CARTA CHÍDOTUNI PABLO XI FILIMON
Ncha kuu ni ndidaa ni
1
Dan ku Pablo tsa yentsadi sa saꞌa sa kaꞌan da s-toꞌon ia kuu Jesucristu, tsaa da carta yaꞌa xiꞌin Timoteu sa kuxi ku kiani ndo tsa xinimani ndo nani Filimón tsa kidachiion xiꞌin ndo, 2 xiꞌin sa kuxi ndidaa ñayii kuu x-congregación Ndios nataka xeꞌe ni, kuenta kuu ku kuaꞌa ndo Apia xiꞌi Arquipo, ku kiani ndo tsa naa sa saꞌa sa naa ndo tuku: 3 Ndios ia kuu ku Tata ndo xiꞌin ku Toꞌo ndo Jesucristu na taxi ia j-gracia ia xiꞌin sa na kookadi ni ndidaa ni.Sa xinimani Filimón ndidaa ñayii xiꞌin sa xininchisa tsa Ndios
4 Ndi kii sañaꞌan da taxaꞌvi xi j-Ndios da ora xika da xi ia sa saꞌa ni; 5 kuan niꞌi toꞌon da na modo xinimani ni xiꞌin xininchisa ni ia kuu ku Toꞌo ndo Jesucristu, xiꞌin na modo xinimani ni ndidaa ka ñayii ndada ii ia, 6 ndasa sa saꞌa sa xininchisa ni na kada sa na tediki ni xiꞌin na kini ni ndidaa sa guaꞌa io jni ndidaa ni sa saꞌa Jesucristu. 7 Kuan ku iꞌni ntseꞌe da ndidaa da xiꞌin kukaꞌnu xanaa da sa saꞌa sa xinimani ni, kuan sa saꞌa dini vi xanii kúkaꞌnu xanaa ndidaa ñayii ndáda ii Ndios.
Pablo xika tsa xi Ndios sa saꞌa Onesimo
8 Kuani guaꞌa ni taꞌvichiion da jni kuan Jesucristu tastuni ñaꞌan d̶a sa taꞌvichiion da sa na kada ni sa nandeꞌe sa kada ni, 9 doko guaꞌa ka sakundaꞌvi da jni sa saꞌa sa xinimani ni, kuan dan Pablo sa kuu savaꞌa da san vita yeꞌe da vekaa kuan xinokuachi da xi Jesucristu, 10 Sakundaꞌvi da jnu ni sa na kinimani ni Onesimo, nu kuu na d̶aꞌa da, kuan kuenta yeꞌe da vekaa xíninchisa nu Jesucristu.
11 Nu ti káchi chintsee ñaꞌan jni en tiempu, doko vita nandeꞌe nu ku ndo nduu ndo. 12 Tsándaꞌa nituku da nu sa io ni, san kada ni kuenta sa mee da sáa sa io ni xan. 13 Nchoj ni da sa nakoo nu jnu da, ndasa na chintsee ñaꞌan nu d̶a x-kuenta ni, neni yeꞌe da vekaa sa saꞌa toꞌon guaꞌa ya; 14 doko ti nchú kada da nisa dana ntsa na kueen on ni, ndasa mee ni na kana xanaa xi san ma ku kuu en sa taꞌvichiion mee da. 15 Kuan gua sa saꞌa xi juan diku dandoo ñaꞌan nu jni en tiempu, ndasa na na kinimani ñaꞌan ni jnu ndikii; 16 adi ka kuenta en esclavu, maska sa guaꞌa ka sa kuxi en esclavu: Na en ku kiani ndo tsa xinimani ntseꞌe da, doko nandeꞌe sa kini manii ntseꞌe ka ni tsa kuan kuu tsa tsa xinokuachi jni, san kuu tsa xani ni sa saꞌa Jesucristu.
17 San tu sani-ini ni sa mani ndo kada ni s-tsa kuenta kachi da, kinimani ni tsa kuenta xinimani ñaꞌan ni xi mee da. 18 San tu nasa kida nu adi nasa neyeka nu dan chaꞌvi jni. 19 Dan Pablo chidotuni da toꞌon yaꞌa xiꞌin ndaꞌa da: Sa neyeka Onesimo dan chaꞌvi jni; (doko dini xini ni sa sa saꞌa dan juandiku io ñuyii ma ndeꞌe jni) ndasa ma kachi ndo sa neyeka ni xuyii ni d̶a. 20 Duꞌua kuu vi xanii, kada ni sa guaꞌa yaꞌa d̶a san duꞌua na kukaꞌnu xanaa da.
21 Tsaa da jni kuan ñoꞌon xanaa da sa kininchisa ñaꞌan ni, kuan xini da sa guaꞌa ka kada ni sa kuxi sa xika da jni. 22 Danuu ni en veꞌe kendoo da; kuan ñoꞌon xanaa da sa sa saꞌa sa xikataꞌvi ni ndidaa ni xi Ndios kee da vekaa san kiꞌin da ku koto ñaꞌan da jni ndidaa ni.
Kada ntse-ini ni ndidaa ni
23 Epafras tsa yeꞌe vekaa xiꞌin da, sa saꞌa sa kaꞌan da s-toꞌon Jesucristu, kachi tsa sa na kada ntse-ini jni ndidaa ni, 24 Marcos, Aristarco, Demas xiꞌin Lucas, ndidaa tsa chintsee ñaꞌan d̶a xiꞌin chiion yaꞌa kachi tsa sa na kadantse-ini jni.
25 J-gracia ia kuu ku Toꞌo ndo Jesucristu na koo xiꞌin x-espíritu ni. Duꞌua na kuu.