Kuenchiion ni ndidaa don taxi Ndios ni
4
Juandiku duꞌua kuenta Jesús taꞌan ia sa saꞌa ndo xiꞌin xikikoño ia, duꞌua ni dini ndidaa ni tuku nandeꞌe sa keꞌe d̶iki ni sa taꞌan ni. Kuan ñayii taꞌan xikikoño xi ti nchu kada ka kuachi, 2 ndasa ma koo ka ni ndidaa ni modo nchoxi xikikoño ni neni io ni ñuyii yaꞌa, maska sa nakoo ni modo nchoxi Ndios. 3 Sa tuꞌu vita, sa xu kada ndo ndidaa ndo diꞌna sa taꞌan xanaa ñayii ti xininchisa ñaꞌan xi Ndios, kuan sa xu kada ndo kuu sa kaj ndo xiꞌin naxini ndo, sa kada ndo sakanuu xiꞌin ku kikikoño ndo, sa nataka sa katuu xiꞌin ñayii yaꞌa ñayii yukua, sa kada sa nchoj mee xiꞌin idolatria sa kuu en sa kuiꞌia ntseꞌe. 4 San ndidaa ñayii ti xininchisa ñaꞌan xi Ndios sani ini naku ti kida ka ni ndidaa sa kuiꞌia xu kada ni kuenta ndidaa tsa yaꞌa, juandiku kaꞌan kuiꞌia tsa ni ndidaa ni. 5 Doko ndidaa tsa yaꞌa na kuañaꞌan tsa kuenta xi Ndios ia sa io sa ndakakuachi xi ñayii nchito xiꞌin ñayii xiꞌi. 6 Kuan juandiku káꞌan toꞌon guaꞌa ya xi ndidaa ndii, kuan ndasa na ndakakuachi kuenta ndakakuachi xi ndidaa ka ñayii, doko na kunchito x-espíritu tsa sa saꞌa Ndios.7 Doko sa kuu yachi sa ndeꞌe ndidaa sa io ya. Juandiku kani-ini ni ndaa ni san ndikii kakataꞌvi ni. 8 San tu xinimani taꞌan ni ndidaa mee ni guaꞌani koo ni sakaꞌnu-ini sa saꞌa sa kuiꞌia na kada xani ni jni. 9 Kuañaꞌan noo ni xeꞌe ni sa na kendoo ñayii xininchisa toꞌon guaꞌa ya san ma kodondaꞌa ñaꞌan ni. 10 Ñayii io sa io ni ndidaa ni xan niꞌi ndiden ndiden sa guaꞌa sañaꞌan Ndios, na kuenchiion sa na kuinokuachi tsa xi ndidaa ka ñayii io sa io ni xan, kuenta ñayii senchiion ndaa ndidaa sa sañaꞌan Ndios xi. 11 Tu andu kaꞌan s-toꞌon Ndios, san na kaꞌan kuenta guaꞌa sañaꞌan Ndios toꞌon na kaꞌan; san tu andu xinokuachi, na kuinokuachi xiꞌin guerza sañaꞌan Ndios sa na kada, kuan ndasa ndidaa sa kida na kada sa na kadakaꞌnu ñaꞌan xi Ndios sa saꞌa Jesucristu, ia kuu xaꞌan xi ndidaa sa naꞌnu xiꞌin sa tastuni ndidaa tiempu. Duꞌua nakuu.
Taꞌan ntseꞌe ni kuenta ñayii xininchisa ñaꞌan xi Jesús
12 Xani ndidaa sa taꞌan ni xiꞌin xitotuni ñaꞌan ni kuaan kuu na ñuꞌu doko ma dayuꞌu ñaꞌan ni, kuenta en ñayii ti xini nasa kuu. 13 Guaꞌa ka ku-iꞌni ni kuan kuu ni ñayii taꞌan kuenta táꞌan Jesucristu, kuan ndasa na ku-iꞌni ntseꞌe ni tuku ora na nanuu sa tastuni ia, san ku iꞌni ntseꞌe ni. 14 Ku-iꞌni ni ndidaa ni tu kaꞌan kuiꞌia ñayii jni sa saꞌa Jesucristu, guaꞌadiko ni ndidaa ni kuan io Espíritu kaꞌnu Ndios jni ndidaa ni. Sa ndaa sa ndidaa ñayii kaꞌan kuiꞌia xi ia, doko sa saꞌa dini ndidaa ni kidakaꞌnu ñaꞌan xi ia. 15 San ma en ni taꞌan kuenta en ñayii saꞌni ndii adi kuenta ñaduꞌu, adi ñayii kuiꞌia, adi ñayii chitaꞌan ami ti kana ñaꞌan xi; 16 doko tu dakaa ni taꞌan sa saꞌa Jesucristu, ma kukaꞌan jnu ni; guaꞌa ka kadakaꞌnu ni Ndios sa saꞌa sa taꞌan ni.
17 Kuan sa saa kii sa kesaꞌa ndakakuachi ichi xeꞌe Ndios ya diꞌna ka; san tu diꞌna ka kesaꞌa xiꞌin ndidaa ntsoo ñayii xininchisa ñaꞌan xi Ndios, Na modo taꞌan ndidaa tsa ti xininchisa s-toꞌon guaꞌa Ndios ya tuda? 18 San tu ñayii kida sa ndaa, uꞌu ntseꞌe nitaꞌvi tsa, Nasa taꞌan tsa kuiꞌia xiꞌin tsa kida kuachi kuaan? 19 Juandiku, ndidaa tsa taꞌan ndaa nchoxi Ndios, na na choꞌon tsa x-alma tsa ndaꞌa Ndios ia ti dandaa ñaꞌan xiꞌin ia kidaguaꞌa ndidaa sa io, san kada ni sa guaꞌa.