Yoꞌoꞌ kaꞌán a̱ xaꞌa̱ꞌ ñu̱ꞌuꞌ ña̱ kuní ka̱ ka̱nandoo ne̱ Israel
13
Te̱ kii̱ꞌ xa̱ i̱i̱n te̱ xi̱xa̱ va̱ nduuꞌ Josué,
te̱ ni̱ kaꞌa̱n Yahvé xiinꞌ ra̱ ndii:
―Xa̱ te̱ xi̱xa̱ va̱ nduuꞌ u̱nꞌ,
te̱ yoo kuaꞌa̱ꞌ va̱ ñu̱ꞌuꞌ ña̱ kuní ka̱ ka̱nandoo ndo̱ꞌ ku̱ndu̱u̱ ña̱ꞌa̱ ndo̱ꞌ.
2 Kuní ka̱ ñu̱ꞌuꞌ miiꞌ ndieeꞌ ne̱ vi̱ꞌe̱ filisteo,
xiinꞌ i̱i̱n ka̱niiꞌ ñu̱ꞌuꞌ miiꞌ ndieeꞌ ne̱ vi̱ꞌe̱ gesureo,
3 te̱ kuní ka̱ tu̱ ka̱nandoo ndo̱ꞌ ñu̱ꞌuꞌ ne̱ vi̱ꞌe̱ cananeo ña̱ xa̱ꞌaꞌ a̱ nde̱e̱ i̱ti̱a̱ Sihor ña̱ kuaꞌa̱n xi̱i̱nꞌ ñu̱ꞌuꞌ Egipto,
xtoꞌniꞌ miiꞌ ketaꞌ ñu̱ꞌu̱,
te̱ kuaꞌa̱n ndi̱koꞌ a̱ ndi̱e̱nu̱ nde̱e̱ xeꞌinꞌ ñu̱u̱ Ecrón.
Te̱ nuu̱ꞌ ñu̱ꞌuꞌ ja̱a̱nꞌ xaꞌndia tyuunꞌ uꞌu̱n taꞌan rey ne̱ vi̱ꞌe̱ filisteo,
te̱ nduuꞌ rey ñu̱u̱ Gaza,
xiinꞌ te̱ nduuꞌ rey ñu̱u̱ Asdod,
xiinꞌ te̱ nduuꞌ rey ñu̱u̱ Ascalón,
xiinꞌ te̱ nduuꞌ rey ñu̱u̱ Gat,
xiinꞌ te̱ nduuꞌ rey ñu̱u̱ Ecrón.
Te̱ kuní tu̱ ka̱nandoo ndo̱ꞌ ñu̱ꞌuꞌ ne̱ vi̱ꞌe̱ aveo
4 ña̱ kanduꞌu̱ꞌ ndienu̱.
Te̱ kuní tu̱ ka̱nandoo ndo̱ꞌ ka̱niiꞌ ñu̱ꞌuꞌ ne̱ vi̱ꞌe̱ cananeo ña̱ xa̱ꞌaꞌ a̱ nde̱e̱ ñu̱u̱ Mehara miiꞌ ndieeꞌ ne̱ vi̱ꞌe̱ sidonio,
te̱ kuꞌu̱n ndi̱koꞌ a̱ nde̱e̱ ñu̱u̱ Afec,
te̱ xkaꞌndi̱a̱ a̱ nde̱e̱ miiꞌ yoo xeꞌinꞌ ñu̱ꞌuꞌ ne̱ vi̱ꞌe̱ amorreo.
5 Te̱ kuní tu̱ ka̱nandoo ndo̱ꞌ ñu̱ꞌuꞌ te̱ vi̱ꞌe̱ giblita xiinꞌ ka̱niiꞌ nuu̱ꞌ ñu̱ꞌuꞌ Líbano xtoꞌniꞌ miiꞌ ketaꞌ ñu̱ꞌu̱ ña̱ xa̱ꞌaꞌ a̱ nde̱e̱ ñu̱u̱ Baal-gad xaꞌa̱ꞌ i̱kuꞌ Hermón,
te̱ kuꞌu̱n ndi̱koꞌ a̱ nde̱e̱ ya̱ti̱n yiꞌeꞌ ñu̱u̱ Hamat.
6 Te̱ sa̱kuuꞌ ne̱ vi̱ꞌe̱ Sidonio,
ne̱ ndieeꞌ te̱i̱n i̱kuꞌ ña̱ xa̱ꞌaꞌ a̱ nde̱e̱ xiki̱ꞌ Líbano te̱ kuꞌu̱n ndi̱koꞌ a̱ nde̱e̱ Misrefotmaim xiinꞌ sa̱a̱ ka̱ taꞌan i̱nga̱ ne̱ yivi̱ꞌ ndieeꞌ i̱kanꞌ ndii,
mi̱iꞌ yuꞌu̱ ka̱ꞌni̱ꞌ ña̱ꞌaꞌ.
Te̱ yoꞌó ndii,
ku̱ndi̱ꞌni̱ ku̱i̱ti̱ꞌ u̱nꞌ ña̱ na̱ta̱ꞌviꞌ u̱nꞌ ñu̱ꞌuꞌ ja̱a̱nꞌ xiinꞌ ña̱ kati̱n ndo̱ꞌ a̱ nda̱ꞌaꞌ ne̱ taꞌanꞌ u̱nꞌ,
ne̱ vi̱ꞌe̱ Israel,
te̱ na̱ꞌi̱ ni̱a̱ a̱ ku̱ndu̱u̱ ña̱ꞌa̱ ni̱a̱ sa̱a̱ niiꞌ ni̱ kaꞌa̱n tyuunꞌ i̱ xiinꞌ u̱nꞌ.
7 Sa̱kanꞌ na kuiiꞌ na̱ta̱ꞌviꞌ kiꞌi̱ꞌ ñu̱ꞌuꞌ kaa̱ꞌ nda̱ꞌaꞌ íin ti̱ꞌvi̱ ne̱ kuní ka̱ na̱ꞌi̱ ñu̱ꞌuꞌ,
xiinꞌ nda̱ꞌaꞌ taꞌvi̱ꞌ sa̱va̱ ti̱ꞌvi̱ ne̱ vi̱ꞌe̱ Manasés ―ni̱ katyi̱ Ndiosí xiinꞌ Josué.
Yoꞌoꞌ kaꞌán a̱ xaꞌa̱ꞌ ñu̱ꞌuꞌ ña̱ ni̱ ndoo̱ nda̱ꞌaꞌ uvi̱ ti̱ꞌvi̱ yoso̱ꞌ sa̱va̱ ne̱ vi̱ꞌe̱ Israel tu̱ku̱ taꞌviꞌ i̱ti̱a̱ Jordán
8 Sa̱kanꞌ ña̱ ne̱ vi̱ꞌe̱ Rubén,
xiinꞌ ne̱ vi̱ꞌe̱ Gad,
xiinꞌ taꞌvi̱ꞌ sa̱va̱ ne̱ vi̱ꞌe̱ Manasés ndii,
xa̱ ni̱ na̱ti̱i̱n ne̱ ja̱a̱nꞌ ñu̱ꞌuꞌ ña̱ ku̱ndu̱u̱ ña̱ꞌa̱ ni̱a̱ kii̱ꞌ ni̱ na̱ta̱ꞌviꞌ Moisés,
te̱ ni̱ xika̱ nu̱u̱ nuu̱ꞌ Yahvé,
ñu̱ꞌuꞌ tu̱ku̱ taꞌviꞌ i̱ti̱a̱ Jordán xtoꞌniꞌ miiꞌ ketaꞌ ñu̱ꞌu̱,
te̱ ni̱ ta̱xi̱ ra̱ a̱ nda̱ꞌaꞌ ni̱a̱.
9 Ni̱ xa̱ꞌaꞌ a̱ nde̱e̱ ñu̱u̱ Aroer,
ña̱ kanduꞌu̱ꞌ yu̱ꞌuꞌ yivi̱ Arnón,
xiinꞌ ñu̱u̱ ña̱ naá ma̱ꞌiꞌ yo̱soꞌ,
xiinꞌ i̱i̱n ka̱niiꞌ miiꞌ ndaa̱ miiꞌ naniꞌ Medeba,
te̱ ni̱ xaꞌa̱n ndi̱koꞌ a̱ nde̱e̱ ñu̱u̱ Dibón.
10 Te̱ ni̱ ta̱xi̱ tu̱ Moisés nda̱ꞌaꞌ ni̱a̱ ñu̱ꞌuꞌ rey Sehón,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ amorreo,
ni̱ xa̱ꞌaꞌ a̱ nde̱e̱ ñu̱u̱ Hesbón miiꞌ ni̱ nduꞌu̱ꞌ ra̱ xaꞌndia tyuunꞌ ra̱,
te̱ ni̱ xaꞌa̱n ndi̱koꞌ a̱ nde̱e̱ xaꞌinꞌ ñu̱ꞌuꞌ ne̱ vi̱ꞌe̱ Amón.
11 Te̱ ni̱ ta̱xi̱ tu̱ Moisés nda̱ꞌaꞌ ni̱a̱ ñu̱ꞌuꞌ ñu̱u̱ Galaad,
xiinꞌ ñu̱ꞌuꞌ ne̱ vi̱ꞌe̱ gesureo,
xiinꞌ ñu̱ꞌuꞌ ne̱ vi̱ꞌe̱ maacateo,
xiinꞌ ka̱niiꞌ i̱kuꞌ ña̱ naniꞌ Hermón,
xiinꞌ ka̱niiꞌ ñu̱ꞌuꞌ ña̱ naniꞌ Basán,
te̱ ni̱ xaꞌa̱n ndi̱koꞌ a̱ nde̱e̱ ñu̱u̱ Salca.
12 Te̱ sa̱kanꞌ tu̱ ka̱niiꞌ ñu̱ꞌuꞌ miiꞌ ni̱ xa̱ꞌndi̱a̱ tyuunꞌ rey Og,
te̱ ni̱ ki̱e̱e̱ nuu̱ꞌ ñu̱ꞌuꞌ Basán,
te̱ ni̱ nduꞌu̱ꞌ ra̱ xaꞌndia tyuunꞌ ra̱ ñu̱u̱ Astarot,
xiinꞌ ñu̱u̱ Edrei,
te̱ ndee i̱i̱n nda̱a̱ꞌ ne̱ ja̱a̱nꞌ nduuꞌ ne̱ vi̱ꞌe̱ Refaim,
te̱ tiaku ka̱ kii̱ꞌ sa̱kanꞌ,
ku̱a̱tyi̱ ndii,
xa̱ ni̱ ka̱nandoo ña̱ꞌaꞌ Moisés,
te̱ ni̱ na̱ꞌi̱ ndo̱o̱ tu̱ ra̱ ñu̱ꞌuꞌ te̱ ja̱a̱nꞌ,
te̱ ni̱ ta̱xiꞌ ña̱ꞌaꞌ ra̱.
13 Ndisu̱ ne̱ vi̱ꞌe̱ gesureo xiinꞌ ne̱ vi̱ꞌe̱ maacateo ndii,
nï̱ ta̱xiꞌ ña̱ꞌaꞌ ne̱ vi̱ꞌe̱ Israel,
taꞌanꞌ i̱,
süu̱ꞌ ja̱a̱nꞌ ndii,
ni̱ ndoo̱ ne̱ ja̱a̱nꞌ ndieeꞌ ni̱a̱ te̱i̱n yooꞌ,
ne̱ Israel,
nde̱e̱ kivi̱ꞌ vi̱ti̱n.
14 Ndisu̱ nï̱ ta̱xi̱ Moisés ñu̱ꞌuꞌ nda̱ꞌaꞌ nde̱e̱ i̱i̱n ne̱ vi̱ꞌe̱ Leví ku̱ndu̱u̱ ña̱ꞌaꞌ ni̱a̱,
sa̱kanꞌ ña̱ ña̱ nasoko̱ꞌ ne̱ vi̱ꞌe̱ Israel nuu̱ꞌ Yahvé Ndiosí nduuꞌ ña̱ ndoo̱ nda̱ꞌaꞌ ne̱ ja̱a̱nꞌ ku̱ti̱a̱ku̱ ni̱a̱,
sa̱a̱ niiꞌ ni̱ kaꞌa̱n mi̱iꞌ a̱ xiinꞌ Moisés.
15 Ña̱ yo̱ꞌo̱ꞌ nduuꞌ ñu̱ꞌuꞌ ña̱ ni̱ na̱ta̱ꞌviꞌ Moisés,
te̱ ni̱ ta̱xi̱ ra̱ a̱ nda̱ꞌaꞌ i̱ꞌi̱n ti̱ꞌvi̱ ne̱ vi̱ꞌe̱ Rubén.
16 Ni̱ xa̱ꞌaꞌ a̱ nde̱e̱ ñu̱u̱ Aroer,
ña̱ kanduꞌu̱ꞌ yo̱soꞌ yu̱ꞌuꞌ i̱ti̱a̱ Arnón,
xiinꞌ ka̱niiꞌ ñu̱u̱ ña̱ kanduꞌu̱ꞌ ma̱ꞌiꞌ yo̱soꞌ,
xiinꞌ ka̱niiꞌ miiꞌ ndaa̱ nde̱e̱ ni̱ xaꞌa̱n ndi̱koꞌ a̱ nde̱e̱ ñu̱u̱ Medeba.
17 Te̱ sa̱kanꞌ tu̱ ñu̱u̱ Hesbón,
xiinꞌ sa̱kuuꞌ ñu̱u̱ nda̱ꞌaꞌ a̱ ña̱ ñuꞌuꞌ yo̱soꞌ ñu̱u̱ Dibón,
xiinꞌ ñu̱u̱ Bamot-baal,
xiinꞌ ñu̱u̱ Bet-baal-meón,
18 xiinꞌ ñu̱u̱ Jahaza,
xiinꞌ ñu̱u̱ Cademot,
xiinꞌ ñu̱u̱ Mefaat,
19 xiinꞌ ñu̱u̱ Quiriataim,
xiinꞌ ñu̱u̱ Sibma,
xiinꞌ ñu̱u̱ Zaret-sahar ña̱ naá te̱i̱n i̱kuꞌ ña̱ itaꞌ yo̱soꞌ,
20 xiinꞌ ñu̱u̱ Bet-peor,
xiinꞌ i̱tu̱n ña̱ kanduꞌu̱ꞌ te̱i̱n i̱kuꞌ Pisga,
xiinꞌ ñu̱u̱ Bet-jesimot.
21 Xiinꞌ sa̱kuuꞌ ñu̱u̱ ña̱ ñuꞌuꞌ miiꞌ kanduꞌu̱ꞌ yo̱soꞌ xiinꞌ ka̱niiꞌ miiꞌ ni̱ xa̱ꞌndi̱a̱ tyuunꞌ Sehón.
Te̱ Sehón ja̱a̱nꞌ ni̱ nduu̱ rey nuu̱ꞌ ne̱ vi̱ꞌe̱ amorreo,
te̱ ñu̱u̱ Hesbón ni̱ nduꞌu̱ꞌ ra̱.
Te̱ Moisés ni̱ xa̱ꞌni̱ꞌ ña̱ꞌaꞌ,
te̱ ni̱ xa̱ꞌni̱ꞌ tu̱ ra̱ te̱ kuuꞌ nu̱uꞌ,
te̱ ni̱ xika̱ nu̱u̱ nuu̱ꞌ ra̱,
te̱ ni̱ ndiee̱ nuu̱ꞌ ñu̱ꞌuꞌ Madián,
te̱ naniꞌ Evi,
xiinꞌ te̱ naniꞌ Requem,
xiinꞌ te̱ naniꞌ Zur,
xiinꞌ te̱ naniꞌ Hur,
xiinꞌ te̱ naniꞌ Reba.
Te̱ ja̱a̱nꞌ nduuꞌ te̱ kuuꞌ nu̱uꞌ,
te̱ ni̱ xika̱ nu̱u̱ nuu̱ꞌ rey Sehón,
te̱ ni̱ ndiee̱ nuu̱ꞌ ñu̱ꞌuꞌ Madián ja̱a̱nꞌ.
22 Te̱ xiinꞌ sa̱kuuꞌ te̱ yivi̱ꞌ,
te̱ ni̱ xa̱ꞌni̱ꞌ te̱ vi̱ꞌe̱ Israel ndii,
ni̱ xa̱ꞌni̱ꞌ tu̱ ra̱ i̱i̱n te̱ naniꞌ Balaam xiinꞌ ityi̱,
te̱ tuviꞌ i̱ni̱,
siꞌe̱ i̱i̱n te̱ naniꞌ Beor.
23 Te̱ nde̱e̱ i̱ti̱a̱ Jordán ni̱ nduu̱ xeꞌinꞌ ñu̱ꞌuꞌ te̱ vi̱ꞌe̱ Rubén,
te̱ ña̱ ja̱a̱nꞌ ni̱ nduu̱ ñu̱ꞌuꞌ ña̱ ni̱ ndoo̱ nda̱ꞌaꞌ i̱ꞌi̱n ti̱ꞌvi̱ te̱ vi̱ꞌe̱ Rubén ja̱a̱nꞌ,
sa̱a̱ ka̱ taꞌan ni̱ ku̱u̱ ni̱a̱,
sa̱kuuꞌ ñu̱u̱ ja̱a̱nꞌ xiinꞌ nda̱ꞌaꞌ a̱ ni̱ ndoo̱ nda̱ꞌaꞌ ni̱a̱.
24 Te̱ ni̱ na̱ta̱ꞌviꞌ tu̱ Moisés ñu̱ꞌuꞌ ni̱ ta̱xi̱ ra̱ nda̱ꞌaꞌ ne̱ vi̱ꞌe̱ Gad sa̱a̱ ka̱ taꞌan ni̱ ku̱u̱ ni̱a̱,
te̱ ña̱ yo̱ꞌo̱ꞌ nduuꞌ kivi̱ꞌ ñu̱ꞌuꞌ ña̱ ni̱ ta̱xi̱ ra̱ nda̱ꞌaꞌ ni̱a̱.
25 Miiꞌ ni̱ na̱ꞌi̱ ni̱a̱ ndii,
ñu̱u̱ Jazer,
xiinꞌ sa̱kuuꞌ ñu̱u̱ ña̱ ñuꞌuꞌ nuu̱ꞌ ñu̱ꞌuꞌ Galaad,
xiinꞌ taꞌvi̱ꞌ sa̱va̱ ñu̱ꞌuꞌ ña̱ ni̱ nduu̱ ña̱ꞌa̱ ne̱ vi̱ꞌe̱ Amón,
te̱ ni̱ xaꞌa̱n ndi̱koꞌ a̱ nde̱e̱ ñu̱u̱ Aroer,
ña̱ kanduꞌu̱ꞌ xtoꞌniꞌ miiꞌ naá ñu̱u̱ Rabá.
26 Te̱ sa̱kanꞌ tu̱ nde̱e̱ ñu̱u̱ Hesbón,
te̱ ni̱ xaꞌa̱n ndi̱koꞌ a̱ nde̱e̱ ñu̱u̱ Ramat-mizpa xiinꞌ ñu̱u̱ Betonim,
te̱ ni̱ xa̱ꞌaꞌ a̱ nde̱e̱ ñu̱u̱ Mahanaim,
te̱ ni̱ xaꞌa̱n ndi̱koꞌ a̱ nde̱e̱ xaꞌinꞌ ñu̱u̱ Debir,
27 xiinꞌ ñu̱u̱ ña̱ kanduꞌu̱ꞌ yo̱soꞌ ña̱ naniꞌ Bet-aram,
xiinꞌ ñu̱u̱ Bet-nimra,
xiinꞌ ñu̱u̱ Sucot,
xiinꞌ ñu̱u̱ Zafón,
xiinꞌ ka̱niiꞌ nuu̱ꞌ ñu̱ꞌuꞌ miiꞌ ni̱ xa̱ꞌndi̱a̱ tyuunꞌ rey Sehón ja̱a̱nꞌ,
te̱ ni̱ xa̱ꞌndi̱a̱ tyuunꞌ ñu̱u̱ Hesbón.
Sa̱kanꞌ na kuiiꞌ sa̱a̱ kuaꞌa̱n yu̱ꞌuꞌ i̱ti̱a̱ Jordán xtoꞌniꞌ miiꞌ ketaꞌ ñu̱ꞌu̱ ni̱ nduu̱ ñu̱ꞌuꞌ rey Sehón ja̱a̱nꞌ,
te̱ ni̱ nduꞌu̱ꞌ ñu̱u̱ Hesbón ja̱a̱nꞌ,
te̱ tu̱ku̱ taꞌviꞌ xeꞌinꞌ ñu̱ꞌuꞌ miiꞌ xaꞌndia tyuunꞌ ra̱ ndii,
naxaá a̱ nde̱e̱ xíniꞌ mi̱ni̱ kaꞌnuꞌ Galilea,
ña̱ naniꞌ tu̱ Cineret.
28 Te̱ ka̱niiꞌ ñu̱ꞌuꞌ ja̱a̱nꞌ ni̱ ndoo̱ nda̱ꞌaꞌ i̱ꞌi̱n ti̱ꞌvi̱ ne̱ vi̱ꞌe̱ Gad ku̱ndu̱u̱ ña̱ꞌa̱ ni̱a̱,
i̱ꞌi̱n ñu̱u̱ xiinꞌ nda̱ꞌaꞌ a̱ sa̱a̱ ka̱ taꞌan ni̱ ku̱u̱ ni̱a̱.
29 Ni̱ ta̱xi̱ tu̱ Moisés ñu̱ꞌuꞌ nda̱ꞌaꞌ taꞌvi̱ꞌ sa̱va̱ ne̱ vi̱ꞌe̱ Manasés ku̱ndu̱u̱ ña̱ꞌa̱ ni̱a̱,
te̱ ña̱ yo̱ꞌo̱ꞌ nduuꞌ ñu̱ꞌuꞌ ña̱ ni̱ ndoo̱ nda̱ꞌaꞌ ni̱a̱.
30 Te̱ ñu̱ꞌuꞌ ne̱ ja̱a̱nꞌ ndii,
nde̱e̱ ñu̱u̱ Mahanaim xiinꞌ ka̱niiꞌ ñu̱ꞌuꞌ Basán,
xiinꞌ ka̱niiꞌ miiꞌ ni̱ xa̱ꞌndi̱a̱ tyuunꞌ Og,
te̱ ni̱ nduu̱ rey nuu̱ꞌ ñu̱ꞌuꞌ Basán ja̱a̱nꞌ xiinꞌ sa̱kuuꞌ uni̱ xi̱ko̱ taꞌan ñu̱u̱,
ña̱ ñuꞌuꞌ nuu̱ꞌ ñu̱ꞌuꞌ ña̱ nduuꞌ kuenta Jair,
ña̱ kanduꞌu̱ꞌ miiꞌ naá ñu̱ꞌuꞌ Basán ni̱ na̱ndu̱u̱ ña̱ꞌa̱ ni̱a̱.
31 Te̱ sa̱kanꞌ tu̱ taꞌvi̱ꞌ sa̱va̱ ñu̱u̱ Galaad,
xiinꞌ ñu̱u̱ Astarot,
xiinꞌ Edrei,
te̱ ñu̱u̱ ja̱a̱nꞌ ni̱ nduu̱ miiꞌ ni̱ nduꞌu̱ꞌ rey Og xaꞌndia tyuunꞌ ra̱.
Te̱ sa̱kuuꞌ ñu̱ꞌuꞌ ja̱a̱nꞌ ni̱ ndoo̱ nda̱ꞌaꞌ taꞌvi̱ꞌ sa̱va̱ ne̱ vi̱ꞌe̱ Maquir ku̱ndu̱u̱ ña̱ꞌa̱ ni̱a̱,
te̱ siꞌe̱ Manasés ni̱ nduu̱ te̱ ja̱a̱nꞌ.
32 Sa̱kuuꞌ ña̱ kaa̱ꞌ nduuꞌ ñu̱ꞌuꞌ ña̱ ni̱ na̱ta̱ꞌviꞌ Moisés yo̱soꞌ ña̱ kanduꞌu̱ꞌ nuu̱ꞌ ñu̱ꞌuꞌ Moab tu̱ku̱ taꞌviꞌ i̱ti̱a̱ Jordán ya̱ti̱n ñu̱u̱ Jericó xtoꞌniꞌ miiꞌ ketaꞌ ñu̱ꞌu̱.
33 Ndisu̱ ne̱ vi̱ꞌe̱ Leví ndii,
köo̱ꞌ ñu̱ꞌuꞌ ni̱ ta̱xi̱ Moisés nda̱ꞌaꞌ ne̱ ja̱a̱nꞌ ku̱ndu̱u̱ ña̱ꞌa̱ ni̱a̱,
sa̱kanꞌ ña̱ mi̱iꞌ Yahvé,
Ndiosí ña̱ xakaꞌnuꞌ ne̱ vi̱ꞌe̱ Israel,
nduuꞌ ña̱ꞌa̱ ni̱a̱ naa xa̱ ni̱ kaꞌa̱n a̱ xiinꞌ ni̱a̱.