̱ꞌe̱ Efraín sa̱a̱ ka̱ taꞌan kuuꞌ ni̱a̱.
Xeꞌinꞌ ñu̱ꞌuꞌ ni̱a̱,
ña̱ kuaꞌa̱n xtoꞌniꞌ miiꞌ ketaꞌ ñu̱ꞌu̱ ndii,
xa̱ꞌaꞌ a̱ nde̱e̱ ñu̱u̱ Atarot-adar,
te̱ i̱kanꞌ kieeꞌ a̱ te̱ kuaꞌa̱n a̱ nde̱e̱ ñu̱u̱ Bet-horón ña̱ kanduꞌu̱ꞌ ndi̱e̱nu̱.
6 Te̱ nakaá xeꞌinꞌ ja̱a̱nꞌ kuaꞌa̱n a̱ nde̱e̱ yu̱ꞌuꞌ mi̱ni̱ kaꞌnuꞌ Mediterráneo,
te̱ naxaá a̱ nde̱e̱ ñu̱u̱ Micmetat ña̱ naá ni̱nu̱,
te̱ i̱kanꞌ kieeꞌ a̱ te̱ ndikoꞌ kuiín a̱ kuaꞌa̱n a̱ nde̱e̱ ñu̱u̱ Taanat-silo xtoꞌniꞌ miiꞌ ketaꞌ ñu̱ꞌu̱,
te̱ i̱kanꞌ kieeꞌ a̱ te̱ xkaꞌndíá nde̱e̱ ñu̱u̱ Janoa.
7 Te̱ ñu̱u̱ Janoa ja̱a̱nꞌ kieeꞌ a̱ te̱ nakaa̱ꞌ a̱ nde̱e̱ ñu̱u̱ Atarot xiinꞌ ñu̱u̱ Naarat,
te̱ tondíá a̱ nde̱e̱ ñu̱u̱ Jericó,
te̱ naxaá a̱ nde̱e̱ i̱ti̱a̱ Jordán.
8 Te̱ nde̱e̱ ñu̱u̱ Tapúa kieeꞌ a̱ te̱ nakaa̱ꞌ a̱ kuaꞌa̱n yu̱ꞌuꞌ yivi̱ ña̱ naniꞌ Caná,
te̱ naxaá a̱ nde̱e̱ mi̱ni̱ kaꞌnuꞌ Mediterráneo.
Ña̱ kaa̱ꞌ nduuꞌ ñu̱ꞌuꞌ ña̱ ni̱ ndoo̱ nda̱ꞌaꞌ i̱ꞌi̱n ti̱ꞌvi̱ ne̱ vi̱ꞌe̱ Efraín nduuꞌ ña̱ꞌa̱ ni̱a̱.
9 Ni̱ yoo̱ tu̱ sa̱va̱ ñu̱u̱ xiinꞌ nda̱ꞌaꞌ a̱ nuu̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ ne̱ vi̱ꞌe̱ Manasés,
te̱ ni̱ ne̱ꞌi̱ ña̱ꞌaꞌ ne̱ vi̱ꞌe̱ Efraín ni̱ na̱ndu̱u̱ ña̱ꞌa̱ ni̱a̱.
10 Ne̱ vi̱ꞌe̱ cananeo,
ne̱ ni̱ ndiee̱ ñu̱u̱ Gezer ndii,
nï̱ ta̱va̱ꞌ ña̱ꞌaꞌ ne̱ vi̱ꞌe̱ Efraín i̱kanꞌ,
süu̱ꞌ ja̱a̱nꞌ ndii,
ni̱ ndoo̱ ne̱ ja̱a̱nꞌ ndieeꞌ ni̱a̱ te̱i̱n ne̱ vi̱ꞌe̱ Efraín nde̱e̱ kivi̱ꞌ vi̱ti̱n.
Ndisu̱ ni̱ ndoo̱ ni̱a̱ ndieeꞌ ni̱a̱ i̱kanꞌ te̱ ku̱ndu̱u̱ ni̱a̱ ne̱ xikaꞌ nuuꞌ so̱ꞌo̱ nuu̱ꞌ ne̱ vi̱ꞌe̱ Efraín ja̱a̱nꞌ.