Ndios na nakani ñaꞌan ndaa ia xi ñayii kuu d̶aꞌa ia
12
Kuaꞌa ntseꞌe ñayii yaꞌa dádana ñaꞌan tsa ndidaa sa guaꞌa kída Ndios, kuan xíninchisa ñaꞌan tsa, juandiku na dandoo ndo ndidaa sa vee xiꞌin kuachi sa chodama ñaꞌan ku ndo tuku, kuan ñuyii yaꞌa kuu na en sa kono ndo, san na kuyakui ndo sa saa ndo sa nandeꞌe sa saa ndo, 2 nachoꞌon ndo ku nuu ndo Jesús, ia sáni saꞌa xiꞌin kída sa na nduu sa xininchisa ndo modo sáni-ini Ndios sa ku kuu ntsa díꞌna, kuan ntsatu en sa guaꞌa ntseꞌe xi ia juandiku kúyakui ia sa i-nchitakaa ia cruz, san ti dánuu ia sakanuu nayáꞌia ia, kuan danduu sakuntsaku ia ichi ladu kuaꞌa intsaku Ndios.3 Juandiku ntsaꞌa ni ndidaa ni sa kída Jesús, sa táꞌan ntseꞌe ia, sa káꞌan kuiꞌia ndidaa ñayii io x-kuachi xi xi ia. Ndasa na kuyakui ni ndidaa ni san ma xavi ni san nayuꞌu ni. 4 Kuan dini ndidaa ni vita naa ka ni xiꞌin kuachi sa kee ni niñi sa kuu ni. 5 Ña ama dána ni toꞌon den kaꞌan Ndios xi ndidaa ñayii kuu na d̶aꞌa ia:
Da, tediki tu ndada ndaa ñaꞌan tsa Toꞌo yo,
san ndukuntsee tu nduden ia yo.
6 Kuan tsa Toꞌo ndada ndaa ia ñayii xinimani ia,
san nduden ia xi ndidaa ñayii ndada ia d̶aꞌa ia.a
7 Doko dini ndidaa ni taꞌan ni ndasa na ndu ndaa ni: Tu ku yakui ni ndidaa sa taꞌan ni kida Ndios, jaꞌa nchu kachi sa kida ñaꞌan ia na d̶aꞌa ia jni. Kuan ti io nisa en daꞌa sa ti nduden s-tata xi xi. 8 Doko tu Ndios ti ndada ndaa ñaꞌan ia jni ndidaa ni, kuenta ndada ndaa ia d̶aꞌa ia, dini ndidaa ni ti kuu nchisa ni d̶aꞌa ia. 9 Kuan kuenta kuu ndo nuliin, ku tadeꞌe ndo ñuyii yaꞌa xu ndudeen tsa ku ndo, san xu kininchisa ñaꞌan ndo s-tsa. Naku ma kininchisa ka ndo ku Tata ndo, ia io andivi ndasa na niꞌi ndo ñuyii. 10 Ku tadeꞌe ndo ñuyii yaꞌa, xu nakani ñaꞌan ndaa tsa ku ndo en tiempu, modo xu kani-ini tsa. Doko Ndios nakani ñaꞌan ndaa nchisa ia ku ndo, kuan xini ia sa juan kuu sa guaꞌa ku ndo, ndasa na nduu ii ndo kuenta mee ia. 11 Sa ndaa kuu, sa ora nakani ñaꞌan ndaa ku ndo, ti ku iꞌni ndo maska sa ta uꞌu ndo, doko ora tuꞌu yaꞌia ñayii ndidaa jaꞌa, danaꞌa sa ñayii yaꞌa io kadi xiꞌin kida sa ndaa.
Ntseꞌe ii io sa ma kada ndo sa nchoxi Ndios
12 Tu dini ndidaa ni sa xavi ndaꞌa ni xiꞌin xavi xikixiti ni, sa xino ni ndukuntsee ni ndidaa ni.b 13 San kada ni en ichi ndaac, san kaka ni ichi yukua, ndasa ndidaa tsa yakua ma d̶ana tsa ichi kuan, maska sa na nduguaꞌa tsa.
14 Nduku ni sa koo kadi ni xiꞌin ndidaa ñayii, san koo ni kuenta en ñayii ndékaxi ia kuu ku Toꞌo ndo, kuan ñayii ti io kuenta ñayii ndekaj xaꞌan xi ma kini ñaꞌan xi ia kuu ku Toꞌo ndo. 15 Ntsaꞌa ni kuan na kada dakaa ni dakuita gracia sañaꞌan Ndios xi, san nduu kuenta en yúku ugua xoꞌo xi san kada ugua ñaꞌa xi dagua ka ñayii; 16 ma en ni ku kuu kuenta en ñayii ñotaꞌan ñadeꞌe yaꞌa ñadeꞌe yukua, adi koo ni kuenta en ñayii ti xininchisa ñaꞌa xi Ndios, kuan duꞌua kída Esaú xiꞌin sa sadaa s-tata tsa sa niꞌi tsa, sa kuu tsa daꞌa diꞌna nuu, san kada nadama tsa sa saꞌa en koꞌo ni comida.d 17 Doko kuenta nchój s-tsa sa niꞌi tsa, sa kaka s-tata tsa sa guaꞌa jnu Ndios sa kuj s-tsa, san ti níꞌi ka tsa kuani oni ndaꞌyu ndutsa nuu tsa xíka tsa.e
18 Dini ti sáꞌan yachi ni jnu tinduu Sinaí, sa guaꞌa ni xu kini xiꞌin xu túxi, san juan xiko ñuꞌu, san ío sa naa, xiꞌin kuiꞌia ntseꞌe kana tachi, 19 nisa ti tsáku jni trompeta, nisa s-tachi Ndios. Ndidaa tsa tsaku xi jaꞌa sákundaꞌvi tsa sa max kaꞌan ka ia s-tsa ndidaa tsa,f 20 Kuan ti xu kuyakui tsa ndidaa sa xu táꞌvichiion: San andu kuu mee na kukoꞌon tinduu kuani en kiti yuku san na chidoyuu ñaꞌan adi xiꞌin en yutu den na kaꞌni ñaꞌan.g 21 San kuiꞌia ntseꞌe nika kaa sa xíni tsa ndidaa tsa, juandiku ntsa ndeꞌe Moisés kachi tsa: Yuꞌu ntseꞌe da san oni kidi ñaꞌan d̶a.h
22 Doko dini kuyachi ni jnu tinduu Sion, sa kuu xuun Ndios nchito, jnu Jerusalén io andivi, sa io kuaꞌa ntseꞌe mil ángel, 23 sa io congregación kuu ndidaa ñayii ndékaxi ia díꞌna, ñayii yodotuni andivi, sa io Ndios ia ndaka kuachi xi ndidaa ñayii, xiꞌin kúyachi ni sa io x-espíritu ndidaa ñayii io ndaa, ñayii ndada Ndios modo sani-ini ia ntsa díꞌna, 24 sa io Jesús tuku, ia kuu ia saꞌntsa dagua tratu saa, san niñi dákitintsaa kuenta xíꞌi ia, níꞌi ka kaꞌan sa kuxi j-niñi Abel.i
25 Kunini guaꞌa ni, sa ma kada ntsee diki ni sa kaꞌan ia. Kuan tu Ndios dákuidokuachi ia ndidaa ñayii ti inini ñaꞌan xi tsa xu kaꞌan ñuyii yaꞌa, vika tuku nstoo ma kuidokuachi ndo, tu ma chodoꞌo ndo sa kaꞌan ia ntsa andivi. 26 San s-tachi ia kaꞌan ntsa andivi kída sa kánda nuꞌu ya tiempu yukua, duꞌua kachi ia sa kada ia enka guelta: “Adi ni nuꞌu yaꞌa kanda kada ntsu, kada ntsu sa na kanda ntsa ndeꞌe andivi.”j 27 Kuenta kachi ia sa enka guelta: Nchu kachi sa kanda nituku, san dita ia ndidaa sa kuguaꞌa, sa kani ndasa na kendoo ndidaa sa ti kani. 28 San duꞌua, tu ntso ndidaa ndo niꞌi ndo en reinu ti kanda, na kuañaꞌan ndo taxaꞌvi xi Ndios sa saꞌa xi jaꞌa. San xiꞌin nee ku kuanaa ndo na kuino kuachi ndo xi ia, san na koo ndo modo nataꞌan xanaa ia xiꞌin na yuꞌu ndo xiꞌin na chiñuꞌu ndo ia. 29 Kuan ku Ndios ndo ku ñuꞌu dandeꞌe ñaꞌan.k