Duꞌua danaꞌa andu kuu Ndidaa d̶aꞌa Ndios
3
Ntsaꞌa ni ndidaa ni sa xinimani ñaꞌan ntseꞌe ia kuu ku Tata ndo, ndasa na ku nani ndo d̶aꞌa Ndios. Juandiku ñuyii yaꞌa ti xini ñaꞌan ku ndo, kuan ti xíni ñaꞌan xi ia tuku. 2 Xanii, tsa xinimani ntseꞌe da, vita sa kuu ndo d̶aꞌa Ndios, sa vitañaꞌa ka nanuu nasa ku kuu ndo. Doko xini ndo sa ora na ndixi Jesucristu, nduu ndo kuenta mee ia, kuan kini ndo nchakaa ia. 3 San ndidaa ñayii ntsatu ndidaa jaꞌa xi ia, ndada ndoo mee, duꞌua kuenta mee ia io ndoo ia.4 Ndidaa ñayii kida kuachi, xido ndagua ñayii j-leya Ndios, kuan kuachi kuu sa ti seniꞌno ñayii j-ley Ndios. 5 San xini ni sa kíxi Jesucristu ki dita ia ku kuachi ndo ndidaa ndo, kuan ti io x-kuachi ia. 6 Duꞌua ndidaa ñayii nduu enika xiꞌin ia ti kida kuachi. Doko ndidaa ñayii kida kuachi, ti xini ñaꞌan xi ia, san nisa vita kini ñaꞌan ka andu kuu ia.
7 Daa, ma en dandaa ñaꞌan jni ndidaa ni, ñayii kida sa ndaa kuu ñayii ndaa, kuenta mee Jesucristu kuu ia ndaa. 8 Doko ñayii kida kuachi ku xaꞌan sakakuiꞌia, kuan sakakuiꞌia kída kuachi ntsa diꞌna. Sa saꞌa xi jaꞌa juandiku kixi D̶aꞌa Ndios ndasa na datani ia ndidaa sa kída sakakuiꞌia.
9 Ndidaa ñayii káku xi Ndios, ti kida kuachi, kuan sa kuu Ndios io s-tsa. San ti kida ka tsa kuachi, kuan káku tsa xi Ndios. 10 San duꞌua xini andu kuu d̶aꞌa Ndios, xiꞌin andu kuu d̶aꞌa sakakuiꞌia: ndidaa ñayii ti kida sa ndaa, xiꞌin ti kida-ini xani xi, adii xaꞌan Ndios kuu ñayii duꞌua kida ya.
Na kinimani taꞌan ndo ndidaa mee ndo
11 Kuan jaꞌa ku toꞌon tsaku jni diꞌna: Sa na kada-ini taꞌan ndo en ndo xiꞌin en ndo. 12 Ma ku kuu ndo ndidaa ndo kuenta Cain, nu kuu xaꞌan sakakuiꞌia kuan saꞌni nu xani nu. San naku saꞌni ñaꞌan nu? Kuan ndidaa sa xu kada Cain ku sa kuiꞌia san sa xu kada xani nu kuu sa ndaa.
13 Xanii, ma ndiꞌi xanaa ni tu xini-uꞌu ñaꞌan ñayii ñuyii yaꞌa jni. 14 Xini ndo sa sa yaꞌia ndo sa xiꞌi ndo san nchito ndo, kuan kida-ini ndo ku kiani ndo, doko andu ti kida-ini xani xi kuu daa ndii. 15 Ndidaa tsa xini uꞌu xani xi ku tsa en tsa saꞌni ndii; san xini ni sa tsa saꞌni ndii, ti io ñuyii ma ndeꞌe xi. 16 San duꞌua xíni ndo sa xinimani, kuan nakua ñaꞌan Jesucristu vida ia sa saꞌa ndo ndidaa ndo; san duꞌua ntsoo ndidaa ndo tuku nchoxi sa kuañaꞌan ndo ku vida ndo sa saꞌa ku kiani ndo. 17 Doko tu dakaa ñayii io sa io xi ñuyii yaꞌa, san xini tsa xani tsa, sa io tsa nisidaa, san ti nchu chintsee ñaꞌan tsa, ama kachi ndo sa io sa xinimani Ndios xanaa tsa yaꞌa ña? 18 Daa, ma kada-ini ndo xiꞌin toꞌon kaꞌan ni ndo adi d̶iki ku kiaa ni ndo kandodo toꞌon kaꞌan ndo, maska sa na kada-ini nchisa ndo.
19 San duꞌua xini ndo sa kuu ndo xaꞌan sa ndaa, san na koꞌon ku kuanaa ndo sa io ndaa ndo xiꞌin Ndios. 20 Doko tu ta uꞌu ndo kida ku kuanaa ndo, kaꞌnu ka ia sa kuxi ku kuanaa ndo, san ia yaꞌa xini ndidaa ndituꞌu.
21 Xanii, tu ti io sa kida sa ta uꞌu ku kuanaa ndo ndidaa ndo, nee ku nu ndo na kiꞌin ndo jnu Ndios tuda; 22 San nasa kuu mee sa na kaka ndo xi ia san taxi ia ku ndo, kuan kida ndo sa táꞌvichiion ia, xiꞌin kida ndo ndidaa sa nataꞌan xanaa ia.
23 San jaꞌa ku sa táꞌvichiion ia: Sa na kininchisa ndo D̶aꞌa ia, ia kuu Jesucristu xiꞌin na kada-ini taꞌan ndo en ndo xiꞌin en ndo, duꞌua kuenta táꞌvichiion ia. 24 San ñayii kida sa taꞌvichiion ia, ndu enika xiꞌin Ndios, san ia yaꞌa kuu enika xiꞌin ñayii yaꞌa tuku. Sa saꞌa Espíritu Santu táxi ia ku ndo juan kida sa xini ndo sa nduu̱ ndo enika xiꞌin ia.