Conseju sa kuxi ndidaa ñayii kukaꞌnu-ini ñaꞌan xi Jesucristu
5
Dan kuu tsa kuu jnu xi ntsakañaꞌa xi ndidaa tsa xininchisa ñaꞌan xi Jesucristu, xini da xiꞌin jnu da ndidaa sa taꞌan ia, san niꞌi da ndidaa sa kunaꞌnu kixi. Juandiku xika da xi ndidaa dini tsa ntsaka ñaꞌan xi ndidaa ka ñayii xininchisa ñaꞌan Jesucristu: 2 Sa guaꞌa guaꞌa koto ni ndidaa ñayii kuu ndidaa ndikachi Ndios io sa io ni ndidaa ni xan, koto ni tsa ndidaa tsa, sa ma kada ni kuenta sa guerza taꞌvichiion sa kada ni, maska sa ntsaꞌa ni tsa kuan xanaa ni kana; san ma kada ni sa saꞌa tuini, maska sa duꞌua kada ni kuan nchoj ni sa kada ni. 3 Adi kuenta ñayii tastuni ñaꞌan xi ndidaa tsa ntsaa ni, maska sa kuenta io mee ni na kutuꞌua tsa koo tsa tuku. 4 San ora na nanuu ia kuu pastor kunaꞌnu, taxi ia en corona guaꞌa sa ti ndeꞌe ni ndidaa ni.5 Duꞌua ni ndidaa yoꞌo nu kuachi tuku, kininchisa ñaꞌan xi ndidaa tsa kuu jnu xi xan; san kininchisa taꞌan ndidaa mee yo sa ku kuu yeñuꞌu, kuan:
Ndios ti sakunini ia ndidaa nu sa ini,
doko kunda-ini ñaꞌan ia xi ndidaa nu yeñuꞌu.
6 Kani ini ni sa atuu dana sa kuu ni jnu Ndios ndasa na kadakaꞌnu ñaꞌan ia ni na taꞌan kii. 7 Nachoꞌon ni ndidaa sa ndiꞌi xanaa ni ndaꞌa Ndios, kuan sani-ini ia sa saꞌa ni ndidaa ni.
8 Guaꞌa ni ndidaa ni san ma kada doꞌo doꞌo ni koo ni ñuyii kuan sakakuiꞌia kuaan naa ndikaꞌa nduku te sa kaj ste duꞌua nduku andu kaxi. 9 San xiꞌin sa xininchisa ni kuyakui ni sa nchu kada sakakuiꞌia kuaan ni, kunaꞌa ni sa ndidaa xani ni tsa xininchisa io ndidaa xichi duꞌua taꞌan ntseꞌe tsa tuku. 10 Doko Ndios ia taj daa ndidaa sa guaꞌa, ia kana ñaꞌan sa saꞌa Jesucristu sa nakoo ndo sa tastuni io ia, ora na tuꞌu taꞌan ni taꞌa dii, dini ia yaꞌa kada sa na nduu ni modo sani-ini ia sa ku kuu ni, san kada ia sa na kuin ndaa ni, na kuyakui ni xiꞌin na kuin kutu ni. 11 San xaꞌan ia na ku kuu ndidaa sa naꞌnu xiꞌin ndidaa sa tastuni ndidaa tiempu. Duꞌua na kuu.
Kada ntse-ini jni ndidaa ni
12 Dan chidotuni tutu neꞌe Silvanu ya tsa xini da sa kuu en tsa xinokuachi ndaa. Tsaa da uu toꞌon yaꞌa ni, san kaꞌan deen da kuan kachi toꞌon ndaa da sa jaꞌa kuu nchisa gracia Ndios, sa kuu sa io ni ndidaa ni.
13 Ndidaa tsa xininchisa io país Babilonia, tsa ndekaxi Ndios kuenta ndekaxaꞌan ia ni ndidaa ni kachi sa na kada ntse-ini jni ndidaa ni duꞌua ni kachi Marcos nu kuu naa d̶aꞌa da. 14 Kaꞌan taꞌan ni ndidaa ni xiꞌin sa xinimani.
San sa kookadi na koo xi ndidaa dini tsa xininchisa ñaꞌan xi Jesucristu. Duꞌua na kuu.