Yoꞌoꞌ kaꞌán a̱ xaꞌa̱ꞌ ña̱ ni̱ na̱ta̱ꞌviꞌ Josué ñu̱ꞌuꞌ Canaán nda̱ꞌaꞌ ne̱ vi̱ꞌe̱ Israel xiinꞌ ña̱ kati̱n
14
Ña̱ yo̱ꞌo̱ꞌ nduuꞌ ñu̱ꞌuꞌ ña̱ ni̱ na̱ꞌi̱ i̱ꞌi̱n ti̱ꞌvi̱ ne̱ vi̱ꞌe̱ Israel ku̱ndu̱u̱ ña̱ꞌa̱ ni̱a̱ nuu̱ꞌ ñu̱ꞌuꞌ Canaán,
ña̱ ni̱ na̱ta̱ꞌviꞌ sutu̱,
te̱ naniꞌ Eleazar,
xiinꞌ Josué,
siꞌe̱ Nun,
xiinꞌ sa̱kuuꞌ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ Israel.
2 Xiinꞌ ña̱ kati̱n ni̱ ta̱xi̱ ra̱ ñu̱ꞌuꞌ ja̱a̱nꞌ nda̱ꞌaꞌ ni̱a̱ sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés,
ña̱ ta̱xi̱ ra̱ ñu̱ꞌuꞌ ja̱a̱nꞌ nda̱ꞌaꞌ íin ti̱vi̱ yoso̱ꞌ sa̱va̱ ne̱ vi̱ꞌe̱ Israel ja̱a̱nꞌ.
3 Sa̱kanꞌ ña̱ xa̱ ni̱ ta̱xi̱ ra̱ ñu̱ꞌuꞌ nda̱ꞌaꞌ uvi̱ taꞌan ti̱ꞌvi̱ yoso̱ꞌ sa̱va̱ ni̱a̱ tu̱ku̱ taꞌviꞌ i̱ti̱a̱ Jordán,
ndisu̱ ne̱ vi̱ꞌe̱ Leví ndii,
köo̱ꞌ ñu̱ꞌuꞌ ni̱ ta̱xi̱ ra̱ nda̱ꞌaꞌ ne̱ ja̱a̱nꞌ te̱i̱n ne̱ ja̱a̱nꞌ.
4 Ku̱a̱tyi̱ ndii,
si̱a̱niꞌ xikaꞌ José ndii,
uvi̱ taꞌan ti̱ꞌvi̱ ni̱ na̱ndu̱u̱ ni̱a̱,
ne̱ vi̱ꞌe̱ Manasés xiinꞌ ne̱ vi̱ꞌe̱ Efraín.
Te̱ ne̱ vi̱ꞌe̱ Leví ndii,
köo̱ꞌ xa̱tyiꞌ ñu̱ꞌuꞌ ni̱ ta̱xi̱ ra̱ nda̱ꞌaꞌ ne̱ ja̱a̱nꞌ ku̱ndu̱u̱ ña̱ꞌa̱ ni̱a̱,
süu̱ꞌ ja̱a̱nꞌ ndii,
ñu̱u̱ miiꞌ ku̱ndi̱e̱e̱ ku̱i̱ti̱ꞌ ni̱a̱ ni̱ ta̱xi̱ ra̱ nda̱ꞌaꞌ ni̱a̱,
te̱ yoo kuaꞌa̱ꞌ kuꞌu̱ i̱kanꞌ ka̱xi̱ꞌ si̱ndiki̱ꞌ xiinꞌ mbe̱e̱ sana̱ ni̱a̱.
5 Te̱ ni̱ na̱ta̱ꞌviꞌ ra̱ ñu̱ꞌuꞌ ja̱a̱nꞌ nda̱ꞌaꞌ i̱ꞌi̱n ti̱ꞌvi̱ ne̱ vi̱ꞌe̱ Israel sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés.
Yoꞌoꞌ kaꞌán a̱ ña̱ ñu̱u̱ Hebrón ni̱ ndoo̱ nda̱ꞌaꞌ Caleb
6 Untaꞌ ndii,
ni̱ ki̱xi̱n i̱i̱n ti̱ꞌvi̱ ne̱ si̱a̱niꞌ xikaꞌ Judá nuu̱ꞌ Josué miiꞌ nduꞌu̱ꞌ ra̱ ñu̱u̱ Gilgal,
te̱ ni̱ kaꞌa̱n Caleb,
siꞌe̱ Jefone,
te̱ vi̱ꞌe̱ cenezeo,
xiinꞌ ra̱ ndii:
―Na̱ka̱ꞌanꞌ u̱nꞌ ña̱ ni̱ kaꞌa̱n Yahvé xiinꞌ Moisés,
te̱ ni̱ xika̱ nu̱u̱ nuu̱ꞌ a̱,
xaꞌa̱ꞌ uvi̱ sa̱aꞌ e̱ꞌ kii̱ꞌ ndieeꞌ ka̱ e̱ꞌ Cades-barnea.
7 Uvi̱ xi̱ko̱ kuiya̱ ni̱ ku̱miꞌ yuꞌu̱ kii̱ꞌ ni̱ ndiee̱ ka̱ e̱ꞌ ñu̱u̱ Cades-barnea ja̱a̱nꞌ,
te̱ ni̱ ti̱ꞌviꞌ Moisés,
te̱ xikaꞌ nu̱u̱ nuu̱ꞌ Yahvé,
yuꞌu̱ te̱ ki̱xi̱n ko̱to̱ i̱ sa̱a̱ kaaꞌ ñu̱ꞌuꞌ yoꞌoꞌ,
te̱ kii̱ꞌ ni̱ na̱ndi̱koꞌ i̱ nuu̱ꞌ ra̱ ndii,
ni̱ kaꞌa̱n nda̱ku i̱ xiinꞌ ra̱ sa̱a̱ kaaꞌ ñu̱ꞌuꞌ yoꞌoꞌ.
8 Te̱ ña̱ni̱ taꞌanꞌ e̱ꞌ,
te̱ ni̱ xaꞌa̱n xiinꞌ i̱ ndii,
siinꞌ ndo̱o̱ ni̱ kaꞌa̱n ra̱,
sa̱kanꞌ na ni̱ sa̱yi̱ꞌvi va̱ ra̱ sa̱kuuꞌ ne̱ taꞌanꞌ e̱ꞌ ja̱a̱nꞌ,
ndisu̱ yuꞌu̱ ndii,
ni̱ sa̱xinu̱ i̱ ña̱ kaꞌán Yahvé,
Ndiosí ña̱ xakaꞌnuꞌ i̱.
9 Sa̱kanꞌ te̱ kivi̱ꞌ ja̱a̱nꞌ ni̱ ta̱xi̱ Moisés kuento ra̱ nuu̱ꞌ Ndiosí kaꞌán ra̱ ndii:
“Ña̱ nda̱ku kaꞌán i̱ xiinꞌ u̱nꞌ ña̱ ñu̱ꞌuꞌ Canaán miiꞌ ni̱ xeꞌni̱ xaꞌa̱ꞌ u̱nꞌ ni̱ xaꞌa̱n u̱nꞌ ndii,
nda̱ꞌaꞌ yoꞌó ndoo̱ a̱ ku̱ndu̱u̱ ña̱ꞌa̱ u̱nꞌ xiinꞌ nda̱ꞌaꞌ si̱a̱niꞌ xikaꞌ u̱nꞌ nde̱e̱ ndiꞌiꞌ ni̱ kivi̱ꞌ xaꞌa̱ꞌ a̱ ña̱ ni̱ sa̱xinu̱ u̱nꞌ ña̱ kaꞌán Yahvé,
Ndiosí ña̱ xakaꞌnuꞌ e̱ꞌ,”
ni̱ katyi̱ ra̱ xiinꞌ i̱.
10 ’Te̱ vi̱ti̱n ndii,
mi̱iꞌ Yahvé xaaꞌ sa̱kanꞌ te̱ tiaku va̱ꞌa̱ i̱ nde̱e̱ vi̱ti̱n niiꞌ uvi̱ xi̱ko̱ uꞌu̱n kuiya̱ yoꞌoꞌ sa̱a̱ niiꞌ ni̱ kaꞌa̱n a̱,
nde̱e̱ kii̱ꞌ ni̱ ta̱xi̱ a̱ kuento kaa̱ꞌ nuu̱ꞌ Moisés kii̱ꞌ xikaꞌ ka̱ yooꞌ,
ne̱ vi̱ꞌe̱ Israel,
miiꞌ i̱tyi kaaꞌ.
Te̱ vi̱ti̱n ndii,
ko̱to̱ u̱nꞌ xa̱ ku̱miꞌ xi̱ko̱ uꞌu̱n kuiya̱ kumiꞌ i̱.
11 Ndisu̱ kaꞌni̱ kuaꞌa̱ꞌ ña̱ ndi̱e̱eꞌ i̱ nde̱e̱ naa kivi̱ꞌ ña̱ ni̱ ti̱ꞌviꞌ Moisés yuꞌu̱ ña̱ ki̱xi̱n ko̱to̱ i̱ sa̱a̱ kaaꞌ ñu̱ꞌuꞌ Canaán yoꞌoꞌ,
yoo kuaꞌa̱ꞌ ña̱ ndi̱e̱eꞌ i̱ te̱ ku̱ntaꞌanꞌ i̱ vi̱ti̱n nde̱e̱ naa kii̱ꞌ sa̱kanꞌ,
te̱ ku̱vi̱ kuꞌu̱n i̱ te̱ ki̱xi̱n i̱ miiꞌ ka̱ kuní i̱.
12 Sa̱kanꞌ na kuiiꞌ ta̱xi̱ ñu̱ꞌuꞌ ña̱ kanduꞌu̱ꞌ te̱i̱n i̱kuꞌ kaa̱ꞌ nda̱ꞌaꞌ i̱ vi̱ti̱n,
ñu̱ꞌuꞌ ña̱ ni̱ ta̱xi̱ Yahvé kuento a̱ xaꞌa̱ꞌ kii̱ꞌ sa̱kanꞌ ta̱xi̱ a̱ nda̱ꞌaꞌ i̱ ku̱ndu̱u̱ ña̱ꞌa̱ i̱.
Sa̱kanꞌ ña̱ ni̱ xi̱ni̱ so̱ꞌo̱ tu̱ yoꞌó kii̱ꞌ sa̱kanꞌ ña̱ i̱kanꞌ ndieeꞌ ne̱ vi̱ꞌe̱ Anac,
te̱ yoo tu̱ ñu̱u̱ naꞌnuꞌ i̱kanꞌ,
te̱ ndasi i̱ꞌnu̱ kutu̱ꞌ a̱ xiinꞌ nama̱.
Ndisu̱ ndiatuꞌ i̱ni̱ i̱ ña̱ tyi̱ndi̱e̱eꞌ Yahvé yuꞌu̱ te̱ ta̱xiꞌ i̱ te̱ ndieeꞌ i̱kanꞌ sa̱a̱ niiꞌ ni̱ kaꞌa̱n a̱ ―ni̱ katyi̱ ra̱ xiinꞌ Josué.
13 Sa̱kanꞌ te̱ ni̱ sa̱ñuꞌuꞌ Josué Caleb,
siꞌe̱ Jefone,
te̱ ni̱ ta̱xi̱ ra̱ ñu̱u̱ Hebrón ja̱a̱nꞌ nda̱ꞌaꞌ ra̱ ku̱ndu̱u̱ ña̱ꞌa̱ ra̱.
14 Sa̱kanꞌ na kuiiꞌ ña̱ꞌa̱ Caleb,
siꞌe̱ Jefone,
te̱ vi̱ꞌe̱ cenezeo,
ni̱ na̱ndu̱u̱ ñu̱u̱ ja̱a̱nꞌ nde̱e̱ kivi̱ꞌ vi̱ti̱n xaꞌa̱ꞌ a̱ ña̱ ni̱ sa̱xinu̱ ra̱ ña̱ kaꞌán Yahvé,
Ndiosí ña̱ xakaꞌnuꞌ ne̱ vi̱ꞌe̱ Israel.
15 Xta̱ꞌanꞌ ndii,
Quiriat-arba ni̱ na̱niꞌ ñu̱u̱ Hebrón ja̱a̱nꞌ.
Sa̱kanꞌ ña̱ i̱kanꞌ ni̱ yoo̱ i̱i̱n te̱ yivi̱ꞌ,
te̱ sukun va̱ te̱i̱n ne̱ vi̱ꞌe̱ Anac,
te̱ ni̱ na̱niꞌ Arba.
Te̱ köo̱ꞌ ka̱ ñuꞌu̱ ni̱ yoo̱ ka̱ nuu̱ꞌ ñu̱ꞌuꞌ ja̱a̱nꞌ kii̱ꞌ ndi̱ꞌi̱ ni̱ xkaꞌndi̱a̱ sa̱kuuꞌ ña̱ ja̱a̱nꞌ.