Yoꞌoꞌ ku̱a̱xi̱ kivi̱ꞌ sa̱kuuꞌ rey te̱ ni̱ ndo̱ñuꞌuꞌ ni̱ xa̱a̱ Moisés
12
Te̱ yo̱ꞌo̱ꞌ nduuꞌ uvi̱ taꞌan rey,
te̱ ni̱ xa̱ꞌndi̱a̱ tyuunꞌ nuu̱ꞌ ñu̱ꞌuꞌ xtoꞌniꞌ miiꞌ ketaꞌ ñu̱ꞌu̱ tu̱ku̱ taꞌviꞌ i̱ti̱a̱ Jordán,
te̱ ja̱a̱nꞌ ndii,
ni̱ xa̱ꞌni̱ꞌ ña̱ꞌaꞌ ne̱ vi̱ꞌe̱ Israel,
te̱ ni̱ na̱ꞌi̱ ni̱a̱ ñu̱ꞌuꞌ ra̱ ku̱ndu̱u̱ ña̱ꞌa̱ ni̱a̱.
Ni̱ xa̱ꞌaꞌ a̱ nde̱e̱ yo̱soꞌ i̱ti̱a̱ Arnón,
te̱ ni̱ xaꞌa̱n ndi̱koꞌ a̱ nde̱e̱ miiꞌ iinꞌ i̱kuꞌ ña̱ naniꞌ Hermón xiinꞌ i̱i̱n ka̱niiꞌ yo̱soꞌ yu̱ꞌuꞌ i̱ti̱a̱ Jordán miiꞌ naniꞌ Arabá,
xtoꞌniꞌ miiꞌ ketaꞌ ñu̱ꞌu̱.
2 I̱i̱n rey ja̱a̱nꞌ naniꞌ Sehón,
te̱ ni̱ xa̱ꞌndi̱a̱ tyuunꞌ nuu̱ꞌ ne̱ vi̱ꞌe̱ amorreo,
te̱ ni̱ nduꞌu̱ꞌ ra̱ ñu̱u̱ Hesbón.
Te̱ miiꞌ xaꞌndia tyuunꞌ ra̱ ndii,
ni̱ xa̱ꞌaꞌ a̱ nde̱e̱ ñu̱u̱ Aroer,
ña̱ kanduꞌu̱ꞌ xeꞌinꞌ yo̱soꞌ yu̱ꞌuꞌ yivi̱ Arnón,
te̱ ni̱ xaꞌa̱n ndi̱koꞌ a̱ nde̱e̱ yu̱ꞌuꞌ i̱ti̱a̱ Jaboc.
Te̱ yivi̱ Arnón ja̱a̱nꞌ nduuꞌ miiꞌ yoo xeꞌinꞌ ra̱ xiinꞌ te̱ vi̱ꞌe̱ Amón.
Sa̱kanꞌ na kuiiꞌ rey Sehón ja̱a̱nꞌ ndii,
nde̱e̱ taꞌvi̱ꞌ sa̱va̱ ñu̱u̱ Galaad ja̱a̱nꞌ ni̱ nduu̱ miiꞌ ni̱ xa̱ꞌndi̱a̱ tyuunꞌ ra̱.
3 Te̱ ni̱ xa̱ꞌndi̱a̱ tyuunꞌ tu̱ ra̱ nde̱e̱ tyaaꞌ yo̱soꞌ yu̱ꞌuꞌ i̱ti̱a̱ Jordán,
xtoꞌniꞌ miiꞌ ketaꞌ ñu̱ꞌu̱,
xa̱ꞌaꞌ a̱ nde̱e̱ mi̱ni̱ Cineret,
te̱ nani tu̱ a̱ mi̱ni̱ Galilea,
te̱ ni̱ xaꞌa̱n ndi̱koꞌ a̱ nde̱e̱ mi̱ni̱ ña̱ naniꞌ Arabá,
ña̱ nduuꞌ Mi̱ni̱ Uꞌva̱.
Te̱ ni̱ xa̱ꞌndi̱a̱ tyuunꞌ tu̱ ra̱ nde̱e̱ xtoꞌniꞌ ni̱ ku̱nda̱ku miiꞌ naá ñu̱u̱ Bet-jesimot,
te̱ ni̱ xaꞌa̱n ndi̱koꞌ a̱ nde̱e̱ xaꞌa̱ꞌ i̱kuꞌ Pisga.
4 Te̱ i̱nga̱ tu̱ku̱ ra̱ nduuꞌ rey Og,
te̱ ni̱ xa̱ꞌndi̱a̱ tyuunꞌ nuu̱ꞌ ñu̱ꞌuꞌ Basán,
te̱ ndee i̱i̱n nda̱a̱ꞌ ra̱ sa̱kanꞌ nduuꞌ kuenta ne̱ vi̱ꞌe̱ Refaim,
te̱ tiaku ka̱,
te̱ ni̱ nduꞌu̱ꞌ ra̱ ñu̱u̱ Astarot xiinꞌ ñu̱u̱ Edrei.
5 Te̱ ni̱ xa̱ꞌndi̱a̱ tyuunꞌ ra̱ i̱kuꞌ ña̱ naniꞌ Hermón,
xiinꞌ ñu̱u̱ Salca,
xiinꞌ i̱i̱n ka̱niiꞌ nuu̱ꞌ ñu̱ꞌuꞌ Basán nde̱e̱ ni̱ xaꞌa̱n ndi̱koꞌ a̱ nde̱e̱ xeꞌinꞌ ñu̱u̱ Gesur xiinꞌ xeꞌinꞌ ñu̱u̱ Maaca.
Te̱ ni̱ xa̱ꞌndi̱a̱ tyuunꞌ tu̱ ra̱ nde̱e̱ taꞌvi̱ꞌ sa̱va̱ ñu̱u̱ Galaad nde̱e̱ miiꞌ xkaꞌndíá xeꞌinꞌ ñu̱ꞌuꞌ rey Sehón,
te̱ nduuꞌ rey ñu̱u̱ Hesbón.
6 Te̱ ni̱ ka̱nandoo ne̱ vi̱ꞌe̱ Israel uvi̱ sa̱aꞌ rey ja̱a̱nꞌ kii̱ꞌ ni̱ xa̱ꞌndi̱a̱ tyuunꞌ Moisés,
te̱ ni̱ xika̱ nu̱u̱ nuu̱ꞌ Yahvé,
nuu̱ꞌ ni̱a̱.
Te̱ ni̱ na̱ta̱ꞌviꞌ ra̱ ñu̱ꞌuꞌ ja̱a̱nꞌ ku̱ndu̱u̱ ña̱ꞌa̱ ne̱ vi̱ꞌe̱ Rubén,
xiinꞌ ne̱ vi̱ꞌe̱ Gad,
xiinꞌ taꞌvi̱ꞌ sa̱va̱ ne̱ vi̱ꞌe̱ Manasés.
Yoꞌoꞌ ku̱a̱xi̱ kivi̱ꞌ sa̱kuuꞌ rey, te̱ ni̱ ndo̱ñuꞌuꞌ kii̱ꞌ ni̱ xa̱ꞌndi̱a̱ tyuunꞌ Josué nuu̱ꞌ ne̱ vi̱ꞌe̱ Israel
7 Yoꞌoꞌ ku̱a̱xi̱ kivi̱ꞌ rey,
te̱ ni̱ ndiee̱ nuu̱ꞌ ñu̱ꞌuꞌ yu̱ꞌuꞌ i̱ti̱a̱ Jordán xtoꞌniꞌ miiꞌ ketá ñu̱ꞌu̱,
kii̱ꞌ ni̱ xa̱ꞌni̱ꞌ ña̱ꞌaꞌ Josué,
xiinꞌ ne̱ vi̱ꞌe̱ Israel.
Ni̱ xa̱ꞌaꞌ a̱ nde̱e̱ ñu̱u̱ Baal-gad miiꞌ kanduꞌu̱ꞌ yo̱soꞌ ñu̱ꞌuꞌ Líbano,
te̱ ni̱ xaꞌa̱n ndi̱koꞌ a̱ nde̱e̱ miiꞌ itaꞌ i̱kuꞌ Halac ña̱ kuaꞌa̱n ka̱a̱ miiꞌ kanduꞌu̱ꞌ ñu̱u̱ Seir.
Te̱ ñu̱ꞌuꞌ ja̱a̱nꞌ ndii,
ni̱ na̱ta̱ꞌviꞌ ña̱ꞌaꞌ Josué nda̱ꞌaꞌ i̱ꞌi̱n ti̱ꞌvi̱ ne̱ vi̱ꞌe̱ Israel ku̱ndu̱u̱ ña̱ꞌa̱ ni̱a̱.
8 Te̱ ka̱niiꞌ ñu̱ꞌuꞌ ña̱ ni̱ ta̱xi̱ ra̱ nda̱ꞌaꞌ ni̱a̱ ja̱a̱nꞌ ndii,
ni̱ xa̱ꞌaꞌ a̱ nde̱e̱ i̱kuꞌ,
xiinꞌ yo̱soꞌ,
xiinꞌ yo̱soꞌ i̱ti̱a̱ Jordán miiꞌ naá mi̱ni̱ ña̱ naniꞌ Arabá,
xiinꞌ i̱tu̱n,
xiinꞌ miiꞌ i̱tyi kaaꞌ,
xiinꞌ nuu̱ꞌ ñu̱ꞌuꞌ i̱tyi ña̱ naniꞌ Neguev.
Te̱ ka̱niiꞌ ñu̱ꞌuꞌ ja̱a̱nꞌ ni̱ nduu̱ ña̱ꞌa̱ ne̱ vi̱ꞌe̱ heteo,
xiinꞌ ne̱ vi̱ꞌe̱ amorreo,
xiinꞌ ne̱ vi̱ꞌe̱ cananeo,
xiinꞌ ne̱ vi̱ꞌe̱ ferezeo,
xiinꞌ ne̱ vi̱ꞌe̱ heveo,
xiinꞌ ne̱ vi̱ꞌe̱ jebuseo.
9 I̱i̱n rey,
te̱ ni̱ xa̱ꞌni̱ꞌ ne̱ Israel ndii,
te̱ ñu̱u̱ Jericó nduuꞌ ra̱,
te̱ i̱nga̱ ra̱ ndii,
rey ñu̱u̱ Hai,
ña̱ kanduꞌu̱ꞌ tu̱ku̱ taꞌviꞌ ñu̱u̱ Bet-el,
nduuꞌ ra̱,
10 te̱ i̱nga̱ ra̱ ndii,
rey ñu̱u̱ Jerusalén nduuꞌ ra̱,
te̱ i̱nga̱ ra̱ ndii,
rey ñu̱u̱ Hebrón nduuꞌ ra̱,
11 te̱ i̱nga̱ ra̱ ndii,
rey ñu̱u̱ Jarmut nduuꞌ ra̱,
te̱ i̱nga̱ ra̱ ndii,
rey ñu̱u̱ Laquis nduuꞌ ra̱,
12 te̱ i̱nga̱ ra̱ ndii,
rey ñu̱u̱ Eglón nduuꞌ ra̱,
te̱ i̱nga̱ ra̱ ndii,
rey ñu̱u̱ Gezer nduuꞌ ra̱,
13 te̱ i̱nga̱ ra̱ ndii,
rey ñu̱u̱ Debir nduuꞌ ra̱,
te̱ i̱nga̱ ra̱ ndii rey ñu̱u̱ Geder nduuꞌ ra̱,
14 te̱ i̱nga̱ ra̱ ndii,
rey ñu̱u̱ Horma nduuꞌ ra̱,
te̱ i̱nga̱ ra̱ ndii,
rey ñu̱u̱ Arad nduuꞌ ra̱,
15 te̱ i̱nga̱ ra̱ ndii,
rey ñu̱u̱ Libna nduuꞌ ra̱,
te̱ i̱nga̱ ra̱ ndii,
rey ñu̱u̱ Adulam nduuꞌ ra̱,
16 te̱ i̱nga̱ ra̱ ndii,
rey ñu̱u̱ Maceda nduuꞌ ra̱,
te̱ i̱nga̱ ra̱ ndii,
rey ñu̱u̱ Bet-el nduuꞌ ra̱,
17 te̱ i̱nga̱ ra̱ ndii,
rey ñu̱u̱ Tapúa nduuꞌ ra̱,
te̱ i̱nga̱ ra̱ ndii,
rey ñu̱u̱ Hefer nduuꞌ ra̱,
18 te̱ i̱nga̱ ra̱ ndii,
rey ñu̱u̱ Afec nduuꞌ ra̱,
te̱ i̱nga̱ ra̱ ndii,
rey ñu̱u̱ Sarón nduuꞌ ra̱,
19 te̱ i̱nga̱ ra̱ ndii,
rey ñu̱u̱ Madón nduuꞌ ra̱,
te̱ i̱nga̱ ra̱ ndii,
rey ñu̱u̱ Hazor nduuꞌ ra̱,
20 te̱ i̱nga̱ ra̱ ndii,
rey ñu̱u̱ Simron-merón nduuꞌ ra̱,
te̱ i̱nga̱ ra̱ ndii,
rey ñu̱u̱ Acsaf nduuꞌ ra̱,
21 te̱ i̱nga̱ ra̱ ndii,
rey ñu̱u̱ Taanac nduuꞌ ra̱,
te̱ i̱nga̱ ra̱ ndii,
rey ñu̱u̱ Meguido nduuꞌ ra̱,
22 te̱ i̱nga̱ ra̱ ndii,
rey ñu̱u̱ Cedes nduuꞌ ra̱,
te̱ i̱nga̱ ra̱ ndii,
rey ñu̱u̱ Jocneam nduuꞌ ra̱,
te̱ ñu̱u̱ ja̱a̱nꞌ ndii,
kanduꞌu̱ꞌ a̱ te̱i̱n i̱kuꞌ ña̱ itaꞌ nuu̱ꞌ ñu̱ꞌuꞌ ya̱ti̱n i̱kuꞌ ña̱ naniꞌ Carmelo.
23 Te̱ i̱nga̱ ra̱ ndii,
rey ñu̱u̱ Dor nduuꞌ ra̱,
te̱ ñu̱u̱ ja̱a̱nꞌ ndii,
kanduꞌu̱ꞌ a̱ yo̱soꞌ nda̱ꞌaꞌ ñu̱ꞌuꞌ Dor,
te̱ i̱nga̱ ra̱ ndii,
rey ñu̱u̱ Goim nduuꞌ ra̱,
te̱ ñu̱u̱ ja̱a̱nꞌ ndii,
kanduꞌu̱ꞌ a̱ nuu̱ꞌ ñu̱ꞌuꞌ Gilgal,
24 te̱ i̱nga̱ ra̱ ndii,
rey ñu̱u̱ Tirsa nduuꞌ ra̱.
Te̱ ña̱ sa̱kuuꞌ rey,
te̱ ni̱ ke̱ta̱ va̱ꞌa̱ ne̱ Israel xiinꞌ ndii,
oko̱ uxi̱ i̱i̱n kuuꞌ ra̱.