Espíritu sa ndaa xiꞌin espíritu sa naꞌntsa
4
Xanii tsa xinimani ntseꞌe da, kuaꞌa ntseꞌe profeta naꞌntsa kee ñuyii yaꞌa san kida natsa tsa san kaꞌan tsa sa neꞌe tsa x-espíritu Ndios doko ma kininchisa ñaꞌan duꞌua ni tsa ndidaa tsa, guaꞌa ka kototuni ni tu kuu xaꞌan Ndios ña ñaꞌan. 2 Kuan modo yaꞌa kini ni tu kuu x-Espíritu Ndios: Ndidaa ñayii nakininchisa sa Jesucristu kíxi xiꞌin yikikoño io x-Espíritu Ndios xi. 3 Doko ndidaa ñayii ti nakininchisa sa Jesucristu kíxi xiꞌin yikikoño, ti io x-Espíritu Ndios xi. San ñayii duꞌua kida io x-espíritu anticristu xi, sa tsaku jni sa vaxi, san vita sa io ñuyii yaꞌa.4 Daa, dini ndidaa ni kuu ni xaꞌan Ndios, san kídanar ni ndidaa tsa naꞌntsa, kuan ia io jni ntseꞌe ka ia sa kuxi sa io ñuyii yaꞌa. 5 Ndidaa tsa yukua kuu xaꞌan ñuyii yaꞌa; juandiku kaꞌan tsa ndidaa sa kuu xaꞌan ñuyii ya, san ñuyii yaꞌa sakunini ñaꞌan s-tsa. 6 Doko ntso ndidaa ndo kuu ndo xaꞌan Ndios, san tsa xini ñaꞌan xi Ndios sa kunini ñaꞌan tsa ku ndo; san tsa ti kuu xaꞌan Ndios ti sa kunini ñaꞌan tsa ku ndo. Juandiku duꞌua nakini ndo Espíritu sa ndaa xiꞌin espíritu sa naꞌntsa.
Xaꞌan Ndios kuu sa xinimani
7 Xanii, na kada-ini taꞌan ndo en ndo xiꞌin en ndo; kuan sa xinimani ku xaꞌan Ndios. San ñayii xinimani kuu d̶aꞌa Ndios san xini ñaꞌan xi Ndios. 8 Ñayii ti kida-ini taꞌan ti xini ñaꞌan xi Ndios, kuan xaꞌan Ndios kuu sa kida-ini. 9 San duꞌua dádana ñaꞌan Ndios sa kida-ini ñaꞌan ia ku ndo ndidaa ndo: Kuan tsandaꞌa ia uniko D̶aꞌa ia ñuyii yaꞌa ndasa na kunchito ndo sa saꞌa ia. 10 San jaꞌa ku sa kida-ini: Adii sa ntsoo xínimani ndo Ndios, maska sa mee ia xínimani ñaꞌan ku ndo ndidaa ndo diꞌna juandiku tsandaꞌa ia D̶aꞌa ia ndasa na doko ia xuyii ia ndasa na ndoo ku kuachi ndo.
11 Xanii, tsa kida-ini ntseꞌe da, tu Ndios duꞌua kida-ini ñaꞌan ia ku ndo, nandeꞌe sa duꞌua kada-ini taꞌan ndo en ndo xiꞌin en ndo tuku. 12 Ti en xíni ñaꞌan xi Ndios. Doko tu kida-ini taꞌan ndo en ndo xiꞌin en ndo, Ndios io ia xiꞌin ndo, san sa xinimani ia chítu ku kuanaa ndo.
13 Xini ndo sa io ndo xiꞌin ia san io ia xiꞌin ndo: Kuan táxi ia x-espíritu Santu ia ku ndo. 14 Dan ndidaa da xíni da xiꞌin naꞌma da sa ia kuu ku Tata ndo tsandaꞌa ia D̶aꞌa ia, ia kida sa nanitaꞌvi ndo. 15 Ndidaa ñayii naꞌma sa Jesús kuu D̶aꞌa Ndios, nduu ia enika xiꞌin ñayii yaꞌa, san ñayii yaꞌa enika nduu xiꞌin Ndios.
16 San dan ndidaa da xini da xiꞌin xininchisa da sa kida-ini ñaꞌan Ndios ku ndo ndida ndo. Kuan xaꞌan Ndios kuu sa kida-ini. San tsa kida-ini nduu tsa enika xiꞌin Ndios san Ndios ndu ia enika xiꞌin tsa tuku. 17 San modo yaꞌa sa kida-ini Ndios chítu ku kuanaa ndo, ndasa na kukaꞌnu-ini ndo kii ndakakuachi: Kuan ntsoo ndidaa ndo io ndo kuenta ío Jesucristu ñuyii yaꞌa. 18 Sa io sa kida-ini atuu sa yuꞌu, kuan sa kida-ini nchisa dita ñaꞌan xi sa yuꞌu. Kuan sa yuꞌu kida sa taꞌan ñayii, san ñayii yuꞌu vita chitu ka xanaa xi sa kida-ini Ndios.
19 Ntso kida-ini ñaꞌan ndo xi ia, kuan diꞌnaka mee ia kída-ini ñaꞌan ku ndo. 20 Tu andu kaꞌan: “Ntsuꞌu kida-ini ntsu Ndios” san xini uꞌu xani xi, tsa yaꞌa ti kaꞌan ndaa tsa. Kuan tu ti kida-ini tsa xani tsa, tsa xini tsa, na modo kada-ini tsa Ndios ia ti xini tsa tuda? 21 San duꞌua táꞌvichiion ia d̶a ndidaa da: Ñayii kida-ini ñaꞌan xi Ndios, na kada-ini xani xi tuku.