CARTA CHÍDOTUNI SANTIAGU
kada ntse-ini ni ndidaa ni xanii
1
Dan kuu Santiagua tsa xinokuachi xi Ndios xiꞌin ia kuu ku Toꞌon ndo Jesucristu, chidotuni da carta yaꞌa xi ndi uxi uu s-tribu Israel nchitsa niꞌno: Kadantsee-ini jni ndidaa ni.Sa kutuni taxi Ndios
2 Xanii, ku-iꞌni ntseꞌe ni ndidaa ni, ora ndaꞌvi ntseꞌe nayaꞌia ni ndidaa ni, 3 kuan xini ni sa duꞌua taꞌan sa xininchisa ni, xitotuni ñaꞌan xi san modo yaꞌa kutuꞌua ka ni sa kuyakui ni. 4 San sa yakui ni na kada ndidaa x-chiion xi xanaa ni, ndasa na koo ndaa ni xiꞌin na koo ndidaa jni, ndasa ma nandeꞌe nisa en jni.
5 San tuu dakaa ni kida falta sa kutuni ka xi káka ni xi Ndios, san taxi ia kuan Ndios ti chituni ia. 6 Doko káka ni san kininchisa ni sa niꞌi ni, san ma kani-ini ni sa ma niꞌi ni. Kuan ñayii ti xininchisa kuu kuenta x-ola mar, sa da kiꞌin ñaꞌan tachi xi ichaꞌa ichukua. 7 Ñayii duꞌua kida na kani-ini sa ma niꞌi nisa dana xi ia kuu ku Toꞌo ndo. 8 Ñayii uu s-toꞌon xi nunka ti daxino chion kida.
9 Ndidaa dini ku kiani ndo kundaꞌvi, ku iꞌni ni kuan Ndios kidakaꞌnu ñaꞌan ia jni; 10 doko ndidaa dini tsa kuika, ku iꞌni ni kuan nata-uꞌu ni jnu Ndios kuan tsa kuika kuu tsa kuenta xitavili ndidaa kuꞌu, sa ti kudii. 11 Kuan ora kee ora san iꞌni ntseꞌe, kuꞌu kuaan yichib san xita xi koꞌio san sa vili kaa kuaan ndeꞌe. Duꞌua taꞌan ndidaa tsa kuika, ndeꞌe tsa xiꞌin ndidaa sa kuika tsa.
Sa xitotuni ñaꞌan xiꞌin sa chiyutu ñaꞌan
12 Na ku-iꞌni ñayii kuyakui ndidaa sa xitotuni ñaꞌan xi, kuan ora na yaꞌia ndidaa jaꞌa san niꞌi tsa ñuyii ma ndeꞌe, sa kuu corona sa kachi Ndios sa niꞌi ndidaa ñayii xinimani ñaꞌan xi ia. 13 Ora xitotuni ñaꞌan jni sa kada ni sa kuiꞌia, ma kachi ni sa Ndios xitotuni ñaꞌan jni, kuan Ndios ti xitotuni ñaꞌan sa kuiꞌia xi ia, san nisa ti xitotuni ñaꞌa ia xi ñayii. 14 Kuan sa nchoxi xikikoño ñayii kida sa kueni kueni xitakaa ñaꞌan xi ñayii. 15 San ndidaa sa kuiꞌia sani-ini kida sa kaku kuachi, san kii kida ñayii kuachi, san ñayii duꞌua kida xidokuachi sa ndeꞌe.
16 Xanii, ma kueen on ni sa dandaa ñaꞌan jni. 17 Ndidaa sa guaꞌa sa diko xiꞌin sa ndakuiti, kixi nino yukua san ndidaa juan ku xaꞌan Ndios ia kuu s-Tata ndidaa sa dayeꞌe, ia ti dama, san ti kuu ia kuenta en kondati sa nonoo nadama ia. 18 Kuan nchóxi ia, juandiku kída ia sa na kaku ndo sa saꞌa s-toꞌon ndaa ia, ndasa na ku kuu ndo sa kuxi mee ia.
Na kada sa taꞌvichiion toꞌon
19 Juandiku vi xanii, ndidaa ñayii na chodoꞌo guaꞌa, san na ku kuee sa kaꞌan xiꞌin na ku kuee sa nadiko xi. 20 Kuan ñayii nadiko xi ti kida sa ndaa nchoxi Ndios. 21 Juandiku dandoo ni ndidaa sa kuiꞌia xiꞌin sa kida kuiꞌia ñaꞌan jni san kuemani ni toꞌon guaꞌa choꞌon xanaa ni sa kida sa na nanitaꞌvi x-alma ni.
22 Doko kada ni sa kachi toꞌon yaꞌa, san ma kada kunini duꞌua ni, kuan dandaa ni mee ni tu duꞌua kida ni. 23 Kuan andu sa kunini toꞌon yaꞌa san ti kida sa kachi, ku kuenta en ñayii ntsaꞌa jnu xi s-peju. 24 Neni ntsaꞌa tsa xini tsa nchakaa jnu tsa, doko tuꞌu ntsáꞌa tsa san dana tsa nchakaa tsa. 25 Doko ñayii chodoꞌo guaꞌa sa kachi ley, sa kida ñaꞌan nchisa libre ku ndo, san ndukuntsee sa kada, san ti kuu tsa en ñayii sa kunini san dana, maska sa kida tsa, tsa yaꞌa kiꞌin guaꞌa s-tsa sa saꞌa sa kida tsa.
26 Tu dakaa ni ndidaa ni sani-ini sa kuu ñayii io modo nchoxi Ndios, san ti na teen tsa toꞌon kaꞌan tsa, ñayii yaꞌa dandaa xanaa xi, san sa sani-ini tsa sa io tsa modo nchoxi Ndios adi sa ndaa kuu. 27 Jaꞌa kuu sa nataꞌan xanaa Ndios ia kuu ku Tata ndo: Sa na ku koto ñaꞌan xi ndidaa nu kendoo ndaꞌvi, xiꞌin ndidaa ñakee ora taꞌan ntseꞌe ña, xiꞌin sa ma ku kuiꞌia ñayii xiꞌin ndidaa sa kuiꞌia io ñuyii yaꞌa.