Ndidaa ñayii dadana ñaꞌan sa naꞌntsa
(Jud 4-13)
2
Doko ío profeta naꞌntsa ñuu Israel tiempu yukua, kuenta vita koo Maestru naꞌntsa, san chiꞌi yuꞌu tsa toꞌon dativi ñaꞌan xi ñayii, san kachi tsa sa ti xininchisa tsa tsa Toꞌo kida sa na nanitaꞌvi tsa, san dini mee tsa kada sa taꞌan tsa sa kuita kikii ni. 2 San kuaꞌa ntseꞌe tsa kunchiko ñaꞌan s-tsa xiꞌin sa kuiꞌia kida tsa, san sa saꞌa xi jaꞌa kada san kaꞌan kuiꞌia xi toꞌon guaꞌa sa kuu sa ndaa, 3 dandaa ñaꞌan tsa ni ndasa na kuañaꞌan ni tuini s-tsa. San ndidaa tsa yaꞌa sa kunaꞌa xidokuachi tsa san sa io sa taꞌan ntseꞌe tsa, san sa kuita tsa atuu romediu io xi.4 Kuan Ndios ti io ia sakaꞌnu-ini xi ndidaa ángel kida kuachi, maska sa dakana niꞌno ñaꞌan ia xiti sa uꞌu sa ndaꞌvi, san chintsadi ñaꞌan ia xiti sa naa, ndasa na kuntsatu kii ndakakuachi; 5 San ti ío ia sakaꞌnu-ini xi ndidaa ñayii ío diꞌna, maska sa Noe ni na chiguaꞌa ia tsa kuu en ñayii ndaa, san xu dakuaꞌa ñaꞌan tsa modo nchoxi Ndios sa na koo ñayii xiꞌin usa ka ñayii, san danduu da koon ntseꞌe ia davi; 6 San da kuidokuachi ia san dandeꞌe ia ñuu Sodoma xiꞌin Gomorra, san yaa ni ka kendoo san juan nchu kachi sa duꞌua taꞌan ndidaa ñayii kuiꞌia nakoo danduu, 7 doko kineꞌen ia Lot, en tsayee ndaa tsa xu ta uꞌu ntseꞌe xanaa xi sa saꞌa sa xu kada ndidaa ñayii kuiꞌia yukua. 8 Kuan tsayee ndaa yaꞌa xukoo tsa sa io ndidaa ñayii kuiꞌia yaꞌa, san xu ta uꞌu ntseꞌe xanaa tsa sa xu kini tsa ndidaa sa kuiꞌia xu kada ndidaa tsa yaꞌa, 9 duꞌua danaꞌa sa Ndios guaꞌni kineꞌen ia ñayii guaꞌa sa taꞌan ntseꞌe xiꞌin kida ñaꞌan ia xi ñayii kuiꞌia kii ndaka ia kuachi.
10 San taꞌan ka ndidaa tsa nchiko sa nchoxi xikikoño xi, ñayii kida sa taꞌan xanaa mee xi xiꞌin sa kuiꞌia ntseꞌe, san ti xinimani tsa sa tastuni. Ndidaa tsa yaꞌa ti yuꞌu tsa san ntsee ntseꞌe diki tsa, san nisa ti yuꞌu tsa sa kaꞌan kuiꞌia tsa xi ndidaa espíritu tastuni. 11 Sa nisa ndidaa ángel, sa kunaꞌnu ka xiꞌin ntsee ka, ti ku yee sa kaꞌan kuiꞌia xi ndidaa jaꞌa jnu tsa Toꞌo.
12 Doko ndidaa tsa yaꞌa, kaꞌan kuiꞌia tsa xi sa ti xini tsa nasa kuu, san kuu tsa kuenta kiti tata ti sani-ini, kiti kaku sa kuu xiꞌin sa kaxaꞌan xi, ndidaa tsa yaꞌa kuu tsa sa saꞌa ndidaa sa kuiꞌia kída, 13 ndidaa tsa yaꞌa níꞌi tsa xaꞌvi sa saꞌa ndidaa sa kuiꞌia kída tsa, kuan sa ku ini tsa sa kida tsa meni sa kuiꞌia san oni nataꞌan xanaa tsa. San ndidaa tsa yaꞌa kuu sa kuiꞌia ntseꞌe xiꞌin sa kida kuiꞌia ñaꞌan, kuan neni saj ni xiꞌin tsa, san oni ku iꞌni tsa xiꞌin ndidaa sa kuiꞌia kida tsa.
14 Ti kachi kini tsa en ñadeꞌe kuan sani-ini tsa sa sa io tsa xiꞌin ña; san ti xavi tsa sa kida tsa kuachi. San chiꞌi tsa toꞌon d̶iki ndidaa ñayii ti in ntsee xiꞌin sa xininchisa; ku ini tsa sa nchoj ntsaa tsa, san kuu tsa ñayii taꞌnu ntsatu kida Ndios. 15 Dandoo tsa ichi ndaa, san dana tsa san nchiko tsa xichi Balaam d̶aꞌa Beor, tsa sani-ini sa niꞌi en sa niꞌi sa saꞌa sa kuiꞌia kída tsa, 16 san nduden s-tsa sa saꞌa sa kuiꞌia kída tsa; kuan en burru en kiti xido, kaꞌan te kuenta en ñayii, san ti kachi te sa kada tsa sa ndukueꞌe nchu kada tsa.
17 Ndidaa tsa naꞌntsa yaꞌa kuu tsa kuenta pozo ti kana ndutsa, xiꞌin viko saꞌan ichaꞌa ichukua kida davi tachi; san sa naa niñu ntsatu sa koo tsa ndidaa tiempu. 18 Kuan guaꞌa ntseꞌe kaꞌan tsa doko ti nandeꞌe nisa dana, san ndidaa sa kuiꞌia nchoj s-tsa chiꞌi tsa toꞌon d̶iki ñayii ndaꞌa dika dandoo ndidaa sa kuiꞌia xu kada. 19 Kuan sadaa tsa xi ndidaa ñayii sa ma keꞌe ka ndidaa tsa yaꞌa ndaꞌa kuachi, san kada mee tsa yeꞌe ndaꞌa xi. Kuan tu uu tsa naa san tsa xita kuaan nayii tsa ndaꞌa tsa kidanar. 20 Kuan tu nchisa sa kee tsa ndaꞌa ndidaa sa kuiꞌia io ñuyii yaꞌa, kuan xininchisa tsa ia kuu ku Toꞌo ndo Jesucristu ia kida sa nanitaꞌvi ndo, san danduu naxikokagua nituku tsa sa xu kada tsa, san kidanar ñaꞌan s-tsa, kuiꞌia ka nduu ñayii yukua sa kuxi diꞌna. 21 Kuan guaꞌa ka tu ti xini tsa ichi ndaa, san adi sa xini tsa, sa dandoo tsa sa guaꞌa xiꞌin sa taꞌvichiion Ndios sa kuu sa ii. 22 Doko tsa yaꞌa taꞌan tsa sa kachi: “Ina nakaj nituku te sa ndúsa te; san kuchi sa tuꞌu dakuchi ñaꞌan xi nchiniꞌno ni tuku te xiti ntsaꞌyu.”