CARTA KU UU CHÍDOTUNI PEDRU
Ncha kuu ni ndidaa ni
1
Dan kuu Simón Pedru tsa xinokuachi xiꞌin tsa kuu x-apóstol Jesucristu; chidotuni da carta yaꞌa sa kuxi ndidaa tsa niꞌi sa xininchisa xaꞌvi ntseꞌe xi kuenta niꞌi mee da ndidaa da sa saꞌa sa guaꞌa ku Ndios ndo xiꞌin ia kida sa nanitaꞌvi ndo, ia kuu Jesucristu: 2 Sa kunda-ini xiꞌin sa kookadi na kaya ka jni ndidaa ni, xiꞌin sa xini ni Ndios xiꞌin ku Toꞌo ndo Jesucristu.Nasa kuu sa io xi en ñayii kukaꞌnu-ini ñaꞌan xi Jesucristu
3 Sa tastuni ia juandiku taxi ia sa nandeꞌe ku ndo ndasa na koo ndaa ndo ñuyii, ndidaa jaꞌa niꞌi ndo kii xininchisa ndo ia kana ñaꞌan ku ndo ia io ndaa xiꞌin tastuni, 4 san sa saꞌa ndidaa jaꞌa kachi ia sa taxi ia sa guaꞌa naꞌnu xaꞌvi ntseꞌe xi ku ndo, ndasa na ku kuu guaꞌa ni kuenta kuu Ndios, kuan dandoo ni ndidaa sa kuiꞌia io ñuyii yaꞌa sa xu kada xikikoño ni. 5 Di ni ndidaa ni tuku, nduku ntsee ni sa saꞌa ndidaa jaꞌa, san sa xininchisa ni nakoo sa kida ni sa ndaa, san sa kida ni sa ndaa nakoo sa kutuni jni; 6 san sa kutuni jni, nakoo sa tastuni ni xikikoño ni san sa tastuni ni xikikoño ni nakoo sa sa kuntsatu, san sa kuntsatu nakoo sa nda-ini; 7 san sa nda-ini nakoo sa kida ini taꞌan san sa kida ini taꞌan nakoo, sa xinimani.
8 Kuan tu ndidaa jaꞌa io ni ndidaa ni san kaya, ma kada sa koo dusa ni adi koo duꞌua ni ni sa saꞌa sa xininchisa ni ia kuu ku Toꞌo ndo Jesucristu. 9 Doko ñayii ti io ndidaa jaꞌa xi, kuu en ñayii taꞌa ni tuu jnu xi adi kuu ñayii kuaa, ñayii dána sa Ndios ndadandoo ia ndidaa kuachi ío xi. 10 Juandiku vi xani, nandeꞌe sa nduku ntsee ka ni xiꞌin sa kutuꞌua ni xiꞌin sa kana ñaꞌan jni: Kuan tu nakada ni ndidaa jaꞌa sa ma dana ni xichi Ndios. 11 Kuan duꞌua nee ndieꞌe kuaan nakaan sa yii ni sa tastuni ti ndeꞌe io xi ku Toꞌo ndo ia kuu Jesucristu ia kida sa nanitaꞌvi ndo.
12 Juandiku dandaku ni on da ndidaa toꞌon yaꞌa jni, kuani sa xini ni ndidaa ni, xiꞌin in ndaa ni xiꞌin sa ndaa kutuꞌua ni. 13 Kuan xini da sa sa ndaa kuu sa kaꞌan deen da sa nanduku ntsee ni neni io daa da xiti xikikoño yaꞌa; 14 Kuan xini da sa sa io sa dandoo da xikikoño da yaꞌa, kuenta kachi ia kuu ku Toꞌo ndo Jesucristu. 15 Ndukuntsee da tuku ndasa ora na kuu da san na ku naꞌan ni ndidaa toꞌon yaꞌa.
Ndidaa ñayii xini ndidaa sa naꞌnu kida Jesucristu
16 Kuan ti kaꞌan da ndidaa da sa naꞌntsa adi daa ka toꞌon sa kachi da sa ndixi ku Toꞌon ndo ia kuu Jesucristu, kuan sa xíni da xiꞌin nduchinuu da ndidaa sa naꞌnu tastuni ia juan kaꞌan da. 17 Kuan kuenta kídakaꞌnu ñaꞌan Ndios xi ia, san s-tachi ia tsaku ntsa sa io ia sa tastuni ia san kachi: “Nu yaꞌa kuu ku Daꞌa ntsu nu xinimani ntsu, nu kida sa nataꞌan ku kuanaa ntsu”. 18 San dan ndidaa da tsaku d̶a s-tachi ia ntsa andivi, kuenta xuku da ndidaa da xiꞌin ia tinduu ii.
19 Xiꞌin io ndidaa toꞌon sa kuu sa ndaa ntseꞌe sa káꞌan ndidaa tsa kaꞌan x-kuenta Ndios tuku, san guaꞌa kida ni sa sakunini kuan ndidaa toꞌon yukua kuu na en tu ñuꞌu xiko san dayeꞌe sa naa, ntsa na yeꞌe kii xiꞌin na kee kiti tuu sa dayeꞌe xanaa ni ndidaa ni. 20 Doko díꞌna ka nandeꞌe sa tediki ni jaꞌa, sa nisa en profecía yodotuni escritura ti kée diki en ñayii; 21 kuan adii ñayii nchóxi sa na kixi profecía ya, maska sa ndidaa ñayii kida ii Ndios kaꞌan kuan Espíritu Santu kida sa na kaꞌan tsa ndidaa tsa.