Namodo nandeꞌe sa koo ndidaa ñayii io d̶eꞌe xi adi xee xi
3
Duꞌua ni dini ñadeꞌe io xee xi, kininchisa ñaꞌan ni xi xee ni, kuan ndasa duꞌua tsa ti xininchisa ñaꞌan xi toꞌon guaꞌa ya na kininchisa tsa sa saꞌa modo ku d̶eꞌe tsa, 2 kuan kini tsa sa kadi ni io ña xiꞌi yeñuꞌu ku ña. 3 Ma kada sa danaꞌa vili ni ichi juera nduku ni, adi sa ndada visa ntseꞌe ni diki ni, adi oro ña doꞌno xaꞌvi ntseꞌe xi ndukutu ni, 4 guaꞌa ka kada kutu ni xanaa ni xiꞌin sa ti ndeꞌe sa kuu espíritu sa guaꞌa sa ti nadiko xi, kuan juan kuu sa nataꞌan ntseꞌe xanaa Ndios. 5 Kuan duꞌua xu ndukutu ndidaa ña deꞌe xu kada sa nchoxi Ndios ña ío díꞌna, san xu koꞌon xanaa ña Ndios, san xu kininchisa ña xee ña. 6 Duꞌua kuenta Sara xu kininchisa ña Abraham san xu kadaa ña toꞌo s-tsa. San dini ndidaa ni ku ni d̶aꞌa ña, san tu kida ni sa guaꞌa, san ma yuꞌu ni sa kachi ñayii sa kada ñayii ni.7 San duꞌua ni dini ndidaa ni tsa io d̶eꞌe xi, kini ni na modo koo ni xiꞌin d̶eꞌe ni, kada-ini ñaꞌan ni xan kuan kuu ña na en vasu vidriu ii ntseꞌe, kuan ndidaa ña yaꞌa niꞌi ña ñuyii ma ndeꞌe tuku sa saꞌa gracia. Duꞌua kada ni ndasa na kunini ñaꞌan Ndios ni ora xikataꞌvi ni xi ia.
Ndidaa ñayii taꞌan kuan kida sa guaꞌa
8 San duꞌua, dini ndidaa ni eni tuj ni, kunda-ini taꞌan ni ndidaa ni, kini mani taꞌan ni ndidaa ni kuan ndidaa ñani mee ni, kada-ini taꞌan ni ndidaa ni, ku mani ni ndidaa ni; 9 Ma naxikoneꞌe ni sa kuiꞌia xiꞌin sa kuiꞌia nisa ma naxikoneꞌe ni sa kuiꞌia ora kaꞌan kuiꞌia jni. Guaꞌa ka kaꞌan guaꞌa ni, kuan Ndios kana ñaꞌan ia sa na niꞌi ni sa guaꞌa taxi ia. 10 Kuan:
ñayii nchu kinimani xuyii xi xiꞌin nchukini kii guaꞌa
ma kaꞌan toꞌon kuiꞌia,
san ma kaꞌan ñayii yaꞌa toꞌon naꞌntsa.
11 Xikokuin ni sa io sa kuiꞌia san kada ni sa guaꞌa,
kadi ni koo ni san duꞌua ni koo ni.
12 Kuan ntsaꞌa ñaꞌan ia kuu ku Toꞌo ndo xi ñayii kida sa guaꞌa,
san d̶oꞌo ia ntsatu sa xikataꞌvi tsa yaꞌa.
Doko ia kuu ku Toꞌo ndo ti xinimani ñaꞌan ia xi ñayii kida sa kuiꞌia.
13 Andu kuu kada sa kuiꞌia ni, tu dini ndidaa ni kida ni sa guaꞌa? 14 Doko tu taꞌan ni sa saꞌa xi sa guaꞌa, ku iꞌni ni. San ma yuꞌu ni sa yuꞌu ndidaa tsa yaꞌa xiꞌin ma dayuꞌu ñaꞌan ni. 15 Kada kaꞌnu ni Cristu ia kuu ku Toꞌo ndo xanaa ni, san ndi kii koo listo ni sa kaꞌan ni vii vii xiꞌin ma nadiko ni xiꞌin ñayii na ndukutoꞌon nasa ñoꞌon xanaa ni sa ntsatu ni ndidaa ni; 16 kadi ni koo xanaa ni ndidaa ni kuan duꞌua na kukaꞌan jnu ñayii kida naꞌntsa sa kaꞌan sa kuu, ora na kini ñayii sa io ndaa ni xiꞌin Jesucristu. 17 Kuan guaꞌa ka tu nataꞌan ni sa kida ni sa guaꞌa, tu juan ku sa nchoxi Ndios, san adi sa kida ni sa kuiꞌia.
18 Kuan taꞌan ntseꞌe Jesucristu endini guelta sa kuxi ndidaa kuachi tuku, ia kuu ia guaꞌa, xiꞌi ia sa saꞌa ñayii kuiꞌia, san mee ia kuntsaka ñaꞌan ku ndo kiꞌin jnu Ndios, kuan xiꞌi xikikoño ia, doko x-espíritu ia niꞌi ñuyii. 19 San x-espíritu ia sa kaꞌan xi ndidaa espíritu yentsadi, 20 ndidaa ñayii diꞌna ti xininchisa ñaꞌan, kuenta kuyakui Ndios ndidaa kii io Noe, neni kuguaꞌa barku, san una ni ñayii sa nayii san ti xiꞌi kida ndutsa. 21 San jaꞌa ndee sa sendutsa ndo vita, sa kida sa nanitaꞌvi ndo (doko adi juan kida sa ndundoo ku kikikoño ndo xi ndidaa sa kuiꞌia, sa kida kuu sa na koo ndoo ndo jnu Ndios) sa saꞌa sa nandoto Jesús ia kuu Cristu. 22 Kuan kundaa ia andivi san intsaku ia ichi ndaꞌa kuaꞌa Ndios; san ndaꞌa ia yeꞌe ndidaa ángel, ndidaa tsa tastuni xiꞌi ndidaa sa tastuni ti xini ndo.