Sa nandeꞌe sa kada ndidaa ñayii xininchisa ñaꞌan xi Ndios
13
Kinimani taꞌan ni ndikii ndidaa ni kuenta ndidaa ñani mee ni. 2 Ma d̶ana ni sa kuañaꞌan noo ni xeꞌe ni sa na kendoo ñayii, kuan uu ñayii duꞌua xu kada san xu kendoo ñayii xeꞌe tsa san ti xinituni tsa sa ángel xu kendoo xeꞌe tsa.a3 Nakaꞌan ni ndidaa tsa yeꞌe vekaa kuenta sa mee ni ndidaa ni duꞌua io, san nakaꞌan ni ndidaa tsa taꞌan ntseꞌe, kuan guaꞌa ni duꞌua taꞌan ni tuku.
4 Sa tandaꞌa na ku kuu en sa yeñuꞌu jni ndidaa ni, san ma en koo xiꞌin ñadeꞌe adi tsie tu ti tandaꞌa xiꞌin; nisa xiꞌin ñayii ti kuu d̶eꞌe xi adi xee xi kuan ndidaa ñayii duꞌua na kada, Ndios ndaka ia kuachi xi ñayii.
5 Ma ndiꞌi xanaa ni tuini ni, ku-iꞌni ni xiꞌin sa io jni, kuan Ndios kachi ia: “Chintsee ñaꞌan ntsu xo ndikii, san ma dandoo ñaꞌan ni mee ntsu xo.”b 6 Juandiku guaꞌa ni kachi ndo xiꞌin nee ku kuanaa ndo:
Ndios kuu ia chintsee ñaꞌan d̶a;
san ma yuꞌu da nasa kada ñayii d̶a.c
7 Na kaꞌan ni ndidaa tsa kuu jnu xi dakuaꞌa ñaꞌan jni s-toꞌon Ndios, san nakaꞌan ni na modo xu kininchisa tsa, san duꞌua koo ni ndidaa ni tuku.
8 Jesucristu kuu dini ia iku, vita xiꞌin ndikii. 9 Ma kuemani ni sa na dakuaꞌa ñaꞌan jni xiꞌin dakaa ni ka toꞌon ti xini ni; guaꞌa ka tu na ndu ntsee ku kuanaa ndo xiꞌin j-gracia Ndios, san adi sa saꞌa sa kaj ndo xiꞌin sa koꞌo ndo, modo taꞌvichiion, kuan ñayii duꞌua senchiion atuu dana sa guaꞌa niꞌi ñayii.
10 Io en ku altar ndo, sa ti nitaꞌvi ndidaa tsa xinokuachi ni on tabernaculo sa kaj s-tsa sa yodo jnu xi. 11 Kuan j-niñi ndidaa kititata, dutu kunaꞌnu kuaan saneꞌe tsa lugar ii sa saꞌa kuachi, doko ndidaa xikikoño te kayu ndikeꞌe ñuu.d 12 Juandiku Jesús taꞌan ia san xiꞌi ia ndikeꞌe ñuu, ndasa na ndada ii ia ñuu xiꞌin j-niñi ia. 13 Na kiꞌin ndo sa io Jesús tavin, ndikeꞌe ñuu san na taꞌan ndo sakanuu táꞌan ia tuku. 14 Kuan ñuyii io ndo ya ma koo oni oni, maska sa ntsatu ndo sa kiꞌin ndo veꞌe kixi. 15 Juandiku sa doko ndo na ku kuu sa kuañaꞌan ndo taxaꞌvi xi Ndios ndikii, sa saꞌa Jesucristu, san na kaꞌan ndo sa mee ia kuu ku Toꞌo ndo, san juan na ku kuu kuenta en sa doko ndo ndikii. 16 Ma d̶ana ni sa kada ni sa guaꞌa xiꞌin sa chintsee taꞌan ni ndidaa mee ni, kuan ndidaa jaꞌa kuu kuenta en sa doko nataꞌan xanaa Ndios.
17 Kininchisa ñaꞌan ni xi ndidaa tsa kuu jnu xi, san kueniꞌno ñaꞌan ni s-tsa yaꞌa, kuan ndidaa tsa yaꞌa kuu tsa ntsaa x-alma ni, kuan xini tsa sa nduku toꞌon Ndios s-tsa, san kada ni sa na ku iꞌni tsa na kada tsa, san ma kada ni sa na ta uꞌu tsa. Kuan tu duꞌua na kada ni ma chintsee ñaꞌan jni.
18 Kakataꞌvi ni sa saꞌa da ndidaa da, kuan xini ndaa da sa io ndoo xanaa da ndidaa da, san nchu kada da ndidaa da, ndidaa sa guaꞌa. 19 Sakundaꞌvi ntseꞌe da sa na kakataꞌvi ni kuan ndasa na kuemani Ndios sa na kij ni da sa io ni ndidaa ni.
Kada ntse-ini jni ndidaa ni
20 San Ndios ia taxi sa kadivii ni na koo ni, ia kída sa nandoto ku Toꞌon ndo Jesús ia kuu Pastor kaꞌnu ndidaa ndikachi, sa saꞌa j-niñi tratu ti ndeꞌe. 21 Na kada ia sa na kuu kada ni sa guaꞌa kuan nakada ni sa nchoxi ia. San sa saꞌa Jesucristu, Ndios na kada ia sa nataꞌan xanaa ia. San na kukaꞌnu ia ndidaa kii. Duꞌua na kuu.
22 Xanii, xika da sa na kuyakui ni ndidaa ni, toꞌon den chídotuni da carta yaꞌa jni, ndasa na kukaꞌnu xanaa ni, kuan taꞌa dii kuu. 23 Keꞌe d̶iki ni sa ku kiani ndo Timoteu sa kee tsa vekaa. Tu na saa yachi tsa, san kij da xiꞌin tsa kikotoñaꞌan da jni ndidaa ni.
24 Na kada ntse-ini xi ndidaa tsa kuu jnu xi io sa io ni xan, na kada ntse-ini xi ndidaa tsa ndada ii Ndios. Ndidaa tsa io Italia ya kachi tsa sa na kada ntse-ini jni ndidaa ni tuku.
25 Ndios na taxi ia j-gracia ia jni ndidaa ni.