Sa xiꞌi Jesucristu kuu sa xaꞌvi xi oni oni
10
Kuan ley kuu x-kondati xi ndidaa sa guaꞌa kixi, doko adi sa guaꞌa sani-ini Ndios sa ku kuu kuu, kuan ti kida sa nduu ñayii modo sani-ini Ndios ntsa diꞌna, ndidaa ñayii kuyachi sa doko ndiden kuia. 2 Kuan tu guaꞌa ni na ndadandoo oni oni endini guelta kuachi, ndidaa ñayii chiñuꞌu ma kuaꞌa kuenta sa io x-kuachi xi san duꞌua ma kaꞌni ka kititata sa doko xi Ndios. 3 Doko sa saꞌni kititata xiꞌin doko ñayii ndiden kuiꞌia, jaꞌa nchu kachi sa nakaꞌan ni on ñayii ndiden kuia, sa io x-kuachi ñayii, 4 Kuan j-niñi toro xiꞌin j-niñi ndidiꞌyu ti kida sa ndoo ndidaa kuachi.5 Juandiku Cristu kuenta vaxi ia ñuyii yaꞌa san sadaa ia xi Ndios:
Ti nchox ka ni sa kaꞌni ñayii kititata sa kuj ni xiꞌin sa doko ñayii,
juandiku táj ni en yikikoño da.
6 Ti nchox ka ni, sa kaꞌni ñayii kititata sa dakayu ñayii te jni,
san nisa sa doko ñayii sa saꞌa kuachi.
7 Juandiku kachi da: “Ntsaꞌa ni ka Ndios, adi da yaꞌa,
sa kada da sa nchoj ni,a
kuenta yodotuni sa taꞌan da s-tutu ni.”
8 Diꞌnanuu kachi ia: Ti táꞌan-ini ni ndidaa sa saꞌni ñayii kititata xiꞌin sa doko ñayii xiꞌin dakayu ñayii jni adi dakaa ka sa doko ñayii ndasa na keyaꞌvi kuachi (kuani duꞌua taꞌvichiion ley) 9 Danduu kachi ia: Ntsaꞌa ni ka adi da yaꞌa sa kada da sa nchoj ni. San duꞌua dita Cristu sa diꞌna nu, san kesaꞌa sa ku uu. 10 Kuan sa saꞌa sa xiꞌi yikikoño Jesucristu endii ni guelta oni oni, kida sa nduu ndo xaꞌan ni mee ia, kuan duꞌua nchoxi Ndios.
11 Sa ndaa nchisa kuu sa ndidaa dutu nduu ni nduu ni in tsa xinokuachi tsa xiꞌin doko tsa dini dini sa saꞌni tsa kititata, sa ti kachi kada sa ndoo kuachi.b 12 Doko Cristu dóko ia mee ia endini guelta oni oni, sa saꞌa ku kuachi ndo. Danduu sakuntsaku ia ladu kuaꞌa intsaku Ndios, 13 juan ntsatu Cristu ntsa na nachiꞌi Ndios ndidaa tsa xini-uꞌu ñaꞌan xi ia ndaꞌa ia.c 14 Kuan endini guelta dóko ia mee ia, san kída ia sa na nduu ndidaa ñayii ndekaxi ia oni oni modo sani-ini ia, ndidaa ñayii kuu xuun ia. 15 San duꞌua káꞌan Espíritu Santu kuaan tuku:
16 Jaꞌa ku tratu kada ntsu xiꞌin nu ndidaa nu
na xinotaꞌan ndidaa kii yukua. Duꞌua kachi ia kuu ku Toꞌo ndo:
choꞌon ntsu ku ley ntsu xanaa nu xiꞌin d̶iki nu ndidaa nu,d
17 San kachi ia tuku:
ma nakaꞌan ka ntsu x-kuachi nu xiꞌin ndidaa sa kuiꞌia kída nu.e
18 Sa duꞌua tu io sakaꞌnu-ini sa saꞌa ndidaa sa kuiꞌia yaꞌa, ti nandeꞌe ka sa doko sa saꞌa xi.
Ndidaa Ñayii sakuindaa xiꞌin sa xininchisa
19 San duꞌua vi xanii, xiꞌin nee ku nuu ndo na yii ndo lugar ii ntseꞌe, taxaꞌvi ñaꞌan xi j-niñi Jesús, 20 kaan ia en ichi saa nchito ichi io titsaa san titsaa yaꞌa kuu xikikoño ia. 21 Kuan Cristu kuu dutu kunaꞌnu tastuni s-tabernaculo Ndios, 22 juandiku nandeꞌe sa natuꞌua ndo Ndios xiꞌin nee ku kuanaa ndo, na kininchisa ñaꞌan ntseꞌe ndo, kuan sa ndundoo ndo xi ndidaa sa kuiꞌia sani-ini ndo sa saꞌa j-niñi ia, xiꞌin sa ndoo ku kikikoño ndo xiꞌin ndutsa kuii.f 23 Na kuin ndaa ndo xiꞌin sa kachi ndo sa xininchisa ndo san ma ichaꞌa ichukua da kani ñaꞌan ku ndo, kuan Ndios kuu ia duꞌua kachi san ti nayuꞌu ia. 24 Na kani-ini ndo na modo na kada ndo sa na nduku ntsee ndo ndidaa ndo xiꞌin sa kinimani taꞌan ndo xiꞌin na kada ndo sa guaꞌa. 25 Dagua ñayii ti nataka kuan duꞌua senchiion tsa ndidaa tsa; guaꞌa ka na nataka ndo san na nduku ntsee ndo ndidaa ndo, vika tu xini ndo sa sa io sa saa kii ndixi ia.
26 Kuan tu sa xíni ndo sa ndaa san ndichiion kida ndo kuachi, ti io enka sa doko sa saꞌa kuachi, 27 maska sa sa ntsatu kuu sa ndaka Ndios kuachi sa kuu en sa kuiꞌia ntseꞌe xiꞌin en ñuꞌú kaꞌnu ntseꞌe sa kaxaꞌan xi ndidaa ñayii xini-uꞌu ñaꞌan xi Ndios.g 28 Ñayii ti xu kininchisa ley chidotuni Moisés, xu kaꞌni ñaꞌan xi, san ti en xu kunda-ini ñaꞌan xi, tu ubi adi uni ñayii xu dakuidokuachi ñaꞌan.h 29 Sa vika tuku ma kuiꞌia ntseꞌe ka taꞌan ndidaa ñayii xika ndodo ñaꞌan xi D̶aꞌa Ndios xiꞌin ndidaa ñayii sani-ini sa ti xaꞌvi xi j-niñi ia, sa kuu tratu saai sa kida sa nduu tsa xaꞌan Ndios xiꞌin ndidaa ñayii kaꞌan kuiꞌia xi Espíritu sa sañaꞌan gracia. 30 Kuan xini ndo ia kachi, ntsuꞌu kuu sa kada ndaa; san ntsuꞌu kuañaꞌan xaꞌvi xi.j San kachi ia tuku: Ndios ndaka ia kuachi xi xuun ia.k 31 ¡Naku ntseꞌe da kuiꞌia kuu sa kikagua ñayii ndaꞌa Ndios nchito!
32 Doko nakaꞌan ni ndidaa ni kii niꞌi ni sa dayeꞌe ichi xika ni, xiꞌin na modo kuyakui ni ndidaa sa xu taꞌan ntseꞌe ni. 33 Dagua ni káꞌan kuiꞌia jni jnu kuaꞌa ntseꞌe ñayii xiꞌin táꞌan ntseꞌe ni xiꞌin sákuntsaa ñaꞌa jni, san dagua ni nakuaka taꞌan ni xiꞌin ñayii duꞌua táꞌan. 34 Dini kunda-ini ni ñayii yeꞌe vekaa, kuyakui ni san ku iꞌni ni sa dita ñayii ndidaa sa io jni, kuan xini ni sa guaꞌa ka xiꞌin ma ndeꞌe sa niꞌi ni io andivi. 35 San vita ma yuꞌu ni kuan kaꞌnu ntseꞌe en sa niꞌi ni. 36 Nandeꞌe sa nduku ntsee ni, ndasa kadivini na kuyakui ni ndidaa sa taꞌan ni, san kada ni sa nchoxi Ndios san duꞌua niꞌi ni sa kachi ia sa taxi ia. 37 Kuan duꞌua yodotuni s-tutu Ndios:
Sa kuyachi sa ndixi ial ndixi
san ma ku kuee ia sa ndixi ia.
38 Andu io ndaa, koo sa saꞌa sa xininchisa,
doko andu naxikokagua ma taꞌan-ini ntsu.m
39 Doko ntso ti kuu ndo ñayii naxikokagua sa kuita, maska sa kuu ndo ñayii xininchisa sa kiꞌin ñuyii ma ndeꞌe.