Nasa kuu sa xininchisa
11
Sa xininchisa kuu sa ñoꞌon xanaa ñayii sa niꞌi nchisa sa ntsatu ñayii. San kuani ti xini ñayii juan xiꞌin jnuu ñayii doko io seguru ñayii sa io. 2 Kuan sa saꞌa xi sa xininchisa juandiku káꞌan guaꞌa xi ñayii io diꞌna.3 San ntsoo xininchisa ndo sa Ndios kídaguaꞌa ia ndidaa sa io xiꞌin s-toꞌon ni ia,a san ndidaa sa xini ndo kuguaꞌa xiꞌin sa ti en xini.
4 Abel xíninchisa tsa Ndios, juandiku guaꞌa ka sa dóko tsa xi Ndios sa kuxi sa dóko Cain. Juandiku Ndios kachi ia sa Abel kuu ñayii ndaa, san taꞌan-ini ia sa dóko Abel. San kuani xiꞌi Abel kuaan, doko da daa ni kaꞌan tsa sa saꞌa sa xíninchisa tsa.b
5 Enoc xíninchisa tsa Ndios, juandiku Ndios nakuaka ñaꞌan ia sta, san nisa en ka ñayii ti xíni ñaꞌa sta ñuyii yaꞌa, kuan Ndios nakuaka ñaꞌa ia sta. Doko antika sa nakuaka ñaꞌan Ndios xi Enoc, tsa yaꞌa kaꞌan guaꞌa s-tsa kuan kída tsa sa nataꞌan xanaa Ndios.c 6 Kuan tu ti xininchisa ñayii, san ma kada sa taꞌan-ini ñaꞌan Ndios xi ñayii, kuan nandeꞌe sa ndidaa ñayii nchu kuyachi sa io Ndios, nchoxi sa kininchisa sa io ia xiꞌin sa sañaꞌan ia sa guaꞌa xi ñayii nchu kini ñaꞌan xi ia.
7 Noe xíninchisa tsa Ndios, juandiku kuenta sadaa ndaa Ndios sa vaxi sa taꞌan, sa vita en ka kini. Yuꞌu tsa san kídaguaꞌa tsa en barku sa nayii guaꞌa tsa nee veꞌe tsa. San sa saꞌa sa xíninchisa tsa Ndios;d juandiku kída tsa sa ndidaa ñayii ñuyii yaꞌa na kuidokuachi, san sa saꞌa ndidaa jaꞌa juandiku niꞌi tsa sa na ku kuu tsa en ñayii ndaa sa saꞌa sa xíninchisa tsa.
8 Abraham xíninchisa tsa Ndios, juandiku kída tsa sa táꞌvichiion Ndios, sa na kee tsa xuun tsa san nakiꞌin tsa ñuꞌu sañaꞌan Ndios sa na kiꞌin tsa, san kée tsa kuaꞌan tsa, kuani ti xini tsa ami kuu sa kiꞌin tsa.e 9 Xíninchisa tsa Ndios, san ío tsa na en ñayii juera ñuꞌu sadaa Ndios sa kuañaꞌan ia. San nani nani ni xu kani tsa veꞌe títsaa lin xu koo tsa, duꞌua ni ío d̶aꞌa tsa Isaac xiꞌin d̶aꞌa ñani tsa Jacob, san nduu tsa yaꞌa sadaa Ndios sa niꞌi tsa ñuꞌu yukua tuku;f 10 duꞌua kída Abraham kuan ntsatu tsa sa kiꞌin tsa ñuu in kutu, sa sáni-ini xiꞌin kídaguaꞌa Ndios.
11 San duꞌua ni, Sara d̶eꞌe Abraham ti kachi koo d̶aꞌa ña, doko Ndios kida ia sa na kuu koo en d̶aꞌa ña, san kaku ña en daꞌa kuani daa yee ña, kuan xíninchisa ña sa Ndios kada ia sa na kuu koo en daꞌa ña, kuan duꞌua sadaa ia. 12 Juandiku Abraham en tsa sa io sa kuu, io ntseꞌe d̶aꞌa tsa kuenta nika kuaꞌa chodini io andivig xiꞌin ñuꞌu kuchi io mar, san ti en ka kachi kaꞌvi ñaꞌan xi.h
13 Xíninchisa tsa ndidaa tsa Ndios, doko xíꞌi tsa san ti níꞌi tsa ndidaa tsa sa sadaa sa niꞌi tsa, maska sa xika xíni tsa ndidaa tsa, san xíninchisa tsa san xika káꞌan tsa xi, san xu káꞌan tsa ndidaa tsa sa kuu tsa ñayii juera xiꞌin ñayii yaꞌia duꞌua ni ñuyii yaꞌa.i 14 Kuan ndidaa ñayii duꞌua kaꞌan, danaꞌa ndaa sa nduku enka ñuu sa koo; 15 san ti ñóꞌo xanaa tsa ndidaa tsa ñuu kée tsa, sa naxikokagua nituku tsa, kuan tu duꞌua sani-ini tsa san guaꞌa ni naxikokagua nituku tsa ndidaa tsa. 16 Doko ndidaa tsa yaꞌa nchoj tsa enka ñuu guaꞌa ka, sa ku ñuu in kutu io andivi. Juandiku Ndios ti kukaꞌan jnu ia sa kunani ia Ndios ndidaa tsa yaꞌa, kuan kídaguaꞌa ia en ñuu sa koo tsa ndidaa tsa.
17 San Ndios xítotuni ia Abraham san sadaa ia sa na doko tsa d̶aꞌa tsa Isaac, kuani Ndios sadaa ia s-sta sa koo kuaꞌa ntseꞌe d̶aꞌa tsa, san kuani duꞌua doko dóko tsa uniko d̶aꞌa tsa, kuan xíninchisa tsa Ndios, 18 san kuani duꞌua sadaa s-tsa: Sa saꞌa Isacc koo d̶aꞌa yo;j 19 doko xu kini tsa sa Ndios tastuni ia sa ndaneꞌe ia ndii, tu na kuu Isaac san kada ndo kuenta sa duꞌua kida nchisa, kuan naniꞌi nituku tsa Isaac.
20 Isaac xíninchisa tsa Ndios, juandiku sadaa tsa xi d̶aꞌa tsa Jacob xiꞌin Esaú ndidaa sa taꞌan danduu.k 21 Jacob xíninchisa tsa Ndios, juandiku kuenta sa io sa kuu tsa xíka tsa sa guaꞌa jnu Ndios sa kuxi ndiden en d̶aꞌa José, san yetuu tsa en yutu chiñuꞌu tsa Ndios.l 22 José xíninchisa tsa Ndios, juandiku kuenta sa io sa kuu tsa kachi tsa sa ndidaa ñayii ñuu Israel kee ñuu Egipto, san sadaa tsa nasa nchoj s-tsa sa kada ndidaa tsa yaꞌa xiꞌin xiki tsa.m
23 S-tadeꞌe Moisés xíninchisa tsa Ndios, juandiku kuenta káku Moisés, chídaꞌvi ñaꞌan tsa uni yoo,n doko s-tadeꞌe Moisés ya xíni tsa sa kuu nu en daꞌyiki vili ntseꞌe kaa, juandiku ti yúꞌu tsa sa nakaꞌnu tsa sa táꞌvichiion rey.o 24 Moisés xíninchisa tsa Ndios, juandiku kuenta sáꞌnu tsa, ti nchoj tsa sa kaꞌan ñayii sa kuu tsa d̶aꞌa d̶aꞌa deꞌe Faraón,p 25 taꞌan ka xanaa tsa sa taꞌan ntseꞌe tsa xiꞌin xuun Ndios, sa kuxi sa kada tsa kuachi xiꞌin sa koo kada tsa ndidaa jaꞌa sa kuu en sa yaꞌia duꞌua ni. 26 Sáni-ini tsa sa xaꞌvi ka xi sa kaꞌan kuiꞌia s-tsa sa saꞌa Cristu, sa kuxi ndidaa sa xaꞌvi xi io Egipto; kuan ñoꞌon xanaa tsa sa guaꞌa niꞌi tsa. 27 Moisés xíninchisa tsa Ndios, juandiku ti yúꞌu tsa sa diko xi Faraon. San kée tsa Egiptoq san kuyakui tsa, kuenta en tsa ntsaꞌa kanda ia ti en xini.
28 Moisés xíninchisa tsa Ndios, juandiku kída tsa Pascua. San táꞌvichiion tsa sa na dakitintsaa ñayii niñi. Ndasa ángel vaxi sa kaꞌni ñaꞌan, ma kaꞌni ndidaa tsie káku díꞌna.r
29 Ndidaa tsa kuu ñuu Israel xíninchisa tsa Ndios, juandiku taꞌantsa tsa kuenta ñayii xika ñuꞌu yichi xiti Mar Rojo. San duꞌua ni nchú yaꞌia ndidaa egipciu doko dakaꞌa tsa.s
30 Ndidaa ñayii ñuu Israel xíninchisa tsa Ndios, juandiku kuenta xíko nduu tsa ndidaa tsa ñuu Jericó usa kii, san ndugua ndidaa sa yekorra ñuu Jericó.t 31 Rahab ña xu diko mee xíninchisa ña Ndios, juandiku kadi ni xínimani ñaꞌan ña xi tsa saꞌan sa koto-ini ñuu yaꞌa.u San ti xíꞌi ña xiꞌin ndidaa ka ñayii ti xíninchisa ñaꞌan xi Ndios io ñuu Jericó.v
32 Kuaꞌa ntseꞌe ka io sa kaꞌan da, doko ti io ka tiempu sa kaꞌan da sa kúu Gedeón,w Barac,x Sanson,y Jefté,z David,a Samuel xiꞌin ndidaa x-profeta Ndios. 33 Ndidaa tsa yaꞌa xíninchisa tsa Ndios, juandiku kídanar tsa kuaꞌa ñuu. San kída tsa sa ndaa, juandiku níꞌi tsa ndidaa tsa sa sadaa Ndios sa niꞌi tsa. Sádi tsa xuꞌu ndikaꞌa,b 34 dándaꞌua tsa ñuꞌu kanandaꞌa ntseꞌe,c ti kída sa kaꞌni ñaꞌan xiꞌin espada s-tsa, san ndidaa tsa diꞌntsa nduntsee tsa, san kídanar tsa ndidaa tsa náa xiꞌin tsa, san xíko tsa ejercito juera. 35 Ndidaa ñadeꞌe naniꞌi ña xayii ña xíꞌi, doko nandoto tsa kída Ndios.d
Doko dagua tsa táꞌan ntseꞌe tsa kuan ti semani tsa sa Ndios na dita ia sa taꞌan tsa, kuan nchój s-tsa sa nandoto tsa en modo guaꞌa ka. 36 Dagua tsa sákuntsaa ñaꞌan s-tsa xiꞌin kániaꞌa s-tsa, san tén ñaꞌa s-tsa san yéꞌe tsa vekaa.e 37 San dagua tsa sáꞌni ñaꞌan s-tsa xiꞌin yuu,f díti dagua ñaꞌan s-tsa xiꞌin sáꞌni ñaꞌan s-tsa xiꞌin espada. Ndínoo tsa ichaꞌa ichukua san níꞌno tsa xeen ndikachi xiꞌin xeen ndidiꞌyu; kúu tsa ñayii ndaꞌvi, ndaꞌvi ío xanaa tsa sa saꞌa sa xu kada ñayii s-tsa, kuan xu kada ñaꞌan ntseꞌe ñayii s-tsa. 38 Ñuyii yaꞌa nisa ti nitaꞌvi sa koo ñayii duꞌua xu taꞌan ya, ndínoo tsa ndidaa desiertu xiꞌin ndidaa yuku, xu koo tsa xiti yavi xiꞌin xiti kagua.