2
Juandiku dandoo ni ndidaa sa kuiꞌia, ma ku kuu ni ñayii naꞌntsa, ñayii uu jnu xi, ñayii kuadu xiꞌin ñayii kaꞌan kuiꞌia xi enka ñayii, 2 ku kuu ni kuenta en daꞌyiki dika kaku nchu kadi nu dikui duꞌua nchoj ni s-toꞌon Ndios sa kuu menina ni dikui espiritual, ndasa na kuaꞌnu ni sa na nanitaꞌvi ni; 3 Tu xíni ni sa guaꞌa kuu ia kuu ku Toꞌo ndo.Jesucristu kuu yuu nchito
4 Tuꞌua ni sa io ku Toꞌo ndo, ia ku yuu nchito, sa ti táꞌan-ini ñayii, doko en yuu ndekaxi Ndios xiꞌin en yuu xaꞌvi ntseꞌe xi. 5 San dini ndidaa ni kuenta en yuu nchito tuku, ku kuu ni kuenta en veꞌe Espiritual xiꞌin kuenta en dutu xi Ndios, ndasa na doko ni ndidaa sacrifisiu sa nataꞌan xanaa ia sa saꞌa Jesucristu. 6 Kuan duꞌua yodotuni s-tutu ii Ndios:
Ntsuꞌu kakituu ntsu en yuu Sion, en yuu sa kuu yuu jnu xi, sa ndekaxi xiꞌin sa xaꞌvi ntseꞌe xi;
san andu na kininchisa ñaꞌan xi ia kuu yuu yaꞌa ma niꞌi sakanuu.
7 Ndidaa dini tsa xininchisa san ia yaꞌa kuu en yuu xaꞌvi ntseꞌe xi; doko ndidaa tsa ti xininchisa,
yuu ti nchoxi ndidaa tsa kidaguaꞌa veꞌe,
yuu yaꞌa kuu yuu jnu xi;
8 San duꞌua yodotuni s-toꞌon Ndios tuku:
yuu sa sakodama xiꞌin sa ndugua ñayii kuu.
Kuan sakodama tsa kida toꞌon, kuan ti xininchisa tsa; kuan duꞌua nitaꞌvi tsa sa taꞌan tsa.
9 Doko dini ndidaa ni kuu ni ñayii ndekaxi ia, en sacerdosio kuu xaꞌan Rey, en ñuu santu, en ñuu seen Ndios. San jaꞌa kuu ndasa na kaꞌan ni sa guaꞌa kida ia, sa kineꞌen ñaꞌan ia xiti sa naa ni san ntsaka ñaꞌan ia sa io sa dayeꞌe ia sa ti kachi ntsaꞌa ndo. 10 Di ni ndidaa ni en tiempu ti kuu ni ñuu, doko vita kuu ni xuun Ndios; ti niꞌi ni sa kunda-ini ñaꞌan ni, doko vita niꞌi ni sa kunda-ini ñaꞌan ni.
Koo ni ndidaa ni san kada ni sa nchoxi Ndios
11 Xani sakundaꞌvi da jni, kuenta ñayii io noo ñuyii yaꞌa, ma kuañaꞌan ni lugar xi sa nchoxi xikikoño ni sa naa xiꞌin x-alma ni. 12 San guaꞌa guaꞌa ku kuu ni jnu ndidaa ñayii ti xininchisa, kuan kaꞌan tsa sa kuu ni ñayii kuiꞌia, na kadakaꞌnu tsa Ndios ora na ndaka kuachi ia, kuan xini tsa sa kadi ni io ni.
13 Sa saꞌa ia kuu ku Toꞌo ndo, kininchisa ni ndidaa tsa tastuni io nuꞌu ya; tu kuu rey kuan tsa yaꞌa ku tsa tastuni, 14 san ndidaa gobernador tsandaꞌa tsa sa na kada ñaꞌan xi ndidaa ñayii kuiꞌia xiꞌin na kuañaꞌan tsa sa guaꞌa xi ndidaa ñayii kida sa guaꞌa. 15 Kuan jaꞌa kuu sa nchoxi Ndios: Sa na kada ni sa guaꞌa, san duꞌua na kada sa ndidaa ñayii ti xini nisadana na kadi xuꞌu xi.
16 San ku kuu ni kuenta ñayii guaꞌa ni kada ndidaa sa kada, doko adi kuenta ñayii sañuntsaa ndidaa jaꞌa sa kada sa kuiꞌia, maska sa kuenta ñayii xinokuachi xi Ndios. 17 Yeñuꞌu yeñuꞌu ku kuu ni xi ndidaa ñayii. Kini mani ni ndidaa ku kiani ndo. Yuꞌu ni Ndios. Ku kuu yeñuꞌu ni xi rey.
18 Ndidaa dini tsa kidachiion, kininchisa ñaꞌan ni xi s-toꞌo ni ñuyii yaꞌa, adi ni tsa kuu ñayii guaꞌa xiꞌin xininchisa ñaꞌan xi Jesús ia ku Cristu, duꞌua ni kininchisa ni s-toꞌo ni tsa kuu ñayii ntseꞌe tuku. 19 Kuan Ndios nataꞌan xanaa ia ora kida ni sa ndaa xini ni, san taꞌan ni doko ku yakui ni ora kida ñaꞌan ñayii ni ndidaa ni. 20 Kuan tu ndoꞌo ni sa saꞌa sa kuiꞌia kida ni, nasa guaꞌa niꞌi ni xiꞌin juan? doko tu taꞌan ni sa kida ni sa guaꞌa, san kuyakui ni, juan kuu sa guaꞌa sa nataꞌan xanaa Ndios. 21 Sa saꞌa xi jaꞌa juandiku kana ñaꞌan jni, kuan Jesucristu táꞌan ia sa saꞌa ni ndidaa ni tuku, san duꞌua kída ia ndasa duꞌua na kada ni ndidaa ni tuku. 22 Ti kida ia kuachi, san nisa toꞌon naꞌntsa ti kaꞌan ia. 23 Kuenta sastadi ñaꞌan xi ia, ti naxikoneꞌe ia. Ora taꞌan ia, ti kaꞌan kuiꞌia ia, maska sa nachoꞌon ia ndaꞌa ia ndaka ndaa kuachi. 24 San mee ia neꞌe ku kuachi ndo sata xikikoño ia jnu cruz ndasa ntsoo ndidaa ndo, ñayii xiꞌi kida kuachi, na kunchito ndo xi sa ndaa; sa saꞌa sa takueꞌe ia nduguaꞌa ni ndidaa ni. 25 Kuan kuu ni ndidaa ni kuenta ndikachi xita, doko vita naxikokagua ni sa io Pastor ia sadi x-alma ni.