So̱ꞌo̱ ni̱ xa̱a̱ a̱ kii̱ꞌ ni̱ ko̱ꞌni̱ ne̱ vi̱ꞌe̱ Israel ñu̱u̱ Jericó
6
Va̱ꞌa̱,
te̱ xaꞌa̱ꞌ a̱ ña̱ yiꞌvi ne̱ ndieeꞌ ñu̱u̱ Jericó xini ni̱a̱ ne̱ Israel ndii,
ndasi kutu̱ꞌ xa̱va̱ꞌa̱ yiꞌeꞌ ñu̱u̱ ja̱a̱nꞌ te̱ ndieeꞌ ni̱a̱.
Nde̱e̱ i̱i̱n ne̱ yivi̱ꞌ kü̱vi̱ ke̱ta̱ ki̱ꞌe̱ ni̱ nde̱e̱ kü̱vi̱ tu̱ ko̱ꞌni̱ ni̱a̱.
2 Sa̱kanꞌ te̱ ni̱ kaꞌa̱n Yahvé xiinꞌ Josué ndii:
―Ko̱to̱ u̱nꞌ,
xa̱ ni̱ sa̱na̱kuaꞌa i̱ nda̱ꞌaꞌ u̱nꞌ ñu̱u̱ Jericó,
xiinꞌ rey,
te̱ xaꞌndia tyuunꞌ nuu̱ꞌ a̱,
xiinꞌ sa̱kuuꞌ te̱ xíinꞌ ra̱,
te̱ ndi̱e̱ni va̱ ti̱i̱n ñuꞌu̱.
3 Yoꞌó xiinꞌ sa̱kuuꞌ te̱ xíinꞌ u̱nꞌ ndii,
kuní a̱ ki̱e̱ndu̱u̱ ndo̱ꞌ sa̱a̱ xinunduu ñu̱u̱ untaꞌ i̱ꞌi̱n kivi̱ꞌ kuaꞌa̱n,
te̱ iñu̱ taꞌan kivi̱ꞌ kuní a̱ sa̱a̱ ndo̱ꞌ sa̱kanꞌ.
4 Te̱ uxa̱ taꞌan sutu̱ ki̱ꞌi̱n i̱tyiꞌ nuu̱ꞌ xatu̱nꞌ miiꞌ naá tu̱tu̱ yuꞌu̱,
Ndiosí,
te̱ ko̱ꞌni̱ꞌi̱ na̱ndaa̱ꞌ ra̱ i̱i̱n nda̱tyuunꞌ ña̱ ni̱ ku̱a̱ꞌa̱ xiinꞌ ndi̱kiꞌ mbe̱e̱.
Te̱ kivi̱ꞌ ña̱ uxa̱ ndii,
uxa̱ i̱tyiꞌ kuní a̱ ki̱e̱ndu̱u̱ ndo̱ꞌ ñu̱u̱ ja̱a̱nꞌ,
te̱ ti̱vi̱ sutu̱ ja̱a̱nꞌ nda̱tyuunꞌ,
tunꞌ ndisoꞌ ra̱ kuaꞌa̱n ra̱ ja̱a̱nꞌ.
5 Te̱ kii̱ꞌ ku̱ni̱ so̱ꞌo̱ u̱nꞌ ña̱ na̱ꞌaꞌ ti̱vi̱ sutu̱ ja̱a̱nꞌ ndi̱kiꞌ mbe̱e̱ ja̱a̱nꞌ ndii,
kaꞌa̱n u̱nꞌ xiinꞌ sa̱kuuꞌ ne̱ yivi̱ꞌ na ku̱a̱aꞌ tiꞌeꞌ xa̱va̱ꞌa̱ ni̱a̱,
sa̱kanꞌ te̱ ndu̱va̱ sa̱kuuꞌ nama̱ ña̱ ndasi i̱ꞌnu̱ ñu̱u̱ ja̱a̱nꞌ,
xa̱ sa̱kanꞌ ni̱ te̱ ko̱ꞌni̱ nda̱ku sa̱kuuꞌ ndo̱ꞌ te̱ ka̱ꞌni̱ꞌ ndo̱ꞌ ne̱ ñu̱u̱ ja̱a̱nꞌ ―ni̱ katyi̱ a̱.
6 Sa̱kanꞌ te̱ ni̱ na̱ka̱ya̱ Josué sa̱kuuꞌ sutu̱,
te̱ ni̱ kaꞌa̱n ra̱ xiinꞌ ra̱ ndii:
―Na̱ꞌi̱ ndo̱ꞌ xatu̱nꞌ miiꞌ naá tu̱tu̱ Yahvé,
te̱ na̱ka̱xi̱n ndo̱ꞌ uxa̱ taꞌan sutu̱ te̱ ki̱ꞌi̱n i̱tyiꞌ nuu̱ꞌ nu̱ꞌ,
te̱ ko̱ni̱ꞌi̱ i̱ꞌi̱n ra̱ i̱i̱n nda̱tyuunꞌ,
tunꞌ ni̱ ku̱a̱ꞌa̱ xiinꞌ ndi̱kiꞌ mbe̱e̱,
tivi ra̱ kuaꞌa̱n ra̱ ―ni̱ katyi̱ ra̱.
7 Te̱ ni̱ kaꞌa̱n tyuunꞌ tu̱ ra̱ xiinꞌ sa̱kuuꞌ ne̱ yivi̱ꞌ kuaꞌa̱ ja̱a̱nꞌ ndii:
―Ki̱e̱ndu̱u̱ ndo̱ꞌ sa̱a̱ xinunduu ñu̱u̱,
te̱ xíinꞌ na ki̱ꞌi̱n i̱tyiꞌ nuu̱ꞌ xatu̱nꞌ miiꞌ naá tu̱tu̱ Yahvé Ndiosí ―ni̱ katyi̱ ra̱.
8 Te̱ kii̱ꞌ ndi̱ꞌi̱ ni̱ kaꞌa̱n tyuunꞌ Josué nuu̱ꞌ ne̱ yivi̱ꞌ ja̱a̱nꞌ,
te̱ ni̱ ki̱ꞌi̱n i̱tyiꞌ uxa̱ sa̱aꞌ sutu̱ ja̱a̱nꞌ nuu̱ꞌ xatu̱nꞌ miiꞌ naá tu̱tu̱ Ndiosí kiendu̱u̱ ra̱ tivi ra̱ uxa̱ sa̱aꞌ nda̱tyuunꞌ ña̱ ni̱ ku̱a̱ꞌa̱ xiinꞌ ndi̱kiꞌ mbe̱e̱ ja̱a̱nꞌ,
te̱ ndikún xatu̱nꞌ ja̱a̱nꞌ xata̱ꞌ ra̱ kuaꞌa̱n ra̱.
9 Sa̱va̱ te̱ xíinꞌ niꞌiꞌ i̱tyiꞌ nuu̱ꞌ sutu̱,
te̱ tivi nda̱tyuunꞌ ja̱a̱nꞌ kuaꞌa̱n ra̱,
te̱ sa̱va̱ tu̱ku̱ ra̱ ndi̱kun xata̱ꞌ xatu̱nꞌ ja̱a̱nꞌ,
te̱ tivi na tivi sutu̱ nda̱tyuunꞌ ja̱a̱nꞌ kuaꞌa̱n ra̱.
10 Te̱ ni̱ kaꞌa̱n Josué xiinꞌ sa̱kuuꞌ ne̱ yivi̱ꞌ ndii:
―Ku̱ä̱aꞌ ndo̱ꞌ kuꞌu̱n ndo̱ꞌ,
ni̱ nde̱e̱ ndä̱tuꞌunꞌ tu̱ ndo̱ꞌ,
ni̱ nde̱e̱ käꞌa̱n tu̱ ndo̱ꞌ nde̱e̱ i̱i̱n yu̱ꞌuꞌ nde̱e̱ ska̱tyiꞌ kaꞌa̱n yuꞌu̱ xiinꞌ ndo̱ꞌ ña̱ ku̱a̱aꞌ ndo̱ꞌ,
sa̱kanꞌ vi̱ꞌ te̱ ku̱a̱aꞌ ndo̱ꞌ ―ni̱ katyi̱ ra̱.
11 Sa̱kanꞌ na kuiiꞌ kivi̱ꞌ ja̱a̱nꞌ ndii,
ni̱ na̱ꞌi̱ sutu̱ xatu̱nꞌ miiꞌ naá tu̱tu̱ Yahvé,
te̱ ni̱ ki̱e̱ndu̱u̱ ra̱ ñu̱u̱ ja̱a̱nꞌ xiinꞌ nu̱ꞌ i̱i̱n nda̱a̱ꞌ i̱tyiꞌ ku̱i̱ti̱ꞌ,
ndi̱ꞌi̱ ja̱a̱nꞌ te̱ ni̱ na̱ndi̱koꞌ sa̱kuuꞌ ra̱ vi̱ꞌe̱ toto̱,
te̱ ni̱ na̱ndiee̱ꞌ ra̱ i̱kanꞌ ñu̱u ja̱a̱nꞌ.
12 Te̱ ni̱a̱ꞌa̱ va̱ tu̱ku̱ kivi̱ꞌ ni̱ ndo̱koo̱ Josué,
te̱ tu̱ku̱ sa̱kanꞌ ni̱ na̱ꞌi̱ sutu̱ xatu̱nꞌ ja̱a̱nꞌ miiꞌ naá tu̱tu̱ kuento Yahvé ja̱a̱nꞌ.
13 Te̱ uxa̱ sa̱aꞌ sutu̱ niꞌiꞌ i̱tyiꞌ nuu̱ꞌ xatu̱nꞌ ja̱a̱nꞌ kiendu̱u̱ ra̱ kuaꞌa̱n ra̱,
te̱ tivi tu̱ ra̱ nda̱tyuunꞌ ña̱ ni̱ ku̱a̱ꞌa̱ xiinꞌ ndi̱kiꞌ mbe̱e̱ ja̱a̱nꞌ.
Te̱ te̱ xíinꞌ ndii,
niꞌiꞌ i̱tyiꞌ tu̱ te̱ ja̱a̱nꞌ nuu̱ꞌ sutu̱,
te̱ ndisoꞌ nda̱tyuunꞌ ja̱a̱nꞌ,
kuaꞌa̱n ra̱,
te̱ ndiaꞌviꞌ ra̱ ndikún xata̱ꞌ xatu̱nꞌ ja̱a̱nꞌ kiendu̱u̱ ra̱ kuaꞌa̱n ra̱.
Te̱ tivi na tivi sutu̱ ja̱a̱nꞌ nda̱tyuunꞌ ja̱a̱nꞌ kuaꞌa̱n ra̱ kii̱ꞌ sa̱kanꞌ.
14 Sa̱kanꞌ na kuiiꞌ kivi̱ꞌ ña̱ uvi̱ ja̱a̱nꞌ ndii,
tu̱ku̱ ni̱ ni̱ ki̱e̱ndu̱u̱ ra̱ ñu̱u̱ ja̱a̱nꞌ untaꞌ,
ndi̱ꞌi̱ ja̱a̱nꞌ te̱ ni̱ na̱ndi̱koꞌ ra̱ vi̱ꞌe̱ toto̱ miiꞌ ndieeꞌ ra̱.
Te̱ i̱i̱n sa̱kanꞌ ni̱ xa̱a̱ ra̱ niiꞌ iñu̱ taꞌan kivi̱ꞌ.
15 Te̱ kivi̱ꞌ ña̱ uxa̱ ndii,
ni̱a̱ꞌa̱ va̱ ni̱ ndo̱koo̱ ne̱ vi̱ꞌe̱ Israel,
te̱ ni̱ ki̱e̱ndu̱u̱ tu̱ku̱u̱ ni̱a̱ ñu̱u̱ ja̱a̱nꞌ naa ni̱ xa̱a̱ ni̱a̱ i̱nga̱ ka̱ kivi̱ꞌ,
ndisu̱ kivi̱ꞌ kaa̱ꞌ ndii,
uxa̱ taꞌan i̱tyiꞌ ni̱ ki̱e̱ndu̱u̱ ni̱a̱ ñu̱u̱ ja̱a̱nꞌ.
16 Te̱ kii̱ꞌ kiendu̱u̱ ni̱a̱ kuaꞌa̱n ni̱a̱ i̱tyiꞌ ña̱ uxa̱ ja̱a̱nꞌ,
te̱ na̱ꞌaꞌ tivi sutu̱ nda̱tyuunꞌ,
tunꞌ niꞌiꞌ i̱tyiꞌ ja̱a̱nꞌ,
te̱ ni̱ kaꞌa̱n tyuunꞌ Josué xiinꞌ ne̱ yivi̱ꞌ ndii:
―Ku̱a̱aꞌ tiꞌeꞌ ndo̱ꞌ,
sa̱kanꞌ ña̱ xa̱ ni̱ sa̱na̱kuaꞌa Yahvé ñu̱u̱ Jericó nda̱ꞌaꞌ e̱ꞌ.
17 Ka̱niiꞌ ñu̱u̱ xiinꞌ sa̱kuuꞌ ña̱ꞌa̱ ña̱ yoo nuu̱ꞌ a̱ kuní a̱ sa̱nduxín xa̱tyiꞌ e̱ꞌ,
te̱ ku̱ndu̱u̱ a̱ tu̱mani̱ꞌ ndi̱ti̱a̱ Yahvé.
I̱i̱n nda̱a̱ꞌ Rahab,
ñaꞌ xiko̱ꞌ xiinꞌ miiꞌ,
ku̱i̱ti̱ꞌ ko̱o̱ kaꞌnuꞌ i̱ni̱ e̱ꞌ xaꞌa̱ꞌ xiinꞌ sa̱kuuꞌ ne̱ ndieeꞌ vi̱ꞌe̱ aꞌ,
sa̱kanꞌ ña̱ ni̱ ti̱si̱ꞌe aꞌ te̱ yivi̱ꞌ,
te̱ ni̱ ti̱ꞌviꞌ e̱ꞌ ko̱to̱ sa̱a̱ kaaꞌ ñu̱ꞌuꞌ yoꞌoꞌ.
18 Ndisu̱ ndoꞌó ndii,
ku̱i̱raro va̱ ko̱o̱ ndo̱ꞌ te̱ nä̱ꞌi̱ ndo̱ꞌ nde̱e̱ i̱i̱n ña̱ xa̱ yoo nduxi̱n sa̱a̱ Ndiosí,
sa̱kanꞌ ña̱ naaꞌ sa̱a̱ ndo̱ꞌ sa̱kanꞌ ndii,
mi̱iꞌ ndo̱ꞌ ku̱ndu̱u̱ te̱ ndo̱ñuꞌuꞌ xa̱tyiꞌ,
te̱ na̱tya̱ꞌa̱n tu̱ sa̱kuuꞌ yooꞌ,
ne̱ vi̱ꞌe̱ Israel,
sa̱a̱ ndo̱ꞌ.
19 Te̱ sa̱kuuꞌ ña̱ꞌa̱ ña̱ ni̱ ku̱a̱ꞌa̱ xiinꞌ plata,
uun xiinꞌ oro,
uun xiinꞌ bronce,
uun xiinꞌ ka̱a̱ ndiaaꞌ ndii,
ndi̱ti̱a̱ Yahvé ku̱ndu̱u̱ a̱,
te̱ na̱koo̱ va̱ꞌa̱ a̱ miiꞌ ñuꞌuꞌ ña̱ vikaꞌ ña̱ nduuꞌ kuenta Ndiosí ―ni̱ katyi̱ ra̱.
20 Sa̱kanꞌ na kuiiꞌ kii̱ꞌ ni̱ xi̱ni̱ so̱ꞌo̱ ne̱ yivi̱ꞌ ja̱a̱nꞌ ña̱ ni̱ ti̱vi̱ sutu̱ nda̱tyuunꞌ,
tunꞌ niꞌiꞌ i̱tyiꞌ,
te̱ ni̱ ku̱a̱aꞌ tiꞌeꞌ ni̱a̱ xiinꞌ sa̱kuuꞌ ña̱ ndi̱e̱eꞌ ni̱a̱.
Te̱ xa̱ numi̱ꞌ sa̱kanꞌ,
te̱ ni̱ ndu̱va̱ sa̱kuuꞌ nama̱ ñu̱u̱ Jericó ja̱a̱nꞌ,
te̱ ni̱ ko̱ꞌni̱ nda̱ku ne̱ Israel te̱ ka̱ꞌni̱ꞌ ni̱a̱ ne̱ ndieeꞌ ñu̱u̱ ja̱a̱nꞌ,
te̱ ni̱ ke̱ta̱ va̱ꞌa̱ ni̱a̱.
21 Te̱ ni̱ xa̱ꞌni̱ꞌ ni̱a̱ sa̱kuuꞌ ne̱ yivi̱ꞌ,
ne̱ ndieeꞌ ñu̱u̱ ja̱a̱nꞌ,
xiinꞌ ityi̱,
ni̱ xa̱ꞌni̱ꞌ ni̱a̱ tiaa̱,
xiinꞌ ña̱ꞌaꞌ,
xiinꞌ ne̱ sa̱va̱,
xiinꞌ te̱ xi̱xa̱,
xiinꞌ mbe̱e̱,
xiinꞌ ti̱xuꞌu̱ꞌ,
xiinꞌ mburru,
xiinꞌ sa̱kuuꞌ nuu̱ꞌ ki̱tiꞌ sana̱ ne̱ ndieeꞌ i̱kanꞌ.
22 Sa̱kanꞌ te̱ ni̱ kaꞌa̱n Josué xiinꞌ uvi̱ sa̱aꞌ te̱ ni̱ xaꞌa̱n ko̱to̱ sa̱a̱ kaaꞌ ñu̱u̱ Jericó ndii:
―Kuaꞌan ndo̱ꞌ vi̱ꞌe̱ Rahab,
ñaꞌ xiko̱ꞌ xiinꞌ miiꞌ,
te̱ xta̱ꞌniꞌ ña̱ꞌaꞌ ndo̱ꞌ xiinꞌ sa̱kuuꞌ ne̱ i̱i̱n kuuꞌ xiinꞌ aꞌ sa̱a̱ niiꞌ ni̱ ta̱xi̱ ndo̱ꞌ kuento ndo̱ꞌ nuu̱ꞌ aꞌ ―ni̱ katyi̱ ra̱.
23 Sa̱kanꞌ te̱ ni̱ ko̱ꞌni̱ te̱ ni̱ xaꞌa̱n ko̱to̱ sa̱a̱ kaaꞌ ñu̱ꞌuꞌ ja̱a̱nꞌ vi̱ꞌe̱ Rahab,
te̱ ni̱ xta̱ꞌniꞌ ña̱ꞌaꞌ ra̱,
xiinꞌ yu̱vaꞌ aꞌ,
xiinꞌ si̱ꞌiꞌ aꞌ,
xiinꞌ tiaa̱ taꞌanꞌ aꞌ,
xiinꞌ sa̱kuuꞌ ña̱ kumiꞌ ni̱a̱,
xiinꞌ sa̱kuuꞌ ne̱ i̱i̱n kuuꞌ xiinꞌ aꞌ,
te̱ ni̱ xaꞌa̱n ndi̱a̱ka̱ ña̱ꞌaꞌ ra̱ miiꞌ ku̱vi̱ ku̱ndi̱e̱e̱ ni̱a̱,
te̱ köo̱ꞌ a̱ ku̱ndo̱ꞌo̱ ni̱a̱,
ya̱ti̱n miiꞌ itaꞌ vi̱ꞌe̱ toto̱ ndieeꞌ mi̱iꞌ ne̱ Israel.
24 Ndi̱ꞌi̱ ja̱a̱nꞌ te̱ ni̱ tyi̱nduꞌu̱ꞌ ñuꞌu̱ ra̱ ka̱niiꞌ ñu̱u̱ ja̱a̱nꞌ xiinꞌ sa̱kuuꞌ ña̱ yoo ti̱xi̱n a̱.
Ña̱ ni̱ ta̱va̱ꞌ ku̱i̱ti̱ꞌ ra̱ ñu̱u̱ ja̱a̱nꞌ ndii,
ña̱ ni̱ ku̱a̱ꞌa̱ xiinꞌ plata,
xiinꞌ ña̱ ni̱ ku̱a̱ꞌa̱ xiinꞌ oro,
xiinꞌ bronce,
xiinꞌ ka̱a̱ tiꞌeꞌ ku̱i̱ti̱ꞌ nduuꞌ a̱,
te̱ ni̱ ta̱xa̱ꞌa̱ ra̱ a̱ miiꞌ ñuꞌuꞌ ña̱ vikaꞌ vi̱ꞌe̱ Yahvé.
25 Ndisu̱ ni̱ yoo̱ kaꞌnuꞌ i̱ni̱ Josué xaꞌa̱ꞌ Rahab,
ñaꞌ ni̱ xi̱ko̱ꞌ xiinꞌ miiꞌ,
xiinꞌ xaꞌa̱ꞌ sa̱kuuꞌ ne̱ i̱i̱n kuuꞌ xiinꞌ aꞌ,
ne̱ ndieeꞌ vi̱ꞌe̱ aꞌ,
sa̱kanꞌ ña̱ ni̱ ti̱si̱ꞌe aꞌ te̱ yivi̱,
te̱ ni̱ ti̱ꞌviꞌ Josué ni̱ xaꞌa̱n ko̱to̱ sa̱a̱ kaaꞌ ñu̱u̱ Jericó ja̱a̱nꞌ.
Te̱ ni̱ ndoo̱ Rahab nduꞌu̱ꞌ aꞌ te̱i̱n yooꞌ,
ne̱ vi̱ꞌe̱ Israel,
nde̱e̱ kivi̱ꞌ vi̱ti̱n.
26 Te̱ kivi̱ꞌ ja̱a̱nꞌ ni̱ ta̱xi̱ Josué kuento ra̱ nuu̱ꞌ ne̱ Israel kaꞌán ra̱ ndii:
―Na sa̱na̱tya̱ꞌa̱n Yahvé yo̱o̱ ka̱ naaꞌ na̱ka̱sa̱ꞌa̱ xa̱aꞌ tu̱ku̱u̱ ni̱a̱ ñu̱u̱ Jericó yoꞌoꞌ,
na ku̱vi̱ tiaa̱ siꞌe̱ ni̱a̱ te̱ xkuaꞌa̱ꞌ,
naaꞌ na̱ka̱sa̱ꞌa̱ ni̱a̱ nama̱,
te̱ na ku̱vi̱ tiaa̱ siꞌe̱ ni̱a̱,
te̱ xanuuꞌ,
naaꞌ na̱ka̱ta̱ ni̱a̱ yiꞌeꞌ nama̱ kaa̱ꞌ ―ni̱ katyi̱ ra̱.
27 Te̱ ni̱ yoo̱ Yahvé xiinꞌ Josué,
te̱ ni̱ kaꞌa̱n va̱ꞌa̱ ne̱ yivi̱ꞌ xaꞌa̱ꞌ ra̱ ka̱niiꞌ nuu̱ꞌ ñu̱ꞌuꞌ Canaán ja̱a̱nꞌ.