Yoꞌoꞌ kaꞌán a̱ xaꞌa̱ꞌ ku̱a̱tyi̱ ña̱ ni̱ xa̱a̱ Acán
7
Ndisu̱ ne̱ vi̱ꞌe̱ Israel ndii,
nï̱ ta̱xi̱ so̱ꞌo̱ ni̱a̱ ña̱ ni̱ kaꞌa̱n tyuunꞌ Ndiosí xiinꞌ ni̱a̱ xaꞌa̱ꞌ ña̱ꞌa̱ ña̱ ni̱ kuni̱ a̱ ku̱ndu̱u̱ ndi̱ti̱a̱ Ndiosí.
Sa̱kanꞌ ña̱ i̱i̱n te̱ yivi̱ꞌ,
te̱ naniꞌ Acán ndii,
ni̱ xa̱kuiꞌnaꞌ ra̱ ndiaꞌviꞌ ña̱ nduuꞌ ndi̱ti̱a̱ Ndiosí.
Xaꞌa̱ꞌ a̱ ja̱a̱nꞌ na ni̱ na̱saa̱ꞌ xa̱va̱ꞌa̱ Yahvé ni̱ xi̱ni̱ a̱ ne̱ Israel.
Acán ja̱a̱nꞌ ndii,
siꞌe̱ Carmi nduuꞌ ra̱,
te̱ Carmi ja̱a̱nꞌ ni̱ nduu̱ si̱a̱niꞌ Zabdi,
te̱ Zabdi ja̱a̱nꞌ ni̱ nduu̱ siꞌe̱ Zera,
te̱ sa̱kuuꞌ ra̱ ni̱ nduu̱ i̱tyiꞌ ne̱ vi̱ꞌe̱ Judá.
2 Ni̱ yaꞌa̱,
te̱ ni̱ ti̱ꞌviꞌ Josué ndiaꞌviꞌ te̱ yivi̱ꞌ nde̱e̱ ñu̱u̱ Jericó te̱ kuaꞌa̱n ko̱to̱ ra̱ sa̱a̱ kaaꞌ ñu̱u̱ Hai ña̱ kanduꞌu̱ꞌ ya̱ti̱n xiki̱ꞌ ña̱ naniꞌ Bet-avén,
xtoꞌniꞌ miiꞌ ketaꞌ ñu̱ꞌu̱ miiꞌ iinꞌ xiki̱ꞌ ña̱ naniꞌ Bet-el.
3 Te̱ kii̱ꞌ ni̱ na̱ndi̱koꞌ te̱ yivi̱ꞌ ja̱a̱nꞌ te̱ ni̱ kaꞌa̱n ra̱ xiinꞌ Josué ndii:
―Küní a̱ kuꞌu̱n sa̱kuuꞌ e̱ꞌ te̱ ku̱ntaꞌanꞌ e̱ꞌ xiinꞌ te̱ ndieeꞌ ñu̱u̱ Hai ja̱a̱nꞌ,
xa̱ ni̱a̱ni̱ yaꞌa̱ uvi̱ mií uun uni̱ mií ku̱i̱ti̱ꞌ e̱ꞌ.
Sa̱kanꞌ na kuiiꞌ vä̱ꞌa̱ sa̱xa̱vi u̱nꞌ sa̱kuuꞌ ne̱ yivi̱ꞌ ña̱ kuꞌu̱n ka̱a̱ ni̱a̱ nde̱e̱ ñu̱u̱ ja̱a̱nꞌ,
sa̱kanꞌ ña̱ köo̱ꞌ kuaꞌa̱ꞌ xa̱tyiꞌ te̱ yivi̱ꞌ ndieeꞌ ñu̱u̱ ja̱a̱nꞌ ―ni̱ katyi̱ ra̱.
4 Sa̱kanꞌ na kuiiꞌ ni̱ ti̱ꞌviꞌ Josué kuyatinꞌ uni̱ mií te̱ yivi̱ꞌ te̱ ku̱ntaꞌanꞌ ra̱ xiinꞌ te̱ ndieeꞌ ñu̱u̱ ja̱a̱nꞌ,
ndisu̱ ni̱ ka̱nandoo ndi̱ꞌi̱ ña̱ꞌaꞌ te̱ ndieeꞌ ñu̱u̱ Hai ja̱a̱nꞌ,
te̱ ni̱ ta̱xiꞌ ndo̱o̱ ña̱ꞌaꞌ ra̱.
5 Te̱ ni̱ xa̱ꞌni̱ꞌ ra̱ oko̱ xaꞌu̱n i̱i̱n taꞌan te̱ xíinꞌ kuenta te̱ Israel,
te̱ nde̱e̱ yiꞌeꞌ ñu̱u̱ ja̱a̱nꞌ ni̱ ki̱e̱e̱ ra̱,
te̱ ni̱ ta̱xiꞌ ra̱ sa̱va̱ te̱ ja̱a̱nꞌ,
te̱ ni̱ xaꞌa̱n ndi̱a̱ka̱ ña̱ꞌaꞌ ra̱ nde̱e̱ miiꞌ naniꞌ Sebarim,
te̱ ni̱ xaꞌa̱n ka̱nandoo ña̱ꞌaꞌ ra̱ nde̱e̱ miiꞌ nakaa̱ꞌ.
Te̱ xaꞌa̱ꞌ a̱ ja̱a̱nꞌ na ni̱ yi̱ꞌvi xa̱va̱ꞌa̱ ne̱ Israel nde̱e̱ ni̱ ki̱si̱ vi̱ꞌ ña̱ꞌaꞌ a̱.
6 Sa̱kanꞌ te̱ Josué xiinꞌ te̱ xi̱xa̱ nuu̱ꞌ ne̱ Israel ndii,
ni̱ nda̱taꞌ sa̱kuuꞌ ra̱ toto̱ nani̱ꞌ niꞌnuꞌ ra̱,
te̱ ni̱ sa̱kaaꞌ tu̱ ra̱ ya̱kaꞌ xíniꞌ ra̱ te̱ niaꞌa̱ ra̱ ña̱ sutyiꞌ va̱ i̱ni̱ ra̱.
Te̱ ni̱ xi̱ku̱ndiee̱ ndi̱e̱e̱ sa̱kuuꞌ ra̱ nde̱e̱ nuu̱ꞌ ñu̱ꞌuꞌ ya̱ti̱n nuu̱ꞌ xatu̱nꞌ miiꞌ naá tu̱tu̱ Yahvé,
nde̱e̱ ni̱ ku̱a̱a̱ꞌ.
7 Te̱ ni̱ kaꞌa̱n tiꞌeꞌ Josué xiinꞌ Yahvé ndii:
―Tákuiꞌe Yahvé,
¿ndiotyun na ni̱ sa̱xkaꞌndi̱a̱ u̱nꞌ ndu̱ i̱ti̱a̱ Jordán yoꞌoꞌ te̱ sa̱na̱kuaꞌa u̱nꞌ ndu̱ nda̱ꞌaꞌ te̱ vi̱ꞌe̱ amorreo te̱ ka̱ꞌni̱ꞌ ndo̱o̱ ra̱ ndu̱?
Nde̱e̱ va̱ꞌa̱ ka̱ naaꞌ ni̱ ndoo̱ ndu̱ tu̱ku̱ taꞌviꞌ yu̱ꞌuꞌ i̱ti̱a̱ Jordán kaa̱ꞌ.
Tákuiꞌe,
xïní i̱ ndee ña̱ kaꞌa̱n i̱ xiinꞌ u̱nꞌ vi̱ti̱n,
sa̱kanꞌ ña̱ te̱ xíinꞌ ndu̱ ndii,
ni̱ ka̱nandoo ña̱ꞌaꞌ te̱ ndasiꞌ taꞌanꞌ xiinꞌ ndu̱,
te̱ ni̱ xi̱nu̱ ndi̱ꞌi̱ ra̱ nuu̱ꞌ te̱ ja̱a̱nꞌ.
9 Sa̱kanꞌ ña̱ kii̱ꞌ ku̱ni̱ ne̱ vi̱ꞌe̱ cananeo xiinꞌ sa̱kuuꞌ ne̱ ndieeꞌ ka̱niiꞌ nuu̱ꞌ ñu̱ꞌuꞌ yoꞌoꞌ kuento xaꞌa̱ꞌ ña̱ ni̱ xkaꞌndi̱a̱ ja̱a̱nꞌ ndii,
ki̱xi̱n ni̱a̱ te̱ ku̱nu̱ndu̱u̱ ni̱a̱ ndu̱,
te̱ nduxi̱n sa̱kuuꞌ ndu̱ sa̱a̱ ni̱a̱.
Naaꞌ xkaꞌndi̱a̱ ña̱ ja̱a̱nꞌ ndii,
kaꞌa̱n ni̱a̱ ña̱ köo̱ꞌ a̱ ni̱ ku̱vi̱ sa̱a̱ xa̱tyiꞌ u̱nꞌ te̱ tyi̱ndi̱e̱eꞌ u̱nꞌ ne̱ nduuꞌ kuenta u̱nꞌ ―ni̱ katyi̱ ra̱.
10 Te̱ ni̱ na̱ku̱i̱i̱n Yahvé nuu̱ꞌ Josué kaꞌán a̱ ndii:
―Ndo̱koo̱ u̱nꞌ.
¿Ndiotyun na kanduꞌu̱ꞌ ndieeꞌ u̱nꞌ nuu̱ꞌ ñu̱ꞌuꞌ ñaa̱ꞌ?
11 Ne̱ Israel,
taꞌanꞌ u̱nꞌ ndii,
ni̱ xa̱a̱ ni̱a̱ ku̱a̱tyi̱,
te̱ ni̱ xaꞌnu̱ tu̱ ni̱a̱ kuento ña̱ ni̱ kaꞌa̱n tyuunꞌ i̱ xiinꞌ ni̱a̱.
Te̱ siinꞌ tukuꞌ ndii,
ni̱ xa̱kuiꞌnaꞌ ni̱a̱ ña̱ꞌa̱ ña̱ ni̱ kaꞌa̱n i̱ xiinꞌ ni̱a̱ nä̱ꞌi̱ ni̱a̱.
Ni̱ xa̱kuiꞌnaꞌ ni̱a̱,
te̱ ni̱ xi̱ni̱ xaꞌanꞌ ni̱a̱,
te̱ ni̱ ti̱si̱ꞌe ni̱a̱ ña̱ ni̱ xa̱kuiꞌnaꞌ ni̱a̱ ja̱a̱nꞌ te̱i̱n ña̱ꞌa̱ ña̱ kumiꞌ ni̱a̱.
12 Xaꞌa̱ꞌ a̱ ja̱a̱nꞌ na köo̱ꞌ tyukuuꞌ ne̱ Israel ka̱nandoo ni̱a̱ ne̱ ndasiꞌ taꞌanꞌ xiinꞌ ni̱a̱,
süu̱ꞌ ja̱a̱nꞌ ndii,
ku̱nu̱ ndi̱ꞌi̱ ni̱a̱ nuu̱ꞌ ne̱ ja̱a̱nꞌ.
Sa̱kanꞌ ña̱ ni̱ xa̱kuiꞌnaꞌ ni̱a̱ ña̱ꞌa̱ ña̱ nduuꞌ ndi̱ti̱a̱ i̱,
te̱ ni̱ sa̱na̱tyaꞌanꞌ ña̱ꞌaꞌ i̱,
sa̱kanꞌ na kuiiꞌ tyï̱ndi̱e̱eꞌ ka̱ i̱ ndoꞌó naaꞌ sä̱ndo̱ñuꞌuꞌ ndo̱ꞌ ña̱ ni̱ xa̱kuiꞌnaꞌ ndo̱ꞌ ja̱a̱nꞌ,
ña̱ ni̱ kaꞌa̱n tyuunꞌ i̱ xiinꞌ ndo̱ꞌ sa̱ndo̱ñuꞌuꞌ ndo̱ꞌ ja̱a̱nꞌ.
13 Sa̱kanꞌ na kuiiꞌ ndo̱ndi̱tyi̱ kii̱ꞌ,
te̱ kaꞌa̱n tyuunꞌ u̱nꞌ xiinꞌ ne̱ yivi̱ꞌ na nda̱sa̱ ndo̱o̱ xiinꞌ miiꞌ ni̱a̱,
te̱ sa̱kooꞌ tu̱ꞌva̱ xiinꞌ miiꞌ ni̱a̱ xaꞌa̱ꞌ kivi̱ꞌ tiaa̱n.
Sa̱kanꞌ ña̱ kaꞌán yuꞌu̱,
Yahvé,
ña̱ nduuꞌ Ndiosí ña̱ xakaꞌnuꞌ ndoꞌó,
ne̱ vi̱ꞌe̱ I̱srael ndii:
“Te̱i̱n ndoꞌó,
ne̱ Israel,
miiꞌ ndieeꞌ ndo̱ꞌ ñaa̱ꞌ naá si̱ꞌe ña̱ nduuꞌ ndi̱ti̱a̱ yuꞌu̱,
Yahvé.
Köo̱ꞌ kivi̱ꞌ ka̱nandoo ndo̱ꞌ te̱ ndasiꞌ taꞌanꞌ xiinꞌ ndo̱ꞌ naaꞌ sä̱ndo̱ñuꞌuꞌ ndo̱ꞌ ña̱ nduuꞌ ndi̱ti̱a̱ i̱,
ña̱ ni̱ xa̱kuiꞌnaꞌ ndo̱ꞌ ja̱a̱nꞌ”,
katyi̱ a̱,
katyi̱ u̱nꞌ xiinꞌ ni̱a̱.
14 Sa̱kanꞌ na kuiiꞌ ni̱a̱ꞌa̱ tiaa̱n ndii,
kuní a̱ na̱kaya̱ i̱ꞌi̱n ti̱ꞌvi̱ ndo̱ꞌ nuu̱ꞌ yuꞌu̱,
Yahvé,
te̱ niaꞌa̱ i̱ ndee ti̱ꞌvi̱ ja̱a̱nꞌ nduuꞌ ne̱ ni̱ xa̱a̱ ku̱a̱tyi̱,
te̱ ti̱ꞌvi̱ ja̱a̱nꞌ xiinꞌ sa̱kuuꞌ ne̱ i̱i̱n kuuꞌ xiinꞌ ni̱a̱ ndii,
kuní a̱ ki̱xi̱n ndi̱a̱ꞌa̱ ka̱ ni̱a̱ nuu̱ꞌ i̱ siee,
te̱ niaꞌa̱ i̱ ndee ne̱ ja̱a̱nꞌ nduuꞌ ne̱ ni̱ xa̱a̱ ku̱a̱tyi̱ ja̱a̱nꞌ.
15 Te̱ te̱ yivi̱ꞌ,
te̱ na̱ꞌi̱ nda̱ꞌaꞌ i̱ kumiꞌ ña̱ꞌa̱ ña̱ ni̱ kuni̱ a̱ sa̱nduxín ndo̱ꞌ ja̱a̱nꞌ ndii,
ka̱ꞌmi̱ ndo̱ꞌ ra̱ xiinꞌ sa̱kuuꞌ ne̱ ndieeꞌ vi̱ꞌe̱ ra̱ xiinꞌ sa̱kuuꞌ ña̱ kumiꞌ ra̱ xaꞌa̱ꞌ a̱ ña̱ ni̱ xaꞌnu̱ ra̱ kuento ña̱ ni̱ ndoo̱ yuꞌu̱,
Yahvé,
xiinꞌ ndo̱ꞌ,
te̱ ni̱ xa̱a̱ ra̱ i̱i̱n ku̱a̱tyi̱ tyiee̱ va̱ te̱i̱n ndoꞌó,
ne̱ Israel ―ni̱ katyi̱ a̱.
16 Ni̱a̱ꞌa̱ va̱ tu̱ku̱ kivi̱ꞌ te̱ ni̱ ndo̱koo̱ Josué,
te̱ ni̱ kaꞌa̱n tyuunꞌ ra̱,
te̱ ni̱ ku̱ya̱ti̱n i̱ꞌi̱n ti̱ꞌvi̱ ne̱ Israel nuu̱ꞌ Ndiosí,
te̱ ni̱ niaꞌa̱ mi̱iꞌ a̱ ti̱ꞌvi̱ ne̱ vi̱ꞌe̱ Judá.
17 Sa̱kanꞌ na ni̱ ki̱xi̱n ndi̱a̱ꞌa̱ ka̱ ne̱ vi̱ꞌe̱ Judá nuu̱ꞌ Ndiosí siee,
te̱ ni̱ niaꞌa̱ Ndiosí ne̱ vi̱ꞌe̱ Zera,
te̱ ni̱ ki̱xi̱n ndi̱a̱ꞌa̱ ka̱ ne̱ vi̱ꞌe̱ Zera ja̱a̱nꞌ nuu̱ꞌ Ndiosí,
te̱ ni̱ niaꞌa̱ Ndiosí ne̱ vi̱ꞌe̱ Zabdi.
18 Te̱ soꞌo̱ꞌ ndiꞌiꞌ te̱ ni̱ ki̱xi̱n ndi̱a̱ꞌa̱ i̱ꞌi̱n te̱ i̱i̱n kuuꞌ xiinꞌ Zabdi ja̱a̱nꞌ,
te̱ ni̱ niaꞌa̱ Ndiosí Acán,
siꞌe̱ Carmi,
te̱ Carmi ja̱a̱nꞌ nduuꞌ si̱a̱niꞌ Zabdi,
te̱ si̱a̱niꞌ xikuaꞌ Zera nduuꞌ Carmi ja̱a̱nꞌ,
te̱ sa̱kuuꞌ te̱ ja̱a̱nꞌ nduuꞌ te̱ vi̱ꞌe̱ Judá.
19 Sa̱kanꞌ te̱ ni̱ kaꞌa̱n Josué xiinꞌ Acán ndii:
―Yu̱vaꞌ i̱,
ki̱ꞌi̱n kaꞌnuꞌ u̱nꞌ Yahvé Ndiosí,
ña̱ xakaꞌnuꞌ yooꞌ,
ne̱ Israel,
te̱ sa̱kaꞌnuꞌ ña̱ꞌaꞌ u̱nꞌ.
Te̱ kaꞌa̱n nda̱ku u̱nꞌ xiinꞌ i̱ yo̱o̱ nduuꞌ a̱ ni̱ xa̱a̱ u̱nꞌ,
te̱ ti̱ä̱si̱ yu̱ꞌuꞌ u̱nꞌ nde̱e̱ i̱i̱n a̱ ―ni̱ katyi̱ ra̱.
20 Te̱ ni̱ kaꞌa̱n Acán xiinꞌ Josué ndii:
―Ña̱ nda̱ku nduuꞌ a̱ ndii,
ni̱ xa̱a̱ i̱ ku̱a̱tyi̱ nuu̱ꞌ Yahvé,
Ndiosí ña̱ xakaꞌnuꞌ yooꞌ,
ne̱ Israel.
Ña̱ yo̱ꞌo̱ꞌ ña̱ yo̱ꞌo̱ꞌ nduuꞌ ña̱ ni̱ xa̱a̱ i̱.
21 Ni̱ xi̱ni̱ i̱ kaꞌni̱ i̱i̱n toto̱ tití ña̱ nda̱tu̱nꞌ va̱,
ña̱ ni̱ ku̱a̱ꞌa̱ nuu̱ꞌ ñu̱ꞌuꞌ Babilonia te̱i̱n sa̱kuuꞌ ña̱ ni̱ na̱ka̱ya̱ e̱ꞌ ñu̱u̱ Jericó,
xiinꞌ uvi̱ kilo xu̱ꞌunꞌ yuu̱ꞌ plata,
xiinꞌ i̱i̱n tuꞌu̱nꞌ tyiee̱ oro ña̱ viee̱ yaꞌa̱ sa̱va̱ kilo.
Te̱ ni̱ kaꞌa̱n va̱ nimá i̱ xaꞌa̱ꞌ a̱,
sa̱kanꞌ na ni̱ na̱tyiꞌi̱ꞌ i̱ sa̱kuuꞌ a̱,
te̱ ni̱ ku̱xi̱ i̱ e̱ ti̱xi̱n ñu̱ꞌuꞌ,
ti̱xi̱n vi̱ꞌe̱ toto̱ miiꞌ nduꞌu̱ꞌ i̱,
ndisu̱ xu̱ꞌunꞌ yuu̱ꞌ plata ndii,
kunu ka̱ ni̱ ku̱xi̱ i̱ e̱ te̱ sa̱kanꞌ sa̱kuuꞌ i̱nga̱ a̱ ―ni̱ katyi̱ ra̱.
22 Sa̱kanꞌ te̱ ni̱ ti̱ꞌviꞌ Josué ndiaꞌviꞌ te̱ yivi̱ꞌ,
te̱ ni̱ xaꞌa̱n ko̱to̱ ra̱ vi̱ꞌe̱ Acán.
Te̱ ni̱ ki̱e̱e̱ kiꞌi̱ꞌ te̱ ja̱a̱nꞌ ni̱ xaꞌa̱n ra̱ i̱kanꞌ,
te̱ ni̱ xi̱ni̱ ra̱ ñuꞌuꞌ si̱ꞌe ña̱ꞌa̱ ña̱ ni̱ xa̱kuiꞌnaꞌ Acán ja̱a̱nꞌ sa̱a̱ niiꞌ ni̱ kaꞌa̱n ra̱,
ña̱ xu̱ꞌunꞌ plata ñuꞌuꞌ kunu ka̱ te̱ sa̱kanꞌ sa̱kuuꞌ a̱.
23 Sa̱kanꞌ te̱ ni̱ na̱ka̱ya̱ ra̱ sa̱kuuꞌ ña̱ꞌa̱ ja̱a̱nꞌ ti̱xi̱n vi̱ꞌe̱ Acán ja̱a̱nꞌ,
te̱ ni̱ ki̱xi̱n ndi̱a̱ka̱ ra̱ a̱ nuu̱ꞌ Josué miiꞌ iinꞌ ra̱ xiinꞌ nuu̱ꞌ sa̱kuuꞌ ne̱ vi̱ꞌe̱ Israel.
I̱kanꞌ te̱ ni̱ ta̱ndi̱e̱e̱ ra̱ nuu̱ꞌ Yahvé.
24 Sa̱kanꞌ te̱ ni̱ ti̱i̱n Josué xiinꞌ sa̱kuuꞌ ne̱ Israel Acán,
si̱a̱niꞌ xikuaꞌ Zera ja̱a̱nꞌ,
te̱ ni̱ na̱ꞌi̱ tu̱ ni̱a̱ xu̱ꞌunꞌ,
xiinꞌ toto̱,
xiinꞌ tuꞌu̱nꞌ oro,
xiinꞌ tiaa̱ siꞌe̱ ra̱,
xiinꞌ ña̱ꞌaꞌ siꞌe̱ ra̱,
xiinꞌ si̱ndiki̱ꞌ sana̱ ra̱,
xiinꞌ mburru sana̱ ra̱,
xiinꞌ mbe̱e̱ sana̱ ra̱,
xiinꞌ vi̱ꞌe̱ toto̱ miiꞌ nduꞌu̱ꞌ ra̱,
xiinꞌ sa̱kuuꞌ ña̱ ni̱ ku̱miꞌ ra̱,
te̱ ni̱ xaꞌa̱n ndi̱a̱ka̱ ni̱a̱ sa̱kuuꞌ a̱ yo̱soꞌ miiꞌ naniꞌ Acor.
25 Te̱ ni̱ kaꞌa̱n Josué xiinꞌ ra̱ ndii:
―¿Ndiotyun na ni̱ sa̱na̱saá u̱nꞌ Ndiosí te̱ ni̱ ka̱ni̱ a̱ yooꞌ?
Vi̱ti̱n ndii,
mi̱iꞌ u̱nꞌ ka̱ni̱ a̱ ―ni̱ katyi̱ ra̱.
Sa̱kanꞌ te̱ ni̱ ku̱u̱n yuu̱ꞌ ña̱ꞌaꞌ sa̱kuuꞌ ne̱ vi̱ꞌe̱ Israel,
te̱ ni̱ ku̱u̱n yuu̱ꞌ tu̱ ni̱a̱ sa̱kuuꞌ ne̱ i̱i̱n kuuꞌ xiinꞌ ra̱,
te̱ ni̱ xa̱ꞌmi̱ ni̱a̱ ñu̱ꞌuꞌ ndeꞌi̱ sa̱kuuꞌ ne̱ ja̱a̱nꞌ.
26 Ndi̱ꞌi̱ ja̱a̱nꞌ te̱ ni̱ ta̱ndi̱e̱e̱ mo̱to ni̱a̱ yuu̱ꞌ xata̱ꞌ ñu̱ꞌuꞌ ndeꞌi̱ ne̱ ja̱a̱nꞌ,
te̱ ndieeꞌ ka̱ yuu̱ꞌ ja̱a̱nꞌ nde̱e̱ kivi̱ꞌ vi̱ti̱n.
Sa̱kanꞌ na kuiiꞌ yo̱soꞌ Acor naniꞌ a̱ nde̱e̱ kivi̱ꞌ vi̱ti̱n.
Sa̱kanꞌ vi̱ꞌ ni̱ xa̱a̱ ni̱a̱,
te̱ ni̱ nu̱u̱ nimá Ndiosí ña̱ ni̱ xiꞌe̱ a̱ ni̱ xi̱ni̱ ña̱ꞌaꞌ a̱.