So̱ꞌo̱ ni̱ xa̱a̱ a̱ kii̱ꞌ ni̱ ko̱ꞌni̱ ne̱ Israel ñu̱u̱ Hai, te̱ ni̱ ka̱nandoo ni̱a̱ ne̱ ndieeꞌ i̱kanꞌ
8
Sa̱kanꞌ te̱ ni̱ kaꞌa̱n Yahvé xiinꞌ Josué ndii:
―Kuäa̱nꞌ yiꞌvi u̱nꞌ,
ni̱ nde̱e̱ kä̱ka̱ tu̱ nimá u̱nꞌ.
Na̱ka̱ sa̱kuuꞌ te̱ yivi̱ꞌ,
te̱ xa̱ ku̱vi̱ ku̱ntaꞌanꞌ miiꞌ yoo ñuꞌu̱,
te̱ ka̱a̱ ndo̱ꞌ,
te̱ kuꞌu̱n ku̱ntaꞌanꞌ ndo̱ꞌ xiinꞌ ne̱ ndieeꞌ ñu̱u̱ Hai.
Sa̱kanꞌ ña̱ xa̱ ni̱ sa̱na̱kuaꞌa i̱ nda̱ꞌaꞌ ndo̱ꞌ rey,
te̱ xaꞌndia tyuunꞌ i̱kanꞌ,
xiinꞌ sa̱kuuꞌ ne̱ ñu̱u̱ ra̱,
xiinꞌ ka̱niiꞌ ñu̱u̱ ra̱,
xiinꞌ ka̱niiꞌ nuu̱ꞌ ñu̱ꞌuꞌ miiꞌ xaꞌndia tyuunꞌ ra̱.
2 Te̱ sa̱ndo̱ñuꞌuꞌ xa̱tyiꞌ ndo̱ꞌ ñu̱u̱ Hai ja̱a̱nꞌ sa̱a̱ niiꞌ ni̱ sa̱ndo̱ñuꞌuꞌ ndo̱ꞌ ñu̱u̱ Jericó xiinꞌ rey,
te̱ ni̱ xa̱ꞌndi̱a̱ tyuunꞌ nuu̱ꞌ a̱.
Ndisu̱ vi̱ti̱n ndii,
ku̱vi̱ ndoo̱ ndo̱ꞌ xiinꞌ sa̱kuuꞌ ña̱ꞌa̱ ña̱ na̱ka̱ya̱ ndo̱ꞌ xiinꞌ sa̱kuuꞌ ki̱tiꞌ,
tiꞌ na̱ka̱ ndo̱ꞌ ku̱ndu̱u̱ ña̱ꞌa̱ ndo̱ꞌ.
Ku̱ndi̱e̱e̱ si̱ꞌe ndo̱ꞌ xata̱ꞌ ñu̱u̱ ja̱a̱nꞌ miiꞌ kasi̱ꞌe te̱ ko̱ꞌni̱ ndo̱ꞌ ku̱u̱n ña̱ꞌaꞌ ndo̱ꞌ kii̱ꞌ köo̱ꞌ a̱ naá nimá te̱ ndieeꞌ ñu̱u̱ ja̱a̱nꞌ ―ni̱ katyi̱ a̱.
3 Sa̱kanꞌ te̱ ni̱ nu̱ta̱ Josué xiinꞌ sa̱kuuꞌ te̱ xíinꞌ ra̱,
te̱ ni̱ ki̱e̱e̱ ra̱ kuaꞌa̱n ra̱ ñu̱u̱ Hai.
Ni̱ na̱ka̱xi̱n ra̱ oko̱ uxi̱ mií te̱ xíinꞌ,
te̱ ndi̱e̱ni ka̱ ku̱ntaꞌanꞌ,
te̱ ni̱ ti̱ꞌviꞌ ña̱ꞌaꞌ ra̱ ñu̱u
4 kaꞌán tyuunꞌ ra̱ xiinꞌ te̱ ja̱a̱nꞌ ndii:
―Ku̱ni̱ so̱ꞌo̱ kaxiꞌ ndo̱ꞌ ña̱ kaꞌa̱n i̱.
Kuaꞌan ndo̱ꞌ xata̱ꞌ ñu̱u̱,
te̱ ti̱si̱ꞌe ndo̱ꞌ ya̱ti̱n i̱kanꞌ,
te̱ ko̱o̱ tu̱ꞌva̱ ndo̱ꞌ te̱ ko̱ꞌni̱ ndo̱ꞌ i̱kanꞌ kii̱ꞌ kuní a̱ ku̱ntaꞌanꞌ ndo̱ꞌ.
5 Te̱ yuꞌu̱ xiinꞌ sa̱kuuꞌ te̱ yivi̱ꞌ,
te̱ kuꞌu̱n xiinꞌ i̱ ndii,
ku̱ya̱ti̱n ndu̱ ñu̱u̱ ja̱a̱nꞌ,
te̱ kii̱ꞌ ki̱e̱e̱ te̱ ñu̱u̱ ja̱a̱nꞌ te̱ ku̱ntaꞌanꞌ ra̱ xiinꞌ ndu̱ naa ni̱ xa̱a̱ ra̱ sa̱aꞌ ndii,
ku̱nu̱ ndu̱ nuu̱ꞌ ra̱.
6 Te̱ xa̱ꞌaꞌ te̱ ja̱a̱nꞌ ku̱ndiku̱n ra̱ nduꞌu̱ nde̱e̱ ska̱tyiꞌ sa̱xikaꞌ ña̱ꞌaꞌ ndu̱ nuu̱ꞌ ñu̱u̱ ja̱a̱nꞌ,
sa̱kanꞌ ña̱ kaꞌa̱n ra̱ ndii:
“Xinuꞌ te̱ Israel kaa̱ꞌ nuu̱ꞌ e̱ꞌ nde̱e̱ naa ni̱ xa̱a̱ ra̱ ña̱ nu̱uꞌ”,
katyi̱ ra̱.
Sa̱kanꞌ na kuiiꞌ ku̱nu̱ ndu̱ nuu̱ꞌ ra̱.
7 Sa̱kanꞌ te̱ i̱i̱n ki̱e̱e̱ ti̱o̱ ndoꞌó miiꞌ ñuꞌuꞌ si̱ꞌe ndo̱ꞌ ja̱a̱nꞌ,
te̱ ko̱ꞌni̱ ndo̱ꞌ ñu̱u̱ ja̱a̱nꞌ,
sa̱kanꞌ ña̱ Yahvé,
Ndiosí e̱ꞌ ndii,
sa̱na̱kuaꞌa a̱ ñu̱u̱ ja̱a̱nꞌ nda̱ꞌaꞌ e̱ꞌ.
8 Te̱ kii̱ꞌ ko̱ꞌni̱ ndo̱ꞌ ñu̱u̱ ja̱a̱nꞌ ndii,
ka̱ꞌmi̱ ndo̱ꞌ a̱ sa̱a̱ niiꞌ ni̱ kaꞌa̱n tyuunꞌ Yahvé xiinꞌ e̱ꞌ.
Sa̱kanꞌ ña̱ ña̱ ja̱a̱nꞌ ni̱ kaꞌa̱n tyuunꞌ a̱ xiinꞌ e̱ꞌ sa̱a̱ e̱ꞌ xiinꞌ ñu̱u̱ ja̱a̱nꞌ ―ni̱ katyi̱ ra̱.
9 Sa̱kanꞌ te̱ ni̱ ti̱ꞌviꞌ ña̱ꞌaꞌ Josué,
te̱ ni̱ ki̱e̱e̱ te̱ ja̱a̱nꞌ kuaꞌa̱n ra̱ miiꞌ ku̱ndi̱e̱e̱ si̱ꞌe ra̱ ja̱a̱nꞌ,
te̱ ni̱ xi̱ku̱ndiee̱ ra̱ ya̱ti̱n ñu̱u̱ Betel xata̱ꞌ ñu̱u̱ Hai xtoꞌniꞌ miiꞌ ketá ñu̱ꞌu̱.
Ndisu̱ Josué ndii,
ni̱ ndoo̱ ra̱ ñu̱u ja̱a̱nꞌ xiinꞌ ne̱ kuaꞌa̱ꞌ ku̱i̱ti̱ꞌ vi̱ꞌe̱ toto̱ miiꞌ ndieeꞌ sa̱kuuꞌ ra̱.
10 Te̱ ni̱a̱ꞌa̱ va̱ tu̱ku̱ kivi̱ꞌ,
te̱ ni̱ ndo̱koo̱ Josué,
te̱ ni̱ nda̱sa̱ i̱i̱n ra̱ sa̱kuuꞌ te̱ xíinꞌ ra̱,
te̱ ni̱ ka̱a̱ ra̱ ñu̱u̱ Hai ja̱a̱nꞌ xiinꞌ te̱ xi̱xa̱ nuu̱ꞌ ne̱ Israel niꞌiꞌ i̱tyiꞌ ra̱ nuu̱ꞌ sa̱kuuꞌ ni̱a̱ kuaꞌa̱n ra̱ te̱ ku̱ntaꞌanꞌ ra̱ xiinꞌ te̱ ndieeꞌ ñu̱u̱ ja̱a̱nꞌ.
11 Te̱ sa̱kuuꞌ te̱ xíinꞌ,
te̱ kuaꞌa̱n xiinꞌ Josué ndii,
ni̱ xa̱a̱ ra̱ ya̱ti̱n nuu̱ꞌ ñu̱u̱ Hai ja̱a̱nꞌ,
te̱ ni̱ xi̱ku̱ndiee̱ ra̱ nda̱ꞌaꞌ ku̱a̱ꞌa̱ a̱ xi̱i̱nꞌ ñu̱u̱ ja̱a̱nꞌ,
te̱ ni̱ yoo̱ i̱i̱n yo̱soꞌ te̱i̱n a̱ miiꞌ ndieeꞌ ra̱ ja̱a̱nꞌ xiinꞌ mi̱iꞌ kanduꞌu̱ꞌ ñu̱u̱ Hai ja̱a̱nꞌ.
12 Te̱ ni̱ ti̱ꞌviꞌ Josué uꞌu̱n mií te̱ xíinꞌ ra̱,
te̱ ni̱ xi̱ku̱ndiee̱ si̱ꞌe ra̱ xtoꞌniꞌ miiꞌ ketá ñu̱ꞌu̱ te̱i̱n a̱ miiꞌ kanduꞌu̱ꞌ ñu̱u̱ Betel xiinꞌ ñu̱u̱ Hai.
13 Sa̱kanꞌ na kuiiꞌ so̱ꞌo̱ ni̱ sa̱kooꞌ tu̱ꞌva̱ xiinꞌ miiꞌ Josué xiinꞌ te̱ xíinꞌ ra̱.
Sa̱kuuꞌ te̱ xíinꞌ,
te̱ kuaꞌa̱ꞌ ku̱i̱ti̱ꞌ ndii,
nda̱ꞌaꞌ ku̱a̱ꞌa̱ ñu̱u̱ ja̱a̱nꞌ ni̱ ndoo̱ ra̱,
te̱ te̱ xíinꞌ,
te̱ ni̱ ndiee̱ si̱ꞌe ndii,
xtoꞌniꞌ miiꞌ ketá ñu̱ꞌu̱ ni̱ ndiee̱ ra̱,
te̱ mi̱iꞌ Josué ndii,
nde̱e̱ ma̱ꞌiꞌ yo̱soꞌ ya̱ti̱n ñu̱u̱ ja̱a̱nꞌ ni̱ ndoo̱ ra̱.
14 Te̱ kii̱ꞌ ni̱ xi̱ni̱ rey,
te̱ xaꞌndia tyuunꞌ ñu̱u̱ Hai ja̱a̱nꞌ,
ku̱a̱xi̱ te̱ xíinꞌ te̱ Israel ndii,
numi̱ꞌ va̱ te̱ ni̱ ki̱e̱e̱ ra̱ ni̱a̱ꞌa̱ xiinꞌ sa̱kuuꞌ te̱ xíinꞌ ra̱,
te̱ ku̱ntaꞌanꞌ ra̱ xiinꞌ te̱ vi̱ꞌe̱ Israel yo̱soꞌ ya̱ti̱n i̱ti̱a̱ Jordán.
Ndisu̱ xïní rey ja̱a̱nꞌ ña̱ xa̱ ndieeꞌ si̱ꞌe i̱i̱n ti̱ꞌvi̱ te̱ xíinꞌ te̱ Israel xata̱ꞌ ñu̱u̱ Hai ja̱a̱nꞌ te̱ ko̱ꞌni̱ ra̱ ñu̱u̱ ja̱a̱nꞌ.
15 Sa̱kanꞌ te̱ ni̱ xi̱ni̱ xaꞌanꞌ Josué xiinꞌ sa̱kuuꞌ ne̱ Israel,
ni̱ xa̱a̱ ni̱a̱ nde̱e̱ naa ni̱ ka̱nandoo xa̱tyiꞌ ña̱ꞌaꞌ te̱ xíinꞌ ja̱a̱nꞌ,
te̱ ni̱ xi̱nu̱ ni̱a̱ nuu̱ꞌ te̱ ja̱a̱nꞌ kuaꞌa̱n ni̱a̱ i̱tyiꞌ ña̱ kuaꞌa̱n miiꞌ i̱tyiꞌ kaaꞌ.
16 Te̱ sa̱kuuꞌ ne̱ ndieeꞌ ñu̱u̱ Hai ja̱a̱nꞌ ni̱ xi̱ku̱ndiku̱n taxiꞌ ni̱a̱ ne̱ vi̱ꞌe̱ Israel ja̱a̱nꞌ.
Sa̱kanꞌ ni̱ xa̱a̱ ne̱ vi̱ꞌe̱ Israel,
te̱ ni̱ ta̱va̱ꞌ xikaꞌ ni̱a̱ ne̱ ndieeꞌ ñu̱u̱ ja̱a̱nꞌ.
17 Te̱ nde̱e̱ i̱i̱n nda̱a̱ꞌ te̱ yivi̱ꞌ nï̱ ndoo̱ ka̱ ñu̱u̱ Hai xiinꞌ ñu̱u̱ Betel,
süu̱ꞌ ja̱a̱nꞌ ndii,
sa̱kuuꞌ ra̱ ndikún kuaꞌa̱n taxiꞌ ra̱ ne̱ vi̱ꞌe̱ Israel,
te̱ köo̱ꞌ nde̱e̱ i̱i̱n te̱ xíinꞌ ni̱ na̱ko̱o̱ ra̱ xitoꞌ yiꞌeꞌ ñu̱u̱ Hai ja̱a̱nꞌ.
18 Sa̱kanꞌ te̱ ni̱ kaꞌa̱n Yahvé xiinꞌ Josué ndii:
―Ka̱ta̱ni̱ kii̱ꞌ ityi̱ ña̱ niꞌiꞌ u̱nꞌ ñaa̱ꞌ ñu̱u̱ Hai,
sa̱kanꞌ ña̱ vi̱ti̱n sa̱na̱kuaꞌa i̱ ñu̱u̱ ja̱a̱nꞌ nda̱ꞌaꞌ ndo̱ꞌ ―ni̱ katyi̱ a̱.
Sa̱kanꞌ te̱ ni̱ ka̱ta̱ni̱ Josué ityi̱ ra̱ ña̱ niꞌiꞌ ra̱ ja̱a̱nꞌ ñu̱u̱ Hai ja̱a̱nꞌ.
19 Te̱ kii̱ꞌ ni̱ ka̱ta̱ni̱ Josué ityi̱ ra̱ ñu̱u̱ ja̱a̱nꞌ ndii,
xa̱kaꞌán e̱ꞌ te̱ ni̱ ki̱e̱e̱ sa̱kuuꞌ te̱ xíinꞌ,
te̱ ñuꞌuꞌ si̱ꞌe ja̱a̱nꞌ,
te̱ ni̱ ko̱ꞌni̱ ra̱ ñu̱u̱ ja̱a̱nꞌ,
te̱ ni̱ xa̱ꞌni̱ꞌ ra̱ sa̱kuuꞌ ne̱ yivi̱ꞌ,
ne̱ ndieeꞌ i̱kanꞌ,
te̱ yatyi̱ va̱ ni̱ xa̱ꞌmi̱ tu̱ ra̱ ñu̱u̱ ja̱a̱nꞌ.
20 Te̱ kii̱ꞌ ni̱ na̱ko̱to̱ xata̱ꞌ te̱ ñu̱u̱ Hai ja̱a̱nꞌ ndii,
ni̱ xi̱ni̱ ra̱ ña̱ xa̱ nde̱e̱ ndi̱viꞌ naxaá ñuꞌma̱ ña̱ xixí ñu̱u̱ ra̱,
te̱ köo̱ꞌ ka̱ miiꞌ ku̱vi̱ kuꞌu̱n ra̱,
sa̱kanꞌ ña̱ te̱ xíinꞌ Israel,
te̱ xinuꞌ kuaꞌa̱n miiꞌ i̱tyiꞌ kaaꞌ ndii,
ni̱ na̱ndi̱koꞌ kuiín ra̱,
te̱ ni̱ xa̱ꞌaꞌ ra̱ ku̱ntaꞌanꞌ ra̱ xiinꞌ te̱ xíinꞌ,
te̱ ndikún taxiꞌ ña̱ꞌaꞌ.
21 Te̱ kii̱ꞌ ni̱ xi̱ni̱ Josué xiinꞌ sa̱kuuꞌ te̱ Israel ña̱ ni̱ ke̱ta̱ va̱ꞌa̱ te̱ xíinꞌ,
te̱ ni̱ ndiee̱ si̱ꞌe ja̱a̱nꞌ,
te̱ ni̱ xi̱ni̱ tu̱ ra̱ ña̱ kuaꞌa̱n ka̱a̱ ñuꞌma̱ ña̱ xixí ñu̱u̱ ja̱a̱nꞌ ndii,
ni̱ na̱ndi̱koꞌ sa̱kuuꞌ ra̱,
te̱ ni̱ ku̱ntaꞌanꞌ ra̱ xiinꞌ te̱ yivi̱ꞌ,
te̱ ni̱ ndoo̱ ka̱ ndieeꞌ ñu̱u̱ Hai ja̱a̱nꞌ.
22 Te̱ te̱ Israel,
te̱ ni̱ ko̱ꞌni̱ ni̱ xa̱ꞌmi̱ ñu̱u̱ ja̱a̱nꞌ ndii,
ni̱ ki̱e̱e̱ ra̱ ñu̱u̱ ja̱a̱nꞌ kuaꞌa̱n na̱taꞌanꞌ ra̱ xiinꞌ te̱ ñu̱u̱ Hai,
sa̱kanꞌ na kuiiꞌ te̱ ñu̱u̱ Hai ja̱a̱nꞌ ndii,
ndee ma̱ꞌiꞌ ni̱ ndoo̱ ra̱,
i̱i̱n ti̱ꞌvi̱ ni̱ na̱ka̱si̱ nuu̱ꞌ ra̱,
te̱ i̱nga̱ ti̱ꞌvi̱ ni̱ na̱ka̱si̱ xata̱ꞌ ra̱.
Te̱ ni̱ xa̱ꞌni̱ꞌ te̱ xíinꞌ te̱ Israel sa̱kuuꞌ ra̱,
te̱ nde̱e̱ i̱i̱n ra̱ nï̱ kaku̱.
23 Ndisu̱ nï̱ xa̱ꞌni̱ꞌ ra̱ rey ñu̱u̱ Hai ja̱a̱nꞌ,
süu̱ꞌ ja̱a̱nꞌ ndii,
ni̱ na̱ti̱i̱n tiaku ña̱ꞌaꞌ ra̱,
te̱ ni̱ sa̱na̱kuaꞌa ña̱ꞌaꞌ ra̱ nda̱ꞌaꞌ Josué.
24 Te̱ kii̱ꞌ ndi̱ꞌi̱ ni̱ xa̱ꞌni̱ꞌ te̱ xíinꞌ Israel sa̱kuuꞌ te̱ xíinꞌ ñu̱u̱ Hai ja̱a̱nꞌ xaꞌa̱ꞌ kuꞌu̱ xiinꞌ miiꞌ i̱tyiꞌ kaaꞌ miiꞌ ni̱ ndiku̱n ña̱ꞌaꞌ te̱ ja̱a̱nꞌ,
te̱ ni̱ ndi̱ꞌi̱ ndo̱o̱ ra̱ ni̱ xiꞌi̱ xiinꞌ ityi̱,
te̱ nde̱e̱ i̱i̱n nda̱a̱ꞌ ra̱ nï̱ ndoo̱ ka̱ ndii,
ni̱ na̱ndi̱koꞌ sa̱kuuꞌ te̱ Israel ñu̱u̱ Hai,
te̱ ni̱ xa̱ꞌni̱ꞌ ndo̱o̱ tu̱ ra̱ ne̱ ni̱ ndoo̱ ka̱ ndieeꞌ ñu̱u̱ ja̱a̱nꞌ.
25 Ña̱ sa̱kuuꞌ ne̱ ni̱ xiꞌi̱ kii̱ꞌ sa̱kanꞌ,
tiaa̱ ni̱ xiinꞌ ña̱ꞌaꞌ ni̱ ndii,
uxi̱ uvi̱ mií ni̱ ku̱u̱ ni̱a̱,
te̱ sa̱kuuꞌ ne̱ ja̱a̱nꞌ ni̱ nduu̱ ne̱ ñu̱u̱ Hai ja̱a̱nꞌ.
26 Sa̱kanꞌ ña̱ Josué ndii,
nï̱ sa̱nuuꞌ ra̱ nda̱ꞌaꞌ ra̱ ña̱ kataniꞌ ra̱ ityi̱ ra̱ ñu̱u̱ Hai ja̱a̱nꞌ nde̱e̱ ska̱tyiꞌ ni̱ ndi̱ꞌi̱ sa̱kuuꞌ ne̱ ndieeꞌ ñu̱u̱ ja̱a̱nꞌ ni̱ xa̱ꞌni̱ꞌ te̱ xíinꞌ ra̱.
27 Ndisu̱ ne̱ Israel ndii,
ni̱ na̱ka̱ ni̱a̱ sa̱kuuꞌ ki̱tiꞌ sana̱ ne̱ ñu̱u̱ ja̱a̱nꞌ ni̱ na̱ndu̱u̱ riꞌ sana̱ ni̱a̱,
te̱ ni̱ na̱ka̱ya̱ ndo̱o̱ tu̱ ni̱a̱ ña̱ꞌa̱ ne̱ ja̱a̱nꞌ ni̱ na̱ndu̱u̱ ña̱ꞌa̱ ni̱a̱,
sa̱a̱ niiꞌ ni̱ kaꞌa̱n tyuunꞌ mi̱iꞌ Yahvé xiinꞌ Josué sa̱a̱ ni̱a̱.
28 Ndi̱ꞌi̱ ja̱a̱nꞌ te̱ ni̱ xa̱ꞌmi̱ ndo̱o̱ Josué ka̱niiꞌ ñu̱u̱ Hai ja̱a̱nꞌ nde̱e̱ ni̱ na̱ndu̱u̱ a̱ ndee yuu̱ꞌ ndiki̱ so̱ꞌo̱,
te̱ ni̱ nduxi̱n ka̱niiꞌ a̱,
te̱ sa̱kanꞌ kaaꞌ a̱ nde̱e̱ kivi̱ꞌ vi̱ti̱n.
29 Te̱ rey ñu̱u̱ ja̱a̱nꞌ ndii,
nuu̱ꞌ ndu̱yu̱ ni̱ ka̱ta̱xkoꞌ ña̱ꞌaꞌ Josué,
te̱ ni̱ xiꞌi̱ ra̱,
te̱ ni̱ sa̱nuuꞌ ña̱ꞌaꞌ ra̱ nde̱e̱ kii̱ꞌ ni̱ ku̱a̱a̱ꞌ vi̱ꞌ,
te̱ kii̱ꞌ xa̱ ketá ñu̱ꞌu̱ ndii,
ni̱ kaꞌa̱n tyuunꞌ Josué ña̱ sa̱nuuꞌ te̱ yivi̱ꞌ ñu̱ꞌuꞌ ndeꞌi̱ rey ja̱a̱nꞌ nuu̱ꞌ ndu̱yu̱ ja̱a̱nꞌ,
te̱ ska̱naꞌ ña̱ꞌaꞌ ra̱ yiꞌeꞌ ñu̱u̱ Hai ja̱a̱nꞌ,
te̱ ni̱ sa̱kaaꞌ ra̱ mo̱to tyiee̱ vi̱ꞌ yuu̱ꞌ xata̱ꞌ ñu̱ꞌuꞌ ndeꞌi̱ rey ja̱a̱nꞌ,
te̱ ndieeꞌ ka̱ yuu̱ꞌ ja̱a̱nꞌ nde̱e̱ kivi̱ꞌ vi̱ti̱n.
Yoꞌoꞌ kaꞌviꞌ Josué tu̱ꞌu̱n nde̱iꞌ Ndiosí nuu̱ꞌ ne̱ Israel
30 Sa̱kanꞌ te̱ ni̱ xa̱ꞌa̱ Josué i̱i̱n altar xíniꞌ i̱kuꞌ ña̱ naniꞌ Ebal miiꞌ sa̱kaꞌnuꞌ ra̱ Yahvé,
Ndiosí ña̱ xakaꞌnuꞌ ne̱ Israel,
taꞌanꞌ ra̱,
31 sa̱a̱ niiꞌ ni̱ kaꞌa̱n tyuunꞌ Moisés,
te̱ ni̱ xika̱ nu̱u̱ nuu̱ꞌ Yahvé,
xiinꞌ ne̱ vi̱ꞌe̱ Israel,
naa yoso̱ꞌ a̱ nuu̱ꞌ tu̱ꞌu̱n nde̱iꞌ ña̱ ni̱ ke̱ꞌi̱ Moisés,
miiꞌ kaꞌán a̱ ndii:
“Ka̱sa̱ꞌa̱ u̱nꞌ i̱i̱n altar xiinꞌ yuu̱ꞌ niiꞌ,
ña̱ köo̱ꞌ kivi̱ꞌ ni̱ taꞌviꞌ te̱ yivi̱ꞌ xiinꞌ ka̱a̱ viee̱”,
katyi a̱.
Te̱ ni̱ xa̱ꞌmi̱ ni̱a̱ ki̱tiꞌ nuu̱ꞌ altar ja̱a̱nꞌ nuu̱ꞌ Yahvé,
te̱ ni̱ xa̱ꞌmi̱ tu̱ ni̱a̱ tu̱mani̱ꞌ ña̱ nakoó ni̱a̱ ña̱ mani̱ꞌ xiinꞌ Ndiosí i̱kanꞌ.
32 Te̱ nuu̱ꞌ ne̱ vi̱ꞌe̱ Israel itaꞌ ni̱a̱ i̱kanꞌ,
te̱ ni̱ ke̱ꞌi̱ Josué sa̱kuuꞌ ña̱ yoso̱ꞌ nuu̱ꞌ tu̱ꞌu̱n nde̱iꞌ Moisés xata̱ꞌ yuu̱ꞌ ña̱ ni̱ ku̱a̱ꞌa̱ altar ja̱a̱nꞌ.
33 Te̱ sa̱kuuꞌ ne̱ vi̱ꞌe̱ Israel,
xiinꞌ te̱ xi̱xa̱ nuu̱ꞌ ñu̱u̱ ni̱a̱,
xiinꞌ te̱ xíinꞌ kuuꞌ nu̱uꞌ ni̱a̱,
xiinꞌ kuesí ni̱a̱,
so̱ꞌo̱ ne̱ tukuꞌ niꞌ,
xiinꞌ mi̱iꞌ ne̱ vi̱ꞌe̱ Israel ndii,
itaꞌ ndi̱tyi̱ ni̱a̱ uvi̱ sa̱aꞌ taꞌviꞌ xi̱i̱nꞌ xatu̱nꞌ miiꞌ naá tu̱tu̱ Yahvé.
I̱i̱n ti̱ꞌvi̱ ni̱a̱ itaꞌ xtoꞌniꞌ miiꞌ kanduꞌu̱ꞌ ñu̱u̱ Gerizim,
te̱ i̱i̱n ti̱ꞌvi̱ ni̱a̱ itaꞌ xtoꞌniꞌ miiꞌ iinꞌ i̱kuꞌ Ebal.
Te̱ xtoꞌniꞌ nuu̱ꞌ taꞌanꞌ uvi̱ sa̱aꞌ ti̱ꞌvi̱ ni̱a̱,
te̱ ma̱ꞌiꞌ ni̱a̱ itaꞌ sutu̱ te̱ vi̱ꞌe̱ Leví,
te̱ niꞌiꞌ xatu̱nꞌ miiꞌ naá tu̱tu̱ Yahvé.
Ni̱ xa̱a̱ ni̱a̱ sa̱a̱ niiꞌ ni̱ kaꞌa̱n tyuunꞌ Moisés,
te̱ ni̱ xika̱ nu̱u̱ nuu̱ꞌ Yahvé,
xta̱ꞌanꞌ xiinꞌ ni̱a̱ ña̱ kuní ka̱ ku̱vi̱ ra̱ kii̱ꞌ ni̱ sa̱ñuꞌuꞌ ña̱ꞌaꞌ ra̱.
34 Ndi̱ꞌi̱ ja̱a̱nꞌ te̱ ni̱ ka̱ꞌvi̱ Josué sa̱kuuꞌ ña̱ kaꞌán tu̱ꞌu̱n nde̱iꞌ Ndiosí,
miiꞌ kaꞌán a̱ xaꞌa̱ꞌ ña̱ sa̱ñuꞌuꞌ Ndiosí xiinꞌ ña̱ sa̱na̱tyaꞌanꞌ a̱ sa̱a̱ niiꞌ yoso̱ꞌ a̱ nuu̱ꞌ tu̱ꞌu̱n nde̱iꞌ ja̱a̱nꞌ.
35 Te̱ nde̱e̱ i̱i̱n ña̱ yoso̱ꞌ nuu̱ꞌ tu̱ꞌu̱n nde̱iꞌ ña̱ ni̱ kaꞌa̱n tyuunꞌ Moisés ja̱a̱nꞌ,
nï̱ na̱ko̱o̱ Josué ña̱ ka̱ꞌvi̱ ra̱ nuu̱ꞌ sa̱kuuꞌ ne̱ Israel.
So̱ꞌo̱ ña̱ꞌaꞌ ni̱,
so̱ꞌo̱ ne̱ kuatyi̱ꞌ kualiꞌ ni̱,
so̱ꞌo̱ ne̱ tukuꞌ,
ne̱ ndieeꞌ te̱i̱n ni̱a̱ ndii,
ni̱ ka̱ꞌvi̱ ra̱ a̱ nuu̱ꞌ sa̱kuuꞌ ni̱a̱.